ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 23 - ದೇವ್ನಿ ಖ್ಹಾಚಿ ವಚನ್ಯೇಸುನ ಪಿಲಾತನ ಖ್ಹಾಮ್ಣೆ ಲಾಯುತೆ ( ಮತ್ತಾಯ 27:1-2 , 11-14 ; ಮಾರ್ಕ 15:1-5 ; ಯೋಹಾನ 18:28-38 ) 1 ಹಿಜ಼್ಜಾ ಎಕ್ಟು ಹುಯಿರ‍್ಹುಥೂತೆ ತಮಾಮ್‌ ಅದ್ಮಿ ಉಠೀನ್, ಯೇಸುನ ಪಿಲಾತಕನ ಬುಲೈಲಿಗಯು. 2 ಹಿಜ್ಜಾ಼ ಇವ್ಣೆ ಯೇಸುಪರ್, “ಆ ಅದ್ಮಿ, ಅಪ್ಣ ಅದ್ಮಿ ಖ್ಹಾರಾನ ಗಲತ್‌ ವಾಟ್‌ಪರ್ ಲೀವಳ್ಯೊಜಾ಼ಸ್, ಇವ್ಣುನ, ‘ತುಮೆ ಕೈಸರ್‌ನ ಶುಂಕ ನಕೊ ಭಾಂದೊ’ ಕರಿ ಬೋಲಸ್, ಅತ್ರೇಸ್ ಕಾಹೆತೆ ಇನು ಯೋಸ್, ‘ಮೇ ಕ್ರಿಸ್ತ ಕರಿ ಏಕ್‌ ರಾಜ಼’ ಕರಿ ಬೋಲ್ತೊಫಂಡಾಸ್” ಕರಿ ಬೋಲಿನ್ ಗಲತ್‌ ಲಗಾಡ್ಯು. 3 ಪಿಲಾತನೆ ಯೇಸುನ, “ತೂ ಯೆಹೂದ್ಯರ್‌ನೊ ರಾಜಾ಼ಕಿ ಶು?” ಕರಿ ಪುಛಾ಼ಯೊ, ತದೆ ಯೇಸುನೆ ಇನ, “ತುನೇಸ್ ಬೋಲ್ಯೋನಿ” ಕರಿ ಜವಾಬ್‌ ದಿದೊ. 4 ತದೆ ಪಿಲಾತನೆ ಮಹಾಯಾಜಕರ್‌ ಅಜು಼ ಅದ್ಮಿನಿ ಭೀಡ್ನ, “ಆ ಅದ್ಮಿಮ ಮನ ಶನೀಶ್ ಗಲತ್‌ ಕೋ ದೆಖಾಯುನಿ” ಕರಿ ಬೋಲ್ಯೊ. 5 ಕತೋಬಿ ಇವ್ಣೆ, “ಯೂದಾಯನು ಖ್ಹಾರಸ್ ಅದ್ಮಿನ, ಆ ವಚನ್ನ ಬೋಲಿದೇತೊಹುಯಿನ್‌, ಇವ್ಣಾಮ ಕಲ್ಹಾಗಟ್ ನಾಖಿರಾಖ್ಯೋಸ್. ಅನೆ ಗಲಿಲಾಯಾಥು ಶುರು ಕರೀನ್, ಹಮ್ಕೆ ಹಜ಼್ಜಾ ಐರ‍್ಹೋಸ್ತೆ” ಕರಿ ಬಿಜೂ಼ಬಿ ಘಟ್‍ಥಿ ಬೋಲ್ಯು. ಯೇಸುನ ಹೆರೋದಕನ ಮೋಕ್‌ಲ್ಯುತೆ 6 ಅನ ಖ್ಹಮ್‌ಜಿನ್‌ ಪಿಲಾತನೆ, “ಆ ಅದ್ಮಿ ಗಲಿಲಾಯವಾಳೊಕಿ ಶು? ಕರಿ ಫುಛಾ಼ಯೊ. 