2 ಕೊರಿಂಥ 3 - ದೇವ್ನಿ ಖ್ಹಾಚಿ ವಚನ್ನವಿ ಒಪ್ಪಂದಾನು ಸೇವೆಕರವಾಳು 1 ಹಮೆ ಹಮಾರಿ ಬಾರೇಮ ಬಿಜು಼ಪಾಛ಼ ಖ್ಹರೈಲ್ಯಾವಾನ ಶುರು ಕರ‍್ಯಾಕಿಶು? ಕೊಯ್ನಿ, ಥೋಡ ಜ಼ಣನ ಹೋಣುತೆ ತಿಮ್ ತುಮಾರಕನ ಆವಾನ ಮನ ಯೋಗ್ಯತೆನು ಚಿಟ್ಟಿ ಮಾಂಗಿಲೆವ್ಣು ಕಿಶು? ಕೊಯ್ನಿ, ಬಿಜಿ ಆಡಿ ಜಾ಼ವಾನಿ ವಖ್ಹತ್‌ಮ ತುಮಾರೇಥಿ ಯೋಗ್ಯತೆನಿ ಚಿಟ್ಟಿ ಮಾಂಗಿಲೆವ್ಣುಕಿಶು? 2 ಶೊಂತ್ ತುಮೇಸ್ ಹಮೂನ ಯೋಗ್ಯತೆನಿ ಚಿಟ್ಟಿ ಹುಯಿರ‍್ಹಾಸ್. ಯೋ ಚಿಟ್ಟಿಖ್ಹಾರಿ ಹಮಾರ ದಿಲ್ಮ ಲಿಖೈರ‍್ಹುಸ್. ಯೋ ಚಿಟ್ಟಿ ಖ್ಹಾರಸ್ನ ಮಾಲುಮ್, ಖ್ಹಾರುಸ್ ಪಢಾಸ್. 3 ತುಮೆ ಹಮಾರಿ ಸೇವೆನ ಫಲ್‌ಥಿ, ಕ್ರಿಸ್ತನೆ ಹಮಾರ ಹಾತೇಥಿ ಲೀಖೈನ್ ದಿದೊತೆ ಚಿಟ್ಟಿಕರಿ ಮಾಲುಮ್‌ಕರಾಯ ಆ ಚಿಟ್ಟಿ ಲೀಖೈರ‍್ಹೂತೆ ಇಂಕ್‍ಥಿ ಕಾಹೆ,ಜಿವ್ತೊಜಾನ್ನೊ ದೇವ್ನ ಆತ್ಮಥಿ ಅನ ಬಂಡಾನ ಪಲ್ಗಾಪರ್‌ ಕಾಹೆ, ಅದ್ಮಿನ ದಿಲ್ನ ಪಲ್ಗಾಪರ್‌ ಲೀಖೈರಾಖ್ಯೊಸ್. 4 ಆಥ್ರಾನು ಭರೋಖ್ಹೊ ಕ್ರಿಸ್ತಮಥೂಸ್ ದೇವ್ನ ಖ್ಹಾಮ್ಣೆ ಹಮೂನ ಛಾ಼. 5 ಹಮಾರಿ ಶೊಂತ್ ಶಕತ್‌ಥೀಸ್‌ ಹಮೆ ಕೆಹುತೋಬಿ ಅಛ್ಛು಼ಕರ್‌ಶು ಕರಿ ಮೇ ಬೋಲುಕೊಯ್ನಿ. ಅಥ್ರಾನಿ ಶಕತ್‍ ಅಪ್ಣುನ ದೇವ್‍ಥೀಸ್‍ ಅಯಿರ‍್ಹೂಸ್. 