ಮತ್ತಾಯ 1 - ದೇವ್ನಿ ಖ್ಹಾಚಿ ವಚನ್

ಯೇಸು ಕ್ರಿಸ್ತನಿ ಗುರುಗುರಬ್‍ಲ್ಯಾನಿ ಪಟ್ಟಿ

¹ ಹೈರಿತೆ ಯೇಸು ಕ್ರಿಸ್ತನಿ ಗುರುಗುರಬ್‍ಲ್ಯಾನಿ ಪಟ್ಟಿ: ಯೇಸು ದಾವೀದನೊ ಖಾಂದಾನ್‌ವಾಳೊ, ದಾವೀದ ಅಬ್ರಹಾಮನೊ ಖಾಂದಾನ್‌ವಾಳೊ.

² ಅಬ್ರಹಾಮ್ ಇಸಾಕನೊ ಬಾ, ಇಸಾಕ್ ಯಾಕೋಬನೊ ಬಾ, ಯಾಕೋಬನ ಯೆಹೂದ ಅಜು಼ ಇನ ಭೈಯೇ ಪೈದಹುಯ.

³ ಯೆಹೂದ ಪೆರೆಚ ಅಜು಼ ಜೆರಹಾನೊ ಬಾ (ಅವ್ಣಿ ಆಯ ತಾಮರ), ಪೆರೆಚ ಹೆಚ್ರೋನನೊ ಬಾ, ಹೆಚ್ರೋನ ಅರಾಮನೊ ಬಾ.

⁴ ಅರಾಮ ಅಮ್ಮಿನಾದಾಬನೊ ಬಾ, ಅಮ್ಮಿನಾದಾಬ ನಹಶೋನನೊ ಬಾ, ನಹಶೋನ ಸಲ್ಮೋನನೊ ಬಾ.

⁵ ಸಲ್ಮೋನಬಿ ರಾಹಾಬನೊ ಛಿಯ್ಯೊ ಬೋವಜ, ಬೋವಜಬಿ ರೂತ್‍ನೊ ಛಿಯ್ಯೊ ಓಬೇದ, ಓಬೇದ ಇಷಯನೊ ಬಾ.

⁶ ಇಷಯ ದಾವೀದ್‌ ರಾಜಾ಼ನೊ ಬಾ, ದಾವೀದ ಸೊಲೊಮೋನನೊ ಬಾ (ಸೊಲೊಮೋನ್ನಿ ಆಯ ಪಹಿಲೆ ಉರಿಯಾನಿ ಬಾವಣ್‍ ಹುಯಿರ‍್ಹೀಥಿ),

⁷ ಸೊಲೊಮೋನ ರೆಹಬ್ಬಾಮ್ನೊ ಬಾ, ರೆಹಬ್ಬಾಮ ಅಬೀಯನೊ ಬಾ, ಅಬೀಯ ಆಸನೊ ಬಾ.

⁸ ಆಸನ ಯೆಹೋಷಾಫಾಟನೊ ಬಾ, ಯೆಹೋಷಾಫಾಟ ಯೆಹೋರಾಮನೊ ಬಾ, ಯೆಹೋರಾಮ ಉಜ್ಜೀಯಾನೊ ಬಾ.

⁹ ಉಜ್ಜೀಯ ಯೋತಾಮನೊ ಬಾ, ಯೋತಾಮ ಆಹಾಜನೊ ಬಾ, ಆಹಾಜ ಹಿಜ್ಕೀಯಾನೊ ಬಾ.

¹⁰ ಹಿಜ್ಕೀಯ ಮನಸ್ಸೆನೊ ಬಾ, ಮನಸ್ಸೆ ಆಮೋನನೊ ಬಾ, ಆಮೋನ ಯೋಷೀಯಾನೊ ಬಾ.

¹¹ ಯೋಷೀಯಾನ ಯೆಕೊನ್ಯ ಅಜು಼ ಇನ ಭೈಯೇ ಪೈದಹುಯ. ಯೆಹೂದ್ಯರ್‌ನ ಅದ್ಮಿನ ಬಾಬೇಲ್‌ನ ಧರ್‌ಲಿಗಯೂತೆ ಯೋ ವಖ್ಹತ್‌ಮ ಅವ್ಣೆ ಪೈದಹುಯುತೆ.

