I Kor 11 - Testamente Ledrimpswha ni Mapsalma

¹ Vanani vayetisi vanga, swanga ha mine ningamuyetisi wa Kriste.

Matrhamela ni mayambalela atinhlegeletanwini

² Nan'wikhensa, vamakweru, hikusa n'wanidrimuka ku hinkwaswu, na kone n'wilandra a swileleto hinkwaswu leswi ningan'widondrisa.

³ Kambe nidjula leswaku n'witiva leswaku a nhloko ya wanuna mun'wana-ni-mun'wana hi Kriste; a wanuna i nhloko ya wansati; kutani a nhloko ya Kriste hi Xikwembu Nkulukumba.

⁴ A wanuna mun'wana-ni-mun'wana lweyi akhongotaka kumbe aprofetaka na afukumeti a nhloko, ayentxisa tingana a nhloko yake.

⁵ A wansati mun'wana-ni-mun'wana loko akhongota kumbe aprofeta na angafukumetanga a nhloko, ayentxisa tingana a nhloko yake, hikusa swifana ni loko abyevulile.

⁶ Ke, loko a wansati angafukumeti a nhloko, atremetiwe; kambe loko swini tingana ku wansati a kutremetiwa kumbe kubyevuliwa misisi, xileswo afukumete a nhloko.

⁷ Hikuva a wanuna angafaneli kufukumeta nhloko, hi leswi anga xifaniso ni kuphatima ka Xikwembu Nkulukumba; kasi a wansati i kuphatima ka wanuna.

⁸ Hikusa ahi wanuna lweyi apfaka ku wansati, kambe a wansati hi yene apfaka ku wanuna.

⁹ Nakone a wanuna angavumbeliwanga wansati, kambe a wansati avumbeliwi wanuna.

¹⁰ Hileswo-ke, a wansati afanela kuvani xikombiso xa kufumiwa anhlokweni, hinkonta ya tintrumi.

¹¹ A Hosini, a wansati angale henhla ka wanuna, ni wanuna angale henhla ka wansati.

¹² Hikusa, swanga hi leswi a wansati apfaka hi le ku wanuna, na yene wanuna apswaliwa hi wansati; hinkwaswu swipfa hi le ku Xikwembu Nkulukumba.

¹³ Tipimiselani ha vuswenu: Xana swafanekela leswaku a wansati akhongota Xikwembu Nkulukumba na angafukumetanga a nhloko, xana?

¹⁴ Xana na wone a ntumbuluku awun'widondrisi leswaku i tingana ku wanuna, a kufuya a misisi yileha?

¹⁵ Kambe loko a wansati ani misisi ya kuleha, ku yene i kukhensiwa, hikuva anyikiwi misisi, xiva xifukumeto ku yene.

¹⁶ Nambi swili tanu, loko kuni lweyi angani mphika ku swone, hine ahina swihila leswo, na wone a makereke ya Xikwembu Nkulukumba amanaswu.

A xilalelo xa Hosi

¹⁷ Ke loko nin'wileleta leswi, anina kun'winkhensa hikuva an'wihlengeletaneli leswi swiyisaka a vuneneni, kambe kuli kuhundrisa ku leswi swimfani.

¹⁸ Hikuva, kusungula, loko n'wihlengeletana akerekeni, niyingela leswaku kuni kuhambana amakari kwenu; kutani, hi tlhelo drin'we, na pfumela leswaku leswo swahumelela.

¹⁹ Mfuri, swafanela akuva kuni kuhambana amakari kwenu, akuva kutavoneka lava vafanelaka a kukhensiwa.

²⁰ Ke loko n'wihlengeletana ku mbangu mun'we, an'wahakongomi kuda a xilalelo xa Hosi,

²¹ hikusa mun'wana-ni-mun'wana aranga atidela a xilalelo xakwe, mun'wana atrhama ni ndlala, na kasi mun'wana awapopswa.

²² Xana an'wina ma kaya lomu n'wingadaka ni kunwa kone, xana? Kumbe n'widrela a kereke dra Xikwembu Nkulukumba ni kuyentxela a tingana lava vangekena ntxhumu? Xana nitahlaya yini ku n'wine? Xana nitan'winkhensa? Ku leswo anina kun'winkhensa!

²³ Hikuva mine niyamukeli ku Hosi leswi na mine nin'winyiketiki, leswaku Hosi Yesu, hi vusiku lebyi angawongiwa ha byone, ateki a kati,

²⁴ loko atlangelile, akhemelela aku: Leyi i miri yanga leyi minyikiwaka hikola kwenu. Yentxani leswi n'witanidrimuka ha swone.

²⁵ Ayentxisa xi swoswo ni hi ntrheko, ntrhaku ka kulalela, aku: A ntrheko lowu i xipfumelelanu lexi ximpswha angatini yanga; yentxani leswi, minkama hinkwayu, loko n'winwa, n'witanidrimuka ha swone.

²⁶ Hikuva hi minkama hinkwayu, loko n'wida a kati ledri, n'winwa a ntrheko lowu, n'witava n'witivisa a kufa ka Hosi yikondra yibuya.

²⁷ Hileswo-ke, lweyi adaka a kati kumbe anwaka a ntrheko wa Hosi hi lana swingafanelikiki, atava ni nandru wa miri ni wa ngati ya Hosi.

²⁸ Kambe a mhunu atikambe ha vuswake, xileswo ade a kati ava anwa a ntrheko.

²⁹ Hikuva lweyi adaka ni lweyi anwaka, atidela ni kutinwela a kuyavanyisiwa kwake, loko angayanakanyi a miri.

³⁰ Hileswo-ke lava vanyingi amakari kwenu vani gome, vavabya; ni vambeni vanyingi vafile.

³¹ Nakone loko hitikamba ha vusweru, afa hingatiyavanyisiwa;

³² kambe loko hiyavanyisiwa hi Hosi, hibekiwa andleleni yinene, akuva hingatiyavanyisiwa kun'we ni misava.

³³ Hileswo-ke vamakweru, loko n'whlengeletanela a kuda, rindrelelanani.

³⁴ Lweyi angani ndlala ade a kaya, akuva n'wingahlengeletaneli kuyavanyisiwa. Hi mintxhumu min'wana, nitatanyika a swileleto loko nitlhasa.