Ef 4 - Testamente Ledrimpswha ni Mapsalma

Ku kula a lirandrwini ni le kutwananeni

¹ Hileswo-ke na n'wikombela, mine mubohiwa Hosini, leswaku n'wifamba hi laha swifanekelaka ku vitaniwa loku n'wivitaniwiki ha kone;

² hiku kutitrongohata hinkwaku ni kunabyala, kulehisa mbilu, n'wibyatrhanana hi lirandru, van'we ku van'wana.

³ N'wikhinyela kubekisa vumun'we bya Moya hi kutrimbana ka kurula van'we ku van'wana:

⁴ Kuni miri min'we ni moya mun'we, swanga hileswi n'wivitaneliwiki akulaviseleni kun'we ntsena, ka kuhlawuliwa kwenu.

⁵ A Hosi i yin'we ntsena, kupfumela i kun'we ntsena, babatiso i drin'we ntsena;

⁶ na Yene Xikwembu Nkulukumba i mun'we ntsena, anga Tatana wa hinkwavu, lweyi angahenhla ka hinkwavu, lweyi atiraka amakari ka hinkwavu angakuhinkwavu.

⁷ A timpswalu tinyikiwi mun'wana-ni-mun'wana wa kweru, kuya hi mpimu wa nyiko ya Kriste.

⁸ Hileswo-ke kuhlayiwile: Atiki na antlhantukela tilweni, atitekeli lava afaka vali vabohiwa Kutani ayaveli vhanu a tinyiko.

⁹ Nakone, leswaku: Antlhantukelile swihlaya yini, loko kunge leswaku, hikusungula axikeli mimbangwini leyi ya kuyeta, ya misava?

¹⁰ Yelweyo angaxika, hi yene nakone anga ntlhantuka henhla ka matilo hinkwawu, akuva atatisa mintxhumu hinkwayu.

¹¹ Hi yene mfuri anga nyika van'we kuva vapostola, ni van'wana kuva vaprofeta, van'wana kuva vavhangeli, ni van'wana kuva vabyisi ni vadondrisi;

¹² na arandri kuhetisekisa tinsasi ku ntiro wa vutireli, ni kuvumba miri ya Kriste.

¹³ Kukota hinkweru hitlhasa kutrimbaneni ka vupfumeli ni ka vutivi bya N'wana wa Xikwembu Nkulukumba; hiva mhunu lweyi wakuhetiseka, ampin'wini wa kuhetiseka wa Kriste,

¹⁴ akuva hingahatami hiva swanga vatrongwana, lava vapfilunganyisiwaka vayisiwaka hala-ni-hala, hi tekiwaka hi timheho hinkwatu ta tidondro, hi kukanganyisiwa hi vhanu, hi marengu lawa vama nhingenisaka ya kuyisa mhunu ku honeni.

¹⁵ Kambe hikulandra a xihlayelamfuri alirandrwini, ahi kuleni hi matlhelo hinkwawu, ku lweyi anga nhloko, anga Kriste,

¹⁶ ku lweyi a miri hinkwayu mitiyisiwaka mitlhanganisiwa hi kupfuna ka minkatrwa hinkwayu, hikutlhangana loku kunene ka xin'we ku swone xikuma ntamu wa kuva miyakiwa alirandrwini.

Vutomi byimpswha ku Kriste

¹⁷ Hikolahu ka leswi, na n'wibyela, ni kutiyisa aHosini leswaku, n'wingaha fambeni swanga hi va-Matiko, a miyanakan'wini yavu ya kuka-ndlela.

¹⁸ A miyanakanyu yavu mile munyameni, vatravukanile kule ni vutomi bya Xikwembu Nkulukumba, hiku kohleka loku kunga kone ku vone, hinkonta ya kunono'hwa ka timbilu tavu;

¹⁹ lava Valahliki kuyingiseta hinkwaku, vatinyiketa vusombolokini, akuva hikunavela ka swa xambya, vayentxa vubihi hinkwabyu.

²⁰ Kambe n'wine an'widondrisanga xiswone ku Kriste;

²¹ loko kunene n'wayingelile vavulavula ha yene, ni loko n'widondrisiwi ku Yene, hikulandra xihlayelamfuri xinga ku Yesu.

²² Hi leswaku, hikola ka mafambela yenu ya khale, humani ku mhunu lweyi wa khale, lweyi a honekaka hi kunavela ka vukanganyisi,

²³ na n'witipfuxa hi vumpswha Moyeni ni le kuyingelisiseni kwenu,

²⁴ na kone n'witiyambexa mhunu lweyi mumpswha, lweyi a vumbiwiki hi xifaniso xa Xikwembu Nkulukumba, a vumbiwiki a xihlayelamfurini, kululameni, ni le kuhlawulekeni.

Milawu ya vutomi lebyimpswha

²⁵ Hileswo-ke trikani madrimi! Hlayani xihlayelamfuri, amun'we ni mun'wana ku mhunukulobye, hikusa hinkweru hiswiro swa miri min'we.

²⁶ Hlundrukelanani, kambe n'winga dohi; n'wingavi trika a dambu dri pela na n'waha hlundrikile.

²⁷ N'winga nyikeni vumbangu Diyavulosi.

²⁸ Lweyi afaka ayiva angaha yive! Kambe aatire leswinga swinene hi ntshima ya mavoko yake, akuva atakota a kupfuna ni lava vapfumalaka.

²⁹ Kungavi huma a ritu ni drin'we ledri nfani amilon'wini yenu; kambe ntsena ledringadrinene driyakisaka hi mfanelo, xileswo, driyentxela leswinene ku lava vadriyingelaka.

³⁰ Minga hlundrukiseni Moya wa Xikwembu Nkulukumba, lowu n'wingafungiwa ha wone ku siku dra kutiruliwa.

³¹ A xiviti hinkwaxu ni tihanyi, a mahlundru, a pongwe, kumbe swifingeto aswive kule na n'wine, ni lixaka hinkwadru dra leswakubiha.

³² Vanani lava vapfunanaka, ni kuvavelelana, n'widrivalelana mun'we ni mun'wana, swanga hi leswi Xikwembu Nkulukumba an'widrivaleliki ha Kriste.