Gl 2 - Testamente Ledrimpswha ni Mapsalma

Pawulosi ayamukeliwa hi vapostolo van'wana

¹ Kuku ntrhaku ka khume dra malembe ni mune, na kutlhelela Yerusalema. Kun'we na Barnabasi mfuri ni teki na Tito.

² Niyi kone hi kupfuleteliwa; nivatlhamuxeli Ivangeli leyi ni reraka ku va-Matiko, kambe ni swiyentxi xihundleni ku lava afaka va voneka swanga hi loko vali kutwala ka ntamu ku van'wana, akuva kuyentxeka leswaku, ninga trutrumi, kumbe ni va lweyi atrutrumiki mahala.

³ Kambe, nambi yene Tito, lweyi afaka ali na mine na ali mu-Girika, angasindrisiwanga kusoka,

⁴ leswo swavi hikola ka vamakweru va madrimi, afaka vanhingenile na hine hi kukanganyisa, akuva vata kambisisa avuntxhunxeki byeru lebyi hinga nabyu ku Yesu Kriste; akuva vahi yentxa nangweso swikarawa swa nawu.

⁵ Volavo, ahi vapfumelelanga ni nkamanyana akutibeka a hansi kwavu, akuva axihlayelamfuri xa Ivangeli xitrhama ku n'wine,

⁶ Kasi, ku lava afaka va voneka swanga hi loko vali kutwala ka ntamu ku van'wana volavu, kumbe va ve ni xiyimu, aswina ntxhumu ku mine; hikusa Xikwembu Nkulukumba angalavisi xiyimo xa mhunu, lavo, nihlaya swaku, ni va voni swanga ntxhumu, kambe avaniyengetelanga ntxhumu.

⁷ Kuti loko vavona leswaku ninyikiwi ntiro wa Ivangeli, akudondrisa lava vakuka vangasokanga, swanga ha Petrosi, ku lava vaku soka;

⁸ hikuva lweyi a yentxiki akuva mupostola wa lava vaku soka, ayentxi leswaku na mine niva mupostola wa va-Matiko,

⁹ na kone vatiki vativa timpswalu leti hinyiwiki tone, mine, na Yakobe, Kefasi, na Yohana lava vahlayiwaka timhandre, va hi nyika mine na Barnabasi, avoko dra xinene dra kutlhangana, hikuva hine hiya ku va-Matiko, vone vaya ku vaku sokiwa.

¹⁰ Ve kuhlaya leswaku hi drimuka swisiwana, hiswoswi na kone afaka ni tiyisa kuswiyentxa.

Pawulosi akhwavela Petrosi

¹¹ Kambe, loko Kefasi atile Antiyokiya, ni muyaleli na hi lavisani hi mimombo, hikusa afa afanekeliwa hiku khwaveliwa.

¹² Hikusa, loko kungasina tlhasa vhanu van'wana vantlawa wa Yakobe, afa ada kun'we ni va-Matiko; kambe, loko kutlhasa a vhanu lavo, atrhindreka ntrhaku, atitravuxa atxhava lava kusoka.

¹³ Na vo vapfumeli van'wana va va-Yuda, vayentxisa swanga ha yene, lakakuva na ye Barnabasi akota akokiwa hi vutoya himayentxela yavu.

¹⁴ Loko ni voni leswaku avafambi hi laha swifanekelaka ha kone hi xihlayelamfuri xa Ivangeli, nite ku Kefasi, a mahlweni ka hinkwavu: Loko wene, unga mu-Yuda, uhanya swanga hi va-Matiko, na ungahanyisi xi-Yuda, hayini usindrisela a va-Matiko vahanya swanga va-Yuda xana?

Kuhanya xinakulobyeni ni Xikwembu Nkulukumba

¹⁵ Hine, hi va-Yuda hi ntumbuluku, ahivadohi ku va-Matiko.

¹⁶ Hine hi tivaka leswaku a mhunu angahlayiwi mululami hinkonta ya mintiro ya nawu, ntsena hi kupfumela ku Kriste Yesu, hine hi pfumeli ku Yesu Kriste akuva hihlayiwa valulami hi kupfumela ku Kriste, kunge hi mintiro ya nawu, hikuva akuna mhunu lweyi atakahlayiwa mululami hi mintiro ya nawu.

¹⁷ Kolahu loko hine hi djula akuhlayiwa valulami ha Kriste, hi kumiwa na hili swidohi, xana Kriste i mutireli wa swidoho xana? Swingavi tanu!

¹⁸ Hikuva, loko ni tlhela ni yaka leswi ninga swihahlula, ni tiyentxa mutluli wa nawu.

¹⁹ Hikusa, mine hi nawu ni file ku nawu, akuva ni hanya kun'we na Xikwembu Nkulukumba.

²⁰ Hikolahu, ni vambiwile kun'we na Kriste, ana ha hanyi, kambe Kriste a hanya ku mine, akuhanya loku ni hanyaka kone swoswi anyameni, ni hanya hi kupfumela, loku kunga ku N'wana wa Xikwembu Nkulukumba, lweyi anirandriki ava atinyiketa hinkonta yanga.

²¹ Anidjuli kutxukumeta a timpswalu ta Xikwembu Nkulukumba; hikuva loko afa kululama kukumiwa hi nawu, Kriste afeli mahala.