ಮಾರ್ಕ 14 - ದೇವ್ನಿ ಖ್ಹಾಚಿ ವಚನ್ಯೇಸುನಿ ವಿರೋದ್ ಮಶ್ಲತ್ ಭಂದಾಯುತೆ ( ಮತ್ತಾಯ 26:1-5 ; ಲೂಕ 22:1-2 ; ಯೋಹಾನ 11:45-53 ) 1 ಪಸ್ಕ ಪೂಜ಼ ಅಜು಼ ಖಾಟುಕೊಂತೆ ರೋಟಾನಿ ಪೂಜಾ಼ನ ಬೇ ದನ್ ಥಾತೆ ತದೆ, ಗಲ್‌ಢಯಾಜಕರ್‌ ಅಜು಼ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಕಿನಾಬಿ ಮಾಲುಮ್ ನಾಪಡ್ಣುತೆ ಇಮ್‌ ಯೇಸುನ ಧರೀನ್ ಮಾರಿನಾಕ್ಣು ಕರಿ ದೇಖುಕರ್ತುಥು. 2 ಕತೋಬಿ ಇವ್ಣೆ, “ಪೂಜಾ಼ನಿ ವಖ್ಹತ್‌ಮ ಯೇಸುನ ನಾ ಧರ್‌ನು, ಶನಕತೊ ಅದ್ಮಿಖ್ಹಾರು ಅಪ್ಣಪರ್ ಕಲ್ಹಾಗಟ್‌ನ ಉಟ್‌ಶೆ” ಕರಿ ವಾತೆ ಬೋಲಿಲಿದು. ಬೆಥಾನ್ಯಾಮ ಯೇಸುನ ಅಬಿಷೇಕ್ ಹುಯೂತೆ ( ಮತ್ತಾಯ 26:6-13 ; ಯೋಹಾನ 12:1-8 ) 3 ಯೇಸು ಬೇಥಾನ್ಯ ಗಾಮ್ಮ ಸೀಮೋನ್ನ ಘರ್‌ಮ ಥೊ, ಆ ಸೀಮೋನ್ನ ಖೋಡ್‍ ಲಾಗಿರ‍್ಹೂಥು. ಹಿಜ್ಜಾ಼ ಯೇಸು ಖಾಣು ಖಾವಾನಿ ವಖ್ಹತ್‌ಮ, ಏಕ್‌ ತಯೇಡ ನಾರ್ಡ್‌ಥಿ ಬಣಾಯುಹುಯು, ಘಣ ಮೋಲ್ನು ವಾನು ತೇಲ್ನ ಬಂಡಾನಿ ಶೀಶಿಮ ಲೀನ್ ಐನ್, ಯೋ ಶೀಶಿನ ಫೋಡಿನ್, ತೇಲ್ನ ಯೇಸುನ ಮಾಥಪರ್ ರಂಚಿ. 4 ಕತೋಬಿ ಹಿಜ್ಜಾ಼ ಥೂತೆ ಥೋಡು ಜ಼ಣು ಇವ್ಣ-ಇವ್ಣಮ ಖೀಜ಼್ ಖೈನ್, “ವಾನುತೇಲ್‌ನ ಲುಕ್ಷಾನ್ ಕರಾಥಿ ಶನಿ ಫಾಯಿ‍ದೊ? 5 ಆ ತೇಲ್ನ ತೀನ್‌ಖ್ಹೊ ರೂಪಾನು ಪಾವ್ಲನ ವೇಚಿನ್ ಗರೀಬ್‌ನ ದಿಯ್ಯೆಜಾ಼ಯಿಥೂನಿ!” ಕರಿ ಬೋಲಿನ್ ಗಾಳೆ ದಿದು. 6 ಕತೋಬಿ ಯೇಸುನೆ, “ಅನ ಮ್ಹೇಲೊ! ಶನ ಅನ ಖ್ಹತಾವಸ್ತೆ? ಆ ತಯೇಡ ಮಾರಖ್ಹಾಜೆ ಘಣು ಅಛ್ಛು಼ಕಾಮ್ ಕರಿರಾಖೀಸ್. 7 ಗರೀಬ್ ಅದ್ಮಿಖ್ಹಾರು ಕದೇಬಿ ತುಮಾರ ಜೋ಼ಡೆ ರ‍್ಹಿಶೆ, ತುಮುನ ಮನ್ ಆವಾತೆ ತದೆ, ಇವ್ಣುನ ಮದತ್ ಕರೆಜಾ಼ಯ್, ಕತೋಬಿ ಮೇ ಕದೇಬಿ ತುಮಾರಕನ ರ‍್ಹೀಶ್‌ಕೊಯ್ನಿ. 8 ಅನೆ ಇನೊ ಹಾತ್‌ ಕೆತ್ರೆ ಹುವ್ವಾಸ್‌ಕಿ ಎತ್ರೆ ಕರಿರಾಖೀಸ್. ಮೇ ಮರ್‌ವಾನ ಅಗಾಡಿಸ್, ಮಾರು ಶರೀರ್‌ನ ಮಖ್ಹಾಣ್ಯು ಕರಾನ ಖ್ಹವಾರನಖ್ಹಾಜೆ ಅನೆ ಅಗಾಡಿಸ್ ಮಾರ ಆಂಗ್‌ತನ್‌ಪರ್ ವಾನು ತೇಲ್‌ಲಗಾಡಿರಾಖಿಸ್‌. 