II Kor 11 - Testamente Ledrimpswha ni Mapsalma

Pawulosi ahambana ni varumiwa vamadrimi

¹ Afa nirandra leswaku n'wini lehisela mbilu, nambi loko nili swanga ni singe drikulu, nisizani n'wini lehisela mbilu!

² Hikuva nan'wihisekela hi hisekelo dra Xikwembu Nkulukumba; hikusa ni n'wibekisile akuva nita n'wikombisa swanga wanhwanyana wa kukala angasina tiva wa nuna, lweyi a basiki, abuteliwaka nuna mun'we ntsena, inga Kriste.

³ Kambe ni txhava leswaku, swanga Eva lweyi angakanganyisiwa hi madrimi ya nyoka na n'wine a miyanakanyu yenu mingatxhuka mihoniwa, mitrika vunene ni kubasa leswi swiyisaka ku Kriste.

⁴ Hikusa, loko kunene kutlhasa mun'we, arera Yesu mumbeni lweyi hingan'wibyelangakiki, kumbe n'wipfumela kuyamukela moya wakuhambana ni lowu n'wiwuyamukeliki, kumbe ni Ivangeli leyi hambanaka ni leyi n'wiyi yamukeliki, lweyo, n'wamuyamukela swinene.

⁵ Kambe niyanakanya leswaku anivanga lweyi ntrongo hantxhumu kuvolava vanga vapostolo lava vakulu!

⁶ Nambi loko mine ningatlharihanga aku khaneleni, kambe aswitanu hi kutiva, mfuri hi vonekisiwile ku n'wine hi matlhelo hinkwawu, ni le mintxhun'wini hinkwayu.

⁷ Nidohile xana hikutitrongohata akuva n'wine n'witlakuxiwa, leswi ningan'wibyela Mahungu lawa manene ya Xikwembu Nkulukumba, ninga hakelisi ntxhumu xana?

⁸ Ni wutlile man'wana makereke, ni hakeliwa ha wone, akuva nitakota kun'witirela.

⁹ Kutani, leswi afaka nili na n'wine, akupfumaleni kwanga, afa ni ngabindreli mhunu; hikolahu, avamakweru lava vapfiki Makedoniya, vanipfunile hi leswi afaka ni swipfumala; ku hinkwaswu nitibekisile ningaka ningan'wibindreli ha ntxhumu; nahatatibekisisa xiswoswo.

¹⁰ Axihlayelamfuri xa Kriste xile ku mine, xileswo, alidrumu dringaka dringasuki ku mine amatikweni ya le Akaya.

¹¹ Hi xini ke xivangelo? Hi leswaku anin'wirandri? Xikwembu Nkulukumba wa switiva leswaku na n'wirandra.

¹² Leswi ni swiyentxaka, nitaswiyentxa akuva nipfumata nkama ku lava vadjulaka nkama, akuva vakumiwa vali swanga ha hine, amhakeni leyi vatitwalisaka ha yone.

¹³ Hikusa volavu i vapostolo vamadrimi, avatiri lava vakanganyisaka, vatiyentxiki avapostolo va Kriste.

¹⁴ Aswina kuhlamalisa hikusa nambi Sathana atindruluta ava ntrumi ya livaningo.

¹⁵ Kutani, ahi ntxhumu lowu wukulu loko vone vatireli vakwe vatindruluta swanga vatireli va kululama; avugamu byavu byitafanana ni mintiro yavu.

Tinxaniso ta mupostola

¹⁶ Nangweso nili, ni mun'we angatxhuki apimisa leswaku ni singe. Kambe loko n'wipimisa leswo, kolahu ke, ni yamukelani swanga ni singe akuva na mine ni tatitwalisa kutrongonyana.

¹⁷ Leswi ni hlayaka swone, aniswihlayi ha Hosi; kambe im'na, swanga hi vusinge, akudumbeni loko ka kutitwalisa.

¹⁸ Hikusa leswi lava vanyingi vatitwalisaka hi nyama, na mine nitatitwalisa.

¹⁹ N'wine minga lava vatlharihiki ngopfu miyamukela hahombe a masinge!

²⁰ N'widrivalela ha hombe lava n'wiyentxaka swikarawa, ni lava van'wimitaka, ni loko an'witekela, lweyi atikulisaka, lweyi an'wibaka liso.

²¹ Nihlaya leswo nani nitingana, ingi ha yentxi hi gome, kambe axin'wana ni xin'wana lexi mhunu atiyaka akutitwalisa ha xone, na mine ninga tiya.

²² N'wi va-Heberu? Na mine ni yene! N'wi va-Israyele? Na mine ni yene! N'wi vana va Abrahamu? Ni yene na mine!

²³ N'wivatireli va Kriste? Mine ni nandra wa kuyampswa kutlula vone: Hi mintiro, ni swin'wana; ngopfu-ngopfu a madjele; hi kubiwa na kunge na mpimu, amakhombyeni ya kufa hi minkama leyi minyingi.

²⁴ Nibiwi hi va-Yuda ka ntlhanu, hi mune wa makume ya minkukuma, kutrikiwa drin'we.

²⁵ Naa pswhitiwi kuraru hi minkhavi, ni khandliwa kan'we hi maribye, ni honekeliwa kuraru hi byatrhu, ni heta siku drin'we ni vusiku, vusiku byin'we ni siku drin'we ni heti na nili amakari ka kulebya ka lwandle;

²⁶ Tiyendrweni letinyingi, ni vi makhombyeni ya kutaleliwa hi mati, ni ya tinsulavoya; makhombo ya kuyentxiwa hi va-le-kweru, ni le makhombyeni ya kuyentxiwa hi va-Matiko, amakhombyeni ya le mutini, amakhombyeni ya le huleni, amakhombyeni ya le lwandle, amakhombyeni ya kuyentxeliwa hi vamakweru vamadrimi;

²⁷ ni vi mintirweni ni minkaralwini, hi minkama minyingi ni vi nivusiku bya kuyandra na ningayetleli, ni vi nindlala nipfumala swakuda, ni kutitrona, hi minkama minyingi ni vi nixirami ni pfumala swakuyambala.

²⁸ Handle ka mintxhumu ya le handle, nini leswi swinibindraka masiku hinkwawu, minga minhlatiyelo ya makereke hinkwawu.

²⁹ I mani angani gome, akuva na mine niva ni gome? Hi mani lweyi angakhunguvanyisiwa akuva na mine ningakhunguvanyisiwe?

³⁰ Loko kuli kutitwalisa, nitatitwalisa agomeni dranga.

³¹ Xikwembu Nkulukumba, ni Tatana wa Hosi Yesu, lweyi atlangeliwaka hi laha kungaheliki, awa switiva leswaku anihembi.

³² A Damaseka, andruna ya kone ya hosi Areta, afa yi beki valaveleli amutini wa va-le-Damaseka, yidjula ku nikhoma.

³³ Kambe ni xikisiwa hi hansi ka lihlampfu hi jinela, na nili ntrhaveni, ni phonyokisa xiswoswo, amavokweni yavu.