I Ptr 4 - Testamente Ledrimpswha ni Mapsalma

Valaveleli vanene va timpswalu ta Xikwembu Nkulukumba

¹ Leswi-ke Kriste axanisekiki anyameni, na n'wine hi mayanakanyela wolawo randranani, hikusa lweyi axanisekiki anyameni, atravukani ni xidoho,

² akuva n'wingahahanyeli akunaveleni ka ximhunu, kambe n'wihanyela a kurandra ka Xikwembu Nkulukumba.

³ Hikuva wadringana a nkama lowu wukhalutiki, na n'wiyentxa a kurandra ka va-Matiko, hi kufambela vuwoswanini, ni kunaveleni loku kumfani, vupopswini, ni le minkhubyini ya kuda, ni le kugandreleni ka kunyenyentsa ka swikwembu swakuka-ndlela.

⁴ Hi laha vambeni van'wihlamala leswi n'wingalongolokiki navu akuhonekeni loku kutlulaka mpimu, van'wisandra;

⁵ vone vatakatiyangulela ku lweyi atibekiseliki kuyavukanyisa lava hanyaka ni lava va kufa.

⁶ Avi hikola ka leswo a Ivangeli yidrunguleliwiki na kone ku lava va kufa, akuva, hi tlhelo drin'we, vatayavanyisiwa hi kulandra a mahanyela ya ximhunu anyameni, kambe hi tlhelo drin'wana vatahanya, amoyeni, hi kulandra kurandra ka Xikwembu Nkulukumba.

⁷ A kuhela ka mintxhumu hinkwayu ku kusuhi. Hileswo-ke tlharihani, n'witikhoma n'witakota akukhongota.

⁸ A henhla ka hinkwaswu, randrananani ngopfu van'we ku van'wana, hikusa a lirandru drifukumeta a vunyingi bya swidoho;

⁹ yamukelanani ama kaya kwenu na n'wingan'unun'uti.

¹⁰ Mun'wana-ni-mun'wana, hi lana ayamukeliki ha kone a nyiko, ayitiriseli van'wana, na n'wili vayaveli vanene va timpswalu leti tinyingi ta Xikwembu Nkulukumba.

¹¹ Loko mhunu avulavula, avulavule swanga swiyangulo swa Xikwembu Nkulukumba; loko mhunu atirela van'wana, aswiyentxe hi ntamu lowu Xikwembu Nkulukumba amunyikaka, kuva ku mintxhumu hinkwayu kutwaliseka Xikwembu Nkulukumba ha Yesu Kriste, lweyi a kutwala ni ntamu swinga swake hi malembe ni malembe, Amen.

Kuxaniseka xikan'we na Kriste

¹² Varandriwa, n'wingahlamaleni a ndrilo wupfuraka a makari kwenu akuva wun'widringa, na wuyentxa swanga i ntxhumu wa kuhlamalisa wuhumelelaka,

¹³ kambe hi leswi n'wikumaka a yavelo akuxanisekeni ka Kriste, nyoxani, akuva n'witanyoxa hi kutrhava kukulu, akupfuleteliweni ka kuphatima kwake.

¹⁴ Loko n'wirukiwa hinkonta ya vito dra Kriste, n'wikatekile, hikusa a Moya wa kuphatima, wunga wa Xikwembu Nkulukumba, wu le henhla kwenu.

¹⁵ Ke, kungavi ni mun'we ku n'wine angaxanisekaka hikuva mudlayi, kumbe muyivi, muyentxi wa leswimfani, kumbe hi kutinhingenisela ku swa van'wana;

¹⁶ kambe, loko mhunu axaniseka hi leswi anga mukriste, angavenatingana, kambe atwalise Xikwembu Nkulukumba hi vito ledro.

¹⁷ Hikusa i nkama wa kusungula a kuyavanyisa, kusungula hi yindlu ya Xikwembu Nkulukumba; ke, loko kusungula ha hine, byitava byini a vugamu bya lava va kuka-kuyingiseta a Ivangeli ya Xikwembu Nkulukumba, xana?

¹⁸ Leswi swikarataka a kuhuluxiwa ka mululami, ke lweyi anga mubihitlhelo mudohi atahumelela kwini, xana?

¹⁹ Hileswo-ke, lava vaxanisekaka hi kulandra a kurandra ka Xikwembu Nkulukumba, avanyikeli a mahika yavu hi kuyentxa leswinene, ku Mutumbuluxi lweyi adumbekaka.