ಮತ್ತಾಯ 16 - ದೇವ್ನಿ ಖ್ಹಾಚಿ ವಚನ್ಅದ್ಭುತ್ ಕರೀನ್ ವತಾಳ್ ಕರಿ ಬೋಲ್ಯೂತೆ ( ಮಾರ್ಕ 8:11-13 ; ಲೂಕ 12:54-56 ) 1 ಫರಿಸಾಯರ್ ಅಜು಼ ಸದ್ದುಕಾಯವಾಳು ಯೇಸುನ ಖ್ಹಪ್‌ಡಾವ್ಣು ಕರಿ ಇನಾಕನ ಐನ್, ತೂ ಆಬ್‍ಥೊ ಆಯೊಹುಯೊ ಕರಿ ವತಾಳನಖ್ಹಾಜೆ ಹಮೂನ ಏಕ್‌ ಅದ್ಭುತ್ ಕರಿನ್ ವತಾಳ್ ಕರಿ ಬೋಲ್ಯು. 2 ತದೆ ಯೇಸುನೆ ಇವ್ಣುನ, “ಖ್ಹಾಂಜ಼್‌ನಿ ವಖ್ಹತ್‌ಮ ತುಮೆ ಆಬ್‍ ಲಾಲ್‍ಹುಯಿರ‍್ಹೋತೊ, ‘ಅಪ್ಣುನ ಅಛ್ಛು಼ ಮೋಸಮ್ ರ‍್ಹಿಶೆ’ ಕರಿ ಬೋಲೋಸ್. 3 ವ್ಹಾಣಾನು ಆಬ್‍ ವಾದ್‍ಳೇಥಿ ಢಪೈನ್ ಕಾಳೊ ಅಜು಼ ಲಾಲ್ ಹುಯಿರ‍್ಹೋತೊ, ‘ಆಜ಼್ ಪಾಣಿ ವರಖ್ಹ್‌ಶೆ’ ಕರಿ ಬೋಲೋಸ್ ಕಾಹೆಕಿ ಶು? ದನ್ನಿ ಹಾಲ್-ಚಾ಼ಲ್ ದೇಖಿನ್, ಆ ಅಮ್, ಯೋ ಇಮ್ ಕರಿ ಖ್ಹಣೇದ್ ಕರಾನ ತುಮೂನ ಮಾಲುಮ್; ಕತೋಬಿ ಆ ವಖ್ಹತ್‌ನಿ ಖ್ಹಣೇದ್‍ನಿ ಮತ್‌ಲಬ್ ತುಮೂನ ಮಾಲುಮ್ ಕೊಯ್ನಿಕಿಶು? 4 ಖರಾಬ್ ಅಜು಼ ಪಾಪಿ ಹುಯಿರ‍್ಹೂತೆ ಆ ಪಿಳ್ಗೀನು ಅದ್ಮಿ ಏಕ್‌ ಅದ್ಭುತಾನ ದೇಕ್ಣು ಕರಿ ಆಖ್ಹ್ ಕರಾಸ್! ಯೋನನ ಚಾ಼ಲ್ಯುತೆ ಅದ್ಭುತ್ ಕಾಮಸ್ ಪಣ್ಕಿ ಬಿಜು಼ ಕೆಹೂಬಿ ಇವ್ಣುನ ಮಳ್‌ಶೆ ಕೊಯ್ನಿ!” ಕರಿ ಜವಾಬ್‌ ದೀನ್, ಇವ್ಣುನ ಮ್ಹೆಂದಿನ್ ಚ಼ಲೆಗಯೊ. ಪರಿಸಾಯರ್ ಅಜು಼ ಸದ್ದುಕಾಯವಾಳನಿ ಬಾರೇಮ ಝೇತಾಯೊತೆ ( ಮಾರ್ಕ 8:14-21 ) 5 ಯೇಸು ಅಜು಼ ಇನ ಶಿಷ್ಯರ್‌ ದರ‍್ಯಾವ್‍ನಿ ಪಾರ್ಲಿ ಬಾಜೂ಼ಮ ಗಯ, ತದೆ ಶಿಷ್ಯರ್‌ನೆ ರೋಟ ಪಳ್ಳಿಜಾ಼ವಾನು ಭೈಕಿಗಯಾಥಾ. 6 ಯೇಸುನೆ ಇವ್ಣುನ, “ಜ಼ತನ್ ರ‍್ಹವೊ! ಫರಿಸಾಯರ್ ಅಜು಼ ಸದ್ದುಕಾಯವಾಳನು ಶೋಡ ನಾಖ್ಯುಹುಯು ಆಟಾನಿ ಬಾರೇಮ ಜ಼ತನ್‌ಥಿ ರ‍್ಹವೊ ಕರಿ ಬೋಲ್ಯೊ. 7 ತದೆ ಇವ್ಣೆ, “ಅಪ್ಣೆ ರೋಟಾ ಲಾಯಕೊಂತೆ ಇನಖ್ಹಾಜೆ ಅಮ್ ಬೋಲ್ಯೊಕಿ ಶುಕಿ” ಕರಿ ಇವ್ಣ-ಇವ್ಣಾಮ ಬೋಲಿಲಿದು. 