¹² ಯೆಹೂದ್ಯರ್‌ನ ಅದ್ಮಿನ ಬಾಬೇಲ್‌ನ ಧರಿಲೀನ್ ಜಾ಼ವಾನ ಬಾದ್‌ಮ, ಪೈದಹುಯುತೆ ಇವ್ಣಿ ಖೇಣಿ, ಯೆಕೊನ್ಯ ಶೆಯಲ್ತಿಯೇಲ್‌ನೊ ಬಾ, ಶೆಯೆಲ್ತಿಯೇಲ್ ಜೆರುಬ್ಬಾಬೆಲ್‍ನೊ ಬಾ.

¹³ ಜೆರುಬ್ಬಾಬೆಲ್ ಅಬಿಹೂದನೊ ಬಾ, ಅಬಿಹೂದ ಎಲ್ಯಕೀಮ್‌ನೊ ಬಾ, ಎಲ್ಯಕೀಮ್ ಅಜೋರನೊ ಬಾ.

¹⁴ ಅಜೋರ ಸದೋಕನೊ ಬಾ, ಸದೋಕ ಅಖೀಮನೊ ಬಾ, ಅಖೀಮ ಎಲಿಹೂದನೊ ಬಾ.

¹⁵ ಎಲಿಹೂದ ಎಲಿಯಾಜರನೊ ಬಾ, ಎಲಿಯಾಜರ ಮತ್ತಾನನೊ ಬಾ, ಮತ್ತಾನ ಯಾಕೋಬನೊ ಬಾ.

¹⁶ ಯಾಕೋಬ ಯೋಸೇಫ್‌ನೊ ಬಾ, ಯೋಸೇಫ ಮರಿಯನೊ ಬಾವ್ರಿ. ಮರಿಯ ಯೇಸುನಿ ಆಯ, ಯೇಸುನ, ಬಚಾ಼ಡವಾಳೊ ಕ್ರಿಸ್ತ ಕರಿ ಚಿಕರ್ತುಥು.

¹⁷ ಅಬ್ರಹಾಮ್‍ಥು ಧರಿನ್ ದಾವೀದತೋಡಿ ಚೌ಼ಧ ಮುಂಡಿ, ದಾವೀದ್‌ಥು ಧರಿನ್ ಬಾಬೇಲ್‌ನ ಧರಿಲಿಗಯೂತೆ ಇವ್ಣಾತೋಡಿ ಚೌ಼ಧ ಮುಂಡಿ, ಬಾಬೇಲ್‌ನ ಧರಿಲಿಗಯೂತೆ ಹಿಜ್ಜಾ಼ಥು ಧರೀನ್ ಕ್ರಿಸ್ತಲಗು ಚೌ಼ಧ ಮುಂಡಿ.

ಯೇಸು ಕ್ರಿಸ್ತ ಪೈದಹುಯೊತೆ

¹⁸ ಯೇಸು ಕ್ರಿಸ್ತ ಪೈದಹುಯೊತೆ ಕಿಮ್‌ಕತೊ; ಇನಿ ಆಯ ಮರಿಯನ ಯೋಸೇಫ್‌ಥಿ ಖ್ಹಗೈ ನಾಖಿರಾಖ್ಯೂಥು, ಕತೋಬಿ ಇವ್ಣೊ ವ್ಯಹಾ ಹುವಾನ ಅಗಾಡಿಸ್, ಯೋ ಪವಿತ್ರಾತ್ಮಾಥಿ ಬೇಜೂನಿ ಹುಯಿರ‍್ಹೀಥೀತೆ ಇನ ಮಾಲುಮ್‌ಪಡ್ಯು.

