ಯೋಹಾನ 10 - ದೇವ್ನಿ ಖ್ಹಾಚಿ ವಚನ್

ಕುರುಬನಿ ಖೇಣಿ

¹ ಯೇಸುನೆ, “ಮೇ ತುಮೂನ ಖ್ಹಾಚ ಬೋಲುಸ್, ಮೇಂಢಾನು ಕೋಠಾನ ಬಾಕಲ್‌ನಿವಾಟೆ ಮ್ಹೆಂದಿನ್, ಬಿಜಿ ಬಾಜು಼ಥು ಚ಼ಢೀನ್‌, ಮಹಿ ಜಾ಼ವಾಳೊ ಚೋ಼ರ್ ಅಜು಼ ಲೂಟಿಲಿಜಾ಼ವವಾಳೊ ಹುಯಿರ‍್ಹೋಸ್.

² ಕೋಣ್ ಬಾಕಲ್‌ವಾಟೆ ಜಾ಼ವಾಳೊಕಿ ಯೊ ಮೇಂಢಾನ ಚ಼ರಾವವಾಳೊ ಹುಯಿರ‍್ಹೋಸ್.

³ ನಾಮ್ ಧರೀನ್ ಚಿಕ್‌ರ‍್ಯುತೊ ಮೇಂಢ ಇನಿ ಅವಾಜ಼್‌ನ ಕಾನ್‍ದೇಸ್. ವಖ್ಹ್‌ತಿ ಕರಾವಾಳೊ ಯೋ ಮೇಂಢಾನ ಚ಼ಲೈಲಿನ್ ಜಾ಼ಸ್‌.

⁴ ತದೆ ಯೋ ಕುರುಬ ಮೇಂಢಾನ ಖ್ಹಾರು ಭಾರ್‌ ಮ್ಹೇಲಾನಜಾ಼ಸ್ಕಿ ತದೆ, ಮೇಂಢ ಇನಪೀಠೆ ಜಾ಼ಸ್‌.

⁵ ಮೇಂಢಖ್ಹಾರು ಇವ್ಣುನ ಮಾಲುಮ್‌ ಕೊಂತೆ ಅಲ್ಹಾವ್ ಅದ್ಮಿನ ಪೀಠೆ ಕೋಜಾ಼ಯ್ನಿ, ಪಣ್ಕಿ ಇಮ್ನ ಅದ್ಮಿಕಂಥು ಮಿಲೈ ಚ಼ಲ್ಯುಜಾ಼ಸ್‌, ಶನಕತೊ ಇವ್ಣುನ ಯೋ ಅದ್ಮಿನು ಗಳು ಮಾಲುಮ್‌ಕೊಯ್ನಿ” ಕರಿ ಬೋಲ್ಯೊ.

⁶ ಆ ಮತ್ಲಬ್‌ನಿ ಖೇಣಿನ ಯೇಸುನೆ ಇವ್ಣುನ ಬೋಲ್ಯೊ, ಕತೋಬಿ ಇವ್ಣೆ ಇನಿ ವಾತೆನಿ ಮತ್ಲಬ್‌ನ ಮಾಲುಮ್ ಕರ‍್ಯುಕೊಯ್ನಿ.

ಯೇಸುಸ್‌ ಅಛ್ಛೊ಼ ಕುರುಬ

⁷ ಇನಖ್ಹಾಜೆ ಯೇಸುನೆ ಪಾಛೊ಼ ಬೋಲ್ಯೊ, “ಮೇ ತುಮೂನ ಖ್ಹಾಚ ಬೋಲುಸ್, ಮೇಸ್ ಮೇಂಢಾನ ಖ್ಹಾರು ದರ‍್ವಾಜು಼ ಹುಯಿರ‍್ಹೋಸ್.