9 “ಹಿಡಿ ಜಗತ್‌ಮ ದೇವ್ನಿ ಅಛ್ಛಿ ಖಬರ್ ಕಿಜ಼್ಜ-ಕಿಜ಼್ಜ ಬೋಲಾವ್‌ಶೇಕಿ, ಹಿಜ್ಜಾ಼-ಹಿಜ್ಜಾ಼ ಅನೆ ಕರೀತೆ ಇನಾಬಿ ಅನಿ ಯಾದ್‌ನಖ್ಹಾಜೆ ಬೋಲ್‌ಶೆ”ಕರಿ ತುಮುನ ಖ್ಹಾಚಮಾಬಿ ಬೋಲುಸ್ ಕರಿ ಬೋಲ್ಯೊ. ಯೂದಾನೆ ಯೇಸುನ ಧೋಕೊ ದ್ಯವಾನ ಮಾನಿಗಯೋತೆ ( ಮತ್ತಾಯ 26:14-16 ; ಲೂಕ 22:3-6 ) 10 ಅನ ಬಾದ್‌ಮ ಭಾರ ಜ಼ಣ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೊಥೋತೆ ಇಸ್ಕರಿಯೋತ ಯೂದಾನೆ, ಯೇಸುನ ಗಲ್‌ಢಯಾಜಕರ್‌ನ ಧರಿದೇಣು ಕರಿ ಇವ್ಣಾಕನ ಗಯೊ. 11 ಇನೆ ಬೋಲ್ಯೋತೆ ವಾತೆನ ಖ್ಹಮ್‌ಜಿನ್‌ ಇವ್ಣುನ ಖ್ಹುಶಿ ಹುಯು, ಅಜು಼ ಯೂದಾನ, “ತುನ ಪೈಶಾ ದಿಶು ಕರಿ” ವಾತೆದಿದು. ಇನಾಖ್ಹಾಜೆ ಯೂದ ಯೇಸುನ ಧರಿದ್ಯವಾನಿ ಬರೋಬರ್‌ನಿ ವಖ್ಹತ್‌ನಖ್ಹಾಜೆ ಜ಼ಪೂಕರ್ತೊಥೊ. ಯೇಸುನೆ ಇನ ಶಿಷ್ಯರ್‌ನ ಜೋ಼ಡೆ ಪಸ್ಕಾನು ಖಾಣು ಖಾದೋತೆ ( ಮತ್ತಾಯ 26:17-25 ; ಲೂಕ 22:7-14 , 21-23 ; ಯೋಹಾನ 13:21-30 ) 12 ಖಾಟುಕೊಂತೆ ರೋಟಾನು ಪೂಜಾ಼ನ ಪಹಿಲ ದನ್ನೆ, ಕತೊ ಪಸ್ಕಾನಿ ಪೂಜಾ಼ನಮೆಂಢಾನ ಚೆಲ್ಕ ರ‍್ಹೇಖ್ಹಾನ ದನ್ನೆ, ಯೇಸುನ ಶಿಷ್ಯರ್‌ ಇನ, “ಹಮೆ ಕಿಜ಼್ಜಾ ಜೈ಼ನ್ ತಾರಾಖ್ಹಾಜೆ ಪಸ್ಕಾನು ಖಾಣನ ಖ್ಹವಾರ್‌ನು?” ಕರಿ ಪುಛಾ಼ಯ. 13 ಯೇಸುನೆ ಇನ ಶಿಷ್ಯರ್‌ಮ ಬೇ ಜ಼ಣಾನ ಬುಲೈನ್, “ತುಮೆ ಖ್ಹಯೇರ‍್ನ ಮಹಿ ಜಾ಼ವೊ, ಹಿಜ್ಜಾ಼ ಏಕ್‌ ಅದ್ಮಿ ಪಾಣಿನೊ ಘಡೊ ಪಳ್ಳಿನ್‌ ತುಮಾರ ಖ್ಹಾಮ್ಣೆ ಆವ್‌ಶೆ; ಇನ ಪೀಠೆ ಜಾ಼ವೊ. 14 ಯೋ ಖೆವ ಘರ್‌ಮ ಜಾ಼ಶೆಕಿ, ಯೋ ಘರ್‌ನ ಯಜಮಾನ್ನ, “ಮಾರ ಶಿಷ್ಯರ್‌ಬಿ ಮೇ ಪಸ್ಕಾನು ಖಾಣು ಖಾವಾನಖ್ಹಾಜೆ ಖಾಣಾನಿ ಝ಼ಗೊ ಕಿಜ಼್ಜಾ ಛಾ಼, ಕರಿ ಗುರುನೆ ಪುಛಾ಼ಯೊ ಕರಿ ಬೋಲೊ. 15 ತದೆ ಯೋ ಹೋಣುತೆ ಖ್ಹಾಮನ್‌ ಖ್ಹಾರು ಬರೋಬರ್‌ಥಿ ಖ್ಹವಾರೈರ‍್ಹಿಶೇತೆ, ಛ಼ತ್‍ನ ಉಪ್ಪರ್‌ಲ್ಯೊ ಮೋಟ ಕೋಣಾನ ತುಮುನ ವತಾಳ್‌ಶೆ, ಹಿಜ್ಜಾ಼ ಅಪ್ಣಖ್ಹಾಜೆ ಖ್ಹಾರು ಖ್ಹವಾರೊ” ಕರಿ ಬೋಲಿನ್ ಮೋಕ್‌ಲ್ಯೊ. 16 ತದೆ ಯೋ ಶಿಷ್ಯರ್‌ ಹಿಜ್ಜಾ಼ಥು ನಿಕ್ಳಿನ್, ಖ್ಹಯೇರ್‌ಮ ಜೈ಼ನ್, ಯೇಸುನೆ ಇವ್ಣುನ ಬೋಲ್ಯೋತೆ ಇಮ್ಮಸ್ ಥೂತೆ ದೇಖಿನ್; ಪಸ್ಕಾನ ಖಾಣನ ತೈಯಾರ್ ಕರ‍್ಯು. 