7 ಯೇಸು ಹೆರೋದ ಅದಿಕಾರ್ ಚ಼ಲಾವ್‍ಕರಾಸ್ತೆ ಗಾಮ್‌ವಾಳೊ, ಕರಿ ಪಿಲಾತನ ಮಾಲುಮ್ ಪಡ್‌ತಾನ, ಯೇಸುನ ಹೆರೋದಕನ ಮೋಕ್‌ಲ್ಯೊ, ಯೋ ದನ್ಮ ಹೆರೋದ ಯೆರೂಸಲೇಮ್ಮಾಸ್ ಥೊ. 8 ಯೇಸುನ ದೇಖಿನ್‌, ಹೆರೋದನ ಘಣು ಖ್ಹುಶಿಹುಯು. ಶನಕತೊ, ಇನೆ ಯೇಸುನಿ ಬಾರೇಮ ಘಣು ಖ್ಹಮ್‌ಜಿರಾಖ್ಯೊಥೊ, ಇನಖ್ಹಾಜೆ ಘಣ ದನ್‌ಥು, ಇನ ದೇವ್ಣುಕರಿ ಥೊ, ಯೇಸು ಕೆಹುತೋಬಿ ಅದ್ಭುತ್ ಕರಾತೊ, ಇನ ದೇಕ್ಣು ಕರಿ ಆಖ್ಹ್‌ಥು. 9 ತದೆ ಹೆರೋದನೆ ಯೇಸುನ ಕೆತ್ರು ಫುಛಾ಼ಯೊತೋಬಿ, ಯೇಸುನೆ ಇನ ಜವಾಬ್‌ ಕೋ ದಿದೋನಿ. 10 ಗಲ್‌ಢಯಾಜಕರ್‌ ಅಜು಼ ಮೋಶೇನು ಧರ್ಮಶಾಸ್ತ್ರ ಶಿಕಾವಾಳು ಶಾಸ್ತ್ರಿಯೆ ಭೀರಿನ್‌, ಯೇಸುನಿ ವಿರೋದ್ ನೀಕೊಂತೇಸ್ ವಾತೆನ ಬೋಲುಕರ್ತೂಥು. 11 ಹೆರೋದ ಅಜು಼ ಇನು ಸಿಪಾಯಿಖ್ಹಾರು ಯೇಸುನಿ ಛಿಂಘಾವ್ಣಿ ಕರೀನ್, ನಕ್ಲೆ ಕಾಡ್ಯು. ಅಜು಼ ಘಣು ಅಛ್ಛು಼ ಝ಼ಗ್ಗಾನ ಫೇರೈನ್, ಪಾಛು಼ ಪಿಲಾತಕನ ಮೋಕ್ಲಿದಿದೊ. 12 ಯೋಸ್ ದನ್ನೆ ಹೆರೋದ ಅಜು಼ ಪಿಲಾತ ದೋಸ್ತ್‌ ಬಣ್ಯಾ. ಅನೇಥಿ ಅಗಾಡಿ ಇವ್ಣೆ ದುಶ್‌ಮನ್‌ ಹುಯಿರ‍್ಹಾಥ. ಯೇಸುನ ಮರಣ್ ದಂಡ್‌ ದಿದೂತೆ ( ಮತ್ತಾಯ 27:15-26 ; ಮಾರ್ಕ 15:6-15 ; ಯೋಹಾನ 18:39—19:16 ) 13 ತದೆ ಪಿಲಾತನೆ, ಮಹಾಯಾಜಕರ್‌ನ, ಅದಿಕಾರಿನ ಅಜು಼ ಅದ್ಮಿ ಖ್ಹಾರಾವ್‌ನ ಏಕ್‌ದಮ್ ಬುಲೈನ್, 14 