Ef 5 - Testamente Ledrimpswha ni Mapsalma

¹ Hileswo-ke, yentxani ku fana ni Xikwembu Nkulukumba, swanga hileswi n'winga vana lava varandriwaka.

² N'wihanya alirandrwini, swanga hileswi Kriste na yene an'wirandriki, lweyi a tinyiketiki havuswakwe hinkonta yeru, swanga gandrelo ni xitlhavelo ku Xikwembu Nkulukumba.

³ Kambe a vuwoswi ni kunyama hinkwaku, ni kunavela hinkwaku swinga hlayiwi ni kan'we amakari kwenu, swanga hi leswi swingafaneliki tinsasi.

⁴ Nakone aswifanekeli kuhlaya maritu ya tinhlamba, ya kubiha kumbe ya vusinge ni ya mafenya, handle ka leswo, avi kuhlaya kutlhangela.

⁵ Tivani leswi: akuna muwoswani nambi lweyi nfani, kumbe vakufelela, ni mugandreli wa swithombe, ataka fanela hi kuda pfindla aNfun'wini wa Kriste ni wa Xikwembu Nkulukumba.

Kuhanya livaningweni dra Kriste

⁶ N'winga kanganyisiweni hi mhunu hi maritu ya kuka ndlela. Hikusa hikola ka leswo, amahlundru ya Xikwembu Nkulukumba mawa henhla ka vana lava vangayingisetikiki.

⁷ Kutani n'wingahlengeli kun'we na vone.

⁸ Khale n'wine afa n'wimunyama, kambe swoswi n'wilivaningo a Hosini; Fambani swanga hi vana va livaningo.

⁹ Hikusa a mhandru wa livango, i vunene hinkwabyu, ni kululama ni xihlayelamfuri,

¹⁰ na u djula hi minkama hinkwayu leswi switrhavisaka Hosi.

¹¹ Mfuri n'wingatipatrinyeteni ni mintiro ya munyama leyi mingeke na mihandru, Kambe hikolahu misolani.

¹² Hikusa leswi vone vaswiyentxaka a xihundleni, swikhomisaka ni tingana a kuvulavula ha swone.

¹³ Kambe a mintxhumu hinkwayu loko misoliwa hi livaningo, mivonekisiwa alivaleni, hikusa hinkwaswu leswi switivonekisaka, i livango.

¹⁴ Hileswo-ke kuhlayiwi leswaku: Sisimuka wene uyetleliki, pfuka makari ka vakufa, kutani Kriste ata kuvaninga.

¹⁵ Kolahu tivonelani swinene ku leswi n'wifambisaka xiswone, n'wingafambeni swanga masinge, kambe swanga hi tintlhari.

¹⁶ Londrovotani swinene a nkama, hikusa a masiku lawa matremakanyiwaka ma bihile.

¹⁷ Hikolahu n'wingaveneni lava vanfani, kambe djulani kuyingelisisa leswaku hi kwini a kurandra ka Hosi.

¹⁸ N'winga popsweni hi vhinyo, hikusa drivanga timholova, kambe titatani hi Moya,

¹⁹ n'wikhanelisana hi Mapsalma, amakari kwenu, yimbani n'widrumisa Hosi hi mbilu, hi tinsimu ni kuyimbelela ka Moya.

²⁰ Tlangelani Xikwembu Nkulukumba, Tatana weru hi minkama hinkwayu, hikola ka hinkwaswu, hi vito dra Hosi yeru Yesu Kriste.

Vutomi bya vatekani

²¹ Titrongohatani van'we ku van'wana, akutxhaveni ka Kriste.

²² Vavasati, yingisetani a vanuna venu swanga hi ku Hosi,

²³ hikusa a nuna hi yene nhloko ya wansati, swanga ha Kriste anga nhloko ya Kereke, hileswi Yene angamuhuluxi.

²⁴ Swanga hileswi a Kereke driyingisetaka Kriste, na vo vavasati vafanekela kuyingiseta vanuna vavu ku hinkwaswu.

²⁵ Na n'wine vavanuna, randrani vasati venu, swanga ha Kriste arandriki Kereke, anyiketi vutomi byake ha drone.

²⁶ Ayentxi leswo akuva adrihlawulekisa ni kudri basisa hi mati ni hi ritu drakwe,

²⁷ akuva adrikombisa mahlweni kwake, na drili Kereke dra kuphatima, ledri dringalikina bati, kumbe kuhoneka, nambi ntxhumu wun'wana wa kufana ni leswo, kambe drixwengiki, mfuri dringalikina xisandru.

²⁸ Hiswoswo, navo vavanuna vafanekela a kurandra vasati vavu swanga hi miri yavu hi ntshima. Lweyi arandraka nsati wakwe awa tirandra.

²⁹ Hikusa akuna mhunu lweyi a tamaka avenga ntshima ya nyama yake. Kambe ngopfu awa yiwundla, awa yibekisa hi kutivonela hinkwaku swanga ha Kriste ayentxelaka Kereke.

³⁰ Hikusa hi swiro swa miri yake.

³¹ Hinkonta ya leswo, a mhunu atatrika a tatana wakwe ni mamana wakwe, a namarela nsati wakwe, hi vubiri byavu vatandruluka nyama yin'we ntsena.

³² A xihundla lexi i xikulu, nikhanela ha Kriste ni hi Kereke.

³³ Nan'wine aswivetanu, amun'wana ni mun'wana habyake arandre a nsati wakwe swanga hi leswi atirandrisaka xi swone, ni nsati ave ni xitxhavu ku nuna.