8 ಯೇಸುನೆ ಇವ್ಣೆ ಬೋಲಿಲೆವ್‍ಕರಾತೆ ಮಾಲುಮ್‌ಕರಿನ್, ಇವ್ಣುನ, “ಕಮ್‍ವಿಶ್ವಾಸ್‍ವಾಳ! ರೋಟಾ ಕೊಯ್ನಿ ಕರಿ ಬೋಲಾನಿ ಬಾರೇಮ ಶನ ವಾತೆ ಬೋಲಿಲೆವ್‍ಕರಾಸ್ತೆ? 9 ತುಮೂನ ಬಿಜೂ಼ಬಿ ಮಾಲುಮ್ ಕರ‍್ಯಾಕೊಯ್ನಿಕಿ ಶು? ತುಮೂನ ಯಾದ್ ಕೊಯ್ನಿಕಿ ಶು? ಯೋ ಪಾಚ಼್ ರೋಟಾನ ಪಾಚ಼್ ಹಜಾ಼ರ್ ಅದ್ಮಿನ ಖಡಾವಾನ ಬಾದ್‌ಮ ಕೆತ್ರ ಟೋಕ್ರಾ ತುಮೆ ಭರ‍್ಯಾಥ? 10 ಎತ್ರೇಸ್ ಕಾಹೆತೆ ಯೋ ಖ್ಹಾತ್ ರೋಟಾನ ಚಾರ್ ಹಜಾ಼ರ್ ಅದ್ಮಿನ ಖಡಾವಾನ ಬಾದ್‌ಮ ತುಮೆ ಕೆತ್ರ ಟೋಕ್ರಾ ಭರ‍್ಯಾಥ? 11 ಮೇ ರೋಟಾನಿ ಬಾರೇಮ ವಾತೆ ಬೋಲ್ಯೋತೆ ಕಾಹೆ ಕರಿ ತುಮೂನ ಮಾಲುಮ್ ಪಡ್ಯುಕೊಯ್ನಿತೆ ಕಿಮ್? ಜ಼ತನ್! ಫರಿಸಾಯರ್ ಅಜು಼ ಸದ್ದುಕಾಯವಾಳನು ಶೋಡಾ ಪಡ್ಯುಹುಯು ಆಟಾನಿ ಬಾರೇಮ ಹೊಷಾರ್‌ಥಿ ರ‍್ಹವೊ” ಕರಿ ಬೋಲ್ಯೊ. 12 ತದೆ ಇನ ಶಿಷ್ಯರ್‌ನೆ ರೋಟಾಮ ನಾಖಾತೆ ಶೋಡಾನಿ ಬಾರೇಮ ಜ಼ತನ್‌ಥಿ ರ‍್ಹವೊ ಕರಿ ಕಾಹೆ ಯೇಸುನೆ ಅಪ್ಣುನ ಬೋಲ್ಯೊತೆ, ಫರಿಸಾಯರ್ ಅಜು಼ ಸದ್ದುಕಾಯವಾಳು ಬೋಲಿ ಶಿಕಾಡಸ್ತೆ ಇನಿ ಬಾರೇಮ ಜ಼ತನ್‌ಥಿ ರ‍್ಹವೊ ಕರಿ ಇನೆ ಬೋಲ್ಯೊತೆ ಕರಿ ಇವ್ಣೆ ಮಾಲುಮ್ ಕರಿಲಿದು. ಪೇತ್ರನೆ ಯೇಸುನ ಕ್ರಿಸ್ತ ಕರಿ ಕಬುಲ್ಯೋತೆ ( ಮಾರ್ಕ 8:27-30 ; ಲೂಕ 9:18-21 ) 13 ಯೇಸು ಫಿಲಿಪ್ಪನು ಕೈಸರೆಯ ಕರಿ ಖ್ಹಯೇರ‍್ನು ಇಟಾರಮ್ಮ ಗಯೊ. ಹಿಜ್ಜಾ಼ ಇನ ಶಿಷ್ಯರ್‌ನ, “ಅದ್ಮಿನೊ ಛಿಯ್ಯೊ ಹುಯಿರ‍್ಹೋತೆ ಮನ ಅದ್ಮಿಖ್ಹಾರು ಕೋಣ್ ಕರಿ ಬೋಲಾಸ್?” ಕರಿ ಪುಛಾ಼ಯೊ. 14 ಇವ್ಣೆ ಇನ, “ಥೋಡು ಜ಼ಣು ತುನ, ‘ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ’ ಕರಿ ಬೋಲಾಸ್, ಬಿಜು಼ ಥೋಡು ಜ಼ಣು, ‘ಎಲೀಯ’ ಕರಿ ಬೋಲಾಸ್, ಅಜು಼ ಥೋಡು ಜ಼ಣು, ಯೆರೆಮೀಯ ನತರ್‌ಕಿ ಪ್ರವಾದೀಮ ಏಕ್‌ ಜ಼ಣೊ’ ಕರಿ ಬೋಲಾಸ್” ಕರಿ ಜವಾಬ್‌ ದಿದಾ. 