I Ptr 1 - Testamente Ledrimpswha ni Mapsalma

Ku losa

¹ Mine Petrosi, mupostola wa Yesu Kriste, ku vahlawuliwa, valuveli lava vahangalakiki Ponto, ni le Galatiya, ni le Kapadokiya, ni le Aziya, ni le Bitiniya;

² vahlawuliwiki hi Xikwembu Nkulukumba Tatana, angativela vone a khale, vaxwengisiwiki hi Moya akuva vayingiseta, ni hi kuxuviwa hi ngati ya Yesu Kriste, a timpswalu ni kurula aswive hi ntalu ku n'wine.

Kutlangela ni kukombisa a kudumba

³ Akukhensiwe Xikwembu Nkulukumba, Tatana wa Hosi yeru Yesu Kriste, lweyi hikola ka lirere drakwe ledri drikulu ngopfu, ahitumbuluxiki ka vubiri, akuva hivani kulavisela loku kuhanyaka, hikola ka kupfuka ku lava vakufa ka Yesu Kriste amakari ka vafi,

⁴ leswaku n'wivani pfindla ledri dringabolikiki, drixwengiki, mfuri dringabunikiki, ledri dribekiseliwiki n'wine a Matilweni,

⁵ n'wine lava hikola ka vupfumeli n'wibekisiwaka hi ntamu wa Xikwembu Nkulukumba akuva n'wikuma a huluxu, ledri drilulameliki kutivonekisa ankameni wa vugamu.

⁶ Ku leswo, n'wini kutrhava kukulu, nambi leswi swoswi, n'wahavavisekaka kutrongo, loko swidjuleka, hinkonta ya mindringo ya tinxaka-xaka,

⁷ akuva a ntshima ya vupfumeli byenu, lebyi byitlulaka hi lisima a gole, ledri drisuvaka, kambe dridringiwaka hi ndrilo, yifanekela hi kukhensiwa, ni kuphatima, ni xihluwa, akutikombekiseni ka Yesu Kriste;

⁸ lweyi n'wimurandraka, nambi n'wingamuvonanga; n'wipfumeleka ku Yene, nambi n'wingamuvoni swoswi, kambe n'witrhavaka hi kutrhava loku kukulu ngopfu, kuphatimisiwiki,

⁹ na n'wiyamukela a nkongometo wa vupfumeli byenu, kunga kuhuluxiwa ka mahika yenu.

¹⁰ Kuvi hi kuhuluxiwa koloko vangavutisisa ni kukambisisa a vaprofeta lava vangaprofeta a timpswalu leti tikongomiki n'wine,

¹¹ na vadjulisisa kutiva leswaku atava wini kumbe wa kuyini a nkama lowu a Moya wa Kriste, lowu afaka wuli ku vone wukongometa wone, na wutiyisa hi tlhelo dra tinxanisa leti afaka tikongoma Kriste, ni kuphatima loku afaka kutalandrela, ntrhaku ka leswo.

¹² Ku vone kupfuleteliwile leswaku afa vangatitireli, kambe afa vatirela n'wine ku mintxhumu leyi swoswi mitivisiwiki ku n'wine hi lava van'wirereliki a Ivangeli hi ntamu wa Moya wa Kuxwenga, lowu wurumeliwiki hi le Tilweni, a mintxhumu leyi nambi tintrumi tidjulisisaka kun'witiva.

Mahanyela manene

¹³ Hileswo-ke, pfukani n'witiya akuyanakanyeni kwenu, hanyani hi kutikhoma, na n'wilavisela hi kuhetiseka atimpswalu leti n'wibuyiseliwiki tone akutipfuleteleni ka Yesu Kriste;

¹⁴ n'wiva swanga vana va kuyingiseta, n'wingayi hi kunavela kwenu ka khale, ankama afaka n'wingasinativa ntxhumu;

¹⁵ kambe swanga hi leswi lweyi an'wivitaniki axwengiki, na n'wine xwengani amahanyeleni yenu hinkwawu,

¹⁶ hikusa kutraliwi leswaku: Vanani lava vaxwengiki hikusa mine ni wa kuxwenga.

¹⁷ Ke loko n'wine n'wivitana swanga Tatana wenu, lweyi ayavanyisaka mun'wana-ni-mun'wana mayelano ni mintiro yake, na angayentxi xihlawu-hlawu xa vhanu, hanyani hi kutxhava, ankameni lowu wa kuhundra kwenu lomu misaveni,

¹⁸ na n'witiva leswaku angavanga hi mintxhumu leyi mibolaka swanga silivela kumbe gole n'witiruliwiki amahanyeleni yenu ya kuka-ndlela, lawa n'wisiyeliwiki hi vatatana venu,

¹⁹ kambe hi ngati ya lisima drikulu ya Xihambana lexi xingalikina vulema kumbe bati dra nandru, anga Kriste,

²⁰ lweyi hi tlhelo drin'we arangiki kutiviwa na misava mingasinavumbiwa, kambe hi tlhelo drin'wana angavonekisiwa avugan'wini bya minkama hikola kwenu,

²¹ n'wine ha Yene n'wipfumeliki ku Xikwembu Nkulukumba lweyi amupfuxiki ku lava vakufa amakari ka vafi, ava amunyika ni lidrumo, akuva a kupfumela kwenu ni kulavisela kwenu swiva ku Xikwembu Nkulukumba.

²² Leswi n'wibasisiki a mahika yenu akuyingiseteni ka xihlayelamfuri, akuva n'wivani lirandru dra xikwavu, ledri dringalikina kukanganyisa, khinyelani a kurandraneni van'we ku van'wana, hi mbilu leyi yi basiki;

²³ n'wine n'wibelekiwi dra vubiri, kungali hi mbewu leyi yibolaka, kambe leyi yingabolikiki hikola ka Ritu dra Xikwembu Nkulukumba, ledri drihanyaka mfuri dringa kone minkama hinkwayu.

²⁴ Hikusa a nyama hinkwayu yifana ni byanyi, ni kuphatima ha yone kufana ni xiluva ya byanyi; kuwomi a byanyi, a xiluva xiwile;

²⁵ kambe a Ritu dra Hosi drikone hi la kungahelikiki. A Ritu ledri anga Ivangeli leyi n'witivisiwiki yone.