⁸ ಮೇ ಆವಾನ ಅಗಾಡಿ ಆಯೂತೆ ಖ್ಹಾರುಸ್‌ ಚೋ಼ರ್ ಅಜು಼ ಲೂಟವಾಳು ಹುಯಿರ‍್ಹುಸ್‍, ಕತೋಬಿ ಮೇಂಢು ಖ್ಹಾರು ಇವ್ಣುನ ಕಾನ್‌ ಕೋ ದಿದೂನಿ.

⁹ ಮೇಸ್ ಯೋ ದರ‍್ವಾಜು಼, ಮಾರವಾಟೆ ಕೋಣ್-ಕೋಣ್ ಮಹಿ ಜಾ಼ಸ್ಕಿ ಇವ್ಣೆ ಬಚಿಜಾ಼ಶೆ ಅಜು಼ ಇವ್ಣೆ ಮಹಿ ಜಾ಼ಯೆಜಾ಼ಯ್‌, ಭಾರ್‌ಬಿ ಆಯೆಜಾ಼ಯ್‌, ಇವ್ಣುನ ಚ಼ರಣ್ಣು ಘಾಖ್ಹ್‌ ಮಳ್‌ಶೆ.

¹⁰ ಚೋ಼ರ್ ಚೋ಼ರಿ ಕರಾನಖ್ಹಾಜೆ, ಮರ್‌ನಾಖಾನಖ್ಹಾಜೆ ಅಜು಼ ಬರ್ಬಾತ್ ಕರಾನಖ್ಹಾಜೆ ಆವಸ್ ಪಣ್ಕಿ, ಬಿಜು಼ ಶನಖ್ಹಾಜೆಬಿ ಕಾಹೆ. ಕತೋಬಿ ಮೇತೊ ಇವ್ಣುನ, ಖಲಿ ಜಾನ್‌ ಕಾಹೆ ಜಿವ್ಣು ದೇವ್ಣುಕರಿ ಐರ‍್ಹೋಸ್ ಯೊ ಜಾ಼ಖ್ಹತ್ ಭರ್‌ಪೂರ್‌ ಜಿವ್ಣು ದೇವ್ಣುಕರಿ ಆಯೊ.

¹¹ ಮೇಸ್ ಅಛ್ಛೊ಼ ಕುರುಬ; ಅಛ್ಛೊ಼ ಕುರುಬ ಇನ ಮೇಂಢ ಖ್ಹಾರಾನಖ್ಹಾಜೆ ಇನು ಜಾನ್ನಾಸ್ ದೇಸ್.

¹² ಕತೋಬಿ ಕೂಲಿಆಳ್‌ ಬೋಲಾಸ್ತೆ ಚ಼ರಾವವಾಳೊಬಿ ಕಾಹೆ, ಮೇಂಢ ಖ್ಹಾರಾನ ಯಜಮಾನ್‌ಬಿ ಕಾಹೆ, ಮೇಂಢು ಶೊಂತ್‍ಬಿ ಕಾಹೆ ಇನಖ್ಹಾಜೆ ಜ಼ರಕ್‌ ಆವಾನು ದೇಕ್ತಾಸ್‌ನ, ಮೇಂಢ ಖ್ಹಾರಾನ ಮ್ಹೇಲಿನ್, ಮಿಲೈ ಚ಼ಲ್ಯೊಜಾ಼ಸ್‌. ತದೆ ಜ಼ರಕ್‌ ಮೇಂಢಪರ್ ಪಡೀನ್, ಝೂ಼ಂಡ್‌ನ ಛಿದ್‍ರೈನಾಖಸ್.

¹³ ಯೋ ಕೂಲಿಆಳ್‌ ಮಿಲೈನ್‌, ಚ಼ಲ್ಯುಜಾ಼ಸ್‌ ಶನಕತೊ ಯೋ ಖಲಿಏಕ್‌ ಕೂಲಿ ಆಳ್‌ ಹುಯಿರ‍್ಹೊಸ್, ಇನಖ್ಹಾಜೇಸ್ ಮೇಂಢ ಖ್ಹಾರಾನಿ ಬಾರೇಮ ಇನ ಫಿಕರ್ ಕೋ ರ‍್ಹೇಯ್ನಿ.

