ಮಾರ್ಕ 3 - ದೇವ್ನಿ ಖ್ಹಾಚಿ ವಚನ್ಯೇಸುನೆ ಹಾತ್ ಝೂ಼ಟೊ ಪಡ್ಯೋಹುಯೊ ಏಕ್‌ ಅದ್ಮಿನ ಅಛ್ಛು಼ ಕರ‍್ಯೊತೆ ( ಮತ್ತಾಯ 12:9-14 ; ಲೂಕ 6:6-11 ) 1 ಬಿಜೇಕ್ ದನ್ನೆ ಯೇಸು ಸಬೆ ಭರಾವನು ಮಂದಿರ್‌ಮ ಗಯೊ. ಹಿಜ್ಜಾ಼ ಹಾತ್ ಝೂ಼ಟೊ ಪಡಿಹುಯು ಏಕ್‌ ಅದ್ಮಿಥು. 2 ಹಿಜ್ಜಾ಼ ಥೋಡು ಅದ್ಮಿ ಯೇಸುಪರ್‌ ಗಲ್ತಿ ಲಗಾಡನಖ್ಹಾಜೆ, ಸಬ್ಬತ್‌ ದನ್ಮ ಯೋ ಹಾತ್ ಝೂ಼ಟೊ ಪಡಿಹುಯು ಅದ್ಮಿನ ಅಛ್ಛು಼ ಕರಾಸ್ಕಿ ಶುಕಿ, ಕರಿ ಜ಼ಪೀನ್ ದೇಖುಕರ್ತುಥು. 3 ಯೇಸುನೆ ಯೋ ಹಾತ್ ಝೂ಼ಟೊ ಪಡ್ಯೊಹುಯೊ ಅದ್ಮಿನ, “ಉಠೀನ್ ಖ್ಹಾರಾನ ಇಚ಼್‌ಮ ಐನ್ ಭೀರೆ” ಕರಿ ಬೋಲ್ಯೊ. 4 ತದೆ ಯೇಸುನೆ ಇವ್ಣುನ, “ಸಬ್ಬತ್‌ ದನ್ಮ ಧರ್ಮಶಾಸ್ತ್ರನಿ ನಿಯಮ್‌ನು ಕಾಮ್‌ಕರಾನು ಖೆವು? ಅಛ಼್ಛುಕರಾನುಕಿ ಖರಾಬ್‌ಕರಾನು? ಜಾನ್‌ ಬಚಾ಼ಡಾನುಕಿ, ಕಾಡಾನು?” ಕರಿ ಬೋಲಾಖ್ಹತರ್ ಇವ್ಣೆ ಖ್ಹೊಪ್‌ ಥು. 5 ತದೆ ಯೇಸು ಖೀಜ಼್‌ಥಿ ಚಾರ‍್ಹೆ ಬಾಜು಼ ದೇಖಿನ್, ಇವ್ಣೊ ದಿಲ್‌ ಬಂಡಾನಿ ಘೋಣಿ ಹುಯಿರ‍್ಹೋತೆ ಇನಾಖ್ಹಾಜೆ ಇನ ಘಣು ದುಖ್ ಹುಯು. ತದೆ ಯೋ ಹಾತ್ ಝೂ಼ಟೊ ಪಡ್ಯೊಹುಯೊ ಅದ್ಮಿನ, “ತಾರೊ ಹಾತ್ ಖ್ಹಾಮ್ಣೆ ಕರ್‌” ಕರಿ ಬೋಲ್ಯೊ. ಯೋ ಖ್ಹಾಮ್ಣೆ ಹಾತ್ ಕಾಡ್ತಾ, ಇನೊ ಹಾತ್ ಅಛ್ಛೊ಼ ಹುಯಿಗಯೊ. 