ಇವ್ಣುನ, “ತುಮೆ ಆ ಅದ್ಮಿನ ಮಾರಕನ ಲೈನ್‌, ಅದ್ಮಿ ಖ್ಹಾರಾನ ಗಲತ್‌ ವಾಟ್‌ಪರ್ ಚ಼ಲಾವ್‍ಕರಾಸ್‌ ಕರಿ ಬೋಲ್ಯ, ಕತೋಬಿ ಮೇ ಅನ ತುಮಾರ ಖ್ಹಾಮ್ಣೆಸ್ ವಿಚಾರ್ ಕರ‍್ಯೊತೋಬಿ, ತುಮೆ ಲಗಾಡ್ಯತೆ ಗಲ್ತಿಮ, ಏಕ್‌ಬಿ ಆನಾಮ ಮನ ಮಳ್ಯುಕೊಯ್ನಿ. 15 ಹೆರೋದನಾಬಿ ಅನಾಮ ಗಲತ್‌ ಕೋ ದೆಖಾಯುನಿ, ಇನಖ್ಹಾಜೆಸ್‌, ಇನೆ ಅನ ಪಾಛು಼ ಅಪ್ಣಕನ ಮೋಕ್‌ಲ್ಯೊತೆ. ಮರಣ್ ದಂಡ್‌ ಖಾವಾಖ್ಹರ್‌ಕು ಗಲತ್‌ ಯೇಸುನೆ ಕರಿರಾಖ್ಯೊಕೊಯ್ನಿ. 16 ಅನಖ್ಹಾಜೆ, ಮೇ ಅನ ಕೊಳ್ಡೇಥಿ ಮರೈನ್, ಮ್ಹೆಂದೆವುಸ್” ಕರಿ ಬೋಲ್ಯೊ. 17 ಪಸ್ಕ ಪೂಜಾ಼ನಿ ವೇಳ್ಮ ಅದ್ಮಿಖ್ಹಾರು ಬೋಲಿಲೇಸ್ತೆ ಏಕ್‍ಜ಼ಣಾನ ಖ್ಹಾರ್ಕೊಟ್‌ಮಾಥು ಪಿಲಾತ ಭಾರ್‌ ಕಾಡಿಮ್ಹೇಲ್‍ನು ಪಡ್ಯುಥು. 18 ಕತೋಬಿ ಇವ್ಣೆ ಜೋ಼ರೇಖ್ಹು ಚಿಕ್ರಿನ್, “ಅನ ಮರೈನಾಕ್‌! ಹಮಾರಖ್ಹಾಜೆ ಬರಬ್ಬನ ಮ್ಹೇಲಿದೆ” ಕರಿ ಬೋಲ್ಯು. 19 ಖ್ಹಯೇರ್‌ಮ ಚಾ಼ಲ್ಯುಥೂತೆ ಕಲ್ಹಾಗಟ್‍ನಟೇಕೆ ಅಜು಼ ಅದ್ಮಿನ ಮರ್‌ನಾಖ್ಯುತೆ ಇನಖ್ಹಾಜೆ ಬರಬ್ಬಾನ ಜೇಲ್‌ಮ ಕೋಂಡಿ ಘಾಲಿರಾಖ್ಯುಥು. 20 ಪಿಲಾತನೆ ಯೇಸುನ ಛೋ಼ಡಾವ್‍ಣು ಕರಿ ಬಿಜು಼ ಪಾಛು಼ ಇವ್ಣ ಜೋ಼ಡೆ ವಾತೆ ಬೋಲ್ಯೊ. 21 ಕತೋಬಿ ಇವ್ಣೆ, “ಇನ ಶಿಲ್ಬೆಪರ್ ನಾಕ್! ಶಿಲ್ಬೆಪರ್ ನಾಕ್!” ಕರಿ ಚಿಕ್ರುಕರ್ತುಥು. 