I Kor 16 - Testamente Ledrimpswha ni Mapsalma

Tinyiko ta kupfuna vapfumeli va-le-Yerusalema

¹ Hi tlhelo dra nhlengo wa kupfuna a vahlawuleki, swanga hi leswi nileletiki a makereke ya Galatiya, yentxani swoswo na n'wine.

² Hi siku dra kusungula dra viki, mun'wana-ni-mun'wana abeki hi tlhelo, a kaya kwake, ahlengeleta mayelano ni leswi anyikiwaka kuswibindrula, akuva kungahayentxiwi minhlengo loko nitatlhasa.

³ Nitaku nitlhasa, niruma, hi mapapela, lava n'witakava n'wivahlawulile, akuva vafambisa nyiko yenu a Yerusalema;

⁴ ni loko swifanekela leswaku mine ni famba, kolahu vatafamba na mine.

Makungu ya Pawulosi

⁵ Nitata ku n'wine loko nihundra hi le Makedoniya, hikusa nitatremakanya hi dra Makedoniya.

⁶ Nakone swingahakoteka leswaku nitrhama kun'we na n'wine nkamanyana, kumbe nitrhama a Vuxika hinkwabyu, akuva n'witataniheketa hinkwaku lomu nita kaya kone.

⁷ Hikusa swoswi, anidjuli kun'wivona hi kuhundra, ntsena; kambe nadumba leswaku nitatrhama na n'wine hi nkamanyana loko Hosi yiswipfumela.

⁸ Kambe nitatrhama a Efesa, kukondra kutlhasa a Pentekosta,

⁹ hikuva nipfuleliwi a nyangwa yikulu mfuri leyi yinene, na kone a vakaneti i vanyingi.

¹⁰ Ni loko Timotewu ata, vonani leswaku angavini kutxhava amakari kwenu; hikusa yene atira a ntiro wa Hosi, swanga ha mine.

¹¹ Hileswo-ke kungavi ni lweyi atakamudrela; kambe muheketani hi kurula, akuva akota a kuta ku mine, hikusa namurindrela kun'we ni vamakweru.

¹² Loko ali makweru Apolo, nimutratriyi ngopfu akuva ata ku n'wine kun'we ni van'wana vamakweru, kambe yene angaswirandranga akuta swoswi; nambi swili tanu, atata hi nkama wumbeni, loko swikoteka.

Mintratriyo ya vugamu ni madrungula

¹³ Hitekani, tiyani akupfumeleni, vanani vavanuna, vanani lava va ntamu.

¹⁴ Yentxani mintxhumu yenu hinkwayu hi lirandru.

¹⁵ Nahan'witratriya, vamakweru: Tivani leswaku a ndangu hinkwawu wa Stefano, lowu wunga xirangana le Akaya, wutinyiketeli antirweni wa kupfuna a vahlawuleki;

¹⁶ akuva na n'wine n'wiyingiseta lava va kutanu, ni hinkwavu lava vapfunetelaka antirweni hi kutikarata.

¹⁷ Nanyoxa hi kubuya ka Stefano na Fortunato na Akayiko, hikuva vahelisi a kuvilela kwanga hi leswi n'wine n'wingaliki na mine;

¹⁸ hikuva varulisi a hika dranga ni drenu. Hikolahu-ke drimukani a vhanu va kutanu.

¹⁹ A makereke ya le Aziya man'widrungula. Akila na Presila ni kereke ledri dringa kaya kwavu, van'widrungula ngopfu a Hosini.

²⁰ A vamakweru hinkwavu van'widrungula. Drungulanani hinkwenu, hi kunyunta ka kuxwenga.

²¹ A kudrungula loku i ka kutraliwa hi voko dranga: Pawulosi.

²² Loko kuni lweyi angarandriki Hosi, ave anaatema! Maran atha. (Tana Hosi).

²³ A timpswalu ta Hosi Yesu Kriste ative na n'wine.

²⁴ A lirandru dranga adrive na n'wine hinkwenu, ku Kriste Yesu.