ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 17 - ದೇವ್ನಿ ಖ್ಹಾಚಿ ವಚನ್ಪಾಪ್ನಿ ಬಾರೇಮ ( ಮತ್ತಾಯ 18:6 , 7 , 21 , 22 ; ಮಾರ್ಕ 9:42 ) 1 ಯೇಸುನೆ ಇನ ಶಿಷ್ಯರ್‌ನ ಬೋಲ್ಯೋಕಿ, “ಅದ್ಮಿನ ಪಾಪ್‌ಮ ಚ಼ಲಾವವಾಳು ರಾಛು಼ ಆವ್‌ಶೆಸ್‌ ಆವ್‌ಶೆ, ಕತೋಬಿ ಇಮ್‌ ಹುವ್ವಾನಿಘೋಣಿ ಕರಾಸ್ತೆ, ಯೋ ಅದ್ಮಿನಿ ಹಾಲ್ನ ಶಾತ್ ಬೋಲು! 2 ಆ ನ್ಹಾನಾವ್‍ಮ ಏಕ್‌ ಜ಼ಣಾನ ಪಾಪ್‌ಮ ಚ಼ಲಾವಥೀಬಿ, ಇನ ಘಲೆಂಡ ಕೇಡೆ ಘಟ್ಟಿನ ಬಂಡಾನ ಭಂದೈಲೀನ್, ದರ‍್ಯಾವ್‌ಮ ನಖೈಲ್ಯವಾನೂಸ್ ಇನ ಅಛ್ಛು಼! 3 ಇನಖ್ಹಾಜೇಸ್, ತುಮೆ ಕರಾತೆ ಬಾರೇಮ ಜ಼ತನ್ ರ‍್ಹವೊ! ತಾರೊ ಭೈ ಪಾಪ್ ಕರ‍್ಯೋತೊ, ಇನ ಗುರ್‌ಕಾವ್, ಏಕ್‌ ವೇಳ್ ಯೋ ಪಾಪ್ನ ಮ್ಹೇಲಿನ್ ಫರಿಗಯೋತೊ, ಇನ ಮಾಪ್‌ ಕರ್‌. 4 ಯೋ ದನ್ನ ಖ್ಹಾತ್ ಹಲ್ಲಾಬಿ ತುನ ಗಲತ್‍ಕರೀನ್ ಖ್ಹಾತ್‍ಹಲ್ಲಾಬಿ ತಾರಭಣಿ ಫರಿನ್, ‘ಮೇ ದಿಲ್‍ ದುಖೈಲೇವುಸ್, ಮನ ಕ್ಷಮಾಕರ್’ ಕರಿ ಬೋಲಿಲಿದೋತೊ ಇನ ಮಾಪ್‌ಕರ್‌ ಕರಿ ಬೋಲ್ಯೊ. ವಿಶ್ವಾಸ್‌ನಿ ಬಾರೇಮ 5 ಅಪೊಸ್ತಲರ‍್ನೆ ಪ್ರಭುನ, “ಹಮಾರಿ ವಿಶ್ವಾಸ್‌ನ ಭಡಾವ್” ಕರಿ ಬೋಲಿಲಿದ. 6 ತದೆ ಪ್ರಭುನೆ ಇವ್ಣುನ, “ರಾಯಿಯೆವ್ಡಿ ವಿಶ್ವಾಸ್‌ ತುಮೂನ ರ‍್ಹಯುತೊ, ತುಮೆ ಆ ಅಂಜೀರ್‌ನ ಝಾ಼ಡ್‌ಣ, ‘ಜ಼ಡ್‌ ಖ್ಹಮೇದ್ ಉಖ್‌ಡೈ ಜೈ಼ನ್‌, ದರ‍್ಯಾವ್‌ಮ ಗಡಿಜಾ಼!’ ಕರಿ ಬೋಲ್ಯಾತೋಬಿ, ಯೋ ತುಮಾರಿ ವಾತೇನ ಖ್ಹಮಜ಼್‌ಶೆ” ಕರಿ ಬೋಲ್ಯೊ. ಆಳ್‌ನು ಕಾಮ್ನಿ ಬಾರೇಮ 7 “ತುಮಾರಾಮ ಕಿನಾತೋಬಿ ನಾಗ್ರಾವಾಳೊ ನತರ್‌ಕಿ ಮೇಂಢ ಚ಼ರಾವವಾಳೊ ಆಳ್‌ ಛಾ಼ ಕರಿ ಲ್ಹಾವೊ. ಯೋ ಆಳ್‌ ಖೇತರ್‌ಮಾಥು ಘರ್‌ಕನ ಆಯೂತೊ, ತುಮೆ ಇನ, ‘ಒಗ್ಗಿಆವ್, ಖಾಣನ ಬೇಖ್ಹ್‌’ ಕರಿ ಬೋಲಸ್ಕಿ ಶು? 8 ಕೊಯ್ನಿಸಸ್ ಕೊಯ್ನಿ! ತುಮೆ ಇನ, ‘ಮನ ಖಾಣು ತೈಯಾರ್‌ಕರ್, ಅಜು಼ ಕಂಬರ್‌ನ ಲುಂಗ್ಡು ಭಾಂದಿಲೀನ್, ಮೇ ಖೈನ್‌ಪೀಯ್ಯಾತೋಡಿ, ಮಾರಿ ಚಾ಼ಕ್ರಿಕರ್‌, ಬಾದ್‌ಮ ತೂ ಖೈನ್‌ಪೀ ಕರಿ ಬೋಲಾಕೊಯ್ನಿಕಿ ಶು? 9 ಇನಿ ಹುಕುಮ್‌ನಿಘೋಣಿ ಚಾ಼ಲ್ಯುತೆ ಯೋ ಆಳ್‌ನ, ‘ತುನ ಧನ್ಯವಾದ್’ ಕರಿ ಬೋಲ್‌ಶೇಕಿ ಶು? 10 ಅಮ್ಮಸ್, ತುಮೆ ತುಮೂನ ಹುಕುಮ್ ಕರ‍್ಯುತೆ ಇನ, ಪೂರ ಕರಾನ ಬಾದ್‌ಮ, ‘ಹಮೆ ಫಾಯಿದೊಕೊಂತೆ ಆಳ್‌ ಹುಯಿರ‍್ಹಾಸ್, ಹಮೆ ಖಲಿ ಹಮಾರು ಕಾಮ್ನ ಕರಿರಾಖ್ಯಾಸ್’ ಕರಿ ಬೋಲ್‌ನು” ಕರಿ ಬೋಲ್ಯೊ. ಯೇಸುನೆ ಖೋಡ್‍ ಲಾಗಿಹುಯು ದಖ್ಹ್‌ ಅದ್ಮಿನ ಗುಣ್‌ಕರ‍್ಯೋತೆ 11 ಯೇಸು ಯೆರೂಸಲೇಮ್‌ ಭಣಿ ಒಳೆಜಾ಼ತೊಥೋತೆ ತದೆ, ಗಲಿಲಾಯ ಅಜು಼ ಸಮಾರ್ಯ ತಬರ್‌ಖಾನು ಇಚ಼್‌ಮಾನಿ ವಾಟೆಕರಿ ಗಯೊ. 12 ಏಕ್‌ ಗಾಮ್ಮ ಆವಾದಿನ್, ಹಿಜ್ಜಾ಼ ಖೋಡ್‍ ಲಾಗಿರ‍್ಹೂಥೂತೆ ದಖ್ಹ್‌ ಜ಼ಣು ಇನಖ್ಹಾಮ್ಣೆ ಆಯಿನ್, ದೂರ್ ಭೀರಿನ್‌, 13 “ಯೇಸು, ಗುರೂ, ಹಮಾರಪರ್‌ ಗೋರ್‌ಕರ್‌!” ಕರಿ ಚಿಕ್ರಿನ್ ಬೋಲ್ಯು. 