Gl 4 - Testamente Ledrimpswha ni Mapsalma

¹ Kambe nili: A mudi wa pfindla, loko ahali ntrongwana, angahambananga ni xikarawa, nambi ali n'winyi wa hinkwaswu.

² Ahafanekela kuva hansi ka vawundli ni valanguteli vakwe kukondra kutlhasa nkama lowu bekiwiki hi Tatana.

³ Hi swoswo na hine. A nkama afaka hili vatrongwana afa hili hansi ka mintamu ya misava leyi;

⁴ Kambe-ke, kutlhasa kuhetiseka ka minkama, Xikwembu Nkulukumba arumi N'wana wakwe, lweyi a pswaliwiki hi wansati, lweyi angatumbuluka a hansi ka nawu,

⁵ akuva atirula lava afaka vali hansi ka nawu, leswaku hi yentxiwa vana.

⁶ Hikusa n'wine n'wi vana, Xikwembu Nkulukumba arumi Moya wa N'wana wakwe atimbilwini teru, lowo wu bandlukana: Abba, swidjulaka kuhlaya leswaku: Tatana!

⁷ Hileswo-ke, wene awehe xikarawa, u n'wana. Ke, loko uli n'wana, na kone umudi wa pfindla ha Xikwembu Nkulukumba.

Pawulosi akarateka hi Vagalatiya

⁸ Kambe n'wine khale afa n'wingativi Xikwembu Nkulukumba, afa n'witirela swikwembu leswi afaka swingeswone.

⁹ Kambe swoswi, leswi n'witivaka Xikwembu Nkulukumba, kumbe, leswi n'witibyiwaka hi Xikwembu Nkulukumba, xana swiyentxisa kuyini, loko n'witlhela ku swagome, swaku ka ndlela, lebyi n'widjulaka kutlhela n'wibyitirela swanga hi le kusunguleni?

¹⁰ N'wibekisa masiku ni tihweti, ni minkama ni malembe,

¹¹ na n'witxhava leswaku, ni tiri mahala ha n'wine.

¹² Nan'wikombela vamakweru, n'wiva swanga ha mine, hikusa na mine ni vi swanga ha n'wine. Anin'widohelanga ntxhumu.

¹³ N'waswitiva leswaku akusunguleni ni n'wirereli Ivangeli nani ni mavabyi a nyameni.

¹⁴ Nambi leswi mavabyi yanga amirini afaka kuli ndringo ku n'wine, an'wini drelanga nambi kuninyenya, n'wini yamukeli swanga hi ntrumi ya Xikwembu Nkulukumba, swanga hi loko nili Yesu Kriste, ha swake.

¹⁵ Kutani akunyoxa kwenu afa ali kayini xana? Kunene ni tiyisa leswaku, loko afa swikoteka, afa n'witanyongolota mahlu yenu n'wini nyika wone.

¹⁶ Hikola ka leswo, kutani ni ndruluki nala ku n'wine hi leswi nin'wibyelaka xihlayelamfuri xana?

¹⁷ A lava van'wikhinyelela, kunge kuyentxa hi vunene; kambe vadjula kun'witravukanyisa ku mine, akuva n'wikhinyelela vone.

¹⁸ Kambe i swinene kukhinyelela swakuxonga hi minkama hinkwayu, na kunge hi loko nili makari kwenu ntsena.

¹⁹ Vana vanga, lava nitlhelaka ni lun'wa ha n'wine; ku kondra Kriste avumbiwa ku n'wine,

²⁰ Afa ninga randra akuva na n'wine swoswi, akuva nita kota kuvulavula na n'wine hi ritu drin'wana, hikusa ni hiseka ngopfu ha n'wine.

A vana ni vadi vapfindla dra xidumbiso xa Xikwembu Nkulukumba

²¹ Nibyelani n'wine n'widjulaka kuva hansi ka nawu, xana an'wi wuyingeli nawu?

²² Hikusa kutraliwi, Abrahamu avi na vana vabiri, amun'wana ali wa nsati wa xikarawa, amun'we ali wa nsati wa kuntrhunxeka.

²³ Kambe a n'wana lweyi wa xikarawa apswaliwi hi kurandra ka nyama, kambe lweyi wa nsati wa kuntrhunxeka apswaliwi hinkonta ya xidumbiso.

²⁴ Amintxhumu leyi ya kufananisa; hikusa a vasati lava vabiri vakombisa swipfumelelanu swibiri: a xin'we hi xa le Nhaveni ya Sinayi, xikombisaka Agari lweyi a pswalaka vana vavukarawa.

²⁵ Kambe Agari afanisa Nhava ya Sinayi a Arabiya, leyi yinga muti wa Yerusalema wa swoswi, lweyi anga xikarawa kun'we ni vana vakwe.

²⁶ Kambe Yerusalema wa le Matilweni antrhuxekile, hi yene mamana weru.

²⁷ Hikuva kutraliwi leswi: Titrhavele wansati wa xihiko, lexi ngaka xinga kumanga vana ni kan'we, bandlukana hi kunyoxa wene ungaka ungatwanga kuvavisa ka kulun'wa, hikusa a wansati wa kudreliwa atava ni vana vanyingi kutlula wansati lweyi angani nuna.

²⁸ N'wine, vamakweru n'wi vana va xidumbiso swanga ha Yisaki.

²⁹ A khale lweyi angapswaliwa hi kurandra ka nyama, axanisi lweyi angapswaliwa hi Moya, kambe ni swoswi.

³⁰ Kambe Matralwa ya Kuxwenga mali yini xana? Mahlaya leswi: Hlongola xikarawa ni n'wana wa xone, hikusa a n'wana wa xikarawa angana kuda pfindla kun'we ni n'wana wa nsati lweyi antrhunxekiki.

³¹ Hileswo-ke, vamakweru, hine ahi vana va xikarawa, kambe hi vana va wansati lweyi a ntrhunxekiki.