II Kor 6 - Testamente Ledrimpswha ni Mapsalma

¹ Swanga hi leswi hitirisanaka na yene, ha n'witratriya na kone leswaku n'wingayamukeli mahala a timpswalu ta Xikwembu Nkulukumba.

² Hikusa Yene ali: Nikuyingelile, hi nkama lowu afaka unidjula, kutani ni kupfunile, hi siku dra huluxu. Hikusa swoswi hi wo nkama lowu wa hombe, ni siku dra huluku.

³ Ahi khunguvanyisi mhunu ha ntxhumu, akuva avutireli byeru byingasoliwi.

⁴ Kambe kuhinkwaswu, hi tiseketela swanga vatiri va Xikwembu Nkulukumba: Hikutiyisela loku kukulu, amahlomulweni, ni le kutitroneni, ni le kukamiweni ka mbilu,

⁵ akubiweni, mabohelweni, ne timpfilumpfilwini, mintrhweni, vulaveleli ni kutitroneni.

⁶ Ni hikubasa, ni kutiva, nihi kulehisa mbilu, ni vunene, nihi ka Moya wakuxwenga, hi lirandu na kungena kukanganyisa,

⁷ aritwini dra xihlayelamfuri, antan'wini wa Xikwembu Nkulukumba, nihi matlhari ya kululama, kungava kutimpfekela kumbe kulweni.

⁸ Hi kukhensiwa; ni kudreliwa, hi kurukiwa ni kutwalisiwa; ingi ha kanganyisa kambe na hili vaxihlayelamfuri;

⁹ swanga ahitibyiwi, na kasi hitibyiwa swinene; swanga hiloko hifa, na kasi ha hanya; swanga lava vakhatisiweke, kambe ahi fanga;

¹⁰ hivi lava vaxukuvalisiwaka, kambe hitrhava hi minkama hinkwayu; swanga swisiwana, kambe hifuyisa lava vanyingi; na hinge na ntxhumu, kambe hive ni hinkwaswu.

¹¹ Ku n'wine va-le-Korinto, amilomu mipfuleliweli n'wine, ni timbilu teru tiyanamile.

¹² An'wipfaleliwanga ku hine; kambe n'wine n'witipfaleli timbilwini tenu;

¹³ ke, hitlheliselani hi vunene byeru, ni khanela na n'wine swanga vana veru, tiyanamisani na n'wine.

Akutlhangana ni lava vangapfumeliki a swidjuleki

¹⁴ N'wingarwaleni mpinga wun'we ni lava vakuka vangapfumeli; kutani, Swingakotekisa kuyini akuva ni ntlhanganu wa kululama ni wa vubihi? Swinga kotekisa kuyini a kutlhangana ka livaningo ni munyama?

¹⁵ Xana akuyingelana ka Kriste na Diyavulosi hi kwini? Kumbe, i ntwananu muni wa vapfumeli ni lava vangapfumelikiki?

¹⁶ Kuni ntlhanganu muni amakari ka yindlu ya Xikwembu Nkulukumba ni swikwembu swakuka ndlela xana? Hileswaku hine hi tiyindlu ta Xikwembu Nkulukumba lweyi a hanyaka, swanga hi kuhlaya kwake: ni ta yaka makari kwavu ni famba na vone. Nitava Xikwembu Nkulukumba wavu vone va tava tiko dranga.

¹⁷ Hileswo-ke, sukani makari kwavu, n'witravukana na vone, kuhlaya Hosi; n'winga khumbeni mintxhumu ya kunyama; kutani mine ni ta n'wiyamukela,

¹⁸ mine nitava tatana wenu, na n'wine n'witava vana vanga vava vanuna ni vavasati, kuhlaya Hosi ya ntamu hinkwayu.