17 ಖ್ಹಾಂಜ಼್ ಹುವಾನ ಬಾದ್‌ಮ, ಯೇಸು ಇನ ಭಾರ ಜ಼ಣ ಶಿಷ್ಯರ್‌ನ ಜೋ಼ಡ್ಮ ಆಯೊ. 18 ಇವ್ಣೆ ಖಾಣು ಖವಾನಿ ವಖ್ಹತ್‌ಮ ಯೇಸುನೆ, “ತುಮುನ ಖ್ಹಾಚಮಾಬಿ ಬೋಲುಸ್ಕಿ, ತುಮಾರಮ ಏಕ್‌ ಜ಼ಣೊ ಮನ ಧೋಕೇಥಿ ಧರಿದಿಶೆ, ಯೋ ಮಾರ ಜೋ಼ಡ್ಮ ಖಾಣು ಖಾವಾಳೋಸ್ ಹುಯಿರ‍್ಹೋಸ್” ಕರಿ ಬೋಲ್ಯೊ. 19 ತದೆ ಇವ್ಣೆ ದುಖ್‌ಥಿ, “ಮೇತೊ ಕಾಹೆನಿ, ಮೇತೊ ಕಾಹೆನಿ” ಕರಿ ಏಕ್‌ನ ಬಾದ್‌ಮ ಏಕ್‌ ಇನ ಬೋಲಾಲಗ್ಯ. 20 ತದೆ ಯೇಸುನೆ ಇವ್ಣುನ, “ಯೋ ಮಾರ ಭಾರ ಜ಼ಣ ಶಿಷ್ಯರ್‌ಮ ಏಕ್‌ ಜ಼ಣೊ, ಯೋ ಮಾರ ಜೋ಼ಡ್ಮ ಕಟೋರಿಮ ಇನೊ ರೋಟೊ ಚೋ಼ಪ್‍ಡಿನ್ ಖಾವಾಳೋಸ್. 21 ಅದ್ಮಿನೊ ಛಿಯ್ಯೊ ಇನಿ ಬಾರೇಮ ಲೀಖೈರ‍್ಹೂಸ್ತೆ ಇಮ್ಮಸ್ ಮರ್‌ಶೇತೆ ಖ್ಹಾಚಸ್; ಕತೋಬಿ ಕೋಣ್, ಅದ್ಮಿನೊ ಛಿಯ್ಯಾನ ಧೋಕೊದೀನ್ ಧರಿದಿಶೇಕಿ ಇನಿ ಹಾಲ್ನ ಶಾತ್‌ ಬೋಲು! ಯೋ ಅದ್ಮಿ ಪೈದ ನಾಸ್ ಹುಯುಹೊತ್ತೊ ಇನ ಅಛ್ಛು಼ ರ‍್ಹಯುಹೋತ್‌!” ಕರಿ ಬೋಲ್ಯೊ. ಪ್ರಭುನು ಭೋಜನ್ ( ಮತ್ತಾಯ 26:26-30 ; ಲೂಕ 22:14-20 ; 1 ಕೊರಿಂಥ 11:23-25 ) 22 ಇವ್ಣೆ ಖಾಣು ಖವ್‍ಕರಾನಿ ವಖ್ಹತ್‌ಮ, ಯೇಸುನೆ ರೋಟಾನ ಪಾಡಿನ್, ದೇವ್ನ ಧನ್ಯವಾದ್ ಕರೀನ್, ಇನ ತೋಡಿನ್, “ಅಲ್ಲೇವೊ, ಆ ಮಾರು ಶರೀರ್” ಕರಿ ಬೋಲಿನ್ ಇನ ಶಿಷ್ಯರ್‌ನ ದಿದೊ. 23 ಬಾದ್‌ಮ ಕಟೋರಿನ ಪಾಡಿನ್,ದೇವ್ನ ಧನ್ಯವಾದ್ ಕರೀನ್, ಇವ್ಣುನ ದಿದೊ; ಇವ್ಣೆ ಖ್ಹಾರೂಸ್ ಇನಾಮ ಪೀದು. 24 ತದೆ ಯೇಸುನೆ ಇವ್ಣುನ, “ಆ ಮಾರು ಲ್ಹೋಯಿ, ಆ ದೇವ್ನೆ ಇನ ಅದ್ಮಿನ ಜೋ಼ಡೆ ಕರ‍್ಯುಹುಯು ನವು ಒಪ್ಪಂದಾನನು ಮಾರು ಲ್ಹೋಯಿ; ಆ ಘಣ ಅದ್ಮಿನಖ್ಹಾಜೆ ರಂಚಾ಼ಯುತೆ ಲ್ಹೋಯಿ. 25 ಮೇ ಖ್ಹಾಚಮಾಬಿ ತುಮುನ ಬೋಲುಸ್ಕಿ, “ಹಂಕೇಥು ಧರೀನ್ ಮೇ ದೇವ್ನಿ ರಾಜ್ಯಮ ನವು ದ್ರಾಕ್ಷಿನು ರಖ್ಹ್‌ನ ಪಿಯ್ಯಾನ ದನ್‌ತೋಡಿ ಅನ ಪಾಛು಼ ಪೀಶಸ್‌ಕೊಯ್ನಿ”. 