^14-15 ಮೇಸ್ ಅಛ್ಛೊ಼ಕುರುಬ ಹುಯಿರೊಸ್; ಬಾನೆ ಮನ ಅಜು಼ ಮೇ ಬಾನ ಮಾಲುಮ್‌ ಕರಿರಾಖ್ಯೊತೆ ಇಮ್ಮಸ್, ಮೇ ಮಾರ ಮೇಂಢಾವ್ನ ಮಾಲುಮ್ ಕರಿರಾಖ್ಯೋಸ್. ಅಜು಼ ಯೊ ಮೇಂಢಾವ್ನೆ ಮನ ಮಾಲುಮ್ ಕರಿರಾಖ್ಯುಸ್. ಅಜು಼ ಮೇ ಮಾರ ಮೇಂಢಾವ್ನಖ್ಹಾಜೆ ಜಾನ್‌ ದ್ಯವಾನ ತಯಾರ್ ಹುಯಿರಿಶ್.

¹⁶ ಅತ್ರೇಸ್ ಕಾಹೆತೆ, ಆ ಮಂಧಾಮ ಮಳ್ಯುಕೊಂತೆ ಬಿಜು಼ ಖ್ಹಾರು ಮೇಂಢಾಬಿ ಮನ ಛಾ಼, ಇನಾಬಿ ಮೇ ಲೀನಸ್ ಆವ್ಣು, ಇವ್ಣೆ ಮಾರಿ ಅವಾಜ಼್‌ನ ಖ್ಹಮ್‌ಜಾ಼ಸ್‌; ತದೆ ಎಕ್ಕಸ್ ಝೂ಼ಂಡ್‌ ಉಶೆ ಅಜು಼ ಎಕ್ಕಸ್ ಜ಼ಣೊ ಕುರುಬ ರ‍್ಹಿಶೆ.

¹⁷ “ಮಾರೊ ಬಾ ಮನ ಪ್ಯಾರ್ ಕರಾಸ್ ಶನಕತೊ ಮೇ ಮಾರ ಜಾನ್ನ ಪಾಛು಼ ಮಳ್‌ಶೆ ಕರಿ ಇನ ದೆವುಸ್.

¹⁸ ಮಾರ ಜಾನ್ನ ಕೋಣ್‌ಬಿ ಮಾರೇಥಿ ಕಾಡಾನ ಕೋ ಹುವಾನಿ. ಮೇ ಮಾರಿ ಖ್ಹುದ್‌ನಿ ಮರ್ಜಿಥಿ ಮಾರ ಜಾನ್ನ ದೆವುಸ್‌ ಮಾರ ಜಾನ್ನ ದ್ಯವಾನ ಅಜು಼ ಪಾಛು಼ ಇನ ಲೀಲ್ಯಾವನ ಮನ ಹಕ್‌ ಛಾ಼. ಆ ಹುಕುಮ್‌ ಮನ ಮಾರ ಬಾಥಿ ಮಳಿರ‍್ಹೀಸ್‌” ಕರಿ ಬೋಲ್ಯೊ.

¹⁹ ಯೇಸುನಿ ಆ ವಾತೇಥಿ ಯೆಹೂದ್ಯರ್‌ಮ ಬಿಜು಼ ಪಾಛು಼ ಭಾಗ್‌ ಪಡಿಗಯು.

²⁰ ಇವ್ಣಾಮ ಘಣು ಜ಼ಣು, “ಅನಾಮ ಭೂತ್‌ ಛಾ಼, ಅನ ದಿವಾನು ಲಾಗಿರ‍್ಹೂಸ್, ತುಮೆ ಶನ ಇನಿ ವಾತೇನ ಖ್ಹಮ್‌ಜೋ಼ಸ್ತೆ?” ಕರಿ ಬೋಲ್ಯು.