6 ತದೆ ಫರಿಸಾಯರ್ ಖ್ಹಾರು ಭಾರ್‌ಜೈ಼ನ್‌ ಒಗ್ಗಿಸ್‌ಮ ಹೆರೋದ ರಾಜ಼ ಭಣಿವಾಳನ ಜೋ಼ಡೆ ಮಶ್ಲತ್ ಭಂದೈನ್, ಯೇಸುನ ಖೆವಿ ತರೀಕಾಥಿ ಮಾರ‍್ಯೆ ಕರಿ ಸೋಚ್ಯು. ಗಲಿಲಾಯ ದರ‍್ಯಾವ್‌ಕನ ಅದ್ಮಿನಿ ಝೂ಼ಂಡ್‌ ಭರಾಯುತೆ 7 ಅನ ಬಾದ್‌ಮ ಯೇಸು ಇನ ಶಿಷ್ಯರ್‌ನ ಜೋ಼ಡೆ ದರ‍್ಯಾವ್‌ಕನ ಗಯೊ. ಗಲಿಲಾಯ ತಬರ್‌ಖಾಥು ಅಜು಼ ಯೂದಾಯ ತಬರ್‌ಖಾಥು ಘಣು ಅದ್ಮಿ ಇನ ಪೀಠೆ ಗಯು. 8 ಎತ್ರೇಸ್ ಕಾಹೆತೆ ಯೇಸು ಅಮ್ನು-ಅಮ್ನು ಕಾಮ್ ಕರಾಸ್ ಕರಿ ಖ್ಹಮ್‌ಜಿನ್‌, ಯೂದಾಯ ತಬರ್‌ಖಾಥು, ಯೆರೂಸಲೇಮ್ ಖ್ಹಯೇರ್‌ಭಣಿಥುಬಿ, ಇದುಮಾಯ ತಬರ್‌ಖಾಭಣಿಥು, ಯೊರ್ದನ್‌ ನದ್ದಿನು ಪಾರ್ಲಿ ಬಾಜು಼ಥು, ತೂರ್ ಅಜು಼ ಸೀದೋನ್ ಖ್ಹಯೇರ್‌ಥು ಘಣು ಅದ್ಮಿ ಯೇಸುಕನ ಆಯು. 9 ಅದ್ಮಿನಿ ಝೂ಼ಂಡ್‌ ಜಾ಼ಖ್ಹತ್ ಥೀತೆ ಇನಾಖ್ಹಾಜೆ ಯೇಸುನೆ, ಅದ್ಮಿಖ್ಹಾರು ಇನಾಪರ್‌ ಪಡೀನ್ ಧಕೇಲ್‌ಶೆ ಕರಿ ಇನ ಶಿಷ್ಯರ್‌ನ, “ಮಾರಖ್ಹಾಜೆ ಏಕ್‌ ಡೋಣ್ಣಾ ಖ್ಹವಾರಿ ಮಿಛಾ಼ಣೊ” ಕರಿ ಬೋಲ್ಯೊ. 10 ಶನಕತೊ ಯೇಸುನೆ ಘಣ ಅದ್ಮಿನು ರೋಗ್‌ ಅಛ್ಛು಼ ಕರ‍್ಯೊಥೋತೆ ದೇಖಿನ್, ರೋಗ್‌ಮ ರ‍್ಹವಾಳು ಖ್ಹಾರು ಇನ ಛೀಮ್‌ನು ಕರಿ ಧಕೇಲ-ಧಕೇಲಿ ಕರ್ತುಥು. 11 ಅಜು಼ ಭೂತ್ ಧರೀರಾಖ್ಯುಹುಯು ಅದ್ಮಿಖ್ಹಾರು ಯೇಸುನ ದೇಖಾತೋಡಿ ಇನ ಗೋಡಾಪರ್ ಪಡ್‌ತೂಥು; ಇವ್ಣಮಾನು ಭೂತ್‌ಖ್ಹಾರು, “ತೂ ದೇವ್‌ನೊ ಛಿಯ್ಯೊ!” ಕರಿ ಚಿಕರ್ತುಥು”. 