II Yhn 1 - Testamente Ledrimpswha ni Mapsalma

Kulosa

¹ Mine murangeli lwenkulu, ni tralela nkosikazi leyi yilangiwiki, ni vana va yone lava ni varandraka hi xihlayelamfuri, kutani ange mine ntsena, kambe na kone, ni hinkwavu lava tivaka xihlayelamfuri.

² Kuve leswaku a xihlayelamfuri xile ku hine, kutani xitava na hine hi la kungahelikiki.

³ A timpswalu, ni lirere ni kurula, leswi swipfaka ku Xikwembu Nkulukumba Tatana, ni le ku Yesu Kriste, N'wana wa Tatana, switava na n'wine hi xihlayelamfurini ni lirandru.

Xihlayelamfuri ni lirandru

⁴ Nive ni kunyoxa ngopfu hikuva ningakuma van'we ku vana vaku lava vafambaka tindleleni ta xihlayelamfuri, mayelanu ni niswileleto swa Xikwembu Nkulukumba Tatana.

⁵ Swoswi ke, nkosikazi na kukombela, na kunge swanga hi loko ni kutralela leleto ledri drimpswha, loko kunge ledri hi dri yamukeliki kusukela kusunguleni: leswaku hi randrana van'we ku van'wana.

⁶ Kutani a lirandru hi ledri: hileswaku hi famba hi swileleto swake. A leleto ledri, swanga hi leswi n'wingaswiyingela kusukela kusunguleni, hileswaku fambani alirandrwini droledro.

⁷ Hikusa kunivakanganyisi vanyingi vahangalakiki misaveni, lava vangakholwikiki leswaku Yesu Kriste atile hi nyama; lavo ivakanganyisi ni vakaneti va Kriste.

⁸ Tivonelani, akuva n'wingalahlekeliwi hi mihandru ya leswi n'wiswitireliki, kambe akuva n'wiyamukela hakelo ledri fanekelaka.

⁹ Lweyo ni lweyo a humaka dondrweni ya Kriste, angatrhami ku yone, angana Xikwembu Nkulukumba; lweyi a trhamaka na atiyile adondrweni ya Kriste, yene ana Tatana ni N'wana.

¹⁰ Loko kuta mhunu ku n'wine, na angabuyisi dondriso leyi, n'wingamuyamukeleni atindlwini tenu, nambi kumuhlayela hoyo-hoyo.

¹¹ Kutani lweyi amuhlayelaka hoyo-hoyo atiyentxa lweyi atlhanganaka ni mintiro yake leminfani.

Madrungula ya kuhetelela

¹² Afa nahalini mintxhumu minyingi ya kun'witralela; anidjulanga kuswiyentxa hi papela ni tinta, nirindrela kuta ku n'wine, natakhanela na n'wine hi ritu dranga, akuva akutrhava kweru kuhetiseka.

¹³ A vana va makwenu wa wansati angamuhlawuliwa, vakudrungula.