²¹ ಬಿಜು಼ ಥೋಡು ಜ಼ಣು, “ಭೂತ್‌ ಧರಿರಾಖ್ಯುತೆ ಅದ್ಮಿ ಅಮ್ನಿ ವಾತೆ ಕೋ ಬೋಲಾನಿ! ಕಿಮ್ ಭೂತ್‌ ಕಾಣಾನ ಡೋಳಾ ದೆಖಾವಾನಿ ಘೋಣಿ ಕರ್‌ಶೇಕಿ ಶು?” ಕರಿ ಬೋಲ್ಯು.

ಯೆಹೂದ್ಯವಾಳು ಯೇಸುನ ಝಿಟ್ಕಾರ‍್ಯುತೆ

²² ತದೆ ಯೆರೂಸಲೇಮ್ಮ ಮಂದಿರ್‌ನು ಉಜಾ಼ಖ್ಹ್‌ನಿ ಪೂಜಾ಼ ಚಾ಼ಲುಕರ್ತುಥು, ತದೆ ಠಣ್ಣಾ ದನ್ ಹುಯಿರ‍್ಹಾಥ.

²³ ಯೇಸು ಮಂದಿರ್‌ನ ಮಹಿ ಸೊಲೊಮೋನ್ನು ಮಂಡಪ್‌ಕನ ಚಾ಼ಲ್ಯೊಫಂಡ್‌ತೋಥೊ.

²⁴ ತದೆ ಯೆಹೂದ್ಯವಾಳು ಇನ ಅಶ್‌ಪಿಶ್ ಐನ್, ಭರಾಯು ಅಜು಼, “ಬಿಜು಼ ಕೆತ್ರ ದನ್ ಹಮಾರೆಥಿ ಖ್ಹಾಚ಼ನ ಮುಶ್ಕಿಲ್‌ಮ ರಾಖಿರಾಖಸ್? ತೂ ಕ್ರಿಸ್ತ ಉಶೇತೊ, ಹಮೂನ ನೇರ್‌ವಳಿಥಿ ಬೋಲ್” ಕರಿ ಬೋಲ್ಯು.

²⁵ ಯೇಸುನೆ, “ಮೇ ಅಗಾಡಿಸ್ ತುಮೂನ ಬೋಲ್ಯೊ, ಕತೋಬಿ ತುಮೆ ಮನ ವಿಶ್ವಾಸ್‌ ಕೋ ಕರ‍್ಯಾನಿ, ಮಾರ ಬಾನ ನಾಮ್‌ಪರ್‌ ಮೇ ಕರುಸ್ತೆ ಅದ್ಭುತ್ ಕಾಮಸ್ ಮನ ಸಾಕ್ಷಿ ಹುಯಿರ‍್ಹುಸ್‍.

²⁶ ಕತೋಬಿ ಮನ ವಿಶ್ವಾಸ್‌ಕರಾಕೊಂತೆ ಇನಖ್ಹಾಜೆ, ತುಮೆ ಮಾರ ಮೇಂಢ ಕೋ ಹುಯಿರಾನಿ

²⁷ ಮಾರ ಮೇಂಢ ಮಾರಿ ಅವಾಜ಼್‌ನ ಖ್ಹಮ್‌ಜಾ಼ಸ್‌; ಮನ ಇವ್ಣೆ ಮಾಲುಮ್‌ ಅಜು಼ ಇವ್ಣೆ ಮಾರ ಪೀಠೆ ಆವಸ್.

²⁸ ಮಾರ ಮೇಂಢಖ್ಹಾರಾನ ಮೇ ಹರ್‌ಹಮೇಶಾನಿ ಜಿ಼ಂದ್‌ಗಿ ದೀಶ್, ಅಜು಼ ಇವ್ಣೆ ಕದೇಬಿ ಮರ್‌ಶೆ ಕೊಯ್ನಿ. ಕೋಣ್‌ಬಿ ಇವ್ಣುನ ಮಾರ ಹಾತ್‌ಮಾಥು ಛಿನಾವಾನ ಕೋ ಉಶೇನಿ.