22 ಕತೋಬಿ ಪಿಲಾತನೆ ತೀನ್ನೆಹಲ್ಲ, “ಶನ? ಆ ಖಾರಾಬ್‌ ಶಾತ್ ಕರಿರಾಖ್ಯೋಸ್? ಮರಣ್ ದಂಡ್‌ ದೆವಾಖ್ಹರ್‌ಖ್ಹು ಗಲತ್‌ ಅನಾಮ ಮನ ದೆಖಾಯು ಕೊಯ್ನಿ! ಅನಖ್ಹಾಜೆ, ಮೇ ಅನ ಕೊಳ್ಡೇಥಿ ಮರೈನ್, ಮ್ಹೆಂದೆವುಸ್” ಕರಿ ಇವ್ಣುನ ಬೋಲ್ಯೊ. 23 ಕತೋಬಿ, ಇವ್ಣೆ ಬಿಜೂ಼ಬಿ ಜೋ಼ರೇಥಿ ಬಳೇಳ್‌ತುಹುಯಿನ್, ಯೇಸುನ ಶಿಲ್ಬೆಪರ್ ನಖಾವ್ಣು ಕರಿ ಬೋಲ್ಯು. ಖ್ಹರ್ತಿಮ ಇವ್ಣಿ ಚಿಕ್ರಾಣಸ್ ಜೂತಿಗೈ. 24 ತದೆ ಪಿಲಾತನೆ ಇವ್ಣೆ ಬೋಲಿಲಿದುತೆ ಇಮ್ಮಸ್ ಹುವಾದೆ ಕರಿ ತೀರ್ಮಾನ್ ಕರೀನ್, 25 ಕಲ್ಹಾಗಟ್ ಅಜು಼ ಅದ್ಮಿನ ಮರ್‌ನಾಖ್ಯುತೆ ಇನಾಟೇಕೆ, ಜೇಲ್‌ಮ ಕೋಂಡೈ ಘಲೈರ‍್ಹೂಥೂತೆ ಬರಬ್ಬನ ಮ್ಹೇಲಿದಿನ್, ಅದ್ಮಿನಿ ಮರ್ಜಿನಿಘೋಣಿ, ಯೇಸುನ ಇವ್ಣ ಹಾತ್‌ಮ ದಿನಾಖ್ಯೊ. ಯೇಸುನ ಶಿಲ್ಬೆಪರ್ ನಾಖ್ಯೂತೆ ( ಮತ್ತಾಯ 27:32-44 ; ಮಾರ್ಕ 15:21-32 ; ಯೋಹಾನ 19:17-27 ) 26 ಸಿಪಾಯಿಖ್ಹಾರು ಯೇಸುನ ಬುಲೈಲಿನ್ ವಳ್ಯುಜಾ಼ತುಥೂತೆ ವಖ್ಹತ್‌ಮ, ಖೇತರ್‌ಥು ವಳ್ಯಾವ್‍ತೊಥೋತೆ ಸಿರೇನ್ ಖ್ಹಯೇರ‍್ನೊ ಸೀಮೋನ್ನ ಧರೀನ್, ಇನಾಪರ್ ಶಿಲ್‌ಬೇನ ನಾಖಿನ್, ಇನ ಪಳ್ಳಿನ್‌, ಯೇಸುನ ಪೀಠೆ ಆವಾನಿಘೋಣಿ ಕರ‍್ಯು. 27 ಅದ್ಮಿನಿ ಮೋಟಿ ಭೀಡ್ ಇನ ಪೀಠೆಆಯಿ; ಇವ್ಣಾಮ ಥೋಡಿ ತಯೇಡಾಬಿ ಥಿಯೆ, ಇವ್ಣೆ ಯೇಸುನಖ್ಹಾಜೆ ಛಾ಼ತಿ ಕೂಟ್‌ತುಹುಯಿನ್, ರೋವ್‌ತಿ ಐಯ್ಯೆ. 28 ತದೆ ಯೇಸುನೆ ಪೀಠೆ ಫರೀನ್ ಇವ್ಣುನ, “ಯೆರೂಸಲೇಮ್‌ನಿ ತಿರಿಯಾವೊ! ಮಾರಖ್ಹಾಜೆ ನಕೊ ರೋವೊ, ಕತೋಬಿ ತುಮಾರಖ್ಹಾಜೆ ಅಜು಼ ತುಮಾರ ಲಡ್ಕಾವ್‍ನಖ್ಹಾಜೆ ರೋವೊ. 