14 ಯೇಸುನೆ ಇವ್ಣುನ ದೇಖಿನ್‌, “ತುಮೆ ಜೈ಼ನ್‌, ಯಾಜಕವ್ನ ತುಮಾರು ಆಂಗ್‌ತನ್‌ ವತಾಳೊ” ಕರಿ ಬೋಲ್ಯೊ. ಇವ್ಣೆ ಜಾ಼ವನಿ ವಖ್ಹತ್‌ಮಸ್, ಇವ್ಣೆ ಪಾಕ್‌ ಹುಯಿಗಯು. 15 ಇವ್ಣಾಮ ಏಕ್‌ ಜ಼ಣು ಇನ ಅಛ್ಛು಼ ಹುಯೂತೆ ದೇಖಿನ್‌, ಚೋ಼ರ್ ಆವಾಜ಼್‌ಥಿ, ದೇವ್ನಿ ಖ್ಹರಾವ್ಣಿ ಕರ್ತುಹುಯಿನ್, ಪಾಛು಼ಫರಿ ಆಯು. 16 ಯೋ ಯೇಸುನ ಗೋಡಾಪರ್ ಪಡೀನ್, ಇನ ಧನ್ಯವಾದ್ ಕರ‍್ಯು. ಯೋ ಸಮಾರ್ಯವಾಳೊ ಹುಯಿರ‍್ಹೋಥೊ. 17 ತದೆ ಯೇಸುನೆ ಇನ, “ದಖ್ಹ್‌ ಜ಼ಣಾನ ಅಛ್ಛು಼ ಹುಯೂನಿ? ಬಿಜು಼ ನೌ ಜ಼ಣ ಕ್ಯಾ?” ಕರಿ ಪುಛಾ಼ಯೊ. 18 ದೇವ್ನಿ ಸ್ತುತಿ ಕರಾನಖ್ಹಾಜೆ, ಆ ಪರೈ ದೇಖ್ಹ್‌ವಾಳಾನ ಮ್ಹೆಂದಿನ್, ಬಿಜು಼ ಕೋಣ್‌ಬಿ ಪಾಛು಼ಫರಿ ಆಯು ಕೊಯ್ನಿ ಶು? ಕರಿ ಬೋಲ್ಯೊ. 19 ಅಜು಼ ಯೇಸುನೆ ಇನ, “ಉಪ್ಪರ್ ಉಠೀನ್, ಜಾ಼; ತಾರಿ ವಿಶ್ವಾಸ್‌ಥೀಸ್‌ ತುನ ಅಛ್ಛು಼ಕರ‍್ಯು” ಕರಿ ಬೋಲ್ಯೊ. ದೇವ್ನಿ ರಾಜ಼್ ಆವ್‌ಶೇತೆ ಬಾರೇಮ ( ಮತ್ತಾಯ 24:23-28 , 37-41 ) 20 ಫರಿಸಾಯರ್‌ಮ ಥೋಡು ಜ಼ಣು ಯೇಸುನ, “ದೇವ್ನಿ ರಾಜ್ಯ ಕದೆ ಆವ್‌ಶೆ?” ಕರಿ ಫುಛಾ಼ಯು. ತದೆ ಇನೆ ಇವ್ಣುನ, “ದೇವ್ನಿ ರಾಜ಼್ ದೆಖಾವಾನಿಘೋಣಿ ಆವಾನು ಕಾಹೆ, 21 ಕೋಣ್‌ಬಿ, “ಹಂದೇಖೊ ಹಜ್ಜಾ಼ ಛಾ಼” ನತರ್‌ಕಿ “ಹಂದೇಖೊ ಹಿಜ್ಜಾ಼ ಛಾ಼” ಕರಿ ಬೋಲಾನ ಕೋ ಹುವಾನಿ. ಶನಕತೊ ದೇವ್ನಿ ರಾಜ್ಯ ತುಮಾರ ಮಹಿಸ್ ಛಾ಼” ಕರಿ ಬೋಲ್ಯೊ. 22 ಅಜು಼ ಯೇಸುನೆ ಇನ ಶಿಷ್ಯರ್‌ನ, “ಏಕ್‌ ವಖ್ಹತ್ ಆವ್‌ಶೆ, ತದೆ ತುಮೆ, ಅದ್ಮಿನೊ ಛಿಯ್ಯಾನ ದನ್ಮ ಏಕ್‌ ದನ್‌ತೋಬಿ ದೇಕ್ಣು ಕರಿ ಆಖ್ಹ್ ಕರ‍್ಯಾತೋಬಿ, ತುಮೆ ಇನ ದೇಕ್‌ಶು ಕೊಯ್ನಿ. 