6 ದೇವ್ ನವಿ ಒಪ್ಪಂದಾನನ ಸೇವೆಕರಾವಾಳ ಹುಯಿರಾವಾನಿ ತಾಖತ್ನ ದೇವ್ನೆಸ್ ಹಮೂನ ದಿದೊ. ಆ ನವಿ ಒಪ್ಪಂದಾನ ಲೀಖಾವನಿ ರೂಪ್‍ಮಛಾ಼ತೆ ಧರ್ಮಶಾಸ್ತ್ರ ಕಾಹೆ. ಆ ಹುಯಿರ‍್ಹುತೆ ಪವಿತ್ರಾತ್ಮ ಹುಯಿರುಸ್. ಲಿಖಾವಟ್‌ನ ರೂಪ್‍ಮಛಾ಼ತೆ ಧರ್ಮಶಾಸ್ತ್ರ ಮರಣ್ಣ ಲ್ಯಾವ್‌ಶೆ, ಕತೋಬಿ ಪವಿತ್ರಾತ್ಮ ಜಾನ್‌ ದ್ಯಾವಾಳೊ ಹುಯಿರೋಸ್. 7 ಮರಣ್‍ದ್ಯವಾನು ನಿಯಮ್‌ನು ಸೇವೆ ಬಂಡಾನು ಪಲ್ಗಾನ ಉಪ್ಪರ್ ಲೀಖ್ಯಮ ಲೀಖೈರ‍್ಹೂಥು. ಯೋ ದೇವ್‌ನು ಮಹಿಮೆನ ಜೋ಼ಡ್ಮ ಆಯುಥು. ಮೋಶೇನು ಮ್ಹೋಡು ಉಜಾ಼ಖ್ಹ್‌ಥಿ ಚ಼ಮ್‍ಕುಕರ‍್ತೂಥುತೆ ಇನಾಖ್ಹಾಜೆ ಇಸ್ರಾಯೇಲ್‌ವಾಳು ಇನ ಮ್ಹೋಡಾನ ದೇಖಾನ ಹುಯುಕೋಯ್ನಿ. ಇನಪಾರ್ ಯೋ ಮಹಿಮೆ ಕಮ್ ಹುಯಿಗು. 8 ಅನಾಖ್ಹಾಜೆ ಪವಿತ್ರಾತ್ಮ ಸಂಬಂದನಿ ಸೇವೆ ಬಿಜೂ಼ಬಿ ಘಣು ಮಹಿಮೆನ ಲೀರಾಖ್ಯುಸ್. 9 ಅನಿ ಅರ್ಥ ಶಾತ್‍ಕತೊ; ಯೋ ಸೇವೆ ಅದ್ಮಿನ ಅಪರಾದಿಕರಿ ತೀರ್ಪ್‍ದಿದು, ಕತೋಬಿ ಯೋ ಮಹಿಮೆನ ಲೀರಾಖ್ಯುಥು. ಅನಖ್ಹಾಜೆ, ನೀತಿನ ಕಫ್ಫನ್ ಹುಯಿರ‍್ಹುತೆ ಸೇವೆ ಬಿಜೂ಼ಬಿ ಘಣು ಮಹಿಮೆನ ಉಬ್‍ಜಾ಼ವಾನು ಕೆತ್ರೇಕ್ಕಿ ಖ್ಹಾಚಹುಯಿರೂಸ್. 10 ಯೋ ಜೂ಼ನಿ ಸೇವೆ ಮಹಿಮೆನ ಲೀರಾಖ್ಯುಥು. ಕತೋಬಿ ನವಿ ಸೇವೆನ ಖ್ಹಾಮ್ಣೆ ಯೋ ಮಹಿಮೆಕೊಂತೆ ಹುಯಿಗಯು. 11 ನೂಛೈ಼ಗಿತೆ ಯೋ ಸೇವೆ, ಮಹಿಮೆನಿ ಜೋ಼ಡ್ಮ ಐರ‍್ಹುಉಶೇತೊ, ಕದೆಕದೇಬಿ ಭಡ್ತಿ ಜಾ಼ವಾನಿ ಆ ಸೇವೆ ಬಿಜೂ಼ಬಿ ಘಣು ಮಹಿಮೆನ ಲೀರಾಖ್ಯುಸ್. 12 ಶನಕತೊ ಹಮೂನ ಆ ಭರೋಖ್ಹೊ ಛಾ಼ತೆ ಇನಾಖ್ಹಾಜೆ ಘಣು ಹಿಮ್ಮಥಿಛಿಯೆ. 