II Kor 4 - Testamente Ledrimpswha ni Mapsalma

A vukosi aswibyeni swa vumba

¹ Hileswo-ke, leswi hingani vutireli lebyi, hikola ka lirere ledri hiyentxeliwiki drone, ahi heli timbilu.

² Hi trhikile amintxhumu leyi mifihliwiki leyi mikhomisaka tingana; ahi yentxi hi marengu, nambi kuli kusombolota ritu dra Xikwembu Nkulukumba; hikuhambana, nitinyiketa kutivisa alivaleni a xihlayelamfuri ku vhanu lavangani lipfalu, amahlweni ka Xikwembu Nkulukumba.

³ Kambe loko Ivangeli yeru yaha fihliwile, yifihlekile ku lava valahlekaka.

⁴ Vone lava a swikwembu swa nkama lowu swidlayiki miyanakanyu yava kuka kupfumela, akuva vangati vaningeliwa hi Ivangeli ya kutwala ka Kriste, lweyi angaxifaniso xa Xikwembu Nkulukumba.

⁵ Hikusa ahi tireri hine, kambe hi rera Kriste a Hosi, mfuri hine vatiri venu hinkonta ya Kriste.

⁶ Hikusa Xikwembu Nkulukumba ati: A livaningo dritavaninga amunyameni. Hikusa Yene mfuri a vaningile timbilwini teru, akuva hi vaninga kutiveni ka lidrumu dra Xikwembu Nkulukumba, amombyeni wa Yesu Kriste.

⁷ Kambe anhlengwe leyi, hina yone aswibyeni swavumba, akuva avukulu bya ntamu lowu byiva bya Xikwembu Nkulukumba, wunge weru.

⁸ Hokamiwa anhlomulweni hi matlhelo hinkwawu, kambe ahiheli timbilu, haganaganeka kambe ahitriki kudumba;

⁹ haxanisiwa, kambe ahifulareliwi; hihelisiwa ntamu, kambe ahisuvi;

¹⁰ na hirwala amirini yeru, a kufa ka Yesu minkama hinkwayu, akuva na byone a vutomi byake byitikombekisa amirini yeru.

¹¹ Hikusa hine hihanyaka, hinyiketiwa kufeni nkama hinkwawu hinkonta ya Yesu, akuva na kone a vutomi byake byitikombisa amirini yeru leyi mifaka.

¹² Xi leswo, aku fa kutira ku hine, kambe ku n'wine kutira vutomi.

¹³ Na hili ni Moya mun'we wa kupfumela, swanga hi leswi kutraliwiki: Mine nipfumelile kutani, xileswo ni khanelile. Nakone na pfumela, xiswoswo na khanela, na hine hipfumelile xileswo na hine hakhanela;

¹⁴ na hiswitiva leswaku lweyi apfuxiki Hosi Yesu, na hine ata hipfuxa na Yesu, akuva ahi tlhanganisa na n'wine.

¹⁵ Hinkwayu mintxhumu mikone hikola ka lirandru drenu, hikuva loko atimpswalu tiyandra, na kone kutlangela kuva kunyingi hikola ka lava vanyingi, akuva kutwalisiwa Xikwembu Nkulukumba.

Ni navela kuva na Kriste

¹⁶ Hileswo-ke, ahiheli ntamu, ni kutrongo. Nambi loko avumhunu byeru bya le handle byibuna, avumhunu byeru bya le ndreni byipfuxiwa siku drin'wana ni drin'wana.

¹⁷ Hikusa a mahlomulo ya nkama lowu wa swoswi mavevuka, mahitisela lidrumo drakuphatima loku kungahelikiki, loku kungekena kupimanisiwa.

¹⁸ Hine hingalangusikiki leswi swivoniwaka, kambe ku leswi swingavoniwikiki. Hikusa leswi swivoniwaka i swa nkamanyana, kambe leswi swingavoniwikiki, i swaminkama hinkwayu.