1 ಪೇತ್ರ 2 - ದೇವ್ನಿ ಖ್ಹಾಚಿ ವಚನ್ಜಿವ್ತಜಾನ್ನೊ ಬಂಡೊ ಅಜು಼ ಪವಿತ್ರ ದೇಖ್ಹ್‌ 1 ಇನಾಖ್ಹಾಜೆ ಖ್ಹಾರು ಖರಾಬ್ ಫನೈಬಿ ಖ್ಹಾರು, ಠಗಾವನುಬಿ, ಚೋ಼ರ್ ಫನೈಬಿ. ಪೇಟ್ನೊ ಬಳಾಪೊಬಿ, ಖ್ಹಾರುಸ್ ಗಾಳೆದ್ಯವಾನುಬಿ ತುಮಾರಮಾಥು ಕಾಡಿನಾಖೊ. 2 ನವೇಥಿ ಪೈದಾಹುವಾತೆ ಲಡ್ಕನಿತರ ಛಾ಼ತೆತುಮೆ ಮೋಟ ಹುವಾನಿತರ ವಚನ್‍ಕರಿ ಆತ್ಮೀಕ್‌ದೂದ್ನ ತರ್ಖ್ಹೊ. ಯೊ ಪಿದಾತೊ ರಕ್ಷಣೆ ಲಿಶು. 3 ಶನಕತೊ ಪ್ರಭು ಅಛ್ಛೊ಼ಕರಿ ತುಮೆ ಲಜ಼ತ್‌ ದೇಖ್ಯಾನಿ ಕರಿ ಪವಿತ್ರ ದಪ್ತರ್‌ಮ ಬೋಲಸ್ನಿ. 4 ತುಮೆ ಜಿವ್ತುರ‍್ಹವಾನ ಬಂಡೊ ಹುಯಿರ‍್ಹಾವಾಳಕನ ಐರ‍್ಹಾಸ್. ಯೋ ಬಂಡೊ ಅದ್ಮೆವ್‍ಥಿ ಝಿಟ್ಕಾರ‍್ಯುತೋಬಿ ದೇವ್‍ಥಿ ಚೂ಼ಣೈಗಯಹುಯುಬಿ ಘಣ ಮೋಲ್‍ನೂಬಿ ಹುಯು. 5 ತುಮೆ ಜಿವ್ತುಜಾನ್‍ವಾಳೊ ಬಂಡೊಹುಯಿನ್ ಆತ್ಮನು ಸಂಬಂದ್‍ವಾಳು ಮಂದಿರ್‌ ಹುವಾನಖ್ಹಾಜೆ ಬಣಾವಟ್ ಹುವ್‍ಕರಸ್, ಯೇಸು ಕ್ರಿಸ್ತಥಿ ದೇವ್ನ ಸ್ವೀಕಾರ್ ಹುವಾನಿತರಾನು ಆತ್ಮೀಕ್ ಬಲಿನ ದ್ಯವಾನ ಪರಿಶುದ್ ಯಾಜಕ್‌ನ ಖೂಮ್‌ವಾಳ ಹುಯಿರ‍್ಹಾಸ್. 6 ಪವಿತ್ರ ದಪ್ತರ್‌ಮ ಶಾತ್‌ ಬೋಲಸ್‍ಕತೊ “ಹಂದೇಕ್, ಚೀಯೋನ್‌ಮ ಕೋಣಾನೊಬಂಡೊ ಮ್ಹೇಲುಸ್, ಯೊ ಚೂ಼ಣೈಗಯುಹುಯು, ಘಣ ಮೋಲ್ನು ಹುಯಿರುಸ್ ಇನಾಪರ್ ವಿಶ್ವಾಸ್ ರಾಖವಾಳೊ ಕದೇಬಿ ಆಖ್ಹ್ ತೋಡಿಲಿಶೆಕೊಯ್ನಿ” 7 ಹಮ್ಕೆ ವಿಶ್ವಾಸ್ ಕರವಾಳ ತುಮೂನ ಯೋ ಘಣ ಮೋಲ್ನೊ ಹುಯಿರ‍್ಹೊಸ್ ಕತೋಬಿ ವಿಶ್ವಾಸ್‌ಕರ‍್ಯುಕೊಂತೆ ಇವ್ಣುನ, “ಘರ್ ಭಾಂದಾವಾಳು ಝಿಟ್ಕಾರ‍್ಯೊಹುಯೊ ಬಂಡೊಸ್ ಘಣು ಮುಖ್ಯ ಕೋಣಾನೊ ಬಂಡೊ ಹುಯೊ”. 