II Kor 3 - Testamente Ledrimpswha ni Mapsalma

Antirweni wa Ivangeli

¹ Xana hitlhela hi sungula kutiyimela? Kumbe xana hi fanela kutidjulela mapapela yaku hi yimela ha wone ku n'wine, swanga hi van'wana xana? Ni mapapela ya ku hi yimela lawa mapfaka ku n'wine xana?

² N'wine n'wi papela dreru, ledri dritraliwiki atimbilwini teru, dritiviwaka ni kuhlayiwa hi vhanu hinkwavu,

³ Hikuva n'wivoniwaka leswaku n'wimapapela ya Kriste, lawa matraliwiki hikola ka ntiro weru, lawa mangatraliwangakiki hi inki, kambe hi Moya wa Xikwembu Nkulukumba lweyi a hanyaka, na kunge hi swipeperele swa maribye, kambe, atimbilwini ta vhanu.

⁴ Hini kudumba ku Xikwembu Nkulukumba, loko kupfaka ha Kriste;

⁵ na inge leswaku hine havusweru haswikota kutiyanakanyela xantxhumu, swanga hi loko swipfa ku hine, aswitanu, akuswikota kweru kupfa ku Xikwembu Nkulukumba,

⁶ lweyi ahinyikiki ntamu wa kuva vatireli va xipfumelelanu lexi ximpswha, na inge xipfumelelanu xa nawu wa kutraliwa, kambe xa Moya; hikusa a nawu wa kutraliwa wadlaya, kambe a Moya wahanyisa.

⁷ Kambe loko avutireli bya kufa, lebyi byitraliwiki hi maletela ya kukenyetiwa maribyeni, byiyambali kuphatima lakakuva a vana va Israyele vahluleka ni kulavisa a liso dra Moxe, hinkonta ya kuphatima ka liso drakwe, na kasi afa kuli kuphatima loku kuhundraka,

⁸ xana byingaka byinge na lidrumu lebyi byikulu avutireli bya Moya xana?

⁹ Hikusa, loko avutireli bya kuyavanyisa byiveni kuphatima, ngopfu-ngopfu avutireli bya kululama byi hundrisa hi kuphatima.

¹⁰ Xiswoswo, ha kunene a kuphatima loku phatimiki kusunguleni akuna kufanisiwa ni kuphatima ka swoswi, loku kunga kukulu ngopfu.

¹¹ Hikuva loko leswi swihelaka swilini kuphatima, ngopfu-ngopfu kuphatima leswi switrhamaka!

¹² Leswi-ke hinga nikulavisela koloko, hi nikutiya loku kulu aku khaneleni kweru.

¹³ Kutani ahiyentxisi xi-Moxe, lweyi afaka afihla mombo hi xixirelo, akuva a vana va Israyele vanga ti vona vugamu bya leswi helaka.

¹⁴ Kambe a miyanakanyu yavu minonon'whisiwile, kukondra kutlhasa masiku ya namunhla, hikusa loko vahlaya timhaka ta xipfumelelanu xa khale, a xixirelo lexo, xa ha vapfalela, vangapfuleteliwe leswaku, ku Kriste xa susiwa.

¹⁵ Kambe ni namunhla, loko kuhlayiwa mabuku ya Moxe, a xisirelelo lexo xehe kone miyanakanywini yavu.

¹⁶ Kambe, loko mun'we wavu andruluka ku Hosi, a xixirelo xasusiwa.

¹⁷ Ke, Hosi i Moya; kutani lomu a Moya wa Hosi wunga kone, kone kuni kuntrhunxeka.

¹⁸ Kutani hine hinkweru va mimombo leyi mifukumuliwiki, hi vonekela swanga hi xivonivoni, xa kutwala ka Hosi; handrulutiwa akuphatimeni hinkwaku, axifanisweni xakwe, swanga hi kuyentxa ka moya wa Hosi.