13 ಕಂಬ್‍ಲೈಜಾ಼ಶೆತೆ ಮಹಿಮೆ ಉಜೈ಼ಜಾಯಿತೆ ಇನ ಇಸ್ರಾಯೇಲ್‌ವಾಳು ನಾ ದೇಕ್ಣುತೆ ತಿಮ್ ಮೋಶೆ ಇನ ಮ್ಹೋಡಾನಪರ್ ಘುಮ್‍ಟೊ ನಾಖಿಲೇತೋಥೊ. ಹಮೆ ಮೋಶೆನಿಘೊಣಿ ಕಾಹೆ. 14 ಕತೋಬಿ ಇವ್ಣಿ ಬುದ್ಧಿ ಮಂಕ್ ಹುಯಿರ‍್ಹಿಥೀತೆ ಇನಾಖ್ಹಾಜೆ ಇವ್ಣೆ ಮಾಲುಮ್ ಕರೀಲಿದುಕೊಯ್ನಿ. ಇವ್ಣೆ ಜೂ಼ನು ಒಪ್ಪಂದಾನನ ಪಢಾನಿ ವಖ್ಹ್‌ತೆ ಯೋಸ್ ಘುಮ್‍ಟೊ ಇವ್ಣ ದಿಲ್‌ಪರ್‌ ಢಪೈಜಾ಼ಸ್. ಶನಕತೊ ಖಲಿ ಕ್ರಿಸ್ತಥಿಸ್ ಯೋ ನಿಕ್‍ಳೈಜಾ಼ಶೆತೆ. 15 ಕತೋಬಿ ಹಮ್ಕೆಲಗೂಬಿ ಮೋಶೇನು ಧರ್ಮಶಾಸ್ತ್ರ ಪಢಾನಿ ವಖ್ಹ್‌ತೆ, ಇವ್ಣ ದಿಲ್‌ಪರ್‌ ಘುಮ್‍ಟೊ ನಖೈರ‍್ಹೇಸ್. 16 ಇನಾಖ್ಹಾಜೆ ಏಕ್‌ ಅದ್ಮಿ ಪ್ರಭುನ ಭಣಿ ಫರೀನ್, ಇನ ಪೀಠೆ ಚಾ಼ಲಾನಿ ವಖ್ಹತ್‌ಮ ಯೋ ಘುಮ್‍ಟೊ ನಿಕ್‍ಳೈಜಾ಼ಶೆ. 17 ಯೋ ಪ್ರಭುಸ್ ದೇವ್ನುಆತ್ಮ, ಪ್ರಭುನು ಆತ್ಮ ರ‍್ಹೇಸ್ತೆ ಹಿಜ್ಜಾ಼ ಛುಟ್ಕಾರ್ ರ‍್ಹೇಸ್. 18 ಕತೋಬಿ ಅಪ್ಣೆಖ್ಹಾರು ಮುಚೈರ‍್ಹೇಯ್‌ಕೊಂತೆ ಮ್ಹೋಡೇಥಿ ಪ್ರಭುನಿ ಮಹಿಮೆನ ಐನಾಮ ದೆಖಾವನಿತರ ಇನ ದೆಕ್ತಹುಯಿನ್ ಅಪ್ಣೆಖ್ಹಾರು ಪ್ರಭುನಿ ಆತ್ಮನಿ ಮಹಿಮೆಥಿ ಜಾ಼ಖ್ಹತ್‌ಹುಯಿನ್ ಯೊ ಮಹಿಮೆನ ರೂಪ್ ಲ್ಯವಾಳ ಹುಯೆಸ್. ಆ ಆತ್ಮ ಹುಯಿರ‍್ಹೋತೆ ಪ್ರಭುನು ಕಾಮಸ್. |
The New Testament in Waghri Language © The Word for the World International and Waghri Translation Samiti, Karnataka, 2023.