II Ptr 2 - Testamente Ledrimpswha ni Mapsalma

Vadondrisi va madrimi

¹ Kahumeleli vaprofeta va madrimi amakari ka tiko dra va-Yuda, swanga hi leswi vataka va kone makari kwenu a vadondrisi va madrimi, lava taka dondrisa tidondro leti honisaka ta madrimi vatalandrula ni Hosi leyi vatiruliki, kambe vatatekeliwa kulahlekeni hi kuhangwesa.

² Avanyingi vatalandra amahanyelo ni swiyentxo swavu swakubiha, hinkonta yavu vata khanela kubiha hi Ndlela ya xihlayelamfuri.

³ Kutani hikunavela kwavu, vatayentxa mabindru ha n'wine hi maritu ya kukanganyisa; kambe kusukela ka yavanyiso ledri vabekiseliwiki drone khale dringahlweli, ni kusuvisiwa kwavu kunga khutriyeli.

⁴ Ke, loko Xikwembu Nkulukumba angatretrelelanga tintrumi loko tidohile, kambe atitxukumetile a gehena, atinyiketa akheleni dra munyama lana tinyimelaka siku dra yavanyiso.

⁵ Nakone angatretrelelanga a vakhale, loko a avarumeli ndambi henhla ka misava ya vhanu lava vanfani, ahuluxi ntsena Nowa, a mureri wa kululama ni ntlhanu wa vhanu na vabiri.

⁶ Amiti ya Sodoma na Gomora, amiyentxa nora, amiyavanyisela kusuvisiwa, akuva mitayentxa xikombiso ku vhanu lava vatakahumelela ntrhaku vahanya hivunfani.

⁷ Kambe ahuluxi Loti, hi leswi afaka e wa kululama, hikukaratiwa hi mayentxela ni mahanyela ya vhanu va kusomboloka.

⁸ Hikusa amululami lweyi, hi leswi afaka a swivona ni kuswiyingela, loko na ahanya makari kwavu, afa swixanisa a hika drakwe hi masiku hinkwawu hikola kavubihi lebyi afaka byiyentxiwa hi vhanu lavo.

⁹ Hi xileswi, a Hosi ya swikota kuhuluxa valulami amindringweni, ni kubekisela vasomboloki xikhatiso xa siku drayavanyiso,

¹⁰ ngopfu-ngopfu lava tinyiketelaka kunaveleni lokunfani ka nyama, ni kusandra a ntamu wa vuhosi; vanivurena, avanaxitxhavu ku mintamu ya le tilweni, kuko va misola.

¹¹ Kasi-ke, atintrumi, nambi leswi tinga ni ntamu ngopfu ni vundruna, ativahlayeli maritu ya yakuyavanyisa hikuvasandra mahlweni ka Hosi.

¹² A vhanu lavo va swanga hi swihari leswi ngeke na kuyanakanya, leswi hanyelaka kudlayiwa ni kuyisiwa kudlaweni, vakhanela kubiha hi leswi vangaswiyingelisikiki, vata suvisiwa hi ndlela ya kufana ni ya swihari,

¹³ na vayamukela a hakelo drakusomboloka kwavu. Vayanakanya leswaku i ndjombo kutinyoxisa a hlikanhini, i mabati-bati ni swisandru, vatinyoxela akukanganyiseni kwavu, loko vada na n'wine.

¹⁴ Amahlu yavu matali hi vuwoswi lawa mangatrikiki kudoha, vareya mimoya leyi mingatiyangakiki vani timbilu leti titaliki hikurandra vufuyi. I vhanu lava varuketeliwiki.

¹⁵ Vatrutrumi a ndleleni leya kululama, va lahleka, valandri ndlela ya Balaami, n'wana Bosori, lweyi angarandra xihiwa xavusomboloki;

¹⁶ kambe ayamukeli kukhatisiwa hi kudoha kwake, a mbongolo leyi ngeke na kuvulavula, yi vulavula hi ritu dra swanga i dra mhunu yi yalela vusinge bya muprofeta.

¹⁷ Volavo vakutanu va swanga tinhlovo leti ngeke na mati, ni swanga matlavi lawa masusumetiwaka hi xidzedze. Ku vone vahlawuleliwi munyama wa kumphuma ngopfu.

¹⁸ Vavulavula maritu ya kutikulisa ni ya kuka ndlela, na matirela kunavela ka nyama, ni ka vuwoswani, vanga lava yisaka vhanu lava afaka vahatrutruma lava vahanyaka kuhoneni.

¹⁹ Vadumbisa kuntrhunxeka, na kasi vone i swikarawa swa vuhoneki, hikusa mhunu mun'wana-ni-mun'wana i xikarawa xa leswi mufumaka.

²⁰ Hikolahu ka leswo, loko ntrhaku n'wihulukile kuhonekeni ka misava hi kutiva Hosi yeru ni Muhuluxi Yesu Kriste, amatrhamelo yavu mandruluki matlula lawa ya kusungula hi kubiha.

²¹ Hikusa afa switayampswa ku vone loko afa vangativanga ndlela ya kululama, kutlula leswaku vayitiva na ntrhaku vatlelela vatravukana ni Nawu lowu vanyikiwiki wone wa kuxwenga.

²² Kuhumelela ku vone leswi hlayiwaka hi ritu dra xihlayahlaya lexi xinene lexaku: A mbyana yi buyeli amanhlanteni ya yone, ni nguluve leyi nhlampsiwiki yi buyeli kupfingalaveni ntrakeni.