II Ptr 3 - Testamente Ledrimpswha ni Mapsalma

Matilo mampswha ni misava mimpswha

¹ Varandriwa, ledri i papela dra vubiri ledri ni n'witralelaka; ku wone, nidjulisisa kupfuxeta mimpimiso yenu leyinene hi swidrimuxo,

² akuva n'widrimuka maritu lawa ya khale mahlayiwiki hi vaprofeta lava kuhlawuleka, ni xileleto xa Hosi ni Muhuluxi, lawa n'widondrisiwiki hi vapostola venu.

³ Akusungula ka hinkwaswu n'wifanela kutiva leswaku masikwini ya vugamu kuta humelela vhanu, avahleki ni swisandri swavu, vatifambela mayelanu ni kunavela kwavu

⁴ vaku: xikwini a xidumbiso xa kubuya kwake? Hikusa kusukela loko vatatana veru vayetlela kutani hinkwaswu swahayimisi xiswoswo, swanga kusukela kusunguleni ka misava.

⁵ Hikusa vadrivalile ha vomu leswaku kusukela ka khale ngopfu amatilo ni misava afa swilikone, swone swatruvukile matini, na hikola ka mati switumbuluxiwa hi Ritu dra Xikwembu Nkulukumba;

⁶ na kone kuvi hikola ka mati, a misava ya nkama wa khale misuvisiwiki hi ndambi.

⁷ Kambe hi ritu droledro a matilo ni misava swibekisiweli ndrilo, swibekisiweli a siku drakuyavanyisa ni kusuvisa vhanu vavabihi.

⁸ Vanakulori, kahali ni ntxhumu mun'we lowu n'wingafaneliki kuwudrivala: hileswaku siku drin'we ku Hosi drakuva swanga khume dra madzana ya malembe, ni khume dra madzana ya malembe swanga siku drin'we.

⁹ Hi leswaku a Hosi ayihlweli kuyentxa leswi yi dumbisiki swone, swanga heswi a van'we vapimisaka leswaku yahlwela, kambe an'wilehisela mbilu, hikusa angadjuli kuva ni mun'we alahleka, kambe leswaku hinkwavu vandruluka.

¹⁰ Kambe a siku dra Hosi dritlhasa swanga hi muyivi, hi siku ledro a matilo mata hundra hikudruma lokukulu, hinkwaswu swivumbiwa switapswha swihela, kutani a misava ni hinkwaswu leswinga kuyone, switahisiwa.

¹¹ La kakuva hinkwaswu leswo switaka hohlotisiwa xileswo, n'wifanela kuva vhanu lava vafambaka mahanyeleni yakuhlawuleka ni vukhongoti,

¹² na n'wilavisela n'wiyimela a siku dra Xikwembu Nkulukumba, na n'witinyiketela leswaku drita hi kuhangwesa, hi siku ledro amatilo mataka hisiwa mahelisiwa ni swivumbiwa hinkwaswu switamunyetiwa hi ndrilo.

¹³ Kambe hine swanga hi xidumbiso xa Xikwembu Nkulukumba, hi lavisela matilo mampswha ni misava mimpswha, lomu kutrhamaka kurula.

¹⁴ Hikola kaleswo varandriwa, leswi n'wahalaviselaka a siku ledro, khinyelani kuyentxa hinkwaswu akuva atan'wikuma hikurula na n'wingenabati mfuri na n'wingenakusoliwa.

¹⁵ Pimisani leswaku akulehisa ka mbilu ka Hosi yeru i kuhuluxiwa kweru, swanga hileswi na yene Pawulosi, makweru lweyi arandriwaka an'witraleliki hikulandra vutlhari lebyi anyikiwiki byone,

¹⁶ hi loko akhanela hi mintxhumu leyi, arandra kuswiyentxa kumapapela yake hinkwawu lawo kunga ni swin'we swakunonowha kuswiyingelisisa, leswaku lavanga dondrangakiki, ni lava vangatiyangakiki vaswindrulutelaka kulahlekeni kwavu, swanga heswi vayentxaka maritwini man'wana akuva vamambundrumuxa kunene.

Vugamu

¹⁷ N'wine ke, varandriwa, n'witivisiwile swoswi, tivonelani! N'winga titrikeni n'wikokiwa hixihono xa lavanfani, akuva n'wingatiwa akutiyeni kwenu.

¹⁸ Kutlula hinkwaswu, yanani mahlweni n'wikula atimpswalwini ni le kutiveni ka Hosi yeru ni Muhuluxi Yesu Kriste. Ku yene akunyikiwe lidrumu, kusukela swoswi nikuyatlhasa sikwini ledringahelikiki! Amen.