8 ಅಜು಼ ಪವಿತ್ರ ದಪ್ತರ್‌ಮ ಅಜೇ಼ಕ್ಆಡಿ ಶಾತ್‌ ಲಿಖಾಸ್‌ಕತೊ “ಅದ್ಮಿ ಧೊಕ್‌ಡೈನ್ ಇವ್ಣೆ ರಡ್ಕಾನೊ ಬಂಡೊ ಹುಯಿರೋಸ್” ಇವ್ಣೆ ದೇವ್ನಿ ವಚನ್ನ ಅವಿಧೇಯ ಹುವಾತೆ ಇನಖ್ಹಾಜೆ ಯೊ ಬಂಡಾನ ಠೋಕರ್ ಲಾಗಿನ್‍ಪಟ್ಕಸ್. ಇನಖ್ಹಾಜೇಸ್ ಇವ್ಣೆ ಚೂ಼ಣೈಗಯೂತೆ. 9 ಕತೋಬಿ ಅಂಧಾರಮ ಛಾ಼ತೆ ತುಮುನ ಬುಲೈನ್ ಇನ ಆಶ್ಚರ್ಯನ ಉಜಾ಼ಳಮ ಮಳೈಲಿದ ಹುಯಾನ ಅದ್ಭುತ್ ಕಾಮ್ನ ಕರಾವಳ ಹೋಣುಕರಿ ತುಮೆ ಚೂ಼ಣೈಗಯುಹುಯು ಜ಼ಗ್‌ಜಾ಼ತ್‌ಬಿ, ರಾಜಾ಼ನ ಖಾನ್‌ದಾನ್ನ ಯಾಜಕ್‍ಬಿ, ಪರಿಶುಧ್ ಅದ್ಮಿಬಿ, ದೇವ್ನ ಶೊಂತ್‌ ಅದ್ಮಿಬಿ ಹುಯಿರ‍್ಹಾಸ್. 10 ಏಕ್‌ ಹಲ್ಲ ತುಮೆ, ದೇವ್ನ ಅದ್ಮೆವ್‍ ಕೋಥಾನಿ. ಕತೋಬಿ ತುಮೆ ಹಮ್ಕೆ ದೇವ್ನ ಅದ್ಮಿಹುಯಿರಾಸ್; ಏಕ್‌ಹಲ್ಲ ದೇವ್ನ ಗೋರ್‌ನ ಮಾಲುಮ್ ಕರಿರಾಖ್ಯಥ ಕೊಯ್ನಿ. ಕತೋಬಿ ಹಮ್ಕೆ ದೇವ್ನ ಗೋರ್‌ನ ಲೀರಾಖವಾಳ ಹುಯಿರ‍್ಹಾಸ್. ದೇವ್ನು ಸೇವಕ್ ಖ್ಹಾರು 11 ಪ್ಯಾರ್‌ನ ದೋಸ್ತಿವೊ ಆ ಜಗತ್ಮ ಪರದೇಖ್ಹ್‌ವಾಳಬಿ ತಮಾಖ್ಹೊ ದೆಖಾವಾಳುಬಿ ಹುಯಿರಾತೆ ತುಮೆ ತುಮಾರ ಆತ್ಮಾನ ವಿರೋದ್ ಹುಯಿನ್ ಜಂಗ್ ಭೀಡಾತೆ ಶರೀರ್‌ನು ನಿಕಳ್ಯ ಜಾನ್‌ಥಿ ದೂರ್ ರ‍್ಹೇವ್ಣುಕರಿ ಮೇ ತುಮುನ ಗಿಂಗೈಲೆವುಸ್. 12 ತುಮಾರಿ ಚಾ಼ಲ್‍ಚ಼ಲಣ್‍ ಅಲ್ಹಾವ್‌ ಅದ್ಮಿವ್‌ನ ಇಚ಼್‌ಮ ಯೋಗ್ಯಹುಯಿರ‍್ಹವಾದೆ, ತದೆ ಇವ್ಣೆ ಖೆವಿಸ್ ವಾತ್ನಿ ಬಾರೇಮ ತುಮುನ ಖರಾಬ್‍ಕರಿ ಚಾ಼ವ್‌ಣ್ಯ ಕರಾಸ್ಕಿ ಯೋಸ್ ತುಮಾರಿ ವಾತೆಮ ತುಮಾರಿ ಅಛ್ಛಿ ಚಾ಼ಲ್‍ಚ಼ಲಣ್ಣಾ ಡೋಳೆಖ್ಹು ದೇಖಿನ್, ದೇವ್ ಆವನ ದನೂಮ ಅಪ್ಣುನ ಇವ್ಣೆ ಖ್ಹರಾವ್‌ಶೆ. 