I Ptr 5 - Testamente Ledrimpswha ni Mapsalma

A tinfanelo ta valaviseli ni tavampswha. Kutitrongahata ni kulavisela

¹ Nitratriya a vakulu-va-kereke lava vanga makari kwenu, mine swanga nkulu-wa-kereke kulobye, mfuri ninga mboni ya kuxaniseka ka Kriste, nakone ningani yavelo akuphatimeni loku kutaka pfuleteliwa, nili:

² Byisani a ntlhambi wa Xikwembu Nkulukumba, lowu wunga ku n'wine, n'wiwulavelela, kungali hi kusindrisiwa, kambe hi kutinyiketela ha vuswenu, na n'wilandra a kurandra ka Xikwembu Nkulukumba; kungali hi kulwela mabindru, kambe na n'witlhantlhekile;

³ n'wingave swanga lava vafumaka hi kubindra lava n'winyikiwiki kuvarangela, kambe swanga swikombiso ku ntlhambi,

⁴ kutani loko a mubyisi lwenkulu ku hinkwavu abuya, n'witayamukela a ngiyana ya kuphatima leyi yingabolikiki.

⁵ Hi ndlela yoleyo, na n'wine vampswha, tibekani hansi ku lavakulu; na kone hinkwenu yambalani a kutitrongohata van'we ku van'wana, hikusa Xikwembu Nkulukumba ayalela lava va kutikulisa, kambe anyika timpswalu ku lava va kutitrongohata.

⁶ Titrongohatani-ke, n'witibeka a hansi ka voko dra ntamu dra Xikwembu Nkulukumba, akuva atan'witlakuxa hi nkama lowu wufanekeliki,

⁷ na n'witxukumetela ku yene a kukarateka kwenu hinkwaku, hikusa yene aron'weka ha n'wine.

⁸ Tikhomani, n'wilavelela! A nala wenu, Diyavulosi, aratela swanga hi nghonyama leyi yidruma-drumekaka, na yidjula lweyi yingamuphatlulaka yimuda;

⁹ muyalelani, hi kutiya akupfumeleni, na n'witiva leswaku a kuxanisekeni ka kufana ni loko, kuhumelela ni le ku vamakwenu lomu misaveni.

¹⁰ Nakone, Xikwembu Nkulukumba wa timpswalu hinkwatu, lweyi an'wivitaneliki akuphatimeni kwake loku kungahelikiki, ku Kriste Yesu, ntrhaku ka kuva n'wixaniseki kutrongonyana, atan'wipfuxeta, an'witiyisa ava an'winyika ntamu.

¹¹ Ku Yene awuve a ntamu hi malembe ni malembe, Amen.

Madrungula ya kulelela

¹² Nin'witraleli a maritunyana lawa ha Silivano, ku mine anga makweru wa kudumbeka, na mine nimuvonisa xiswoswo, na nin'witratriya, nibeka ni vumboni, leswaku leti i timpswalu ta xihlayelamfuri ta Xikwembu Nkulukumba; tiya ku tone.

¹³ A kereke ledri dringa Babilona, ledri drihlawuliwiki kun'we na n'wine, dran'widrungula, na yene Marka, n'wananga.

¹⁴ Losanani hi kunyuntana ka lirandru. A kurula akuve na n'wine hinkwenu n'winga ku Kriste.