15 ಯೇಸುನೆ ಇವ್ಣುನ, “ತುಮೆ ಮನ ಕೋಣ್ ಕರಿ ಬೋಲೋಸ್?” ಕರಿ ಪುಛಾ಼ಯೊ. 16 ತದೆ ಸೀಮೋನ ಪೇತ್ರನೆ, “ತೂ ಆವ್ಣುತೆ ಕ್ರಿಸ್ತ, ಜಿವ್ತೊ ದೇವ್‌ನೊ ಛಿಯ್ಯೊ” ಕರಿ ಜ಼ವಾಬ್ ದಿದೊ. 17 ಯೇಸುನೆ, “ಯೋನಾನೊ ಛಿಯ್ಯೊ ಸೀಮೋನ, ತೂ ಧನ್ಯ ಹುಯಿರ‍್ಹೋಸ್! ಆ ಖ್ಹಾಚ಼ನ ತುನ ಮಾಲುಮ್ ಕರಾಯೂತೆ ಅದ್ಮಿನೆ ಕಾಹೆ, ಪಣ್ಕಿ ಸೊರ್ಗಾಮ ಛಾ಼ತೆ ಮಾರ ಬಾನೇಸ್ ಆ ಖ್ಹೂಜ಼್‌ ಕರಾಯೋತೆ ಕರಿ ಬೋಲ್ಯೊ. 18 ಅಜು಼ ಮೇ ತುನ ಶಾತ್ ಬೋಲಸ್‍ಕತೊ, ಪೇತ್ರ, ತೂ ಬಂಡೊ, ಅಜು಼ ಆ ಬಂಡಾಪರ್ ಮೇ ಮಾರಿ ಸಬೆನ ಭಾಂದೀಶ್, ಪಾತಾಳ್ನಿ ಶಕತ್‌ಬಿ ಇನ ಕದೇಬಿ ಹರಾವನ ಕೋ ಉಶೇನಿ. 19 ಸೊರ್ಗಾನು ರಾಜ್ಯನು ಬೀಗಾನ ಖ್ಹಾರು ಮೇ ತುನ ದಿಶ್; ಧರ್ತಿಪರ್ ತೂ ಶಾತ್ ಭಾಂದೀಶ್‌ಕಿ, ಯೋ ಸೊರ್ಗಾಮಾಬಿ ಭಂದಾವ್‌ಶೆ, ಅಜು಼ ಧರ್ತಿಪರ್ ತೂ ಶಾತ್ ಛೋ಼ಡಿಶ್‌ಕಿ, ಯೋ ಸೊರ್ಗಾಮಾಬಿ ಛೋ಼ಡಾವ್‌ಶೆ” ಕರಿ ಬೋಲ್ಯೊ. 20 ಅನಕೇಡೆಥು ಯೇಸುನೆ ಇನ ಶಿಷ್ಯರ್‌ನ, “ಮೇಸ್ ಕ್ರಿಸ್ತ ಹುಯಿರ‍್ಹೋಸ್ ಕರಿ ಕಿನಾಬಿ ನಾ ಬೋಲ್‌ನು” ಕರಿ ಝೇತೈನ್‌ ಬೋಲ್ಯೊ. ಯೇಸುನೆ ಇನ ಖ್ಹತಾಪ್ಣಿ ಅಜು಼ ಮರಣ್ಣಿ ಬಾರೇಮ ಬೋಲ್ಯೋತೆ ( ಮಾರ್ಕ 8:31—9:1 ; ಲೂಕ 9:22-27 ) 21 ತಪ್‌ಥೊ ಯೇಸು, “ಮೇ ಯೆರೂಸಲೇಮ್‌ನ ಜೈ಼ನ್‌, ಹಿಜ್ಜಾ಼ ಶಾಣಾವ್‍ಥೀಬಿ, ಗಲ್‌ಢಯಾಜಕರ್‌ಥಿ, ಅಜು಼ ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೇಥಿ ಘಣು ಲತಾಡ ಖ್ಹಮಾಳ್‌ಣು ಅಜು಼ ಇವ್ಣೆ ಇನ ಮರ್‌ನಾಕ್‌ಶೆ; ಕತೋಬಿ ತೀನ್ ದನ್‌ಕೇಡೆ ಮೇ ಪಾಛೊ಼ ಜಿವ್ತೊಹುಯಿನ್, ಉಠೀನ್ ಆಯಿಶ್” ಕರಿ ಶಿಷ್ಯರ್‌ನ ಬೋಲಾನ ಶುರು ಕರ‍್ಯೊ. 