13 ಆ ಜಗತ್‌ನು ಅದಿಕಾರಿ ನೇಮಕ್ ಕರ‍್ಯುತೆ ಹರೇಕ್ ಒಪ್ಪಂದನಾಬಿ ಪ್ರಭುನಖ್ಹಾಜೆ ತುಮೆ ಅಧೀನ್‍ಹುವೊ. ಅಖ್ಖಾಸ್‌ಪರ್ ಅದಿಕಾರಿ ಹುಯಿರೋತೆ ರಾಜ಼ನಾಬಿ ಅಧೀನ್‌ರ‍್ಹವೊ, 14 ಅಜು಼ ರಾಜ಼ ಮೋಕ್‌ಲಸ್ತೆ ಅಧಿಕಾರಿಯೇನ ಗಲತ್‌ ಕರಾವಾಳನ ನಿಶತ್‌ದ್ಯವಾನಬಿ ಅಛ್ಛು಼ಕರಾವಾಳನ ಹುಮ್ಮಖ್ಹ್ ದ್ಯವಾನ ಇವ್ಣೆ ಮೋಕ್‌ಲೈರಾಸ್ ಕರಿ ಖ್ಹಮ್‌ಜಿನ್‌ ಇವ್ಣುನ ಅಧೀನ್‍ಹುವೊ. 15 ತುಮೆ ಅಛ್ಛು಼ಕರಾನಿ ವಖ್ಹ್‌ತೆ ತುಮಾರಿ ಬಾರೇಮ ಖರಾಬ್ ವಾತೆಬೋಲಾನು ಬಿಣ್‍ಅಕ್ಲಿ ಅದ್ಮಿವ್‌ನ ಮ್ಹೋಡು ಮುಚಾ಼ನಿತರ ಕರಾನುಸ್ ದೇವ್ನಿ ಖ್ಹೂಜ಼್ ಹುಯಿರ‍್ಹಿಸ್. 16 ಛುಟ್ಕಾರ್ ಲೀಲೆವೊ, ಕತೋಬಿ ಖರಾಬ್ ಫನೈನ ಲಪಾಡನಖ್ಹಾಜೆ ತುಮಾರಿ ಛುಟ್ಕಾರ್‌ನ ನಕೊ ಉಪಯೋಗ್‍ಕರೊ. ಕತೋಬಿ ತುಮೆ ದೇವ್ನ ಸೇವಕ್‌ನಿತರ ಚಾ಼ಲಿಲೆವೊ. 17 ಖ್ಹಾರಸ್ನ ಮರ್ಯಾದಿ ಕರೊ ವಿಶ್ವಾಸಿ ಭೇನೆ ಭೈಯೇವೊನ ಪ್ಯಾರ್‌ಕರೊ. ದೇವ್ನ ಡರೊ. ಅಜು಼ ರಾಜಾ಼ನಬಿ ಮರ್ಯಾದಿ ದೆವೊ. ಕ್ರಿಸ್ತನಿ ಖ್ಹತಾಪ್ಣಿನಿ ಬಾರೇಮ. 18 ಸೇವಕ್ ಹುಯಿರ‍್ಹಾತೆ, ತುಮೆ ತುಮಾರ ಯಜಮಾನ್ನ ಪೂರ ಮರ್ಯಾದಿಥಿ ಅಧೀನ್ ಹುಯಿರ‍್ಹೇವೊ. ಶೇದೇವ್ ರ‍್ಹವಾಳಾಬಿ ಅಛ್ಛಿ಼ಸೋಚ್‌ರ‍್ಹವಾಳನ ಖಲಿ ಕಾಹೆತೆ ಮೊಂಡಿ ಬುದ್ದಿವಾಳನಾಬಿ ವಿಧೇಯ ಹುಯಿರೇವೊ. 19 ಎಕ್‍ಜ಼ಣೊ ಅನ್ಯಾಮ್‍ಥಿ ಖ್ಹತಾವಾಳೊ ಹುಯಿರ‍್ಹಿನ್ ದೇವ್ ದೇಕ್‌ಶೆಕರಿ ಇನ ಖ್ಹಮಾಳಿಲಿದೋತೊ, ಯೋ ಖ್ಹರಾವ್ಣಿನ ಲ್ಹಾಯಕ್ ಹುಯಿರ‍್ಹೊಸ್. 