I Kor 15 - Testamente Ledrimpswha ni Mapsalma

Kupfuka ka Kriste akufeni

¹ Vamakweru, nitlhela nin'witivisa a Ivangeli leyi nin'wirereliki yone, n'wiviki n'wiyiyamukela, n'witiya ku yone,

² a lvangeli leyi n'wihuluxiwaka ha yone, loko n'wiyibekisa swanga hi laha nin'wirereliki ha kone, loko angali leswaku n'wepfumela mahala!

³ Hikuva akusunguleni, nin'winyiketi leswi na mine niswiyamukeliki, leswaku: Kriste a fi hikola ka swidoho sweru, swanga hi kuhlaya ka Matralwa;

⁴ ni leswaku alahliwile ntrhaku apfuka akufeni hi siku dra vuraru, swanga hi kuhlaya ka Matralwa;

⁵ ni leswaku ativonekisi ku Khefasi, ntrhaku ku lava va khume na vabiri.

⁶ A ntrhaku ka leswo, ativonekisi na kone ku lava va kutlula ntlhanu wa madzana ya vamakweru, hi nkama wun'we ntsena, lava hi vunyingi byavu vahaliki kone kutlhasa ni swoswi, kambe van'we vafile.

⁷ Hi kulandra ativonekisi ku Yakobe, ntrhaku hi vapostola hinkwavu;

⁸ Hi vugamu, ativonekisi ku mine, lweyi ingiki nibelekiwi na nkama wungasitlhasa.

⁹ Hikusa mine ni lweyi ntrongo ku vapostola, mfuri anifaneliwi kutxhuliwa mupostola hikusa naxanisi a kereke dra Xikwembu Nkulukumba.

¹⁰ Kambe hi timpswalu ta Xikwembu Nkulukumba, mine ni leswi ninga swone, ni timpswalu ku mine ativanga ta mahala, hikuva nitiri ngopfu kutlula hinkwavu, nambi leswi afaka angali mine kambe tili timpswalu ta Xikwembu Nkulukumba leti tinga ku mine.

¹¹ Hileswo-ke, nambi mine, nambi vone, hirerisi xiswoswo, na n'wine n'wipfumelisi xiswoswo.

Kupfuka ka vafi

¹² Ke loko kureriwa leswaku Kriste apfukile kufeni, xana hayini van'we ku n'wine vahlaya leswaku akuna kupfuxiwa ka vafi?

¹³ Nakone loko kungana kupfuxiwa ka vafi, Kriste na Yene angapfukanga ku vafi.

¹⁴ Kutani loko Kriste angapfukanga ku vafi, hikolahu a vureri byeru i bya mahala, ni ko kupfumela kwenu i ka mahala;

¹⁵ ntlhantakubiri, hikumiwa na hili timboni ta madrimi ta Xikwembu Nkulukumba, hikusa hihambeli Xikwembu Nkulukumba a vumboni bya leswaku Yene apfuxi Kriste akufeni, na kasi angamupfuxanga, loko ha kakunene a vafi vangapfuki akufeni.

¹⁶ Hikuva loko a vafi vangapfuki kufeni, Kriste na Yene angapfukanga akufeni.

¹⁷ Ni loko Kriste angapfukanga akufeni, a kupfumela kwenu i ka kuka-ndlela, mfuri n'wahali swidohweni swenu.

¹⁸ Kolahu na vone lava vatiyetleleliki ku Kriste valahlekile.

¹⁹ Loko-ke a kulavisela kweru ku Kriste kuli ka vutomi lebyi (bya lomu misaveni) ntsena, hi va khombo ngopfu kutlula a vhanu hinkwavu.

²⁰ Kambe swoswi, hi xihlayelamfuri, Kriste apfukile ku lava va kufa, abekiwi xirangana xa lava vayetleliki.

²¹ Hikuva, swanga hi leswi ha mhunu mun'we kutumbuluki akufa lomu misaveni, a kupfuxiwa ka vafi na kone kutumbuluki hi mhunu mun'we.

²² Ke leswi hikola ka Adamu hinkwavu vafaka, xiswoswo, hinkwavu vatatlhela vahanya ha Kriste.

²³ Kambe mun'wana-ni-mun'wana, hi nkama wakwe: Hi kusungula, Kriste swanga xirangana; hi kulandra, lava vanga va ka Kriste akubuyeni vakwe.

²⁴ Ntrhaku ata vugamu, atanyiketa a mfumu ku Xikwembu Nkulukumba ni Tatana, loko atava ahohloti a vuhosi hinkwabyu, ni kufuma hinkwaku, ni mintamu hinkwayu.

²⁵ Hikusa swifanela leswaku afuma akondra abeka a valala hinkwavu ahansi ka minkondro yake.

²⁶ Kutani a nala lweyi atakahetisiwa avugan'wini, i lifu.

²⁷ Hikusa abeki hinkwaswu a hansi ka minkondro yake; na kone loko aku a mintxhumu hinkwayu mibekiwi ahansi kwake, swile livaleni leswaku lweyi abekiki hinkwaswu ahansi kwake, yene ale handle ka swone.

²⁸ Kutaku loko swibekiwi hinkwaswu ahansi kwake, kone na Yene N'wana atabekiwa ahansi ka lweyi abekiki hinkwaswu ahansi kwake, akuva Xikwembu Nkulukumba ava hinkwaswu ku hinkwaswu.

²⁹ Loko swingali tanu, xana hayini kuni lava yamukelaka a Babatiso amatrhan'wini ya lava vafiki? Loko kunene a vafi vangahapfuki, xana hayini kuni lava vababatiseliwaka vone?

