Gl 5 - Testamente Ledrimpswha ni Mapsalma

Vuntrhunxeki ku Kriste

¹ Akuva hi ntrhunxeka, avi Kriste angahi ntrhunxa. Kolahu-ke, trhamani n'witiya, n'wingahatlheli n'witinhingenisela ku mpinga wa wukarawa.

² Mine Pawulosi, nili ku n'wine: loko n'wiyamukela kusoka, Kriste angahatipfuna ntxhumu ku n'wine.

³ Ni tiyisa mfuri ku vhanu hinkwavu lava sokaka, lava vasindrisiwaka kubekisa nawu.

⁴ N'witravukani na Kriste n'wine lava vadjulaka vululami hi nawu, n'wi wile an'wehena timpswalu.

⁵ Hikusa hine, hikola ka Moya hi rindrela hi kulavisela ka kululama loku kutaka hi kupfumela.

⁶ Hikusa ku Kriste Yesu, aku soka ni kuka kusokiwa, aswipfuni ntxhumu, kambe i kupfumela kutiraka hikola ka lirandru.

⁷ N'wine leswi afaka n'witrutruma swinene, i mani lweyi a n'wiyimisiki kuya mahlweni hi kulandra xihlayelamfuri xana?

⁸ Akukholwisa loku, kuhuma ku Yene, lweyi angan'wivitana.

⁹ A handrelonyana yi kukumuxa ntlatu hinkwawu.

¹⁰ Mine na n'widumba Hosini leswaku n'winga yanakanyi swimbeni. Hikusa lweyi an'wikarataka atarwexiwa ku yavanyisiwa, angava mani na mani.

¹¹ Kambe loko ali mine vamakweru, loko na ha rera a kusoka, xana na ha xanisiwela yini? Kolahu a xikhunguvanyiso xa xihambanwini afa xitahela.

¹² Afa switava swone loko kutremiwa lava van'wipfilunganisaka.

¹³ Hikusa n'wine vamakweru, n'wivitaneliwi kuntrhunxeka; hileswo ke, n'wingatxhuki n'witeka kuntrhunxeka n'wikuyentxa hi kurandra ka nyama, kambe fambani hi lirandru drin'wiyentxa leswaku n'witirelana van'we ni van'wana.

¹⁴ Hikusa hinkwawu nawu wu katrakanyiwa hi leleto drin'we ledri driliki: Utarandra mhunukuloni swanga hi loko u tirandra.

¹⁵ Kambe loko n'wilumana, n'widrelana, tivonelani n'wingatxhuka n'witihelisa ha vuswenu.

Kufambisiwa hi Moya wa Xikwembu Nkulukumba

¹⁶ Kambe nili ku n'wine: hanyani hi kulandra Moya, n'winga yentxi hi kunavela ka nyama.

¹⁷ Hikusa a nyama yini kunavela loku kuyalanaka ni ka Moya, na wo Moya wuyalana ni kunavela ka nyama, hikusa amintxhumu leyo, milwetana kun'we akuva n'wingayentxi leswi n'wiswirandraka.

¹⁸ Kambe loko n'wifambisiwa hi Moya, an'wehe hansi ka nawu.

¹⁹ Kambe a mintiro ya nyama mile livaleni, minga leyi: A vumbuye, ni vuwoswi, ni xambya,

²⁰ ni kugandrela swifaniso, ni vungoma, ni mona, ni timholova, ni vukwele, ni mahlundru, ni tihanyi, ni kutravukana, kuyalana,

²¹ kutrhohoka, kupopswa, makwanga, ni leswi swifanaka na swone; leswi nin'wibyelaka, Swanga hi leswi ninga n'wibyela khale, leswaku avayentxi vakukari vangadi pfindla dra mfumu wa Xikwembu Nkulukumba.

²² Kambe amihandru ya Moya, i lirandru, ni kutrhava, ni kurula ni kutiyisela, ni kutrhavelana ni vunene, kudumbeka, kunabyala ni kutikhoma

²³ A nawu awu kone lowu wakuyala leswo.

²⁴ Kambe avaka Kriste Yesu va vambi nyama ni kurandra ni kunavela ka yone.

²⁵ Kambe loko hi hanya hi Moya hi fanela kufambisiwa ha wone.

²⁶ Hingatidjuleli kutikulisa ka swaku ka ndlela, hikupfukana ni vukwele.