20 ಗಲತ್‍ಕರೀನ್ ಘುಖ್ಹ್‌ತ ಖಾವಾಮ ತುಮೆ ಖ್ಹಮಾಳಿಲಿದಾತೊ ಇಂಥಿ ಶನಿ ಕೀರತ್ ಮಳ್ಯು? ಕತೋಬಿ ಅಛ್ಛು಼ಕರಿನ್ ಖ್ಹತ್‍ವಾಮ ತುಮೆ ಖ್ಹಮಾಳಿಲಿದಾತೊ ಆ, ದೇವ್ನ ಖುಷಿ ಕರಾವಸ್. ದೇವ್ ತುಮುನ ಪಸಂದ್‌ ಕರ್ಶೆ. 21 ಅನಖ್ಹಾಜೆಸ್ ತುಮೆ ಬುಲೈರ‍್ಹಾಸ್ತೆ.ಕ್ರಿಸ್ತ ಜಿನುಬಿ ತುಮಾರಖ್ಹಾಜೆ ಖ್ಹತಾಪ್ಣಿಪಡಿನ್, ತುಮೆ ಇನ ಖೋಜ಼್‌ನಿ ಖ್ಹಣೇದ್‍ಮ ಚಾ಼ಲ್‌ನುಕರಿ ತುಮುನ ಏಕ್‌ ಸಾಕ್ಷಿನ ವತಾಳಿನ್ ಜೈರ‍್ಹೊಸ್. 22 ಯೋ ಶನು ಪಾಪ್‌ಬಿ ಕರ‍್ಯೊಕೊಯ್ನಿ, ಇನ ಮ್ಹೋಡಾಮಾಥಿ ಖೆವಿ ಠಗಾವಾನಿ ವಾತ್‍ಬಿ ಮಳಿಕೊಯ್ನಿ. 23 ಗಾಳೆ ದ್ಯವಾಳನ ಪಾಛೊ಼ ಗಾಳೆದಿದೊಕೊಯ್ನಿ. ಯೊ ಖ್ಹತಾಪ್ಣಿ ಕರಾನಿ ವಖ್ಹ್‌ತೆ ಕಿನಾಬಿ ಡರಾಯೊಕೊಂತೆ, ನ್ಯಾವ್‌ಥಿ ತೀರ್ಪ್ ಕರಾವಾಳನ ಇನ ಕಾಮ್ನ ದಿನಾಖಿದಿದೊ. 24 ಅಪ್ಣೆ ಅಪ್ಣ ಪಾಪ್ನ ಭಾಗ್ನ ಮರೀನ್ ನೀತಿವಾಳ ಹುಯಿನ್ ಬಚಾ಼ನಿತರ ಅಪ್ಣ ಪಾಪ್ನ ಯೋಸ್ ಇನ ಶರೀರ್‌ಪರ್‌ ಢೊಯ್ಲಿನ್ ಶಿಲ್‌ಬೆಪರ್ ಮರಿಗೊ. ಇನ ಘಾವ್‍ಥಿ ತುಮುನ ಅಛ್ಛು಼ಹುಯು. 25 ಶನಕತೊ ತುಮೆ ವಾಟ್‌ ಭೈಕಿಗಾತೆ ಮೇಂಢಾನಿತರ ಹುಯಿರ‍್ಹಾಸ್ ಕತೋಬಿ ಹಮ್ಕೆ ತುಮೆ ಪಾಛ಼ ಫರೀನ್ ತುಮಾರ ಆತ್ಮಾನ ಪಾಳವಾಳಕನಾಬಿ ಕುರುಬ ಹುಯಿರ‍್ಹಾವಾಳಕನ ಆಯಿರ‍್ಹಾಸ್. |
The New Testament in Waghri Language © The Word for the World International and Waghri Translation Samiti, Karnataka, 2023.