I Kor 5 - Testamente Ledrimpswha ni Mapsalma

A vuwoswi

¹ Kuyingeliwa hinkwaku leswaku amakari kwenu kuni vuwoswi, vuwoswi lebyi byingagamikiki byiva kone nambi amakari ka va-Matiko, byitlhasiki ni lana kakuva kuni lweyi atekiki a nsati wa tatana wakwe

² Nambi swili tanu, n'watikukumuxa, n'wiva n'wingasoli, akuva a mhunu lweyi ayentxiki a mhaka leyo asusiwa amakari kwenu!

³ Hikuva mine, nambi ningali kone hi miri, kambe ni kone hi moya, niyavanyisi khale a muyentxi wa wumfani byolebyo swanga hiloko nivi kone;

⁴ hi vito dra Hosi yeru Yesu Kriste, na n'wine n'wihlengeletanile, kun'we ni moya wanga, hi ntamu wa Hosi yeru Yesu Kriste,

⁵ ahinyiketeni a mhunu lweyo ku Sathana, akuhohlokeni ka nyama yake, akuva a moya wakwe wuhuluka hi Siku dra Hosi.

⁶ Ahi ntxhumu wunene a kutikukumuxa kwenu. Xana an'wiswitivi leswaku a handrelo yitrongo yibilisa a mbila hinkwayu xana?

⁷ Txukumetani a handrelo ya khale, akuva n'windruluka mbila yimpswha, n'wiva lava vangalikina handrelo, hikuva na drone a Paska drenu dritlhabyiwile, anga Kriste.

⁸ Ke ahihambeni a nkhuvu, angali hi handrelo ya khale, kumbe handrelo ya mona ni ya vubihi, kambe hi makati lawa ya kukala mangana handrelo, ya vunene ni xihlayelamfuri.

⁹ Apapeleni ledri afaka nin'witraleli leswaku n'wingapatrani ni va vumbuye;

¹⁰ anihlayi leswaku n'witravukana ni va vumbuye, kumbe lava vanavelaka a vukosi bya misava leyi, kumbe vayivi, kumbe vagandreli va swikwembu swakuka-ndlela; hikusa loko afa swilitano an'witasindriseka a kusuka amisaveni leyi.

¹¹ Kambe swoswi, nin'witralela akuva n'wingatipatri ni lweyi ahlayiwaka makwenu na kasi i wa vumbuye, kumbe munaveli wa vukosi bya misava leyi, kumbe mugandreli wa swikwembu swakuka-ndlela, kumbe mulumbeti, kumbe mpopswi, kumbe muyivi; a mhunu wa kufana ni lweyo, n'wingapatrani na yene, nambi kudeni.

¹² Hikuva niyikuma kwini a mfanelo ya kuyavanyisa a va le handle? Ahi va le ndreni lava n'wifanelaka a kuvayavanyisa, xana?

¹³ Kambe a va le handle, Xikwembu Nkulukumba atavayavanyisa. Ke, hlongolani a wa vubihi amakari kwenu.