23 ಅದ್ಮಿಖ್ಹಾರು ತುಮೂನ, ‘ಹಂದೇಖೊ, ಹಜ್ಜಾ಼ ಛಾ಼!’ ನತರ್‌ಕಿ, ‘ಹಂದೇಖೊ, ಹಿಜ್ಜಾ಼ ಛಾ಼’ ಕರಿ ಬೋಲ್‌ಶೆ. ಕತೋಬಿ ತುಮೆ ಇವ್ಣ ಪೀಠೆ ನಕೊಜಾ಼ಶು. 24 ಶನಕತೊ, ವಿಜ಼್‌ಳಿ ಖಡ್ಕಿನ್‌, ಆಬ್‍ಮ ಏಕ್‌ ಬಾಜು಼ಥು ಬಿಜ್ಜೇಕ್‌ ಬಾಜು಼ತೋಡಿ ಚ಼ಮ್‌ಕಾಸ್ತೆ ಇಮ್ಮಸ್, ಅದ್ಮಿನೊ ಛಿಯ್ಯೊ ಇನ ದನ್ಮ ರ‍್ಹಿಶೆ. 25 ಕತೋಬಿ ಅನೇಥಿಬಿ ಅಗಾಡಿ, ಅದ್ಮಿನೊ ಛಿಯ್ಯೊ, ಘಣಿ ಖ್ಹತಾಪ್ಣಿ ಖೈನ್, ಆ ಹಗಾಮ್ನ ಅದ್ಮಿಥಿ ಝಿಟ್ಕಾರವ್ಣು. 26 ನೋಹಾನ ದನ್ಮ ಚಾ಼ಲ್ಯುತೆ ಇಮ್ಮಸ್, ಅದ್ಮಿನೊ ಛಿಯ್ಯಾನ ದನ್‌ಮಾಬಿ ಚಾ಼ಲ್‌ಷೆ. 27 ತಮಾಮ್‌ ಅದ್ಮಿ, ಖಾತು-ಪೀತು ಹುಯಿನ್, ವ್ಯಹಾ ಕರಿದೇತುಹುಯಿನ್‌, ವ್ಯಹಾ ಕರಿಲೇತುಹುಯಿನ್‌ ಥು. ನೋಹಾನೆ ಜ಼ಹಾಜ಼್‌ನ ಮಹಿ ಚ಼ಢ್ಯೋತೆ ದನ್‌ಮಾಬಿ ಇವ್ಣೆ ಇಮ್ಮಸ್ ಕರುಕರ್ತುಥು. ತದೆ ತೋಫಾನ್‌ ಆಯಿನ್, ತಮಾಮ್‌ ಅದ್ಮಿನ ಬರ್ಬಾತ್ ಕರಿನಾಖ್ಯು. 28 ಲೋಟನ ದನ್ಮ ಚಾ಼ಲ್ಯುತೆ ಇಮ್ಮಸ್ ಚಾ಼ಲ್‌ಷೆ. ಅದ್ಮಿಖ್ಹಾರು ಖಾತು-ಪೀತುಹುಯಿನ್‌, ಮೋಲ್ ಲೇತುಹುಯಿನ್‌, ವೇಚ಼್‌ತುಹುಯಿನ್‌, ಖೆತರ್‌ಮ ಗಾಡ್‌ತುಹುಯಿನ್‌, ಘರ್ ಭಾಂದ್‌ತುಹುಯಿನ್‌ ಥೂ. 29 ಕತೋಬಿ ಲೋಟ ಸೊದೋಮ್ ಗಾಮ್‌ನ ಮ್ಹೆಂದಿನ್ ನೀಕ್‌ಳ್ಯೋತೆ ತದೆ, ಆಬ್‍ಪರ್‌ಥು, ಆಗ್‌ನೊ ಅಜು಼ ರಂಜ಼ಕ್‌ನೊ ಪಾಣಿ ವರ್ಶಿನ್‌ ಇವ್ಣ ಖ್ಹಾರಾವ್‌ನ ಬರ್ಬಾತ್ ಕರಿನಾಖ್ಯು. 