Gl 6 - Testamente Ledrimpswha ni Mapsalma

¹ Vamakweru, loko mhunu akumiwa na e nandrwini, n'wine lava vanga va Moya, mululamisani hi Moya lowu wa kunabyala, na utivonela ungatidringiwa na wene.

² Rwalelanani mintrhwalu yenu mun'wana-ni-mun'wana, n'wihetisisa xiswoswo a nawu wa Kriste.

³ Loko mhunu apimisa leswaku i xa ntxhumu nange wa ntxhumu, awa tikanganyisa ha vuswake.

⁴ Mun'wana-ni-mun'wana atikambele mintiro yake, lahu kutani atakota kuti twalisa ntsena miyanakanywini yake, na kunge ku mun'wana.

⁵ Hikuva mun'wana-ni-mun'wana atatitekela ntrhwalu wakwe.

⁶ Lweyi adondrisiwaka ritu, apumbele mintxhumu hinkwayu lweyi amudondrisaka.

⁷ N'winga tikanganyisi: Xikwembu Nkulukumba angatlangisiwi; hikusa leswi mhunu aswibyaliki, atatrhovela swoleswo.

⁸ Hikusa lweyi a byalaka leswi nyoxisaka a nyama yake, ata trhovela swa nyama, kambe lweyi abyalelaka a Moya, ku Moya atatrhovela vutomi lebyingahelikiki.

⁹ Hinga karaleni a kuyentxa leswi swinene, hikusa hitatrhovela hi nkama wa kone loko hingalolohi.

¹⁰ Hileswo-ke, leswi hingani nkama ahi yentxeleni leswi swinene ku hinkwavu, kambe ngopfu ku lava vanga vandangu wa vupfumeli.

Kulelela ni swidrimuxo

¹¹ Lavisani a maletela lawa makulu lawa ni n'witraleliki wone hi xiyandla xanga!

¹² Hinkwavu lava vadjulaka kuva lava vatrhavisaka hi tlhelo dra nyama, van'wisindrisa ku soka akuva ntsena vanga xanisiwi hinkonta ya xihambanu xa Kriste.

¹³ Hikusa nambi lava vasokaka ava landri nawu, kambe varandra leswaku n'wine n'wisoka, akuva vatitwalisa amirini yenu.

¹⁴ Kambe mine, anidjuli kutitwalisa loko kunge xihambanwini xa Hosi yeru Yesu Kriste; lweyi amisava mivambiwiki ku mine ha Yene, na mine ni vambiwile ku yone.

¹⁵ Akuva ni soka kumbe ni nga soki, aswipfuni ntxhumu; swipfuna kuva ni vutomi lebyi byimpswha.

¹⁶ Mfuri, ku hinkwavu lava vafambaka hi longoloka ni nawu lowu; akurula ni lirere aswive henhla kwavu, ni le ku Israyele wa Xikwembu Nkulukumba.

¹⁷ Kusukela swoswi, kungahavena mhunu lweyi ataka ni karata hikusa ni rwali amirini yanga amintrhonsi ya Kriste.

¹⁸ A timpswalu ta Hosi yeru Yesu Kriste vamakweru, ative amimoyeni yenu hinkwenu. Amen!