I Kor 1 - Testamente Ledrimpswha ni Mapsalma

Kulosela

¹ Pawulosi, avitaniwiki hi kurandra ka Xikwembu Nkulukumba akuva mupostola wa Yesu Kriste, kun'we ni makweru Sostenesi,

² ku Kereke dra Xikwembu Nkulukumba ledri dringa Korinto, lava vaxwengisiwiki ku Kriste Yesu, vavitaneliwiki kuva vahlawuleki, ni hinkwavu, lava mimbangwini hinkwayu vakhongotaka a vito dra Yesu Kriste, Hosi yavu ni yeru.

³ A timpswalu ku n'wine ni kurula, swipfa hi le ku Xikwembu Nkulukumba, Tatana weru, ni hi le ku Yesu Kriste, Hosi yeru.

Kutlangela ku Xikwembu Nkulukumba

⁴ Nitlangela Xikwembu Nkulukumba wanga minkama hinkwayu ha n'wine, hinkonta ya timpswalu leti Xikwembu Nkulukumba an'winyikiki tone ha Yesu Kriste,

⁵ hikusa, ku mintxhumu hinkwayu, n'windruluki swipfundri ku yene, aritwini hinkwadru, ne kutiveni hinkwaku;

⁶ swanga hi leswi a vumboni bya Kriste byitiyisiwiki ku n'wine,

⁷ lana kakuva n'wingapfumali nyiko ni yin'we, na n'wirindrela kutikombekisa ka Hosi yeru Yesu Kriste,

⁸ lweyi atakan'witiyisa kutlhasa vugan'wini, leswaku n'wingativana nandru a sikwini dra Hosi yeru Yesu Kriste.

⁹ Xikwembu Nkulukumba awadumbeka, lweyi ha Yene n'wivitaniweliki kuva kun'we ni N'wanakwe Yesu Kriste, Hosi yeru.

Mintratriyo ya kuva van'we

¹⁰ Nan'witratriya vamakweru hi vito dra Hosi yeru Yesu Kriste, leswaku hinkwenu n'wivulavula a ritu drin'we, kungave ni kuhambana amakari kwenu, kambe n'wiva van'we amiyanakanywini ni le mavoneleni.

¹¹ Hikusa vamakweru, nitivisiwile hi ndangu wa ka Kloye leswaku kuni kutengisana amakari kwenu.

¹² Nihlaya leswo hi leswi mun'wana-ni-mun'wana ku n'wine aliki: Mine ni wa Pawulosi!, Mine ni wa Apolo!, Mine ni wa Petrosi!, Mine ni wa Kriste!

¹³ Xana hileswaku Kriste ayavanile? Xana avi Pawulosi lweyi afeliki n'wine axihambanwini? Kumbe n'wibabatisiwi hi vito dra Pawulosi?

¹⁴ Nitlangela Xikwembu Nkulukumba hikuva ningababatisangakiki mhunu wa kwenu, loko kungali Krispo na Gayo, ntsena,

¹⁵ xi swoswo akuna mhunu lweyi angahlayaka leswaku ababatisiwi avitweni dranga.

¹⁶ Kambe nababatisi ni va ndangu wa Stefano; handle ka lavo anidrimuki leswaku kumbe ningava nibabatisi mun'wana.

¹⁷ Hikusa Kriste anganirumanga kuyababatisa, kambe ntsena a kuyativisa a Ivangeli, na ningatirisi vutlhari bya maritu, akuva swingatisusa lisima axihambanwini xa Kriste.

Ntlhamuxelo wa xihambano xa Kriste

¹⁸ Kunene, a ritu dra xihambano i vusinge ku lava valahlekiki; kambe ku hine hiyamukeliki huluxu, i ntamu wa Xikwembu Nkulukumba.

¹⁹ Hikuva kutraliwi leswaku: Nitahelisa a vutlhari bya tintlhari, nitadrela a vutivi bya tintivi.

²⁰ Yi kwini a ntlhari? A kwini a mutrali? A kwini a muphikisi wa minkama leyi? Xikwembu Nkulukumba angayentxanga leswaku a vutlhari bya misava leyi byindruluka vusinge xana?

²¹ Hikusa leswi, a vutlharini bya Xikwembu Nkulukumba a misava mingamutivangakiki Xikwembu Nkulukumba hi vutlhari bya yone, Xikwembu Nkulukumba atirandreli a kuhuluxa a vapfumeli hi vusinge bya kurera a Ivangeli.

²² Hikusa a va-Yuda vakombela a mahlolana na kasi a va-Girika vadjula a vutlhari;

²³ kambe hine hihuwelela Kriste lweyi avambiwiki axihambanwini, leswi swinga xikhunguvanyiso ku va-Yuda na kone swinga vusinge ku va-Matiko.

²⁴ Kambe ku lava vavitaniwiki, va-Yuda kumbe va-Girika, Kriste i ntamu wa Xikwembu Nkulukumba ni vutlhari bya Xikwembu Nkulukumba.

²⁵ Hikusa a vusinge bya Xikwembu Nkulukumba i vutivi ngopfu kutlula vhanu, ni gome dra Xikwembu Nkulukumba i ntamu wukulu kutlula vhanu.

²⁶ Vamakweru, yanakanyani-ke a kuvitaniwa kwenu; hikusa ahi vanyingi vavitaniwiki na vali tintivi hi kulandra a tlhelo dra nyama, mfuri ahi vanyingi a va ntamu kumbe a va mapswaliwela ya kutxhaviseka.

²⁷ Kambe Xikwembu Nkulukumba ahlawuli leswi swinga vusinge ku misava leyi akuva ayentxela tingana a tintivi, mfuri ahlawuli leswi swinga swa gome amisaveni akuva ayentxela tingana a mintxumu leyi minga ya ntamu;

²⁸ na kone Xikwembu Nkulukumba ahlawuli a mintxhumu leyi ya kutrongahateka amisaveni, ni leyi midreliwaka, ni mintxumu leyi mingaliki kone, akuva ahelisa a mintxumu leyi minga kone;

²⁹ akuva kungavi ni lweyi angatitwalisaka hi swakuka-ndlela amahlweni ka Xikwembu Nkulukumba.

³⁰ Kambe n'wine n'wi vakwe, hi le ku Yesu Kriste, lweyi ku hine andrulukiki vutlhari, ni vululami, ni kuxwenga, ni vutiruli hi kurandra ka Xikwembu Nkulukumba,

³¹ akuva, swanga hi leswi kutraliwiki: Lweyi atitwalisaka, atitwaliseli a Hosini.