¹⁹ ಯೋಸೇಫ ಏಕ್‌ ನೀತಿವಾಳೊ ಅದ್ಮಿ ಹುಯಿರ‍್ಹೋಥೊ, ಇನಖ್ಹಾಜೆ ಯೋಸೇಫ ಅದ್ಮಿನ ಖ್ಹಾಮ್ಣೆ ಮರಿಯನಿ ಖ್ಹರಮ್‌ ನಾ ಕಾಡ್ಣು ಕರಿ, ಕಿನಾಬಿ ಮಾಲುಮ್‌ಪಡ್ಣುನಾತೆ ಇಮ್‌, ಖ್ಹಗೈನ ತೋಡಿನಾಕ್‌ಣು ಕರಿ ಥೊ.

²⁰ ಯೋ ಇಮ್‌ ಸೋಚುಕರಾನಿ ವಖ್ಹತ್‌ಮ, ದೇವ್ನದೂತನೆ ಇನ ಖ್ಹೋಣ್ಯಮ ದೆಖೈನ್, “ದಾವೀದನೊ ಖಾಂದಾನ್‌ವಾಳ ಯೋಸೇಫ, ಮರಿಯನ ತಾರಿ ಬಾವಣ್‍ ಕರಿಲ್ಯವಾನ ಡರ್‌ನಕೊ. ಯೋ ಪವಿತ್ರಾತ್ಮಥೀಸ್ ಬೇಜೂನಿ ಹುಯಿರ‍್ಹೀಸ್ತೆ.

²¹ ಯೋ ಏಕ್‌ ಪರ್ಖ್ಹೊ ಲಡ್ಕಾನ ಜ಼ಣ್‌ಶೆ, ತೂ ಇನ ಯೇಸುಕರಿ ನಾಮ್ ಮ್ಹೇಲ್ನು. ಶನಕತೊ, ಯೋ ಇನ ಅದ್ಮಿಯೇವ್ನ ಪಾಪ್‌ಮಾಥು ಬಚಾ಼ವ್‍ಶೆ” ಕರಿ ಬೋಲ್ಯೊ.

²² ಪ್ರಭುನೆ ಪ್ರವಾದಿಯೇನ ಮ್ಹೋಡವಾಟೆ ಬೋಲಾಯೋತೆ ವಾತೆ ಖ್ಹಾರು ಚಾ಼ಲಾನಟೇಕೆ, ಆ ಖ್ಹಾರು ಚಾ಼ಲ್ಯುತೆ.

²³ ಯೋ ವಾತೆ ಶಾತ್‌ಕತೊ, “ಹಂದೇಖೊ, ಏಕ್‌ ಕವಾರಿ ಬೇಜೂನಿ ಹುಯಿನ್, ಏಕ್‌ ಛಿಯ್ಯಾನ ಜ಼ಣ್‌ಶೆ. ಅಜು಼ ಇನ, ‘ಇಮ್ಮಾನುವೇಲ್’ ಕರಿ ನಾಮ್ ಮ್ಹೇಲ್‌ಶೆ!” ಇಮ್ಮಾನುವೇಲ್ ಕತೊ, “ದೇವ್ ಅಪ್ಣ ಜೋ಼ಡೆ ಛಾ಼” ಕರಿ.

²⁴ ಯೋಸೇಫ ನಿಂದರ್‌ಮಾಥು ಹೊಷಾರಿ ಹುಯಿನ್ ಉಠಾನ ಬಾದ್‌ಮ, ದೇವ್ನದೂತನೆ ಬೋಲ್ಯೋತೆ ಇಮ್ಮಸ್, ಮರಿಯನ ವ್ಯಹಾ ಕರಿಲಿದೊ.

²⁵ ಕತೋಬಿ ಮರಿಯ ಛಿಯ್ಯೊ ಪೈದಾಕರಾತೋಡಿ, ಯೋಸೇಫ ಇನಜೋ಼ಡೆ ಖ್ಹುತೊಕೊಯ್ನಿ. ಯೋಸೇಫ್‌ನೆ ಯೋ ಲಡ್ಕಾನ ಯೇಸು ಕರಿ ನಾಮ್ ಮ್ಹೇಲ್ಯೊ.