I Kor 3 - Testamente Ledrimpswha ni Mapsalma

Kupfunana antirweni wa Xikwembu Nkulukumba

¹ Na mine, vamakweru, aniswikotanga a kukhanela ku n'wine swanga vhanu va Moya, kambe swanga ku vhanu va nyama, swanga vatrongwana ku Kriste.

² Nin'winyikiki ntrwamba n'winwa wone, matrhan'wini ya kun'winyika a swakuda swakutiyela, hikusa afa n'wingatiswikota. Kambe ni swoswi an'wisinaswikota,

³ hikusa n'wahali va nyama, ntsena. Hikuva leswi kahaniki vukwele ni timholova amakari kwenu, xana an'wi va nyama, ni va kufamba hi ximhunu ntsena?

⁴ Hikuva loko mun'we aku: Mine ni wa Pawulosi, ni mun'wana aku: Mine ni wa Apolo, xana amayentxela lawo ahi ya vhanu xana?

⁵ Ke, Pawulosi hi mani xana? Na yene Apolo hi mani xana? Loko vangali malandra, lava n'wine n'wipfumeliki hikola kwavu, hi laha mun'wana-ni-mun'wana anyikiwiki Hosi?

⁶ Mine nibyalile, Apolo atxheleteli mati, kambe Xikwembu Nkulukumba hi yene amilisiki ava akulisa;

⁷ hikuva nambi lweyi abyalaka ahi ntxhumu, na yene lweyi atxheletelaka ahi ntxhumu, kambe ntsena lweyi amilisaka ava akulisa, anga Xikwembu Nkulukumba.

⁸ Lweyi abyalaka ni lweyi atxheletelaka vafana, kambe mun'wana-ni-mun'wana atayamukela a hakelo mayelano ni ntiro wakwe;

⁹ hikuva hine hi vapfuneteli antirweni wa Xikwembu Nkulukumba, n'wine n'wi nsimu ya vudrimu ya Xikwembu Nkulukumba, n'wi yindlu ya Xikwembu Nkulukumba.

¹⁰ Hi timpswalu ta Xikwembu Nkulukumba leti ninyikiwiki tone, swanga ntivi hi tlhelo dra vuyaki, nibeki a masungulu; kutani mun'wana ayaka a henhla ka wone; kambe mun'wana-ni-mun'wana ativonele leswi ayakisaka swone a henhla ka wone.

¹¹ Hikusa akuna lweyi angakotaka a kubeka a masungulo man'wana handle ka lawa mabekiwiki, lawa anga Yesu Kriste.

¹² Kambe loko leswi mhunu ayakaka a henhla ka masungulo lawo swili gole kumbe silivhela, kumbe maribye lawa ya lisima, kumbe mapulangu, kumbe byanyi, kumbe nhlanga,

¹³ a ntiro wa mun'wana-ni-mun'wana wutavoneka alivaleni; hikusa a siku ledro dritawuvonekisa, wuvonekisiwa hi ndrilo, a ndrilo lowu wutakakambisisa a ntiro wa mun'wana-ni-mun'wana leswaku i ntiro muni!

¹⁴ Ni loko a ntiro wa lweyi ayakiki a henhla ka masungulu wutiyisela, lweyo atayamukela a hakelo

¹⁵ Kambe loko a ntiro wa mhunu wa ku kari wupswha, yene atapfumala a hakelo, kambe yelweyo atahuluxiwa swanga hi loko ahuluki andrilweni.

¹⁶ Xana an'wiswitivi leswaku n'wi Tempele dra Xikwembu Nkulukumba, ni leswaku a Moya wa Xikwembu Nkulukumba wutrhama amakari kwenu?

¹⁷ Loko a mhunu ahahlula a Tempele dra Xikwembu Nkulukumba, Xikwembu Nkulukumba atamuhahlula na yene; hikusa a Tempele dra Xikwembu Nkulukumba drihlawulekile, na kone a Tempele ledro hi n'wine.

¹⁸ A mhunu angatxhuki atikanganyisa; loko mun'we amakari kwenu apimisa leswaku atlharihile amisaveni leyi, andruluke singe, akuva atava ntivi.

¹⁹ Hikusa a vutivi bya misava leyi i vusinge amahlweni ka Xikwembu Nkulukumba; hikuva kutraliwi leswaku: Yene akhoma tintlhari avutlharini bya tone.

²⁰ Kutraliwi ni leswaku: A Hosi yitiva a miyanakanyu ya vhanu leswaku i ya kuka-ndlela.

²¹ Hileswo-ke, kungavini lweyi atikulisaka hi vhanu; hikusa hinkwaswu i swenu:

²² nambi Pawulosi, nambi Apolo kumbe Petrosi, nambi misava hinkwayu, nambi vutomi kumbe lifu; nambi mintxhumu ya swoswi kumbe ya nkama lowu wutaka, hinkwaswu i swenu,

²³ kambe n'wine n'wi va Kriste, Kriste i wa Xikwembu Nkulukumba.