²⁹ ಆ ಅಖ್ಖಾನ ಮನ ದಿದೋತೆ ಮಾರ ಬಾ ಖ್ಹಾರೇಥಿ ಮೋಟೊ, ಅಜು಼ ಬಾನ ಹಾತ್‌ಮಾಥು ಕೋಣ್‌ಬಿ ಇವ್ಣುನ ಛಿನಾವಾನ ಕೋ ಹುವಾನಿ.

³⁰ ಬಾಬಿ, ಮೇ ಎಕ್ಕಸ್ ಹುಯಿರ‍್ಹಾಸ್‌” ಕರಿ ಬೋಲ್ಯೊ.

³¹ ಪಾಛು಼ ಯೆಹೂದ್ಯರ್ ಯೇಸುನ ಮಾರ‍್ನು ಕರಿ ಬಂಡಾ ಚೂ಼ಣಿಲಿದು.

³² ತದೆ ಯೇಸುನೆ ಇವ್ಣುನ, “ಬಾನೆ ದಿದೋತೆ ಕೈಯೆಕ್ಕಿ ಅಛ್ಛು಼ ಕಾಮ್ನ ಮೇ ತುಮಾರ ಖ್ಹಾಮ್ಣೆ ಕರಿವತಾಳ್ಯೊ; ಯೋ ಖ್ಹಾರು ಕಾಮ್ಮಾಥು ಕೆಹು ಕಾಮ್ನಟೇಕೆ ಮಾರಪರ್ ತುಮೆ ಬಂಡಾ ಫೇಕ್‌ಣು ಕರಿ ಛಾ಼?” ಕರಿ ಪುಛಾ಼ಯೊ.

³³ ಯೆಹೂದ್ಯರ್‌ನೆ, “ಹಮೆ ತಾರಪರ್ ಬಂಡಾ ಫೇಕಾನ ಆಯಾತೆ ಅಛ಼್ಛ ಕಾಮ್ನಕರಿ ಕಾಹೆ, ತುನೆ ದೇವ್ನ ಛಿಂಗಾಯೋತೆ ಇನಖ್ಹಾಜೆ, ತೂ ಖಲಿ ಏಕ್‌ ಅದ್ಮಿ ಹುಯಿರ‍್ಹೋಸ್, ಅಜು಼ ತಾರು ತೂಸ್ ದೇವ್ ಕರಿಲ್ಯವಾನ ದೇಖಾಸ್ತೆ ಇನಖ್ಹಾಜೇಸ್ ಬಂಡಾ ಫೇಕಾನ ಆಯಾತೆ!” ಕರಿ ಜವಾಬ್‌ ದಿದು.

³⁴ ತದೆ ಯೇಸುನೆ, “ತುಮೆ ದೇವ್‌ಖ್ಹಾರು ಹುಯಿರ‍್ಹಾಸ್‌’ ಕರಿ ದೇವ್ನೆ ಬೋಲ್ಯೊತೆ ತುಮಾರಿ ಧರ್ಮಶಾಸ್ತ್ರಮ ಲೀಖೈರ‍್ಹುಸ್ ಕೊಯ್ನಿಕಿಶು?” ಕರಿ ಜವಾಬ್‌ ದಿದೊ.