30 ಅದ್ಮಿನೊ ಛಿಯ್ಯೊ ದೆಖಾವ್‌ಶೇತೆ ದನ್‌ಮಾಬಿ ಅಮ್ಮಸ್ ರ‍್ಹಿಶೆ. 31 ಯೋ ದನ್ಮ, ಇನ ಘರ್‌ನ ಛ಼ತ್‍ಪರ್‌ ರ‍್ಹವಾಳು, ಇನು ರಾಛು಼ ಪಾಡಾನಟೆಕೆ ಹೇಟ್ ಉತ್ರಿನ್, ಘರ್‌ಮ ನಾ ಆವ್ಣು. ಇಮ್ಮಸ್, ಖೇತರ್‌ಮ ರ‍್ಹವಾಳುಬಿ ಪಾಛು಼ಫರಿ ಇನ ಘರೆ ನಾ ಜಾ಼ವ್ಣು. 32 ಲೋಟನಿ ಬಾವಣ್ಣ ಯಾದ್ ಕರಿಲೆವೊ! 33 ಕೋಣ್ ಇನೊ ಜಾನ್‌ ಬಚಾ಼ಡಿಲೇವ್ಣುಕರಿ ಕರಾಸ್ಕಿ ಯೋ ಇನ ಗುಮೈಲಿಶೆ; ಕತೋಬಿ ಕೋಣ್ ಇನೊ ಜಾನ್‌ ಗುಮೈಲೇಸ್ಕಿ ಯೋ ಇನ ಬಚಾ಼ಡಿಲಿಶೆ. 34 ಮೇ ತುಮೂನ ಬೋಲುಸ್ಕಿ, ಯೋ ರಾತ್ಮ ಎಕ್ಕಸ್ ಖಟಿಯಾಪರ್‌ ಬೇ ಜ಼ಣು ಖ್ಹುತುರ‍್ಹೀಶೆ, ಏಕ್‌ಜ಼ಣಾನ ಪಳ್ಳಿಶೆ, ಏಕ್‌ನ ಮ್ಹೆಂದಿಶೆ. 35 ಬೇ ತಯೇಡ ಎಕ್ಕಸ್ ಘಟ್ಟಿಪರ್‌ ದಳುಕರ್‌ಶೆ, ಏಕ್‌ನ ಪಳ್ಳಿಶೆ, ಏಕ್‌ನ ಮ್ಹೆಂದಿಶೆ ಕರಿ ಬೋಲ್ಯೊ. 36 ಖೇತರ್‌ಮ ರ‍್ಹವಾಳ ಬೇಜ಼ಣಾಮ ಏಕ್‍ಜ಼ಣೊ ಪಡೈಚ಼ಲ್ಯೊಜಾ಼ಶೆ ಬಿಜೇಕ್‍ಜ಼ಣೊ ಹಿಜ್ಜಾ಼ಸ್ ಮ್ಹೇಲೈಜಾ಼ಶೆ ಕರಿ ಬೋಲ್ಯೊ. 37 ತದೆ ಶಿಷ್ಯರ್‌ನೆ, “ಪ್ರಭು, ಆ ಕಿಜ್ಗಾ಼ ಉಶೆ?” ಕರಿ ಫುಛಾ಼ವಖ್ಹತರ್‌, ಯೇಸುನೆ ಇವ್ಣುನ, “ಮುರ್ದು ಕಿಜ್ಜಾ಼ಕಿ, ಹಿಜ್ಜಾ಼ಸ್ ಗರದ್‍ಖ್ಹಾರು ಎಕ್ಟುಹುವಾಸ್” ಕರಿ ಜವಾಬ್‌ ದಿದೊ. |
The New Testament in Waghri Language © The Word for the World International and Waghri Translation Samiti, Karnataka, 2023.