Gl 1 - Testamente Ledrimpswha ni Mapsalma

Kulosa

¹ Pawulosi, muapostolo, na kunge hi tlhelo dra vhanu, nambi kukuyentxiwa hi vumhunu, kambe ha Yesu Kriste, ni Xikwembu Nkulukumba Tatana, lweyi angapfuxa Yesu ku vakufa,

² ni vamakweru hinkwavu lava vanga na mine, hi tralela makereke ya le Galatiya hili:

³ A timpswalu ni kurula aswive na n'wine, leswi swipfaka ku Xikwembu Nkulukumba Tatana weru, na Yesu Kriste Hosi yeru,

⁴ Lweyi atinyiketiki ha swake, hinkonta ya swidoho sweru, akuva ahi kulula misaveni leyi minfani, leyi hinga ku yone, ahetisisa xileswi hikurandra ka Xikwembu Nkulukumba, Tatana weru.

⁵ Lweyi a faneliwaka hi lidrumu hi minkama ni minkama. Amen!

Akuna yin'wana Ivangeli

⁶ Nahlamala ngopfu hikusa n'wihangwesi kuyini akutrika lweyi a n'wivitaniki hi lirandru dra Kriste, n'wilandra yin'wana Ivangeli, ya kuhambana.

⁷ Ahi leswaku yi kone yin'wana Ivangeli, kambe hileswaku kuni van'wana vhanu van'wipfilunganisaka, vadjula kun'windrulutela Ivangeli ya Kriste.

⁸ Kambe nambi ali hine kumbe ntrumi yakuta hi le tilweni yin'wirerela Ivangeli, leyi yihambanaka ni leyi hi n'wirereliki yone, yelweyo, aarukiwe.

⁹ Swanga hi leswi ningan'wibyela hi khale, na n'wibyela ni swoswi: Loko mhunu an'wirerela Ivangeli, ya kuhambana ni leyi n'winga yiyamukela, arukiwe!

¹⁰ Swingava leswaku, mine swoswi, ni djula wupfuno bya vhanu kumbe bya Xikwembu Nkulukumba xana? N'wiyanakanya leswaku xana nidjula kunyoxisa vhanu xana? Loko ni djula leswo, afa ningativa nandra wa Kriste.

Avi Xikwembu Nkulukumba lweyi a vitaniki Pawulosi

¹¹ Vamakweru, switivani leswaku a Ivangeli leyi ningan'witivisa yone ayipfanga ku vhanu.

¹² Aniyamukelanga mfuri anidondranga ku mhunu, kambe avi hi kupfuleteliwa ha Yesu Kriste.

¹³ Ha kunene n'wiswiyingelile kuhlayiwa swa mafambela yanga loko afa nehe vukhongotini bya va-Yuda; leswi afaka ni hundrisa kuxanisa Kereke dra Xikwembu Nkulukumba, nidjula kudrihahlula.

¹⁴ Mfuri afa niya mahlweni, avuyudeni, ni tlula lava vanyingi vantanga-kulori atikweni dreru, niva ni nkhinkhi akulandreni ka swihila swa vatatana vanga.

¹⁵ Kambe loko lweyi anganihlawula na ningasina pswaliwa, anivitanile hi timpswalu;

¹⁶ leswi apfuleteliki N'wana wakwe ku mine, akuva niyamurera amakari ka va-Matiko. Na hikuhangwesa anivutisanga nyama nambi ngati,

¹⁷ mfuri anintlhantukelanga Yerusalema kuya kumana ni lava vanganirangela kuva vapostolo, kambe nitiyeli a Arabiya, ntrhaku nitlhela nibuyela a Damaseka.

¹⁸ Antrhaku ka malembe mararu, kutani ni ntlhantukeli Yerusalema akuva niya vonana na Kefasi, ni trhami na yene khume dra masiku ni ntlhanu.

¹⁹ Kutani, anivonanga mun'wana wa vapostola, loko a nge Yakobe, a makwavu wa Hosi.

²⁰ Hikola ka leswi ni n'witralelaka swone, ke, amahlweni ka Xikwembu Nkulukumba ni tiyisa leswaku anihlayi madrimi.

²¹ Antrhaku ka leswo, niyi matikwaneni ya le Siriya ni le Kilikiya.

²² Kambe afa ningativiwi hi mombo amakerekeni ya le Yudeya, lawa afaka mali ku Kriste.

²³ Ntsena afa vayingeli leswaku: Lweyi afaka khale ahixanisa, swoswi afamba arera vupfumeli lebyi khale afaka adjula kubyihlasela.

²⁴ Kutani afa vadrumisa Xikwembu Nkulukumba hinkonta yanga.