³⁵ ಧರ್ಮಶಾಸ್ತ್ರ ಕದೇಬಿ ಝೂ಼ಟಿ ಕೋ ಹುವಾನಿ; ದೇವ್ನಿವಚನ್ನ ಲೀರಾಖವಾಳನ ದೇವ್‌ಖ್ಹಾರುಕರಿ ಯೋ ಬೋಲಾನು ರ‍್ಹಯುತೊ

³⁶ ಬಾನೇಸ್ ಇನು ಶೊಂತ್‍ಛಿಯ್ಯೊನ ಚೂ಼ಣಿಲೀನ್, ಜಗತ್‌ಮ ಬೋಲಿ ಮೋಕ್‌ಲೈರ‍್ಹೋತೆ ಇನ ತುಮೆ ‘ಮೇ ದೇವ್‌ನೊ ಛಿಯ್ಯೊ ಹುಯಿರ‍್ಹೋಸ್ ಕರಿ ಬೋಲ್ತಾನ, ‘ತೂ ದೇವ್ನಿ ದೂಷಣೆ ಕರಾಸ್’ ಕರಿ ಬೋಲಸ್ತೆ ಶನ?

³⁷ ಮೇ ಮಾರೊ ಬಾ ಬೋಲಾತೆ ಕಾಮ್ನ ನಾ ಕರ‍್ಯೊ ಉಶೇತೊ, ಮಾರಿ ವಾತೇನ ನಕೊ ನಂಬೊ.

³⁸ ಕತೋಬಿ “ಮೇ ಅಮ್ ಕರ‍್ಯೊತೆ ಇನಖ್ಹಾಜೆ ಮನ ತುಮೆ ವಿಶ್ವಾಸ್‌ ಕೊ ಕರಾನಿ, ಆ ಕಾಮ್ನ ದೇಖಿನ್‌ ತೋಬಿ ನಂಬೊ. ತದೆ ಮಾರ ಮಹಿ ಬಾ ಛಾ಼ ಕರೀಬಿ, ಅಜು಼ ಬಾನ ಮಹಿ ಮೇ ಛೂ಼ ಕರೀಬಿ ತುಮೆ ಮಾಲುಮ್‌ ಕರಿಲಿಶು” ಕರಿ ಬೋಲ್ಯೊ.

³⁹ ಇವ್ಣೆ ಬಿಜು಼ ಪಾಛು಼ ಯೇಸುನ ಧರ್‌ನು ಕರಿ ಕರ‍್ಯು, ಕತೋಬಿ ಯೋ ಇವ್ಣೇಥಿ ಛು಼ಕಿನ್ ನಿಕ್ಳಿಗಯೊ.

⁴⁰ ಅನ ಬಾದ್‌ಮ ಯೇಸು ಯೊರ್ದನ್‌ ನದ್ದಿನು ಪಾರ್ಲಿ ಬಾಜೂ಼ಮ ಯೋಹಾನ ಅಗಾಡಿ ಬ್ಯಾಪ್ತಿಸ್ಮ ದೆವಾಡು ಕರ್ತೊಥೋತೆ, ಯೋ ಝ಼ಗೋಕನ ಪಾಛು಼ ಜೈ಼ನ್‌, ಹಿಜ್ಜಾ಼ಸ್ ಥೊ.

⁴¹ ಕೈಯೆಕ್ಕಿ ಅದ್ಮಿಖ್ಹಾರು ಇನಾಕನ ಐನ್, “ಯೋಹಾನನೆ ಕದೇಬಿ ಏಕ್‌ ಖ್ಹಣೇದ್‌ಬಿ ಕರ‍್ಯೊಕೊಯ್ನಿ, ಕತೋಬಿ ಆ ಅದ್ಮಿನಿ ಬಾರೇಮ ಯೋಹಾನನೆ ಬೋಲ್ಯೋತೆ ಹರೇಕ್ ವಾತೇಬಿ ಖ್ಹಾಚಿಸ್” ಕರಿ ವಾತೆ ಬೋಲ್ಯು.

⁴² ಅಜು಼ ಯೊ ಝ಼ಗೊ ಕೈಯೆಕ್ಕಿ ಅದ್ಮಿ ಯೇಸುಪರ್ ವಿಶ್ವಾಸ್‌ ಕರ‍್ಯು.