29 ಶನಕತೊ ಅಮ್ನದನ್‌ ಖ್ಹಾರ ವಳ್ಯಾವಾಸ್ಕಿ, ಯೋ ದನ್ಮ ಅದ್ಮಿಖ್ಹಾರು, ‘ವಾಂಝ಼್‌ಣಿ ಅಜು಼ ಬೇಜೂನಿ ಹುಯಿಕೊಂತೆ ಅಜು಼ ದೂದ್ ಪಿಡೈಕೊಂತೆ ತಯೇಡಾಸ್ ಧನ್ಯ’ ಕರಿ ಬೋಲ್‌ಶೆ. 30 ಯೋ ದನ್ಮ ಅದ್ಮಿ, ‘ಪರ್ಭತ್‌ ಹಮಾರಪರ್ ಪಡ್! ಪಹಾಡ್ ಹಮೂನ ಢಾಪಿಲೆ!’ ಕರಿ ಬೋಲ್‌ಶೆ. 31 ಝಾ಼ಡು ಹರ‍್ಯು ರ‍್ಹವಾನಿ ವಖ್ಹತ್‌ಮಾಸ್‌, ಅಮ್ನು ಖ್ಹಾರು ಹುಯೂತೊ, ಖ್ಹುಕೈ ಜಾ಼ಶೇತೆ ವಖ್ಹತ್‌ಮ ಶಾತ್ ಉಶೆ?” ಕರಿ ಬೋಲ್ಯೊ. 32 ಯೇಸುನ ಜೋ಼ಡೆಸ್ ಬಿಜ಼ ಬೇ ಜ಼ಣಾನಾಬಿ ಮಾರ‍್ನು ಕರಿ ಲೀವಳ್ಯುಜಾ಼ತುಥು, ಇವ್ಣೆ ಭೇ ಜ಼ಣಾಬಿ ಅಪರಾದಿ ಹುಯಿರ‍್ಹಾಥ. 33 ಇವ್ಣೆ ‘ಖೋಪ್ರಿ’ ಕರಿ ಬೋಲಾನಿ ಝ಼ಗೋಕನ ಐನ್, ಹಿಜ್ಜಾ಼ ಯೇಸುನ ಶಿಲ್ಬೆಪರ್ ಮಾರ‍್ಯು, ಅಜು಼ ಯೋ ಬೇ ಅಪರಾದಿಮ ಏಕ್‌ ಜ಼ಣಾನ ಖಾವಿ ಬಾಜೂ಼ಮ ಅಜು಼ ಬಿಜೇಕ್‌ ಜ಼ಣಾನ ಡಾವಿ ಬಾಜೂ಼ಮ ಶಿಲ್ಬೆಪರ್ ಮಾರ‍್ಯು. 34 ತದೆ ಯೇಸುನೆ, “ಬಾ, ಅವ್ಣುನ ಮಾಪ್‌ಕರ್‌! ಅವ್ಣೆ ಶಾತ್ ಕರುಕರಸ್ ಕರಿ ಅವ್ಣುನಾಸ್‌ ಮಾಲುಮ್ ಕೊಯ್ನಿ” ಕರಿ ಬೋಲ್ಯೊ. ಸಿಪಾಯಿಖ್ಹಾರು ಚೀಟಿ ನಾಖಿನ್, ಯೇಸುನ ಲುಂಗ್ಡಾವ್‍ನ ಇವ್ಣ-ಇವ್ಣಾಮಸ್ ವಾಟ ಪಾಡಿಲಿದು. 35 ಅದ್ಮಿಖ್ಹಾರು ಭೀರಿನ್‌, ಯೆಹೂದ್ಯರ್‌ನ ಅದಿಕಾರಿಖ್ಹಾರು ಯೇಸುನಿ ನಕ್ಲೆ ಕಾಡುಕರ್ತುಥೂತೆ ಇನ ದೇಖುಕರ್ತುಥು. ಇವ್ಣೆ, “ಅನೆ ಬಿಜಾ಼ನ ಬಚಾ಼ಡ್ಯೊ, ಯೋ ದೇವ್ನೆ ಚೂ಼ಣ್ಯೋತೆ ಕ್ರಿಸ್ತ ಉಶೇತೊ, ಇನು ಯೋಸ್ ಬಚಾ಼ಡಿಲ್ಯವಾದೆ! ಕರಿ ಬೋಲ್ಯು. 