II Kor 12 - Testamente Ledrimpswha ni Mapsalma

Vukulu ni gome dra mupostola

¹ Kumbe swadjuleka akutitwalisa, nambi loko swingafaneli, nitava swivonisweni ni mimpfuletelo ya Hosi.

² Nitiva mhunu lweyi anga ku Kriste, hi mpfhuka wa khume dra malembe ni mune, lweyi atekeliwiki tilweni dra vuraru; (Kumbe ahandle, kumbe andreni ka miri, aniswitivi, switiviwa hi Xikwembu Nkulukumba)

³ na switiva mfuri leswaku, a mhunu lweyo (Kumbe ahandle, kumbe andreni ka miri, aniswitivi, switiviwa hi Xikwembu Nkulukumba)

⁴ atekeliwiki a paradiseni, ayingeli maritu ya kuka mangahlayeki, lawa mangafanelikiki kuhlayiwa hi mhunu.

⁵ Hikolahu ka leswo, nitatitwalisa; kambe anititwalisi ha vuswanga, loko kungali hi gome dranga ntsena.

⁶ Kambe nambi loko afa ningatititwalisa, ningavi singe, hikusa afa nitahlaya xihlayelamfuri; kambe naswitrika akuva kungativa ni lweyi atakatikarata ha mine hi leswi aswiyingelaka ni leswi aswivonaka ha mine.

⁷ Kambe akuva ningatitikukumuxa ngopfu hivukulu bya mimpfuletelo, nibekeliwi amitwa anyameni, anga ntrumi ya Sathana; akuva aniba ni leswaku ningatikulisi.

⁸ Ha yone ni khongoti kuraru ku Hosi akuva misuka ku mine.

⁹ Kambe a Hosi yiku ku mine: Atimpswalu tanga ta kudringana, hikusa a ntamu wanga wuhetiseka a gomeni, Hikolahu, nitatitwalisa agomeni dranga akuva ntamu wa Kriste wutrhama ku mine.

¹⁰ Na nyoxa hikola ka gome, aswiruko, akupfumala, akuxanisiwa ni kubindreliwa hinkonta ya lirandru dra Kriste. Hikusa, loko nini gome, lahu hi kone ninga ni ntamu.

Kukarateka hi vanhlengeletanu ya va-le-Korinto

¹¹ Nivi singe, hi kukhanelisa xileswi; kambe avi n'wine n'winisindrisiki akuva niva xiswoswo, hikusa n'wine afa n'witanitwalisa; hikusa anintrongo ku va apostolo volavo, nambi ninge wa ntxhumu.

¹² Axikombiso xa vupostolo byanga xi kombisiwi ku n'wine hi kutiyisela hinkwaku, hi swikombiso, ni hi mahlolana, ni hi mintamu.

¹³ Xana n'witluliwa ha yini hi man'wana makereke? Xana ahi leswi nikalaka ningan'wibindrelanga ha ntxhumu! Nidrivalelani ku xikhunguvanyiso lexo!

¹⁴ Hi swoswo, nilulamile akuta halanu ka vuraru, ningatin'wibindrela, hikuva anidjuli swenu, nidjula n'wine; hikusa ahi vana lava vafanekelaka kuhlengeleta vapswele, kambe avapswele hi vone vahlengeletaka a vana.

¹⁵ Mine hikurandra kwanga, ni lulameli kunyiketa hinkwaswu leswi ninga naswu, mfuri na mine hi vutama byanga nitatinyiketa, akuva ni n'wipfuna; loko ni n'wirandra ngopfu, n'witanirandra kutrongo xana?

¹⁶ Kambe aswive tanu, mine anin'wibindrelanga, ke, leswi ni tlharihiki ni n'wikhomi hi rengu.

¹⁷ Xana ni n'witekeli yini hi lava ningavaruma ku n'wine xana?

¹⁸ Nikombeli Tito leswaku ata halanu, kun'we ni mun'wana makweru. Xana angava an'witekeli ntxhumu xana? Xana ahi fambanga na yene hi moya mun'we xana?

¹⁹ Kumbe xana ni swoswi n'wahapimisa leswaku hitiyangulela ku n'wine, hi vulavuli ha Kriste amahlweni ka Xikwembu Nkulukumba, kambe hinkwaswu leswi, varandriwa, hileswaku n'wiyakiwa.

²⁰ Hikusa, na txhava kuta halanu natan'wikuma na n'wingasiva xileswi ni swirandraka, na mine na ningasiva xileswi n'wiswirandraka, akuva kungavi na timholova ni vukwele, ni mahlundru, ni kutravukana, ni mahlevo, ni kulumbetana ni kutikukumuxa, ni madzolonga.

²¹ Ni leswaku, ni loko nitatlhela nita ku n'wine, Xikwembu Nkulukumba wanga angani trongohati amahlweni kwenu, nidrilela lava vanyingi vanga doha khale, vangandrulukangakiki akusombolokeni kwavu, vusinge ni vumbuye leswi afaka vahanya ku swone.