I Kor 13 - Testamente Ledrimpswha ni Mapsalma

Lirandru dra vukriste

¹ Nambi loko mine ningavulavula a tindrimi ta vhanu ni ta tintrumi, loko ningana lirandru, nifana ni nhumbu leyi yipfumaka, xinsimbana lexi xihambaka a mpfumawulu.

² Nakone nambi ningavani nyiko ya vuprofeta, nambi ningativa a swihundla hinkwaswu ni vutivi hinkwabyu; nambi ningava ni kupfumela hinkwaku la kakuva nisusa ni tinhava, loko ningana lirandru, ani ntxhumu.

³ Mfuri nambi loko ningayavela a vukosi byanga hinkwabyu, nambi ninganyikela a miri yanga wuhisiwa akuva nititwalisa, loko ningalina lirandru, aswinipfuni ha ntxhumu.

⁴ A lirandru drilehi mbilu, drini vunene. A lirandru adrina vukwele, adritiyentxisi na kone adritikukumuxi,

⁵ a lirandru adriyentxisi tingana, adritidjuleli swa drone ntsena, adritikwatisi, adripimisi leswi swakubiha;

⁶ adritrhaveli kuka-vululami, kambe dritrhavela a xihlayelamfuri;

⁷ drixaniseka hi hinkwaswu, dripfumela hinkwaswu, drilavisela hinkwaswu; dribyatrha hinkwaswu.

⁸ A lirandru adrina vugamu hi la kungahelikiki. Kasi nambi kuni vuprofeta, byitahelisiwa; nambi tindrimi titahela; nambi a vutivi byitahelisiwa.

⁹ Hikusa hi tlhelo drin'we hini vutivi, hi tlhelo drin'wana haprofeta;

¹⁰ kambe loko kutatlhasa leswi swihetisekiki, hinkwaswu leswi swinga swone hi tlhelo ntsena switasuvisiwa.

¹¹ A nkama afaka nili ntrongwana, afa ni vulavula swanga ntrongwana, nipimisa swanga ntrongwana, niyanakanyisisa swanga ntrongwana; loko ntrhaku nindruluki wanuna nkulu, nihelisi a swavutrongwana.

¹² Hikusa swoswi hivona hi xivonivoni, hi liphume; kambe ankameni wolowo, hitavonisisa, liso ni liso; swoswi nitiva hi tlhelo ntsena, kambe ntrhaku nitativisisa swanga hi leswi nitivisiwaka xi swone.

¹³ Kambe swoswi kuni leswi swiraru: Kupfumela, kulavisela ni lirandru; kambe lexi xikulu ku swone i lirandru.