II Tmt 1 - Testamente Ledrimpswha ni Mapsalma

Kulosa

¹ Pawulosi, mupostola wa Yesu Kriste hi kurandra ka Xikwembu Nkulukumba, hi xidumbiso xa vutomi lebyinga ku Kriste Yesu,

² ku Timotewu n'wananga lweyi arandrekaka, a timpswalu ni lirere ni kurula, leswipfaka ku Xikwembu Nkulukumba Tatana, ni le ku Kriste Yesu, Hosi yeru.

Kukhensa ni kukhongotela

³ Ni tlangela Xikwembu Nkulukumba lweyi ni mutirelaka swanga hi vakokwana vanga, hi lipfalu ledri dribasiki; na kone anikaluti kukudrimuka aswikhongotweni swanga vusiku ni nhlikanhi.

⁴ Ni loko ni drimuka minyembeti yaku, ni navela kukuvona akuva ni tala hi kutrhava;

⁵ hi kukumbuka kupfumela kwaku loku ngeke na kukanganyisa, loku afaka ali naku kokwana waku Loyide kusunguleni, ni mamana waku Ewunice, ni nikudumba leswaku unaku na wene.

⁶ Hileswo-ke, ni kudrimuxa leswaku upfuxa nyiko ya Xikwembu Nkulukumba leyi yinga ku wene hi kutlhantekiwa ka mavoko yanga.

⁷ Hikusa Xikwembu Nkulukumba angahinyikanga moya wa vutoya, kambe wakuva wa ntamu, ni lirandru ni vutlhari.

⁸ Hileswo-ke ungave ni tingana hi vumboni bya Hosi yeru, nambi kakuva ha mine, ninga mubohiwa wa yone; kambe yingela kuvaviseka kun'we na mine, a Ivhangeleni leyinene, hi ntamu wa Xikwembu Nkulukumba;

⁹ lweyi anga hi huluxa, anga hi vitana hi vitaniwo ledra kuxwenga, kunge ha mintiro yeru, eke ku hi vitana hi kutirandrela kwake, ni hi timpswalu leti hinga hananiwa tone ha Kriste Yesu, na minkama leyi mingahelikiki mingasanganava kone,

¹⁰ a tivonekisiki swoswi, hi kuvoneka ka Muhuluxi weru Kriste Yesu, lweyi ahelisiki kufa, avonekisa vutomi ni kuhanya loku kungahelikiki hi Ivangeli,

¹¹ leyi ni bekiwiki kuva mureri ni mupostola, ni mudondrisi wa yone.

¹² Hileswo-ke naxaniseka ha swone; kambe anina tingana hikusa nitiva lweyi nipfumeliki ku yene, nidumba leswaku ana ni ntamu wa kubekisa leswi nibekiki ku yene, kukota kutlhasa ledro siku.

¹³ Tamelisisa a mpimu wa maritu lawa manene lawa umadondriki ku mine, hi kupfumela ni lirandru leswinga ku Kriste Yesu.

¹⁴ Leswi swinene leswi swibekiwiki ku wene, swibekise hi Moya wa Kuxwenga lowu trhamaka ndreni kweru.

¹⁵ Wa switiva swoswi leswaku hinkwavu va-le-Aziya vanitrikile, amakari kwavu anga, Figelo na Hermogenisi.

¹⁶ Aan'winyiki Xikwembu Nkulukumba a vumbilu byake ku ndangu wa Onesiforo, hikusa ha kanyingi animbuweteliki angavanga na tingana ha mine hikuva mine ni bohiwile.

¹⁷ Atiki awatlhasa a Roma, anidjulisisi anikuma.

¹⁸ A Hosi ayimunyiki hi siku ledriya, leswaku a kuma vumbilu ku Hosi. Nakone wene wa switiva ngopfu kutlula mine, leswaku mintiro mingani aniyentxeliki le Efesa.