II Ptr 1 - Testamente Ledrimpswha ni Mapsalma

Ku losa

¹ Simoni Petrosi, a nandra ni mupostola wa Yesu Kriste, ku lava hinkweru hi yamukeliki kupfumela kakufana kalisima, akululameni ka Xikwembu Nkulukumba weru ni Muhuluxi Yesu Kriste.

² A timpswalu ni kurula aswin'witaleli, akutiveni ka Xikwembu Nkulukumba na Yesu Kriste, Hosi yeru.

A vunene bya mukriste

³ Hileswi hi ntamu wakwe wa vukwembu (vunkulukumba bya le henhla-henhla), ahi hananiki hinkwaswu leswifaneliki avutomi ni lirere, ni hikutivisisa lweyi ahivitaniki akuphatimeni kwake ni ntamu wakwe.

⁴ Hikola ka leswo, ahinyiki aswidumbiso swake swalisima ledrikulu ngopfu swinene, akuva ha swone n'wiva ni vuhlengeli bya ntumbuluku wa kuhlawuleka wa le henhla-henhla, n'witrutruma ku swinavelo swakubiha swinga kone misaveni.

⁵ Hikolahu ka leswo mfuri, hikutlhanganisa mintamu yenu hinkwayu, tlhanganisani vupfumeli byenu hi vunene, avuneneni n'wiva ni vutivi;

⁶ ni hi vutivi, akutikhoma ha byenu; akutikhomeni loku, n'wiva ni kutiyisela; ni le kutiyiseleni, nwiva ni vukhongoti;

⁷ hi vukhongoti, n'wirandrana, hi kurandrana ka lirandru.

⁸ Hikusa leswo loko swili kone ku n'wine hi ntalu, ku n'wine swiyandra, swin'wiyentxa akuva n'wingavi lava valolohaka, nambi kuva n'wingabeki mihandru akutiveni ka Hosi yeru Yesu Kriste.

⁹ Kambe lweyi leswo a ngeke na swone i wakufa mahlu, a vona ntsena leswi swinga kusuhi, a drivala kuhlampswiwa a swidoho swake swakhale.

¹⁰ Hileswo-ke, vamakweru, hundrisani a kukhinyela ngopfu, kutiyisa vitaniwo ni hlawuliwo drenu; hikusa loko n'wiyentxisa xileswo, n'wingati khunguvanyeka ni kan'we.

¹¹ Kutani, hi ndlela leyo n'witayengeteliwa ngopfu a nyangwa ya kunhingena Mfun'wini wa Yesu Kriste, Hosi yeru ni Muhuluxi.

¹² Hileswo-ke, nitaya mahlwini hi ku n'widrimuxa hikola ka leswo, nambi n'wiswitiva, ni kuva n'witiyile xihlayelamfurini lexi n'wingana xone.

¹³ Nambi swili tanu, na nahali kola antrongeni, nipimisa leswaku swilulamile kun'wikawuka hi swidrimuxo leswi,

¹⁴ nadumba leswaku nita hatla nitrika a ntronga wanga, swanga hileswi nipfuleteliwiki hi Hosi yeru Yesu Kriste.

¹⁵ Kambe hi tlhelo dranga, nitakhinyela hi ntamu, hi kuyentxa leswaku, hinkwayu minkama n'wibekisa swidrimuxo hinkwaswu, nambi loko nitava nisukile.

Xidumbiso xa ritu dra vurumiwa

¹⁶ A dondro leyi hi minyikiki henhla ka ntamu ni kubuya ka Hosi yeru Yesu Kriste, ayi tiseketelanga ha swihitana swavutlhari, kambe hine hi timboni tikulu ta yone hi kuswivona hi mahlu yeru.

¹⁷ Hikusa Yene ayamukeli xihluwa ni lidrumu leswi swipfaka ku Xikwembu Nkulukumba Tatana, hi loko arumeliwile a ritu ledriya drakuphatima drakutlakuka hi le tilweni driku: lweyi i N'wananga lweyi arandrekaka, lweyi ni nga ni kutrhava kukulu ha Yene!

¹⁸ Nakone, a ritu ledri, dra kupfa hi le tilweni, hine hi dri yingelile, loko hivi na Yene anhaveni ya kuxwenga.

¹⁹ Xileswo, hini kudridumba ngopfu swinene a ritu dravuprofeta, kutani n'wine n'wiyentxa swone loko n'widriyingelisisa, hikusa dri swanga hi motre lowu vaningaka mbangwini wa kumphuma, byiko byixa, na yo nyeleti ya mixo yi vaninga timbilwini tenu.

²⁰ Kambe na n'witiva leswi hi kusungula: akuna vuprofeta nibyin'we bya Matralwa byipfaka kutlhamuxeliweni ka kukala ndlela.

²¹ Hikusa a kungiva ni vuprofeta ni byin'we byitivisiwiki hi kurandra ka vumhunu, kambe, a vhanu vakuhlawuleka vakhaneli na swipfa ku Xikwembu Nkulukumba, na vafambisiwa hi Moya wa Kuxwenga.