ಕೊಲೊಸ್ಸೆ 4 - ದೇವ್ನಿ ಖ್ಹಾಚಿ ವಚನ್1 ಯಜಮಾನವೊ, ತುಮಾರ ಚಾ಼ಕ್ರಿ ಕರವಾಳನ ನ್ಯಾವ್‌ಥಿರ‍್ಹವಾನು ಅಜು಼ ಬರೊಬರ್‌ ರ‍್ಹವಾನೂಬಿ ಕರೊ. ಶನಕತೊ ಪರ್‌ಲೋಕ್‌ಮ ತುಮುನಾಬಿ ಯಜಮಾನ್ ಛಾ಼ಕರಿ ಮಾಲುಮ್ ಛಾ಼. ಮಾರಗ್ ದೆಖಾಡನು 2 ಹೊಷಾರ್‌ಥಿ ರ‍್ಹೀನ್ ಧನ್ಯವಾದ್‍ಕರಾವಾಳ ಹುಯಿರ‍್ಹಿನ್ ಕದೇಬಿ ಪ್ರಾರ್ಥನೆ ಕರ್ತರ‍್ಹೇವೊ. 3 ಯೋಸ್ ವೇಳ್ಮ ಹಮೆ ಕ್ರಿಸ್ತನಿ ಮಾಯ್ನನಿ ವಾತೆ ಬೋಲಾನ ದೇವ್ ಹಮಾರಖ್ಹಾಜೆ ಬಾಕಲ್ ಉಖ್ಡಾನಿತರ ಪ್ರಾರ್ಥನೆಕರೊ. ಅನಖ್ಹಾಜೆಸ್ ಮೇ ಜೇಲ್‌ಮ ಛೂ಼ತೆ. 4 ಅಮ್ ಆ ಖ್ಹಾಚ಼ನ ಮೇ ಅದ್ಮೆವ್‍ನ ಬರೋಬರ್‌ಥಿ ಬೋಲಿ ವತಳಾನಿತರ ಹುವಾದೆ. 5 ತುಮುನ ಮಳಾನಿ ಮೋಕಾನ ಬರೋಬರ್‌ಥಿ ಉಪಯೋಗ್ ಕರಿಲಿನ್, ವಿಶ್ವಾಸ್ಮ ನಾರ‍್ಹವಾಳನಿ ಜೋ಼ಡ್ಮ ಅಕ್ಲಿನಿತರ ಚಾ಼ಲಿಲೇವೊ. 6 ತುಮೆ ವಾತೆಬೋಲಾನಿ ವಖ್ಹತ್‌ಮ ಕದೇಬಿ ವಾರ್‌ಖ್ಹಾನಿ ತರಾಬಿ ಅಜು಼ ರುಚ಼್‌ನಿತರ ರ‍್ಹವಾದೆ. ಅಮ್ನಿಪರಕ್ ತುಮೆ ಹರೇಕ್ ಜ಼ಣನಾಬಿ ಕಿಮ್ ಜ಼ವಾಬ್‍ದೇವ್ಣು ಕರಿಬೋಲಾನು ಮಾಲುಮ್ ಕರಿಲಿಶು. ಖ್ಹರ್ತಿನಿ ಖ್ಹಲಾಮ್ 7 ಪ್ಯಾರ್‌ನೊ ಭೈಬಿ ವಿಶ್ವಾಸ್‌ನೊ ಸೇವಕ್‌ಬಿ ಅಜು಼ ಪ್ರಭುನಿ ಸೇವೆಮ ಛಾ಼ತೆ ತುಖಿಕ ಮಾರಿ ಬಾರೇನಿ ವಾತೆಖ್ಹಾರಿ ತುಮುನ ಖ್ಹಮ್‍ಜಾ಼ಡ್‍ಶೆ. 8 ತುಮೆ ಹಮಾರಿ ಬಾರೇಮ ಮಾಲುಮ್‌ಕರಿಲೇವ್ಣು ಕರಿ ಅಜು಼ ತುಮಾರ ದಿಲ್ನ ಹುಮ್ಮಖ್ಹ್‌ ಕರಾವನಕರಿ ಇನ ತುಮಾರಕನ ಮೋಕ್ಲಿರಾಖ್ಯೊಸ್. 9 ತುಮಾರಮ ವಿಶ್ವಾಸ್‌ವಾಳೊ ಅಜು಼ ಲಾಡ್‌ನೊ ಭೈ ಓನೇಸಿಮನಿ ಜೋ಼ಡ್ಮ ಇನ ಮೇ ಮೋಕ್ಲಿರಾಖ್ಯೊಸ್. ಇವ್ಣೆ ಹಜ಼್ಜ ಚಾ಼ಲುಕರಾತೆ ವಾತೆಖ್ಹಾರಿ ಖ್ಹಮ್‍ಜಾ಼ಡ್‍ಶೆ. 10 ಮಾರಿ ಜೋ಼ಡ್ಮ ಜೇಲ್‌ಮಛಾ಼ತೆ ಅರಿಸ್ತಾರ್ಕಬಿ ಅಜು಼, ಬಾರ್ನಬನೊ ಸಂಬಂದ್‌ವಾಳೊ ಮಾರ್ಕ ತುಮುನ ಖ್ಹಲಾಮ್ ಬೋಲಾಸ್, ಮಾರ್ಕನಿ ಬಾರೇಮ ತುಮೆ ಹುಕುಮ್‌ ಲೀರಾಖ್ಯಾಸ್ನಿ ಯೋ ಏಕ್‌ ವೇಳ್ಮ ತುಮಾರಕನ ಆಯೋತೊ ಇನ ಮಳೈಲೆವೊ. 