I Kor 4 - Testamente Ledrimpswha ni Mapsalma

Ntiro wa vapostola

¹ Xiswoswo, a vhanu hinkwavu avavoni swanga vatireli va Kriste, ni valaveleli va swihundla swa Xikwembu Nkulukumba.

² Ntlhanta kubiri, leswi swidjulekaka ku valaveleli, hileswaku mun'wana-ni-mun'wana ava lweyi adumbekaka.

³ Na swone, ku mine i ntxhumu wutrongo ngopfu a kuyavanyisiwa ha n'wine, kumbe a kuyavanyisiwa hi huvu ya ximhunu; mfuri nambi mine ha vuswanga anitiyavanyisi!

⁴ Hikusa anititivi na nini nandru, kambe nambi swili tanu, anitihlayi na nili lweyi alulamiki hikusa a Hosi hi yone yiniyavanyisaka.

⁵ Hileswo-ke, n'wingayavanyiseni ntxhumu na nkama wungasinatlhasa, kukota kutlhasa Hosi; anga Yene atakavaninga leswi swifihlekiki, swa munyama, atakavonekisa ni makungu lawa manga timbilwini ta vhanu; laho-ke mun'wana-ni-mun'wana atayamukela a kukhensiwa hi Xikwembu Nkulukumba.

⁶ A mintxhumu leyi, vamakweru, nimifanisi ha mine na Apolo hinkonta yenu, akuva n'widondra ku hine akuva n'wingatluli leswi switraliwiki ni kuva amakari kwenu kungavini lweyi atikulisaka a henhla ka mun'wana.

⁷ Hikusa hi mani lweyi akuhambanisaka ni van'wana, xana? Nakone una yini leswi unganyikiwangakiki? Mfuri leswi wekeyamukela ntsena, hayini-ke utitwalisa, swanga hi loko leswi unga naswu unganyikiwanga?

⁸ N'wine swoswi n'wixurile, n'wi swipfundri, na n'wingana hine, n'wifumile; mawaku loko ingi ha kunene n'wingafuma, akuva na hine hitafuma kun'we na n'wine!

⁹ Hikuva nipimisa leswaku Xikwembu Nkulukumba ahibeki, hine vapostola, swanga va vugamu; hikombisiwa swanga hiyavanyiseliwi lifu, hikuva hindruluki xihlamaliso amisaveni, amahlweni ka tintrumi ni ka vhanu.

¹⁰ Hinkonta ya Kriste hine hi swihunguki; kambe n'wine n'wi tintivi ku Kriste; hine hi va gome, kambe n'wine n'wi va ntamu; n'wine n'wi va kutxhaviseka, kambe hine hayeyisiwa.

¹¹ Kutlhasa nkama lowu, hini ndlala ni tora, hiyambala a switlatla, hayamasiwa timpama, ahina vutrhamu bya kutiya,

¹² na kone hakarateka na hitira hi mavoko yeru. Loko hirukiwa, hihlayela vunene; loko hixanisiwa, hatiyisela;

¹³ loko hilumbetiwa, hiyangula hi maritu ya hombe; kutlhasa ni swoswi, hindruluki swanga nsila ya misava leyi, ni leswi switxukumetiwaka hi hinkwavu.

¹⁴ Anin'witraleli leswi kuva nin'wikhomisa tingana, kambe akuva nin'wikhwavela swanga vana vanga lava varandrekaka ngopfu.

¹⁵ Hikusa nambi n'wingavani dzana dra madzana ya vadondrisi ku Kriste, kambe an'wina vatatana vanyingi, hikuva hi mine nin'wibelekiki ku Yesu Kriste, hikola ka Ivangeli.

¹⁶ Hileswo-ke nan'witratriya leswaku n'wiva vayetisi vanga.

¹⁷ Hikola ka leswo nin'wirumeli Timotewu, anga n'wananga wa kurandreka ni kudumbeka a Hosini, akuva atan'widrimuxa a tindlela tanga ku Kriste, kukotisa leswi nidondrisaka matlhelo hinkwawu akerekeni drin'wana-ni-drin'wana.

¹⁸ Kambe, hikuva mine ningati ku n'wine, van'we vatikukumuxile;

¹⁹ Kambe loko a Hosi yiswirandra, ndreni ka nkamanyana nitan'wiyendrela; laho-ke nitativa, kungali ritu dra lava vatikukumuxaka, kambe a ntamu wavu;

²⁰ hikuva a Mfumu wa Xikwembu Nkulukumba awutiyisiwi hi ritu, kambe hi ntamu.

²¹ Xana n'wirandra yini? Leswaku nita ku n'wine ni nhonga, kumbe ni lirandru ni moya wa vumbilu xana?