12 ಕತೋಬಿ ಯೇಸುನೆ ಯೋ ಕೋಣ್ ಕರಿ, ಅದ್ಮಿನ ಖ್ಹಾಮೆ ನಾ ಬೋಲ್‌ನು ಕರಿ ಭೂತ್‌ನ ಖ್ಹಾರು ಝೇತಾಯೊ. ಯೇಸು ಭಾರ ಜ಼ಣ ಅಪೊಸ್ತಲರ್‌ನ ಚೂ಼ಣ್ಯೋತೆ ( ಮತ್ತಾಯ 10:1-4 ; ಲೂಕ 6:12-16 ) 13 ಬಾದ್‌ಮ ಯೇಸು ಏಕ್‌ ಪಹಡ್‌ಪರ್ ಚ಼ಢೀನ್, ಇನ ಕೋಣ್-ಕೋಣ್ ಹೋಣುಕಿ ಇವ್ಣುನ ಬುಲಾಯೊ. ತದೆ ಇವ್ಣೆ ಇನಾಕನ ಆಯು. 14 ಇವ್ಣಮಾಥು ಯೇಸು ಭಾರ ಜ಼ಣಾನ ಚೂ಼ಣಿನ್ ಅಪೊಸ್ತಲರ್ ಕರಿ ನಾಮ್‌ದಿದೊ. ಯೋ ಭಾರ ಜ಼ಣ ಇನ ಜೋ಼ಡೆ ರ‍್ಹೇವ್ಣುಕರಿ ಅಜು಼ ದೇವ್ನಿ ಅಛ್ಛಿ ಖಬರ್‌ನ ತಮಾಮ್‌ ಅದ್ಮಿನ ಬೋಲಿದೆವಾನ ಖ್ಹಾಜೆ ಮೋಕಲ್‌ನು ಕರಿ, 15 ಅಜು಼ ಭೂತ್‌ಖ್ಹಾರು ಕಾಡಾನ ಅದಿಕಾರ್‌ವಾಳ ಹುಯಿರ‍್ಹೇಣು ಕರಿ ಇವ್ಣುನ ಅಲಕ್ ಕಾಡಿಮ್ಹೇಲ್ಯೊ. 16 ಯೋ ಭಾರಜ಼ಣ ಕೋಣ್-ಕೋಣ್‌ಕತೊ, ಯೇಸುನೆ ಪೇತ್ರ ಕರಿ ನಾಮ್ ಮ್ಹೇಲ್ಯೋತೆ ಸೀಮೋನ; 17 ಜೆಬೆದಾಯನ ಲಡ್ಕಾ ಹುಯಿರ‍್ಹಾಥಾತೆ ಯಾಕೋಬಬಿ, ಇನೊ ನ್ಹಾನೊ ಭೈ ಯೋಹಾನ. ಯೇಸುನೆ ಅವ್ಣುನ ಬೊವನರ್ಗೆಸ್‌ ಕರಿ ನಾಮ್ ದಿದೊ, ಅಮ್‌ಕತೊ “ವಿಜ಼್‌ಳಿನ ಚೆಲ್ಕ” ಕರಿ. 18 ಅಜು಼ ಅಂದ್ರೆಯ, ಫಿಲಿಪ್ಪ, ಬಾರ್ತೊಲೊಮಾಯ, ಮತ್ತಾಯ, ತೋಮ, ಅಲ್ಫಾಯನೊ ಛಿಯ್ಯೊ ಯಾಕೋಬ, ತದ್ದಾಯ, ದೇಖ್ಹ್‌ನ ಪ್ಯಾರ್ ಕರಾವಾಳೊ ಕರಿ ಬೋಲೈಲಿದೋತೆ ಸೀಮೋನ, 19 ಅಜು಼ ಯೇಸುನ ಧೋಕೇಥಿ ಧರಿದಿದೋತೆ ಇಸ್ಕರಿಯೋತ ಯೂದ, ಅವ್ಣೇಸ್. ಯೇಸು ಅಜು಼ ಬೆಲ್ಜೆಬೂಲ್ ( ಮತ್ತಾಯ 12:22-32 ; ಲೂಕ 11:14-23 ; 12:10 ) 20 ಅನ ಬಾದ್‌ಮ ಯೇಸು ಘರೆ ಆವಾದಿನ್, ಪಾಛು಼ ಅದ್ಮಿ ಭರೈಗಯು, ಅನೇಥಿ ಯೇಸುನಾಬಿ ಇನ ಶಿಷ್ಯರ್‌ನ ಖಾಣುಬಿ ಖಾವಾನ ವಖ್ಹತ್ ಕೋ ಥೀನಿ. 