11 ಯೂಸ್ತಕರಿ ಬೋಲೈಲಿದೋತೆ ಯೇಸುಬಿ ತುಮುನ ಖ್ಹಲಾಮ್‍ಕರಸ್. ದೇವ್ನ ರಾಜ್ಯನಖ್ಹಾಜೆ ಮಾರಿಜೋ಼ಡೆ ಜೋ಼ಡ್ಮಕಾಮ್‍ ಕರಾವಾಳೊ ಹುಯಿರೊಸ್. ಯೆಹೂದ್ಯರ್‌ಹುಯಿರ‍್ಹುತೆ ಅವ್ಣೆಥೀಸ್ ಕಾಮ್‌ಕರಾಮ ಮನ ಭಾಲಿ ಹುಯು. 12 ತುಮಾರಮ ಕ್ರಿಸ್ತ ಯೇಸುನೊ ದಾಸ ಹುಯಿರ‍್ಹೋತೆ ಎಪಫ್ರಬಿ ತುಮುನ ಖ್ಹಲಾಮ್ ಬೋಲಸ್, ತುಮೆ ಪುರ್ಗುಲ್ ಹುಯಿರ‍್ಹೇಣು ಕರೀಬಿ ಖ್ಹಾರಾಸ್ ಕಾಮ್ಮ ದೇವ್ನಿ ಅಖ್ಖಿ ಖ್ಹೂಜ಼್‌ನಿ ಬಾರೇಮ ಪೂರ ಮಾಲುಮ್ ಕರಿರಾಖವಾಳ ಹುಯಿರ‍್ಹೇವ್ಣುಕರಿ ಹೈರೋತೆ ತುಮಾರಖ್ಹಾಜೆ ಮನ್‍ಲಗಾಡಿನ್ ಕದೇಬಿ ಪ್ರಾರ್ಥನೆಮ ಹುಮ್ಮಖ್ಹ್‌ ಲೀರಾಖವಾಳೊ ಹುಯಿರ‍್ಹೋಸ್. 13 ಹೈರೋತೆ ತುಮಾರಖ್ಹಾಜೇಬಿ ಲವೊದಿಕೀಯ ಅಜು಼ ಹಿರಿಯಪೋಲಿಯನ ಅದ್ಮೆವ್‍ನ ಖ್ಹಾಜೇಬಿ ಯೋಘಣು ವಾಖ್ಯೊ ಪಡುಕರಸ್ಕರಿ ಇನಿ ಬಾರೇಮ ಮೇ ಸಾಕ್ಷಿ ಹುಯಿರ‍್ಹೊಸ್. 14 ಪ್ಯಾರ್‌ನೊ ಪೊಂಡಿತ್ ಹುಯಿರ‍್ಹೋತೆ ಲೂಕ ಅಜು಼ ದೇಮ ತುಮುನ ಖ್ಹಲಾಮ್ ಬೋಲಸ್. 15 ಲವೊದಿಕೀಯಮ ಛಾ಼ತೆ ಭೈಯೇ ಭೇನೆನಾಬಿ ಅಜು಼ ನುಂಫಕರಿ ಬೋಲೈಲ್ಯವಾಳಿ ಅಜು಼ ಇನಘರ್‌ಮ ಮಳೀನ್‍ ಅವಾತೆ ಸಬೇನಾಬಿ ಬೋಲ್ಯೊ ಕರಿ ಬೊಲ್ದೆ. 16 ಆ ಚಿಟ್ಟಿನ ತುಮೆ ಪಢಾನ ಬಾದ್ಮ ಲವೊದಿಕೀಯವಾಳನಿ ಸಬೆಮಾಬಿ ಪಢಾವೊ. ಇಮ್ಮಸ್ ಲವೊದಿಕೀಯಾಥು ಆಯುತೆ ಚಿಟ್ಟಿನ ಮಂಗೈನ್ ತುಮೇಬಿ ಪಢೊ. 17 ಅರ್ಖಿಪ್ಪನ, “ತೂ ಪ್ರಭುಥಿ ಲೀಲಿದೋತೆ ಸೇವೆನ ಚ಼ಲಾವನ ಹುಷಾರ್‌ಥಿ ರ‍್ಹೀನ್ ಪೂರಹೊಣು” ಕರಿ ಬೋಲೊ. 18 ಪೌಲಕರಿ ಮೇ ಮಾರ ಹಾತೇಥಿಸ್ ಲೀಖ್ಯೋತೆ ಖ್ಹಲಾಮ್ ಹುಯಿರೀಸ್. ಮೇ ಜೇಲ್‌ಮ ಥೋಕರಿ ಬೋಲಾನು ಯಾದ್ ಕರಿಲೆವೊ. ದೇವ್‌ನೊ ವಾರ್‌ಖ್ಹೊ ತುಮಾರಿ ಜೋ಼ಡ್ಮ ರ‍್ಹವಾದೆ. |
The New Testament in Waghri Language © The Word for the World International and Waghri Translation Samiti, Karnataka, 2023.