Ef 6 - Testamente Ledrimpswha ni Mapsalma

Vapswali ni vana

¹ Vana, yingisetani vapswali venu a Hosini, hikusa leswo swilulamile.

² Vana ni xihluwa ku tatana waku ni ku mamana waku wunga wone nawu wakusungula ni xidumbiso,

³ akuva utanyoxa ni kutrhava, uva ni vutomi bya kuleha misaveni.

⁴ Vapswali, n'winga hlundrukiseni vana venu. Kambe vawundlani hi makhatela ya vumhunu, hi vito dra Hosi.

Swikarawa ni vinyi

⁵ N'wine malandra, yingisetani vinyi venu hi ka nyama, hi xitxhavu ni kururumela, akululameni ka timbilu tenu, swanga hi loko n'witirela Kriste.

⁶ N'wingavi tira akuva va n'wivona ntsena, swanga hi loko n'widjula kunyoxisa vhanu, kambe swanga malandra ya Kriste, yentxani hi mbilu, akurandra ka Xikwembu Nkulukumba.

⁷ Tirelani hikuswirandra, swanga hi loko n'witirela Hosi, na kunge vhanu;

⁸ na n'widrimuka leswaku a mun'wana-ni-mun'wana atayamukela ku Hosi hinkwaswu leswi swinene atakaswiyentxa, nambi xi xikarawa, kumbe wa kuntrhunxeka.

⁹ Na n'wine vinyi, yentxani swoswo ku vone, n'wingavahaleli kuvaxanisa, tivani leswaku a Hosi leyi yinga Matilweni, i yin'we ku n'wine ni ku vone, Yone ayihlawule vhanu.

Kulwa ni vubihi

¹⁰ Leswi saliki, tiyani Hosini ni le ntan'wini wa vukulu bya Yone.

¹¹ Hlomani hi matlhari hinkwawu ya Xikwembu Nkulukumba, akuva n'wita kota kutiya mintlhan'wini ya Diyavulosi.

¹² Hikusa ahi lwi ni ngati kumbe ni nyama, kambe hi lwa ni mimfumu, ni mintamu, ni vafumi va munyama wa minkama leyi, ni kulwa ni mimoya ya vubihi amimbangwini ya le henhla.

¹³ Hileswo-ke tamelani a matlhari hinkwawu ya Xikwembu Nkulukumba, akuva n'wita tiya sikwini ledriya dra kubiha, akuva loko n'wihlulile hinkwaswu n'witakota kutiya.

¹⁴ Trhamani na n'witiyile, n'witikhama hi xihlayelamfuri swanga bandi, yambalani a vululami swanga hi xixirelo a swifuveni.

¹⁵ Na n'wiyambali swifambu minkondrweni yenu, ni kutilulamisa kutivisa Ivangeli ya kurula.

¹⁶ Hlomani minkama hinkwayu a xitlhangu xa vupfumeli, akuva n'wita timpfekela a mintumbana leya kupfura ya Nala.

¹⁷ Nakone tekani xintlontlo xa kuhuluka ni lipanga dra Moya, dringa Ritu dra Xikwembu Nkulukumba.

¹⁸ N'wikhongota minkama hinkwayu hi kukhongota hi kutitrongohata hi kutlhangana ni Moya wa Kuxwenga, n'wirindra hikutiyisela ni kutitrongohata ni hikukhongotela tinsasi hinkwatu.

¹⁹ Mfuri na mine n'wini khongotela, akuva Xikwembu Nkulukumba anihuhutela, akupfuleni ka nomo wanga ni vulavula hikudumba, akuva a ntiro wa mhaka ya Ivangeli yi vonekisiwa,

²⁰ leyi ha yone ni nga murumiwa wa yone a amabohelweni, akuva ni vulavula ha yone akuntrhunxekeni, swanga hi laha swifanekeliki.

Madrungula ya vugamu

²¹ Akuva na n'wine n'witativa madrungula ya kutlhamuxeleka henhla kwanga ni kuleswi ni swiyentxaka, Tikiko, makweru lweyi arandrekaka ni kudumbeka Hosini, atan'wibyela hinkwaswu,

²² lweyi ni murumeliki swone ku n'wine, akuva n'witiva amahanyela yeru, yene arulise timbilu tenu. Atan'widrungulela madrungula hinkwawu hi tlhelo dreru, hi kutiyisa atan'winyika ngopfu a xixixi.

²³ Akurula ni lirandru ni kupfumela aswive na n'wine vamakweru, leswipfaka ku Xikwembu Nkulukumba Tatana wa Hosi yeru Yesu Kriste.

²⁴ Atimpswalu ative na n'wine hinkwenu lava randraka Hosi yeru Yesu Kriste hi kudumbeka hinkwaku. Amen!