21 ಯೇಸುನ ಘರ್‌ವಾಳಾನೆ ಇನ ದಿವಾನು ಲಾಗಿರ‍್ಹೂಸ್ ಕರಿ ಅದ್ಮಿಖ್ಹಾರು ಬೋಲಾತೆ ಖ್ಹಮ್‌ಜಿನ್‌, ಇನ ಘರೆ ಬುಲೈಲಿನ್ ಆವಾನಟೇಕೆ ನಿಕ್‌ಳ್ಯು. 22 ಎತ್ರೇಸ್ ಕಾಹೆತೆ ಯೆರೂಸಲೇಮ್‌ಥು ಆಯುಹುಯು ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಖ್ಹಾರು, “ಆ ಯೇಸುನ ಬೆಲ್ಜೆಬೂಲ್ ಧರಿರಾಖ್ಯೋಸ್‌! ಯೋ ಭೂತ್‌ನೊ ಯಜಮಾನ್ನಿ ಮದತ್‌ಥೀಸ್ ಯೇಸು ಭೂತ್‌ನಖ್ಹಾರು ಕಾಡಸ್ತೆ” ಕರಿ ಬೋಲುಕರ್ತೂಥು. 23 ಯೇಸುನೆ ಇವ್ಣುನ ಖನ್ನೆ ಬುಲೈನ್, ಇವ್ಣುನ ಮತ್ಲಬ್‌ನಿ ವಾತೆಖ್ಹು ಬೋಲ್ಯೋಕಿ: ಶೈತಾನ್ ಶೈತಾನ್ನಸ್ ಕಿಮ್ ಕಾಡ್‌ಶೆ? 24 ಏಕ್‌ ರಾಜ಼್‌ಭಾರ್‌ನು ಅದ್ಮಿ ಭಾಗ್‌ ಪಡಿನ್, ಇವ್ಣ ಇವ್ಣಾಸ್‍ಮ ಲಡೈ ಪಡಾಲಗ್ಯೂತೊ, ಯೋ ರಾಜ್ಯ ಪಡಿಜಾ಼ಶೆ. 25 ಏಕ್‌ ಘರ್‌ಮ ಭಾಗ್‌ ಪಡಿನ್ ಏಕ್‌ಥಿ ಏಕ್‌ ಲಡೈ ಕರಾಲಗ್ಯುತೊ ಯೋ ಘರ್ ಫುಟಿಜಾ಼ಸ್. 26 ಇಮ್ಮಸ್ ಶೈತಾನ್ ಉಠೀನ್ ಇನು ಭೂತ್‌ಖ್ಹಾರನ ಯೋಸ್ ನಖ್ಹಾಡ್ಯೋತೊ ಯೋ ಭಾಗ್‌ ಹುಯಿನ್‌, ಇನು ರಾಜ಼್‌ಭಾರ್ ರ‍್ಹಿಶೆಕೊಂತೆ ಖತಮ್ ಹುಯಿಜಾ಼ಶೆ. 27 ಎತ್ರೇಸ್ ಕಾಹೆತೆ ಕೋಣ್‌ತೋಬಿ ಏಕ್‌ ಜ಼ಣು ಅಗಾಡಿ ಏಕ್‌ ಶಕತ್‌ವಾಳ ಅದ್ಮಿನ ಭಾಂದ್ಯುನಾತೊ, ಇನ ಘರ್‌ಮ ಜೈ಼ನ್‌, ಇನು ಶೊತ್ ಖ್ಹಾರು ಚೋ಼ರಿ ಕರಾನ ಕೋ ಹುವಾನಿ. ಕತೋಬಿ ಯೋ ಇನ ಭಾಂದಿನಾಖಿದೆವಾನ ಬಾದ್‌ಮ ಇನ ಘರ್‌ಮ ಲೂಟಿ ಕರೆಜಾ಼ಯ್. 