³⁰ Kutani na hine, hayini hitinyiketa akhombyeni hi minkama hinkwayu?

³¹ Mine nafa siku drin'wana-ni-drin'wana; vamakweru, nifunga swoswo, swanga hi leswi ningani kutitwalisa ha n'wine ku Yesu Kriste, Hosi yeru.

³² Loko leswi ninga mhunu, nilwi ni swihari a Efesa, swinipfuna hayini? Loko vafi vangapfuki, ahideneni, ahinweneni, hikusa mundruku hitafa.

³³ N'wingakanganyisekeni! A kutolovelana ni lava vamfani swibolisa a swihena leswi swinene.

³⁴ Ntrhunxekani, kunene, n'wingadoheni; hikusa van'we avana kutiva ka Xikwembu Nkulukumba; nihlaya leswo akuva nin'wiyentxisa tingana.

A miri wa ntrhaku ka kupfuka akufeni

³⁵ A mhunu angaku: Vapfuxisiwa kuyini a vafi? Vata humelela ni miri ya kuyini, xana?

³⁶ Singe ndruwene! Lexi wene uxibyalaka axihanyisiwi loko xingarangi hi kufa.

³⁷ Ni lexi uxibyalaka, ahi miri lowu ntrhaku wutakava wone, kambe ntsena ubyala a nhleke ya mavele kumbe ya swin'wana.

³⁸ Kambe Xikwembu Nkulukumba anyika a nhleke yoleyo a miri, swanga hi laha arandraka ha kone, yin'wana-ni-yin'wana a miri ya yone.

³⁹ Nakone a nyama hinkwayu ahi nyama yin'we; kambe kuni nyama ya vhanu, yin'wana i ya swihari, yin'wana i ya tinyanyana ni yin'wana mfuri i ya tinhlampfi.

⁴⁰ Nakone mfuri mikone a miri ya tilo ni miri ya misava; kambe kun'we i kuphatima ka miri ya tilo, kun'wana i ka miri ya misava.

⁴¹ Kun'we, i kuphatima ka dambu, kumbeni i kuphatima ka n'weti, kumbeni mfuri i ka tinyeleti; hikuva a nyeleti yin'we yihambana ni nyeleti yimbeni hi kuphatima.

⁴² Switava tano ni le kupfuxiweni ka vafi. A miri yibyaliwa na yini kubola, yipfuka kufeni na yingana kubola;

⁴³ yibyaliwa na yini kudreliwa, yipfuxiwa kufeni na yini kuphatima; yibyaliwa na yini gome, yipfuxiwa kufeni na yini ntamu.

⁴⁴ Yibyaliwa na yini miri ya nyama, yipfuxiwa na yini miri ya moya. Loko-ke kuni miri ya nyama, na yone miri ya moya yikone.

⁴⁵ Nakone, swanga hi leswi kutraliwiki leswaku: A mhunu wa kusungula, Adamu ahambiwi ava hika ledri drihanyaka, kambe Adamu wa vugamu i moya, lowu wunyikaka vutomi.

⁴⁶ Kambe awa kusungula ahi wa moya, kambe im'na i wa nyama, ntrhaku ava lweyi wa moya.

⁴⁷ A mhunu wa kusungula, avumbiwiki kusukela amisaveni, i wa misava, a mhunu wa vubiri i wa tilo.

⁴⁸ Hinkwavu a va misava, vafana ni lweyi wa misava, na vone a va moya vafana ni lweyi wa moya.

⁴⁹ Swanga hi leswi hiyambaliki a xifaniso xa lweyi wa misava, xiswoswo hitayambala a xifaniso xa lweyi wa tilo.

⁵⁰ Kutani swoswi, vamakweru, nihlaya leswaku a nyama ni ngati aswina kuswikota a kuyamukela a pfindla dra Mfumu wa Xikwembu Nkulukumba, ni kubola, akuna kuswikota a kuyamukela a pfindla dra kuka-kubola.

⁵¹ Vonani, nin'winyika a xihundla lexi: Hingatifa hinkweru, kambe hinkweru hitandrulutiwa;

⁵² ha nkama mun'we, hi kubyavuta ka tihlu, hi nanga ya vugamu, hikuva kutayimba a nanga, a vafi vatapfuxiwa vangahatlheli vabola, kutani hine hitandrulutiwa.

⁵³ Hikusa kudjuleka leswaku a miri leyi yibolaka, yiyambala a kuka-kubola, ni leswi yifaka, yiyambala a kuka-kufa.

⁵⁴ Ni loko a miri leyi yibolaka yiyambali kuka-kubola, ni loko leswi yinga leyi yifaka yitava yiyambali kuka-kufa, laho-ke kutahetiseka a ritu ledri dritraliwiki, driliki: A lifu drimintiwi hi kuhlula.

⁵⁵ We lifu, xana kukwini swoswi a kuhlula kwaku? Kukwini a kuxanisa kwaku?

⁵⁶ Akuxanisa ka lifu i xidoho, ni ntamu wa xidoho i nawu.

⁵⁷ Kambe kutlangeliwa Xikwembu Nkulukumba lweyi ahinyikaka a kuhlula hi Hosi yeru Yesu Kriste!

⁵⁸ Hileswo-ke, vamakweru lava varandrekaka, tiyani n'wingatrekatreki, n'wivani nkhinkhi yikulu antirweni wa Hosi minkama hinkwayu, na n'witiva leswaku a ntiro wenu a Hosini ahi wa mahala.