36 ಶಿಪಾಯಿ ಖ್ಹಾರುಬಿ ಯೇಸುನಿ ನಕ್ಲೆ ಕಾಡ್ಯು; ಇವ್ಣೆ ಯೇಸುನ ಖನ್ನೆ ಐನ್, ಕಮ್ ಮೋಲ್ನು ಕಂದಾಯುಹುಯು ದ್ರಾಕ್ಷಿನು ರಖ್ಹ್‌ನ ಪಿಯ್ಯಾನ ದೀನ್, 37 “ತೂ ಯೆಹೂದ್ಯರ್‌ನೊ ರಾಜಾ಼ ಉಶೇತೊ, ತಾರು ತೂಸ್ ಬಚಾ಼ಡಿಲೆ” ಕರಿ ಬೋಲ್ಯು. 38 ಯೇಸುನಿ ಶಿಲ್‌ಬೆನ ಉಪ್ಪರ್, “ಆ ಯೆಹೂದ್ಯರ್‌ನೊ ರಾಜ಼” ಕರಿ ಲೀಖೈರ‍್ಹೂಥು. 39 ಹಿಜ್ಜಾ಼ ಶಿಲುಬೆಪರ್ ಠಂಗೈರಾಖ್ಯುಥೂತೆ ಅಪರಾದಿಮ ಏಕ್‌ ಜ಼ಣು ಯೇಸುನಿ ನಕ್ಲೆ ಕಾಡ್ತೊಹುಯಿನ್‌, “ತೂ ಕ್ರಿಸ್ತ ಕಾಹೆಕಿ ಶು? ಇಮ್‍ಕತೊ, ತೂಬಿ ಬಚಿ ಜಾ಼ ಹಮುನಾಬಿ ಬಚಾ಼ಡ್‍!” ಕರಿ ಬೋಲ್ಯೊ. 40 ಕತೋಬಿ ಬಿಜೇಕ್‌ ಜ಼ಣಾನೆ ಇನ ಗುರ್‌ಕೈನ್, “ತುನ ದೇವ್‌ನೂ ಡರ್‌ ಕೊಯ್ನಿಕಿ ಶು? ತುನಾಬಿ ಇಮ್ನಿಸ್ ನಿಶತ್ ಮಳಿರ‍್ಹೀಸ್‌ನಿ. 41 ಅಪ್ಣುನತೋಬಿ, ನಿಶತ್ ಮಳಿರ‍್ಹೀಸ್ತೆ ಇನಾಮ ನ್ಯಾವ್‌ ಛಾ಼; ಶನಕತೊ ಅಪ್ಣೆ ಕರ‍್ಯಾತೆ ಗಲತ್‌ನಖ್ಹಾಜೆ, ಅಪ್ಣುನ ನಿಶತ್ ಮಳಿರ‍್ಹಿಸ್‌. ಕತೋಬಿ ಅನೆ ಶನೀಬಿ ಗಲತ್‌ ಕೋ ಕರ‍್ಯೋನಿ!” 42 ಅಜು಼ ಇನೆ ಯೇಸುನ, “ಯೇಸು, ತೂ ರಾಜ್ಯಲೀನ್ ಆವಾನಿ ವಖ್ಹತ್‌ಮ, ಮನ ಯಾದ್ ಕರಿಲಿಜೊ!” ಕರಿ ಬೋಲ್ಯೊ. 