26 ಬಾದ್‌ಮ ಇವ್ಣೆ ಸ್ತುತಿನು ಗೀದ್‌ ಬೋಲಿನ್ ಆಲಿವ್ ಪಹಡ್‌ಕನ ಚ಼ಲೇಗಯ. ಪೇತ್ರ ಝಿಟ್ಕಾರನು ಯೇಸುನ ಮಾಲುಮ್ ಹುಯುತೆ ( ಮತ್ತಾಯ 26:31-35 ; ಲೂಕ 22:31-34 ; ಯೋಹಾನ 13:36-38 ) 27 ತದೆ ಯೇಸುನೆ ಇವ್ಣುನ, “ತುಮೆ ಖ್ಹಾರುಸ್ ಮನ ಮ್ಹೆಂದಿನ್ ಮಿಲೈಜಾ಼ಶು, ಶನಕತೊ, ‘ದೇವ್ ಮೇಂಢ ಚ಼ರಾವವಾಳಾನ ಮರ್‌ನಾಕಿಶ್, ತದೆ ಮಂಧಾಮಾಥು ಮೇಂಢ ಛಿಡ್‌ಗರ್‌ ಹುಯಿಜಾ಼ಶೆ’ ಕರಿ ಲೀಖೈರ‍್ಹೂಸ್‌ನಿ. 28 ಕತೋಬಿ ಮೇ ಜಿವ್ತೊಹುಯಿನ್ ಉಠಾನ ಬಾದ್‌ಮ, ತುಮಾರೇಥಿ ಅಗಾಡಿ ಗಲಿಲಾಯ ಜೈ಼ಶ್”. ಕರಿ ಬೋಲ್ಯೊ. 29 ಕತೋಬಿ ಪೇತ್ರನೆ, “ಖ್ಹಾರು ಡರಿನ್ ತುನ ಮ್ಹೆಂದಿದುತೋಬಿ, ಮೇ ಕೋ ಮ್ಹೇಲೀಶ್‌ನಿ!” ಕರಿ ಬೋಲ್ತಖ್ಹತರ್‌, 30 ಯೇಸುನೆ ಪೇತ್ರನ, “ಖ್ಹಾಚಮಾಬಿ ತುನ ಬೋಲುಸ್ಕಿ ಆ ರಾತೇಸ್ ಮುರ್‌ಗೊ ಬೇ ಹಲ್ಲ ಬಾಂಗ್‌ ದ್ಯವಾನ ಅಗಾಡಿ, ತು ಮಾರಿ ಬಾರೇಮ, ‘ಯೋ ಮನ ಮಾಲುಮ್‌ಕೊಯ್ನಿ’ ಕರಿ ತೀನ್ ಹಲ್ಲ ಬೋಲಿಶ್” ಕರಿ ಬೋಲ್ಯೊ. 31 ಕತೋಬಿ ಪೇತ್ರನೆ ಬಿಜೂ಼ಬಿ ಕಡಕ್‌ಥಿ, “ಮೇ ತಾರ ಜೋ಼ಡ್ಮ ಮರ‍್ನುಕತೋಬಿ, ‘ತೂ ಮನ ಮಾಲುಮ್ ಕೊಯ್ನಿ’ ಕರಿ ಕೋಸ್ ಬೋಲಿಶ್‌ನಿ!” ಕರಿ ಬೋಲ್ಯೊ. ಅಜು಼ ಖ್ಹಾರ ಶಿಷ್ಯರ್‌ನೇಬಿ ಇಮ್ಮಸ್ ಬೋಲ್ಯ. ಗೆತ್ಸೆಮನೆಮ ಯೇಸುನೆ ಪ್ರಾರ್ಥನೆ ಕರ‍್ಯೊತೆ ( ಮತ್ತಾಯ 26:36-46 ; ಲೂಕ 22:39-46 ) 32 ಬಾದ್‌ಮ ಇವ್ಣೆ ಅಖ್ಖಾಜ಼ಣ ಗೆತ್ಸೆಮನೆ ಕರಿ ಬಾಗ್‌ಕನ ಆಯ, ಯೇಸುನೆ ಇನ ಶಿಷ್ಯರ್‌ನ, “ಹಜ್ಜಾ಼ಸ್ ಬೇಖ್ಹೊ, ಮೇ ಪ್ರಾರ್ಥನೆ ಕರೀನ್ ಆವುಸ್‌” ಕರಿ ಬೋಲ್ಯೊ. 33 ಅಮ್ ಬೋಲಿನ್ ಖಲಿ ಪೇತ್ರ, ಯಾಕೋಬ್ ಅಜು಼ ಯೋಹಾನ್ನ ಇನ ಜೋ಼ಡ್ಮ ಬುಲೈಲಿ ಗಯೊ. ತದೆ ಯೇಸುನ ಘಣು ಘಬ್ರಾವ್‍ಣಿ ಹುಯು ಅಜು಼ ದುಖ್‌ಥಿ ಭರೈಗೊ. 34 ಅಜು಼ ಇನೆ ಇವ್ಣುನ, “ಮಾರೊ ಜಾನ್‌ ಮರ‍್ವಎತ್ರೆ ದುಖ್‌ಮ ಛಾ಼. ತುಮೆ ಹಜ಼್ಜಾಸ್ ರ‍್ಹೀನ್ ಹೊಷಾರಿ ರ‍್ಹವೊ” ಕರಿ ಬೋಲಿನ್, 35 ಜ಼ರ ಖ್ಹಾಮ್ಣೆ ಜೈ಼ನ್, ಜ಼ಮೀನ್‌ಪರ್ ಆಡೊ ಪಡೀನ್, ಹೋತು ಉಶೇತೊ, ಯೋ ವದೇಖ್ಹಾನಿ ವಖ್ಹತ್ ಇನ ಮ್ಹೆಂದಿನ್ ಜಾ಼ವಾನಿತರ ಪ್ರಾರ್ಥನೆ ಕರೀನ್, 36 “ಓ ಬಾ, ಓ ಮಾರೊ ಬಾ! ತಾರೇಥಿ ಖ್ಹಾರುಸ್ ಹುವ್ವಾಸ್‌. ಆ ವದೇಖ್ಹಾನ ರಾಛಾ಼ನ ಮಾರೇಥಿ ಹಟಾವ್‌. ತೋಬಿ ಮಾರಿ ಮರ್ಜಿನಿ ಘೋಣಿ ಕಾಹೆತೆ ತಾರಿ ಮರ್ಜಿನಿ ಘೊಣಿಸ್ ಹುವಾದೆ” ಕರಿ ಬೋಲ್ಯೊ. 37 ಬಾದ್‌ಮ ಯೇಸು ಪಾಛೊ಼ಫರಿ ಐನ್ ದೇಖಾತೊ ಯೋ ತೀನ್ ಜ಼ಣ ಶಿಷ್ಯರ್‌ ನಿಂದರ್‌ ಲೆವ್‌ಕರ್ತುಥು. ತದೆ ಇನೆ ಪೇತ್ರನ, “ಸೀಮೋನ್, ಖ್ಹುತೋಸ್ಕಿ ಶು? ಏಕ್‌ ಘಡೀಬಿ ತುನ ಹೊಷಾರಿರ‍್ಹವಾನ ಕೋ ಹೋಯ್ನಿಕಿ ಶು?” 38 ಅಜು಼ ಇವ್ಣುನ ಬೋಲ್ಯೋಕಿ, “ಶೋದನೆಮ ಪಡ್ಣುನಾತೆ ಇಮ್‌ ಹೊಷಾರಿ ರ‍್ಹೀನ್ ಪ್ರಾರ್ಥನೆ ಕರೊ. ಮನ್ ಛಾ಼ ಖ್ಹಾಚಸ್, ಕತೋಬಿ ಶರೀರ್‌ನ ಶಕತ್ ಪೂರಕೊಯ್ನಿ.” 39 ಬಾದ್‌ಮ ಪಾಛೊ಼ ಜೈ಼ನ್, ಯೋಸ್‌ ವಾತೆನ ಬೋಲ್ತೊಹುಯಿನ್ ಪ್ರಾರ್ಥನೆ ಕರ‍್ಯೊ. 40 ಪಾಛೊ಼ ಐನ್ ದೇಖಾನಿ ವಖ್ಹತ್‌ಮ ಇವ್ಣೆ ಬಿಜೂ಼ಬಿ ನಿಂದರ್‌ ಲೆವ್‌ಕರ್ತುಥು; ಇವ್ಣ ಡೋಳಾಮ ನಿಂದರ್‌ ಚು಼ವ್‌ಕರ್ತುಥು. ಇನಾಖ್ಹಾಜೆ ಯೇಸುನೆ ಪುಛಾ಼ಯೋತೆ ಇನ, ಶಾತ್‌ ಬೋಲ್‌ನು ಕರಿ ಇವ್ಣುನ ಮಾಲುಮ್ ಕೋ ಪಡ್ಯುನಿ. 41 ಯೇಸುನೆ ತೀನ್ನೆ ಹಲ್ಲ ಪ್ರಾರ್ಥನೆನ ಜೈ಼ನ್ ಐನ್ ಇವ್ಣುನ, “ತುಮೆ ಹಂಕೆತೋಡಿ ಖ್ಹುಯಿನ್, ಅರಾಮ್‌ ಕರುಕರಾಸ್ಕಿ ಶು? ಬಶ್‌! ಹಂದೇಖೊ, ಅದ್ಮಿನೊ ಛಿಯ್ಯಾನ ಧರೀನ್ ಪಾಪಿ ಅದ್ಮಿನ ಹಾತ್‌ಮ ದೆವೈಜಾ಼ಶೆ. 42 ಉಠೊ, ಜ಼ಯ್ಯೆ. ಮನ ಧೋಕೇಥಿ ಧರಿದ್ಯವಾಳೊ ಖನ್ನೆಸ್‌ ಐರ‍್ಹೋಸ್, ದೇಖೊ” ಕರಿ ಬೋಲ್ಯೊ. ಯೇಸುನ ಧರ‍್ಯೂತೆ ( ಮತ್ತಾಯ 26:47-56 ; ಲೂಕ 22:47-53 ; ಯೋಹಾನ 18:3-12 ) 43 ಯೇಸು ಅಜೂ಼ಬಿ ವಾತೆ ಬೋಲುಕರಾತೆ ತದ್ದೇಸ್, ಇನ ಭಾರಜ಼ಣ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೊಥೋತೆ ಯೂದ, ಹಿಜ್ಜಾ಼ ಆಯೊ. ಇನ ಜೋ಼ಡ್ಮ ಗಲ್‌ಢಯಾಜಕರ್‌, ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಶಾಣುಖ್ಹಾರು ಬೋಲಿ ಮೋಕ್‍ಲ್ಯುಹುಯು ಏಕ್‌ ಟೋಳ್‌, ತಲ್ವಾರೆ ಅಜು಼ ಲಠ್ಠ ಧರಿಲಿನ್‌ ಹಿಜ್ಜಾ಼ ಆಯು. 44 ಯೇಸುನ ಧೋಕೇಥಿ ಧರಿದ್ಯವಾಳೊ ಯೋ ಝೂ಼ಂಡ್‌ವಾಳನ, “ಮೇ ಕಿನ ಬುಚ್ಚಾ಼ ದೆವ್‌ಸ್ಕಿ ಯೋಸ್‌ ತುಮೂನ ಹೋಣುತೆ ಅದ್ಮಿ. ಇನ ಧರೀನ್ ಹೊಷಾರ್‌ಥಿ ಲೀಜಾ಼ವೊ” ಕರಿ ಖ್ಹಣೇದ್ ಬೋಲಿ ದೀರಾಖ್ಯೊಥೊ. 