I Kor 12 - Testamente Ledrimpswha ni Mapsalma

A tinyiko ta Moya

¹ Vamakweru, mayelano ni tinyiko ta Moya, anidjuli leswaku n'wikohleka.

² N'waswitiva leswaku ankama afaka n'wili va-Matiko, afa n'wikokeliwa ku swikwembu swakuka-ndlela, leswi swingavulavuliki, n'wifambisiwa handle ka ndlela.

³ Hileswo-ke nan'witivisa leswaku akuna mhunu lweyi avulavulaka hi Moya wa Xikwembu Nkulukumba, angahlayaka leswaku: Yesu i murukiwa. Nakone akuna mhunu lweyi anga kotaka kuhlaya leswaku: Yesu i Hosi, loko kungali hi Moya wa Kuxwenga.

⁴ Atinyiko ta hambana, kambe a Moya i mun'we ntsena.

⁵ Kuni matirela ya kuhambana, kambe a Hosi i yin'we ntsena.

⁶ Nakone, kuni mintiro ya kuhambana, kambe i Xikwembu Nkulukumba mun'we ntsena, lweyi atiraka hinkwaswu ku hinkwavu.

⁷ A kutivonekisa ka Moya kunyikiwa ku mun'wana-ni-mun'wana, akuva apfuna hinkwavu.

⁸ Hikuva mun'we anyikiwa hikola ka Moya, a ritu dra vutlhari; mun'wana, hikola ka Moya wolowo, anyikiwa a ritu dra vutivi;

⁹ mun'wana mfuri, ku Moya wolowo, a nyiko ya kupfumela, mun'wana a ntamu wa kuholisa mavabyi, ku Moya wolowo;

¹⁰ mun'wana mfuri a ntamu wa kuyentxa mahlolana, mun'wana a vuprofeta, mun'wana a kutivisisa a mimoya hi vuyentelelo, mun'wana a kukhanela tindrimi ta tinxaka-xaka, mun'wana a kutitlhamuxela.

¹¹ Kambe hinkwaswu leswo switiriwa hi Moya wolowu wa wun'we, wuyavela ku mun'wana-ni-mun'wana hi laha wurandraka ha kone.

Hinkweru hivumba miri wun'we ntsena

¹² Hikuva swanga hi leswi a miri wunga wun'we ntsena, nambi leswi wungani swiro swinyingi, na swone swiro hinkwaswu, nambi swili swinyingi, swivumba a miri wun'we ntsena, xileswo, na yene Kriste swi tanu.

¹³ Hileswo-ke, hinkweru hibabatisiwi ku Moya wolowu wa wun'we, akuva hiva miri wun'we, vangava va-Yuda kumbe va-Girika, swikarawa kumbe lava vantrhunxekiki. Nakone hinkweru hinwisiwi a Moya wun'we ntsena.

¹⁴ Hikuva a miri ahi xiro xin'we ntsena, kambe i swiro swinyingi.

¹⁵ Loko a nenge afa wungahlaya leswaku: Leswi mine ningaliki voko, ani wa miri, hinkonta ya leswo ahi wa miri, xana?

¹⁶ Ni loko a ndleve afa yingaku: Leswi mine ningaliki tihlo, ani wa miri; hikola ka leswo ahi ya miri, xana?

¹⁷ Loko afa a miri hinkwawu awova tihlu, a kuyingela afa kutava kwini, xana? Loko afa a miri hinkwawu awova ndleve, akunun'huta akutava kwini, xana?

¹⁸ Kambe swoswi, Xikwembu Nkulukumba abeki a swiro: xin'wana-ni-xin'wana amirini, hi laha arandriki ha kone.

¹⁹ Kambe loko afa hinkwaswu swova xiro xin'we ntsena, a miri afa wutava kwini, xana?

²⁰ Ke swoswi, a swiro i swinyingi, kambe a miri i wun'we ntsena.

²¹ A tihlu adrina kuswikota a kubyela a voko driku: anikuvileli; na yone a nhloko, ku minenge: anin'wivileli.

²² Kambe ngopfu-ngopfu, a swiro swa miri leswi swivonekaka na swili swa gome, hi leswi swivilelekaka ngopfu.

²³ Mfuri a swiro swa miri leswi hipimisaka leswaku switxhaviseka kutrongo, hi swone leswi hiswibekelaka a lisima hi kuhundrisa; ni leswi vonekaka swini tingana, hi swone leswi swiyentxeliwaka xitxhavu lexi hundrisaka;

²⁴ na kone a swiro sweru leswi switxhavisekaka, aswahavileli kubekeliwa xitxhavu. Kambe Xikwembu Nkulukumba ayentxi a miri, ava anyika a lisima drikulu ku swiro leswi afaka swidrivilela,

²⁵ akuva a kutravukana kungativa kone amirini, kambe a swiro switikaratela, swin'we ku swin'wana.

²⁶ Akuva loko xin'we xiro xixaniseka, na swone leswi swin'wana swixaniseka kun'we na xone. Ni loko xin'we xiro xitwalisiwa, hinkwaswu switrhava kun'we na xone.

²⁷ N'wine n'wi miri ya Kriste; na kone n'wi swiro swake, mun'wana-ni-mun'wana.

²⁸ Nakone, Xikwembu Nkulukumba abeki van'we, a Kerekeni, hi kusungula a vapostola; hi kulandra, a vaprofeta; a va vuraru, i vadondrisi; ntrhaku, kulandra a vayentxi va mahlolana; ntrhaku a tinyiko ta kuholisa, ni ta kupfuna, ni ta vurangeli, ni ta kuvulavula a tindrimi ta tinxaka-xaka.

²⁹ Xana hinkwavu vangava vapostola? Xana hinkwavu vangava vaprofeta? Xana hinkwavu vangava vadondrisi? Xana hinkwavu vangava vayentxi va mahlolana?

³⁰ Xana hinkwavu vangavani tinyiko ta kuholisa? Xana hinkwawu vavulavula a tindrimi ta tinxaka-xaka? Xana hinkwavu vakota a kutlhamuxela a tindrimi?

³¹ Kambe djulisisani a tinyiko leti tingani lisima ngopfu. Nakone, nan'wikomba a ndlela leyi yinga yone swinene.