Filimoni 1 - Testamente Ledrimpswha ni Mapsalma

Kulosa

¹ Pawulosi, a mubohiwa hinkonta ya Kriste Yesu, na makweru Timotewu, ku wene Filimoni, murandriwa weru ni mutirikulori,

² na Afiya, makweru wa wansati, na Arkipo, mutirikulori, asotxhakulori ni kereke ledri dringa mutini waku.

³ A timpswalu ative na n'wine hinkwenu, ni kurula leswi swipfaka ku Xikwembu Nkulukumba Tatana weru ni le ku Hosi Yesu Kriste.

Kupfumela ni lirandru dra Filimoni

⁴ Nitlangela Xikwembu Nkulukumba wanga nanikudrimuka hi minkama hinkwayu, aswikhongotweni swanga,

⁵ hikuyingela swalirandru ledri unganadru ku Hosi Yesu ni kutinsasi hinkwatu, ni kupfumela loku unganaku.

⁶ Kukombela kwanga hileswaku a ntlhanganu wa kupfumela kwaku kuva loku tiraka hintamu, akutiveni ka hinkwaswu leswi nene leswiyentxeliwaka Kriste amakari kwenu.

⁷ Hiswoswo makweru, nive ni kutrhava loku kulu ni kumiyetiwa hinkonta ya lirandru draku, hikusa a timbilu ta tinsasi ti rulisiwa ha wene.

Kukombeleliwa ka Onesimo

⁸ Kutani-ke, nambi ni ngava ni vuntrhunxeki hi vito dra Kriste, akukuleleta kuyentxa leswi faneliki,

⁹ ni navela akuva ni yentxa xikombelo hi lirandru, swanga hileswi ninga xiswone, mine Pawulosi, xiduhwati, swoswi ninga mubohiwa hinkonta ya Kriste Yesu,

¹⁰ Ina, nakukombela hikola ka n'wananga Onesimo, lweyi ni mubelekiki kola bohelweni.

¹¹ Khale Yene afa angapfuni, kambe swoswi awa hi pfuna mine na wene.

¹² Ni murumeli kutlhelela ku wene, swoswi, na ni kukombela akuva umuyamukela swanga hi loko yene ali xiyenge xa mbilu yanga ha byanga.

¹³ Afa ni randra kumubekisa kola kwanga, akuva anitirela, avutrhan'wini byaku, amapindreni lawa ninganawu hinkonta ya Ivangeli;

¹⁴ kambe afa ninga swirandranga kuyentxa ntxhumu na ungapfumelanga leswaku a vunene byaku byinga vi hi kusindrisiwa kambe byiva hikurandra kwaku.

¹⁵ Hikusa swingahakoteka leswaku Onesimo ali kutravukana na wene hi nkamanyana, akuva utatlhela uva na yene hi minkama hinkwayu.

¹⁶ Angehe xikarawa kambe ngopfu kutlula leswo, swanga makweru lweyi a randrekaka, kupfumeleni. Ni murandra ngopfu, kambe ngopfu-ngopfu ku wene, wahafanelaka kuva na yene swanga mhunu ni swanga makwenu Hosini.

¹⁷ Hikolahu ka leswo, loko uku ni mutirikulori kupfumeleni muyamukele Onesimo swanga uyamukela mine.

¹⁸ Loko akuhoxelile, kumbe ani nandru ku wene wutava wanga.

¹⁹ Hi mine Pawulosi ni switralaka hi voko dranga. Nita kutlhelisela, mbuu. Nambi loko ninga kota kukudrimuxa leswaku uninandru wa vutomi byaku ku mine hi ntshima.

²⁰ Ina makweru, ni trhavisisi xiswoswo ha wene a Hosini, nirulise mbilu ku Kriste.

²¹ Hikudumba loko ninga naku, hi kuyingelisisa kwakwu, ni kutralelaka leswi, na nitiva leswaku utayentxa leswi ni kukombelaka, mfuri ni kutlula leswo.

²² Xikan'we ni bekisele xilawu hikusa ni dumba leswaku Xikwembu Nkulukumba atayangula swikhongoto swenu hinkwenu ni kuva ni tlhlelela ku n'wine.

Kulelela

²³ Yamukela kudrunguliwa ha Epafra, mubohiwa-kulori ku Kriste Yesu,

²⁴ na Marka, Aristariko, Demasi na Luka vatirikulori.

²⁵ A timpswalu ta Hosi yeru Yesu Kriste, ative ni moya wenu.