45 ಯೂದ ಹಿಜ್ಜಾ಼ ಆವ್‌ತಾಸ್ನ, ಇನೆ ಯೇಸುನ ಖನ್ನೆ ಜೈ಼ನ್, “ಗುರು!” ಕರಿ ಬೋಲಿನ್ ಇನ ಬುಚ್ಚಾ಼ ದಿದೊ. 46 ತದೆ ಇವ್ಣೆ ಯೇಸುಪರ್ ಹಾತ್‌ ನಾಖಿನ್ ಇನ ಧರ‍್ಯು. 47 ತದೆ ಹಿಜ್ಜಾ಼ ಖನ್ನೆಸ್‌ ಭಿಯ್ಯುಥೂತೆ ಏಕ್‌ ಜ಼ಣು ಇನಿ ತಲ್ವಾರ್‌ನ ಕಾಡಿನ್, ಗಲ್‌ಢಯಾಜಕ್‌ನ ಆಳ್‌ನ ಮಾರಿನ್, ಇನೊ ಕಾನ್‌ ಕತ್ರಿನಾಖ್ಯು. 48 ತದೆ ಯೇಸುನೆ ಇವ್ಣುನ, “ಚೋ಼ರ್‌ನ ಧರಾನಿಘೋಣಿ ತಲ್ವಾರೆ, ಲಠ್ಠ ಪಳ್ಳಿನ್‌ ಮನ ಧರಾನಖ್ಹಾಜೆ ಆಯಾಕಿ ಶು? 49 ಮೇ ದನ್‌ರೋಜ಼್‌ ತುಮಾರ ಜೋ಼ಡ್ಮಾಸ್ ರ‍್ಹೀನ್ ಮೋಟಿ ಮಂದಿರ್‌ಮ ವಚನ್ ಬೋಲಿ ದೆವ್‌ಕರ್ತೊಥೋತೆ, ತದೆ ತುಮೆ ಮನ ಧರ‍್ಯಾಕೊಯ್ನಿ. ತೋಬಿ ವಚನ್‌ಮ ಲೀಖೈರ‍್ಹೂತೆ ಪೂರಹುವಾನಖ್ಹಾಜೆ ಆ ಖ್ಹಾರು ಹುಯೂತೆ” ಕರಿ ಬೋಲ್ಯೊ. 50 ತದೆ ತಮಾಮ್‌ ಶಿಷ್ಯರ್‌ ಯೇಸುನ ಮ್ಹೆಂದಿನ್ ನಾಶಿ ಚ಼ಲೇಗಯ. 51 ಹಿಜ್ಜಾ಼ ಏಕ್‌ ಜಾ಼ನ್ಜ಼ಮಾನ್ ಅದ್ಮಿ, ಖಾಲಿ ಆಂಗ್‌ಪರ್‌ ಘಣ ಮೋಲ್‌ನುಲುಂಗ್ಡು ಲಪೇಟಿಲೀನ್, ಯೇಸುನ ಪೀಠೆ-ಪೀಠೆ ವಳ್ಯುಜಾ಼ತೂಥು. ಇವ್ಣೆ ಇನಾಬಿ ಧರಿಲೇವ್ಣು ಕರಿ ಕರ‍್ಯು, 52 ಕತೋಬಿ ಯೋ ಇನು ಕೋರಲುಂಗ್ಡಾನ ಮ್ಹೆಂದಿನ್, ಖಾಲಿಆಂಗೇಸ್‌ ನಾಶಿಗಯು. ಮೋಟಿ ಸಭೆನ ಖ್ಹಾಮೆ ಯೇಸುನ ಭೀರಾಖ್ಯೂತೆ ( ಮತ್ತಾಯ 26:57-68 ; ಲೂಕ 22:54-55 , 63-71 ; ಯೋಹಾನ 18:13-14 , 19-24 ) 53 ಬಾದ್‌ಮ ಇವ್ಣೆ ಯೇಸುನ ಗಲ್‌ಢಯಾಜಕ್‌ನ ಘರ್‌ಕನ ಲೀನ್‌ಗಯು, ಹಿಜ್ಜಾ಼ ಗಲ್‌ಢಯಾಜಕರ್‌, ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಶಾಣು ಖ್ಹಾರು ಭರೈರ‍್ಹೂಥು. 54 ಪೇತ್ರ ದೂರ್‌ಥೋಸ್ ಯೇಸುನ ಪೀಠೆ-ಪೀಠೆ ಜಾ಼ತೋಹುಯಿನ್‌ ಗಲ್‌ಢಯಾಜಕ್‌ನ ಘರ್‌ನ ಖ್ಹಾಮ್ಣೆನು ಚೌ಼ಕ್‌ಕನ ಗಯೊ. ಹಿಜ್ಜಾ಼ ಆಗ್ ಶೇಕು ಕರ್ತುಥೂತೆ ಕಾವ್ಲಿ ಕರಾವಾಳನ ಜೋ಼ಡ್ಮ ಬೇಶಿನ್, ಯೋಬಿ ಆಗ್ ಶೇಕಾಲಗ್ಯೊ. 55 ತದೆ ಗಲ್‌ಢಯಾಜಕರ್‌ ಅಜು಼ ಮೋಟಿ ಸಬೇನು ಖ್ಹಾರು ಯೇಸುನ ಮರೈನಾಖಿದೇಣು ಕರಿ ಸಬೂತ್ ಢೂಂಡ್ಯು. ಕತೋಬಿ ಬರೋಬರ್‌ನಿ ಸಾಕ್ಷಿ ಮಳ್ಯುಕೊಯ್ನಿ. 