II Kor 8 - Testamente Ledrimpswha ni Mapsalma

Kunyika ka vukriste

¹ Han'witivisa vamakweru, timpswalu ta Xikwembu Nkulukumba leti tinyikiwiki a makereke ya Makedoniya.

² Hikusa andreni ka mindringo leyi minyingi ya kuxaniseka, avusiwaneni byavu lebyi byikulu vayandrisile vupfundri bya kuhanana kwavu.

³ Hikusa, mine ni mboni ya leswi swaku vahanani ni kutlula ntamu wavu, vahanani hikuswirandra,

⁴ vahikombeli hi kuhikhongota ngopfu, akuva hiyamukela leswi angahumexa swone akuva hi yavela tinsasi.

⁵ Nakone, avayentxanga leswi afaka hi lavisele swone ntsena, kambe varangi vatinyiketa ku Hosi ha byavu, ntrhaku hine, hi kurandra ka Xikwembu Nkulukumba.

⁶ La kakuva hikhongoti Tito, lweyi a sunguliki ntiro lowo wa timpswalu aheti wone amakari kwenu.

⁷ Swanga hi leswi n'witraleliwiki matlhelo hinkwawu, akupfumeleni, ni le kuvulavuleni, ni le kutiveni, ni le kukhinyeleni hinkwaku, ni le kurandreni, tralelani ni le ntirweni wa timpswalu.

⁸ Anihlayi hi kun'wileleta, kambe ni dringa hi nkhinkhi ya van'wana avunene bya lirandru drenu;

⁹ hikusa n'wine n'witiva swinene a lirandru dra Hosi yeru Yesu Kriste, lweyi nambi loko ali xipfundri kambe a tindruluti xisiwana hinkonta yenu akuva n'windruluka swipfundri hinkonta ya vusiwana byake.

¹⁰ Ku mhaka leyi, ni nyika amayanakanyela yanga; hikusa swan'wifanela n'wine lava vangasungula lembe ledri drihundriki, kunge hikutira ntsena kambe hikurandra ntiro lowo.

¹¹ Swoswi ke, hetisani ntiro lowu miwusunguliki, akuva swanga hi leswi n'wikombisiki nkhinkhi ya kuwurandra, hi swoswo helisani ntiro wolowo mayelana ni leswi n'winganaswu.

¹² Hikusa, loko nkhinkhi yili kone, yita yamukeleka mayelanu ni leswi mun'wana-ni-mun'wana anganaswu, na kungeke hi leswi angeke naswu.

¹³ Hikusa ahi leswaku van'wana vava ni kuruleliwa, n'wine n'wibindreliwa, kambe hi leswi swaku kuva ni kudringana.

¹⁴ Kambe ku nkama lowu, a ntalu wa leswi n'winganaswu switapfuna akupfumala kwavu, akuva a ntalu wa leswi vanganaswu wupfuna leswi n'wine n'wiswipfumalaka; kutani, xileswo, kutava ni kudringana,

¹⁵ Swanga hileswi kutraliwiki: Ku lweyi atroveliki swinyingi, aswimusalelanga; ni lweyi afaka ali ni switrongo, angapfumalanga ntxhumu.

Vatirikulobye va Pawulosi

¹⁶ Akutlangeliwe Xikwembu Nkulukumba lweyi abekiki mbilwini ya Tito akunavela ka kufana ni kweru ka kun'wipfuna.

¹⁷ Hikusa apfumeli xikombelo xeru, asuka hi nkhinkhi ata ku n'wine, a famba hi kuswirandra.

¹⁸ Hi murumela ku n'wine kun'we ni makweru, lweyi akhensiwaka makerekeni hinkwawu hinkonta ya Ivangeli.

¹⁹ Kunge hi leswo ntsena, amakweru lweyo ahlawuliwi hi makereke akuva ahi heketa antirweni lowu wa timpswalu, akuva hidrumisa a Hosi, na mfuri hi kombisa akuswirandra kweru;

²⁰ na xiswoswo, hitivonela leswaku kungavi na lweyi ahirambelaka hikola ka nhlengo lowu wukulu wutiriwaka ha hine.

²¹ Hikusa akuvilela kweru hileswaku hitira hivunene, kunge ntsena mahlweni ka Hosi, kambe na kone mahlweni ka vhanu.

²² Kun'we na vone hi n'wirumela mun'wana makweru, lweyi ha kanyingi hi bekaka kudumba, hikola ka leswo ha switiva leswaku ha kanyingi alulamela a kupfuna. Swoswi leswi angani kun'widumba ngopfu, ahali ni kunavela ngopfu akupfuna.

²³ Ha Tito, ni hlaya leswaku i nakulori atira na mine akun'wipfuna. Na hikola ka vambeni vamakweru, varumiwa vamakereke, nikukhensa Kriste.

²⁴ Kombisani ku man'wana makereke alirandru drenu ledri ni kutitwalisa kweru hinkonta yenu amahlweni ka vhanu lavo.