28 ಯೇಸುನೆ “ತುಮೂನ ಮೇ ಖ್ಹಾಚಾಮ ಬೋಲುಸ್ಕಿ, ಅದ್ಮಿಖ್ಹಾರು ಕರಾತೆಅಖ್ಖು ಪಾಪ್‌ನಾಬಿ ದೂಷಣೆನಾಬಿ ಕ್ಷಮಾಪಣ್ ಮಳ್‌ಶೆ. 29 ಕತೋಬಿ ಪವಿತ್ರಾತ್ಮನಿ ಚಿಂಘಾವ್ಣಿ ಕರಾವಾಳನ ಕದೇಬಿ ಮಾಪಿ ಕೋ ಮಳ್‌ಶೆನಿ. ಯೋ ಹಮೇಶಾಬಿ ಮಾಪ್‌ಕರಾನ ಕೋ ಹುವ್ವಾನಿತೆ ಪಾಪ್‌ಮ ಪಡಿಗಯೊ” ಕರಿ ಬೋಲ್ಯೊ. 30 ಇವ್ಣೆ ಇನ, “ಭೂತ್ ಧರಿರಾಖ್ಯುಸ್” ಕರಿ ಬೋಲುಕರ್ತೂಥೂತೆ ಇನಾಖ್ಹಾಜೆ ಯೇಸುನೆ ಅಮ್ ಬೋಲ್ಯೋತೆ. ಯೇಸುನಿ ಆಯ ಅಜು಼ ಇನ ಭೈಯೆ ( ಮತ್ತಾಯ 12:46-50 ; ಲೂಕ 8:19-21 ) 31 ತದೆ ಯೇಸುನಿ ಆಯಾಬಿ ಇನ ನ್ಹಾನ ಭೈಯೇ ಹಿಜ್ಜಾ಼ ಐನ್, ಭಾರ್ ಭೀರಿನ್‌ ಇನ ಬುಲಾಯು. 32 ತದೆ ಯೇಸುನ ಅಶ್‌ಪಿಶ್‌ ಭರೈರ‍್ಹುಥೂತೆ ಅದ್ಮಿಖ್ಹಾರು ಇನ, “ತಾರಿ ಆಯ, ಭೇನೆ ಅಜು಼ ತಾರ ಭೈಯೇ ತುನ ಢೂಂಡಿನ್ ಭಾರ್ ಭಿಯ್ಯುಸ್ ದೇಕ್” ಕರಿ ಬೋಲ್ಯು. 33 ತದೆ ಯೇಸುನೆ ಇವ್ಣುನ, “ಮಾರಿ ಆಯ ಕೋಣ್? ಮಾರ ಭೈಯೇ ಕೋಣ್?” ಕರಿ ಬೋಲೀನ್‌, 34 ಇನ ಅಶ್‌ಪಿಶ್‌ ಬೆಠುಥೂತೆ ಅದ್ಮಿನ ದೇಖಿನ್, “ಹಂದೇಕ್‌! ಅವ್ಣೇಸ್ ಮನ ಆಯಾಬಿ, ಮಾರ ಭೈಯೇ! 35 ಕೋಣ್ ದೇವ್ನಿ ಮರ್ಜಿನಿ ಘೋಣಿ ಚಾ಼ಲಾಸ್ಕಿ ಯೋಸ್ ಮಾರೊ ಭೈ, ಮಾರಿ ಭೇನ್, ಮಾರಿ ಆಯ ಹುಯಿರುಸ್‌” ಕರಿ ಬೋಲ್ಯೊ. |
The New Testament in Waghri Language © The Word for the World International and Waghri Translation Samiti, Karnataka, 2023.