56 ಘಣು ಅದ್ಮಿ ಯೇಸುಪರ್ ಝೂ಼ಟಿ ಸಾಕ್ಷಿಖ್ಹಾರಿ ಬೋಲ್ಯುತೋಬಿ ಇವ್ಣಿ ಸಾಕ್ಷಿ ಏಕ್‌ಥಿ-ಏಕ್‌ ಬರೋಬರ್ ಕೋ ಲಾಗ್ಯುನಿ. 57-58 ಬಾದ್‌ಮ ಥೋಡು ಅದ್ಮಿ ಉಠಿ ಭೀರಿನ್, “ಅದ್ಮಿನೆ ಭಾಂದಿರಾಖ್ಯುಸ್ತೆ ಆ ಮಂದಿರ್‌ನ ಮೇ ಫೋಡಿನಾಖಿನ್, ಅದ್ಮಿನ ಹಾತೇಖ್ಹು ಭಾಂದಾನ ಕೋ ಹುವ್ವಾನಿತೆ ಬಿಜೇಕ್‌ ಮಂದಿರ್‌ನ, ತೀನ್ ದನ್ಮ ಭಾಂದೀಶ್’ ಕರಿ ಆ ಬೋಲ್ಯೊತೆ ಹಮೆ ಖ್ಹಮ್‌ಜಿರಾಖ್ಯಾಸ್‌” ಕರಿ ಯೇಸುಪರ್ ಝೂ಼ಟಿ ಸಾಕ್ಷಿ ಖ್ಹಾರು ಬೋಲ್ಯು. 59 ತದೇಬಿ ಇವ್ಣಿ ಸಾಕ್ಷಿ ಖ್ಹಾರು ಏಕ್‌ಥಿ-ಏಕ್‌ ಬರೋಬರ್ ಕೋ ಲಾಗ್ಯುನಿ. 60 ತದೆ ಗಲ್‌ಢೊಯಾಜಕ್‌ನೆ ಉಠೀನ್ ಖ್ಹಾರಾನ ಖ್ಹಾಮ್ಣೆ ಭೀರಿನ್, “ತೂ ಶಾತ್ಬಿ ಜವಾಬ್ ಕೋ ದೇಯ್ನಿಕಿ ಶು? ಅವ್ಣೆ ತಾರಪರ್ ಬೋಲುಕರಸ್ತೆ ಆ ಸಾಕ್ಷಿ ಖ್ಹಾಚಸ್‌ಕಿ ಶು?” ಕರಿ ಯೇಸುನ ಪುಛಾ಼ಯೊ. 61 ತೋಬಿ ಯೇಸುನೆ ಶಾತ್ಬಿ ಫರೈ ಕೋ ಬೋಲ್ಯೊನಿತೆ ಖ್ಹೊಪ್‌ ಥೊ. ಪಾಛೊ಼ ಗಲ್‌ಢಯಾಜಕ್‌ನೆ, “ತೂ ಮಹಾನ್ ದೇವ್‌ನೊ ಛಿಯ್ಯೊ ಹುಯಿರ‍್ಹೋತೆ ಕ್ರಿಸ್ತಸ್‌ಕಿಶು?” ಕರಿ ಯೇಸುನ ಪುಛಾ಼ವಖ್ಹತರ್, 62 ಯೇಸುನೆ, “ಒಹೊ, ಮೇಸ್; ಎತ್ರೇಸ್ ಕಾಹೆತೆ ಅದ್ಮಿನೊ ಛಿಯ್ಯೊ, ಮಹಾನ್ ಶಕತ್‌ವಾಳೊ ದೇವ್ನ ಖಾವಿಬಾಜು಼ಮ ಬೆಠೊರ‍್ಹಿಶೇತೆ ಅಜು಼ ಆಬ್‍ನ ವಾದ್ಳಪರ್ ಬೇಶಿನ್ ಆವ್‌ಶೇತೆ ತುಮೆಖ್ಹಾರು ದೇಕ್‌ಶು!” ಕರಿ ಬೋಲ್ಯೊ. 63 ಅನ ಖ್ಹಮ್‌ಜಿನ್‌, ಗಲ್‌ಢಯಾಜಕ್‌ನೆ ಇನ ಝ಼ಗ್ಗಾನ ಫಾಡಿಲೀನ್, “ಅಪ್ಣುನ ಅನೇಥಿಬಿ ಅಜು಼ ಖೆವಿ ಸಾಕ್ಷಿ ಹೋಣು! 64 ಅನೆ ದೇವ್ನ ಗಾಳೆಕರಾನಿ ವಾತೆ ಬೋಲ್ಯೋತೆ ತುಮೆ ಖ್ಹಮ್‌ಜ್ಯಾನಿ. ತುಮುನ ಕಿಮ್ ದೆಖಾವಸ್?” ಕರಿ ಬೋಲ್ತಖ್ಹತರ್‌, ಇವ್ಣೆ ಖ್ಹಾರು ಯೇಸುನಿ ವಿರೋದ್ ಹಾತ್‌ ಪಾಡಿನ್, “ಆ, ಮರ್‌ವಾನ ಲ್ಹಾಯಕಸ್ ಛಾ಼” ಕರಿ ಬೋಲ್ಯು. 