22 ತದೆ ಪೇತ್ರನೆ ಯೇಸುನ, ಏಕಾಡಿ ಬುಲೈಲಿಜೈ಼ನ್, ಪ್ರಭು, ದೇವ್ ತೂ ಇಮ್ ನಕೋಸ್ ಬೋಲ್! ತುನ ಇಮ್ ನಾಸ್ ಹೋಣು!” ಕರಿ ಬೋಲಿನ್, ಇನ ಜಿದ್‌ಕರ‍್ಯೊ. 23 ತದೆ ಯೇಸುನೆ ಫರೀನ್, ಪೇತ್ರನ, “ಏ ಶೈತಾನ್, ಮಾರ ಖ್ಹಾಮ್ಣೇಥೊ ಹಟಿಜಾ಼! ತೂ ಮಾರ ಕಾಮ್ನ ಅಡ್ಡಿ ಹುಯಿರ‍್ಹೋಸ್! ತಾರಿ ಆ ಸೋಚ್ ಅದ್ಮಿನಿ ಸೋಚಸ್‌ ಪಣ್ಕಿ ದೇವ್ನಿ ಸೋಚ಼್ ಕಾಹೆ” ಕರಿ ಬೋಲ್ಯೊ. 24 ಅನಕೇಡೆಥು ಯೇಸುನೆ ಇನ ಶಿಷ್ಯರ್‌ನ, “ಕಿನಾತೋಬಿ ಮಾರ ಪೀಠೆ ಆವ್ಣುಕರಿ ಮನ್ ಉಶೇತೊ, ಯೋ ಖ್ಹುದ್‌ನ ಭೈಕಿಜೈ಼ನ್, ಇನಿ ಶಿಲ್‌ಬೇನ ಪಾಡಿಲೀನ್, ಮಾರ ಪೀಠೆ ಆವಾದೆ. 25 ಇನೊ ಜಾನ್ನ ಬಚಾ಼ಡಿಲೇವ್ಣು ಕರಿ ಕರಾವಾಳು ಇನ ಗುಮೈಲಿಶೆ; ಕತೋಬಿ ಮಾರಖ್ಹಾಜೆ ಇನ ಜಾನ್ನ ಗುಮೈಲ್ಯಾವಾಳು ಇನ ಬಚಾ಼ಡಿಲಿಶೆ. 26 ಏಕ್‌ ಅದ್ಮಿ ಹಿಡಿ ಜಗತ್‍ನಾಸ್ ಕಮೈಲೀನ್, ಇನ ಜಾನ್ನ ಲುಕ್‌ಶಾನ್ ಕರಿಲಿದುತೋ, ಇನ ಶನಿ ಫಾಯಿದೊ? ಶನೀಸ್ ಫಾಯಿದೊ ಕೊಯ್ನಿ! ಯೋ ಅದ್ಮಿ ಬಿಜು಼ ಶಾತ್ಬಿ ದೀನ್ ಇನ ಜಾನ್ನ ಪಾಛು಼ ಬಚಾ಼ಡಿಲ್ಯವಾನ ಕೋ ಹುವಾನಿ! 27 ಅದ್ಮಿನೊ ಛಿಯ್ಯೊ ಇನ ಬಾನಿ ಮಹಿಮೆಥಿ ಅಜು಼ ಇನ ದೂತರ್‌ನ ಜೋ಼ಡೆ ಆವ್‌ಶೆ; ಯೋ ವಖ್ಹತ್‌ಮ ಏಕೇಕ್‌ನ ಇವ್ಣಿ ಚಾ಼ಲ್‌ನಿಘೋಣಿ ಇನಾಮ್ ದಿಶೆ. 28 ಮೇ ತುಮೂನ ಖ್ಹಾಚಾಮ ಬೋಲುಸ್ಕಿ, ಹಜ್ಜಾ಼ ಭಿಯುತೆ ಇವ್ಣಾಮ ಥೋಡು ಜ಼ಣು ಅದ್ಮಿನೊ ಛಿಯ್ಯೊ ಇನ ರಾಜ್ಯಮ ಆವ್‌ಶೇತೆ ದೇಖಲಗೂಬಿ ಮರ್‌ಶೆಸ್ ಕೊಯ್ನಿ” ಕರಿ ಬೋಲ್ಯೊ. |
The New Testament in Waghri Language © The Word for the World International and Waghri Translation Samiti, Karnataka, 2023.