43 ತದೆ ಯೇಸುನೆ ಇನ, “ಮೇ ತುನ ಖ್ಹಾಚ ಬೋಲುಸ್ಕಿ, ಹಮ್ಕೇಸ್ ತೂ ಮಾರ ಜೋ಼ಡೆ ಸೊರ್ಗಾಮ ರ‍್ಹೀಶ್” ಕರಿ ಬೋಲ್ಯೊ. ಯೇಸು ಜಾನ್‌ ಮ್ಹೇಲ್ಯೋತೆ ( ಮತ್ತಾಯ 27:45-56 ; ಮಾರ್ಕ 15:33-41 ; ಯೋಹಾನ 19:28-30 ) 44-45 ತದೆ ಧೊಪಾರ್‌ ಹುಯಿಗಯುಥು, ಚಾ಼ಂದ್ ಉಜಾ಼ಳು ದ್ಯವಾನು ಭೀರಿಜೈ಼ನ್, ತೀನ್ ಘಂಟಾಲಗು, ಯೋ ಖ್ಹಾರ ದೇಖ್ಹ್‌ಪರ್ ಅಂಧಾರು ಢಫೈಗಯುಥು. ಮಂದಿರ್‌ಮ ಠಂಗೈರಾಖ್ಯುಥೂತೆ ಪಡ್‌ದೊ ಫಾಟಿನ್, ಬೇ ಭಾಗ್‌ ಹುಯಿಗಯು. 46 ಯೇಸು ಜೋ಼ರೆಖ್ಹು ಚಿಕ್ರಿನ್, “ಬಾ, ತಾರ ಹಾತ್‌ಮ ಮಾರು ಆತ್ಮಾನ ದೆವುಕರುಸ್‌” ಕರಿ ಬೋಲಾನ ಬಾದ್‌ಮ, ಜಾನ್‌ ಮ್ಹೇಲ್ಯೊ. 47 ತದೆ ಖ್ಹೋಶಿಪಾಯಿನೊ ಮೋಟಾನೆ ಚಾ಼ಲ್ಯುತೆ ಇನ ದೇಖಿನ್‌, “ಖ್ಹಾಚಮಾಬಿ ಆ ಅದ್ಮಿ ನೀತಿವಾಳೊಸ್‌ ಹುಯಿರ‍್ಹೋಥೊ!” ಕರಿ ದೇವ್ನ ಖ್ಹರಾಯೊ. 48 ಆ ಖ್ಹಾರು ದೆಖಾನ ಐರ‍್ಹೂಥೂತೆ ಅದ್ಮಿಖ್ಹಾರು, ಚಾ಼ಲ್ಯುತೆ ಇನ ದೇಖಿನ್‌, ದುಖ್‌ಥಿ ಛಾ಼ತಿ ಕೂಟ್‌ತುಹುಯಿನ್, ಇವ್ಣ ಘರೆ ಫಾಛು಼ಫರಿ ಗಯು. 49 ಯೇಸುನು ವಳ್‌ಖಿನು ಅದ್ಮಿಖ್ಹಾರು ಅಜು಼ ಗಲಿಲಾಯಾಥು ಇನ ಭೀಡೆ ಆಯುಹುಯಿ ತಯೇಡ ಖ್ಹಾರಿ ದೂರ್ ಭೀರಿನ್‌, ಚಾ಼ಲ್ಯುತೆ ಯೋ ಖ್ಹಾರಾನ ದೇಖಿಯೆ. ಯೇಸುನ ಮುರ್ದಾನ ಘವಿಮ ಘಾಲ್ಯುತೆ ( ಮತ್ತಾಯ 27:57-61 ; ಮಾರ್ಕ 15:42-47 ; ಯೋಹಾನ 19:38-42 ) 50-51 ಯುದಾಯ ತಬರ್‌ಖಾನು, ಅರಿಮಥಾಯ ಕರಿ ಗಾಮ್ಮ ಯೋಸೇಫ ಕರಿ ಏಕ್ಜ಼ಣೊ ಥೊ. ಯೋ ಏಕ್‌ ಅಛ್ಛು಼ ಅಜು಼ ನೀತಿವಾಳೊ ಅದ್ಮಿ ಹುಯಿರ‍್ಹುಥೊ, ದೇವ್ನಿ ರಾಜ್ಯ ಕದೆ ಆವ್‍ಶೆಕರಿ ಬೋಲಿನ್ ಟಿವವ್‍ಕರ್ತೊಥೊ. ಶಾಣಾವ್‍ನಿ ಸಭೆಮಾನು ಅದ್ಮಿಮ ಆಬಿ ಏಕ್‌ ಜ಼ಣೊ ಹುಯಿರ‍್ಹೋಥೊ, ಕತೋಬಿ ಯೆಹೂದ್ಯರ್‌ನು ಶಾಣುಖ್ಹಾರು ಯೇಸುನ ಮಾರ‍್ನು ಕರಿ ಕರ‍್ಯುತೆ ಇನ, ಅನೆ ಮಾನ್ಯೊಥೊ ಕೊಯ್ನಿ. 52 ಯೋ ಪಿಲಾತಕನ ಜೈ಼ನ್‌, ಯೇಸುನು ಶರೀರ್ ಮನ ದೇ ಕರಿ ಬೋಲಿಲಿದೊ. 53 ಇನೆ ಯೇಸುನು ಶರೀರ್‌ನ ಶಿಲ್‌ಬೆಪರ್‌ಥು ಉತಾರಿನ್‌, ಘಣ ಮೋಲ್ನು ಲುಂಗ್ಡಾಥಿ ಲಪೇಟಿನ್, ಬಂಡಾಮ ಖೋಂದಿ ರಾಖ್ಯುಥೂತೆ ಘವಿಮ ಮ್ಹೇಲ್ಯೊ. ಅನೇಥಿ ಪಹಿಲೆ ಇನಾಮ ಕಿನೂಬಿ ಮಖ್ಹಾಣ್ಯು ಮ್ಹೇಲ್ಯೂಥು ಕೊಯ್ನಿ. 54 ಯೋ ದನ್ ಖ್ಹವಾರಾನೊ ದನ್ ಹುಯಿರ‍್ಹೋಥೊ, ಅಜು಼ ಜ಼ರ ಘಡಿಮಾಸ್ ಸಬ್ಬತ್ ದನ್ ಶುರು ಹುವಾಳು ಥು. 55 ಗಲಿಲಾಯಥು ಯೇಸುನ ಭೀಡೆ ಆಯಿಹುಯಿ ತಯೇಡಾನೆ, ಯೋಸೇಫ್‌ನ ಜೋ಼ಡೆ ಜೈ಼ನ್‌, ಘವಿನಾಬಿ ಅಜು಼ ಯೇಸುನು ಶರೀರ್‌ನ ಮ್ಹೇಲೈರೂತೆ ತರಿಕಾನ ದೇಖ್ಯು. 56 ತದೆ ಇವ್ಣೆ ಪಾಛು಼ಫರಿ ಘರೆಐನ್, ಅಛ್ಛು಼ ವಾನು ಜ಼ಡಿಬೂಠಿ ಅಜು಼ ವಾನುತೇಲ್‌ನ, ಯೇಸುನ ಶರೀರ್‌ಪರ್‌ ಲಗಾಡನಖ್ಹಾಜೆ ಖ್ಹವಾರಿಯೆ, ಮೋಶೇನು ಧರ್ಮಶಾಸ್ತ್ರಮ ಹುಕುಮ್‌ ದೀರಾಖ್ಯುತೆ ಇಮ್ಮಸ್ ಇವ್ಣೆ ಸಬ್ಬತ್ ದನ್ಮ ಅರಾಮ್‌ಕರಿಯೆ. |
The New Testament in Waghri Language © The Word for the World International and Waghri Translation Samiti, Karnataka, 2023.