65 ಬಾದ್‌ಮ ಇವ್ಣಾಮ ಥೋಡು ಜ಼ಣು ಯೇಸುಪರ್ ಥೂಕಿನ್, ಇನ ಮ್ಹೋಡಾಪರ್ ಲುಂಗ್ಡು ನಾಖಿನ್, ಗುಖ್ಹ್‌ತೊ ದೀನ್, “ಕಿನೆ ಮಾರ‍್ಯೂಕಿ ಪ್ರವಾದ್‌ನೆ ಬೋಲ್‌ನು ದೇಖೆ!” ಕರಿ ಬೋಲ್ಯು. ಅಜು಼ ಕಾವ್ಲಿ ಕರಾವಾಳನೆ ಇನ ಕಲ್ಲಪರ್ ಮಾರಿನ್ ಇವ್ಣ ಜೋ಼ಡ್ಮ ಬುಲೈಲಿ ಗಯು. ಪೇತ್ರನೆ ಯೇಸು ಮಾಲುಮ್ ಕೊಯ್ನಿ ಕರಿ ಬೋಲ್ಯೋತೆ ( ಮತ್ತಾಯ 26:69-75 ; ಲೂಕ 22:56-62 ; ಯೋಹಾನ 18:15-18 , 25-27 ) 66 ಯೋಸ್‌ ವಖ್ಹತ್‌ಮ ಪೇತ್ರ ಹೇಟ್‌ ಘರ್‌ನ ಖ್ಹಾಮ್ಣೆ ಥೊ. ತದೆ ಗಲ್‌ಢಯಾಜಕ್‌ನ ಆಳ್‌ಮ ಏಕ್‌ ಜ಼ಣಿ ಹಿಜ್ಜಾ಼ ಐನ್, 67 ಪೇತ್ರ ಆಗ್ ಶೇಕುಕರ್ತೊಥೋತೆ ದೇಖಿ. ಅಜೂ಼ಬಿ ಇನ ಖನ್ನೆಥು ಠರ್‌ಕೈ ದೇಖಿನ್, “ತೂಬಿ, ಯೋ ನಜ಼ರೇತ್‌ನೊ ಯೇಸುನ ಜೋ಼ಡ್ಮ ಥೋನಿ” ಕರಿ ಬೋಲಿ. 68 ತದೆ ಪೇತ್ರನೆ, “ಕೊಯ್ನಿ, ತು ಶಾತ್‌ ಬೋಲುಕರಾಸ್ಕಿ ಮನ ಮಾಲುಮ್‌ಕೊಯ್ನಿ” ಕರಿ ಬೋಲಿನ್ ಭಾರ್‌ಲಿ ಝ಼ಗೋಪರ್‌ ಗಯೊ. ಎತ್ರಾಸ್‌ಮ ಮುರ್‌ಗೊ ಬಾಂಗ್‌ ದಿದೊ. 69 ಹಿಜ್ಜಾ಼ ಯೋ ಆಳ್‌ನೆ ಪಾಛು಼ ಇನ ದೇಖಿನ್, ಖನ್ನೆಸ್‌ ಭಿಯುಥೂತೆ ಅದ್ಮಿ ಖ್ಹಾರಾವ್‌ನ, “ಆಬಿ ಇವ್ಣಾಮ ಏಕ್‌ ಜ಼ಣೊ” ಕರಿ ಬೋಲಾಲಗಿ. 70 ಕತೋಬಿ ಪೇತ್ರನೆ, “ಕಾಹೆ” ಕರಿ ಪಾಛೊ಼ ಬೋಲ್ಯೊ. ಜ಼ರಘಡಿನ ಬಾದ್‌ಮ ಹಿಜ್ಜಾ಼ ಭಿಯುಥೂತೆ ಇವ್ಣೆ ಪೇತ್ರನ, ಖ್ಹಾಚ಼ಮಾಬಿ “ಯೇಸುನ ಜೋ಼ಡ್ಮ ಥೂತೆ ಇವ್ಣಾಮ ತೂಬಿ ಏಕ್‌ ಜ಼ಣೊ ಕರಿ ಹಮೂನ ಮಾಲುಮ್, ತೂಬಿ ಗಲಿಲಾಯವಾಳೋಸ್‌” ಕರಿ ಬೋಲ್ಯು. 71 ಕತೋಬಿ ಪೇತ್ರನೆ, “ಖ್ಹಾಚಮಾಬಿ, ತುಮೆ ಬೋಲುಕರಾಸ್ತೆ ಯೋ ಅದ್ಮಿ ಮನ ಮಾಲುಮ್‌ಕೊಯ್ನಿ! ಮೇ ಝೂ಼ಟಿ ಬೋಲುಕರ್ತೊ ಉಶೇತೊ, ದೇವ್ನ ಮಾರ್ ಮಾರಪರ್ ಆವಾದೆ ಕರಿ” ಬೋಲಿನ್ ಶಪತ್‌ ಖಾವಲಗ್ಯೊ. 72 ಯೋಸ್‌ ವಖ್ಹತ್‌ಮ, ಮುರ್‌ಗೊ ಬೇನೆ ಹಲ್ಲ ಬಾಂಗ್‌ ದಿದೊ. ತದೆ ಪೇತ್ರನೆ, “ಮುರ್‌ಗೊ ಬೇ ಹಲ್ಲ ಬಾಂಗ್‌ದ್ಯವಾನ ಅಗಾಡಿ, ತೂ ಮಾರಿ ಬಾರೇಮ ತೀನ್ ಹಲ್ಲ ‘ಯೋ ಮನ ಮಾಲುಮ್ ಕೊಯ್ನಿ’ ಕರಿ ಬೋಲಿಶ್” ಕರಿ ಯೇಸುನೆ ಇನ ಬೋಲ್ಯೊಥೋತೆ ವಾತೆನ ಯಾದ್‌ಕರಿನ್, ಯೋ ಖ್ಹಡ್‌ಕ್ಯಾ ಭರಿನ್ ರೋಯೊ. |
The New Testament in Waghri Language © The Word for the World International and Waghri Translation Samiti, Karnataka, 2023.