Zuudë 1 - N’KANGULU WUMOONË

Sibweekë

¹ Miinu Zuudë, ciseelu ci Yeesu Kliistu, nkoombë Zaakë. Ke banë bëtelu ke Nzaambi, bëzolu ke naandi, Taatë, i bëswaminë mu Yeesu Kliistu,

² biikë n'leenvo, n'sikë, i luzolo bye veewu mu beeno lunduu.

Miloonji lupuutu

³ A bayaami bë n'timë, miinu yabë cideenzë cinenë mu kulusonikinë mu manë mën'talë luvukulu lwiitu beeso booso. Kasi miinu yavaangë mëngolo mu kulusonikinë n'kaandë be wuuwu, bwiinji luciinzi bitu mu kunwaanë mu ciminu cinë Nzaambi wuvaanë ke baandi ci mëkulu.

⁴ Licyelikë, mpaapë baatu bëke sinsalulu simbi bëkotë mu mësweeci fë meeyiinu. Baawu bëbalulë muulë wu Nzaambiitu mu kusalilë busafu, baawu bëmaangë Yeesu Kliistu, N'loonjiitu i Fumwiitu. Mpaapë ntaangu sivyookë, lusifu lwaawu lusonëmë mu mëbuuku më Nzaambi.

⁵ Beeno luzabisi makë mooso omo buboti. Miinu beeno yin'tebulë moonyi, buni Fumu wuvucilë vyaasi mweekë mboongu yi Islayeelë ku si Zipiitë. Kasi naandi wuvoondë banë bëkaambu kutuulë lufyaatu mu naandi.

⁶ Tebukaanu moonyi, siyaanzi sikaambu kucinzikë lutumu lo Nzaambi kubëvaanë, baawu bisë lekulë bivwandulu byaawu. Nzaambi wubëkangilë ci mëkulu kusi citoombi, tee fë cilumbu cinenë ci lufundusu.

⁷ Tebukaanu moonyi libweeti li Sodoomë, li Ngomoolë i mëvulë mëbelëmë. Banë bëlëzingilë mwaawu, bëvaangë busafu bo bumweekë yi siyaanzi. Baawu bisë toombë kubundënë sinyitu i bivaangu bin'ka. Baawu bëke mu lusifu lu kastiikë yi buluunji bu mbaasu yi tee yi tee. Lyaawu lukumini lu njiinji mu baatu bakë booso.

⁸ Mu bo bumweekë, baatu aba bën'vangilaangë mu bideenzë byaawu, bën'safulë nyitu i kubaayi lutumu lu Nzaambi. Baawu bisë fiingë bumpumu bu siyaanzi si Nzaambi.

⁹ N'leembuko Mikayeelë, wusye vaangë bo bumweekë kuve, bunë kwaba mu lwambulu yimunë dyaabu, fanë kulëfindënaangë mpakë mu vuumbi yi Moyiizë. Mikayeelë wusye podi ko kun'fundisi yi bifiingu, kasi naandi wutubë : « Fumu wukuseembë! »

¹⁰ Kasi baatu aba bëlë mu kufiingë mo baawu bëkaambu kuzaabë. Manë bën'zaabaangë mu cimuutu bo buke bibulu bi n'situ, lyaawu lin'vangisi lunyambukunu lwaawu.

¹¹ Cyaali mu baawu! Bëlaandë nzilë yi Kayiinë, i bisë kubwa mu lisokë li mboongo, dedë mweekë Balaamë. Bisë fwa cibilë bëbwa mu lisokë mu kumaangë kuwulu Nzaambi dedë mweekë Kolee.

¹² Lutakusunu lwaawu lun'vangisi kudifisi n'saangu, mu simpaangulu syaawu sikaambu sonyi i kubalaangë tokë mu baveekë. Baawu mpilë mweekë yi mëduungë mën'vekëmukë mu mpeemo mën'kaambu kunokisi n'vulë. Baawu fwiifu si miti yin'kaambu kubutë lyosuku likuundi, keti lilë ba mu ntaangu cisifu. Ningë bëbëyitumunë, yaawu yin'fwa vyaasi wali.

¹³ Baawu, dedë mweekë mëyo më m'bu mën'fundumukaangë mu mëngolo i baawu bëm'basyaangë fë ntwaalaawu mëvaangë maawu mësonyi buke lifusë. Baawu bëke dedë mweekë simbotë sin'zungënë bwendi si. Nzaambi wusë bëlundilë tee yi tee ciikë ku citoombi cike pipitii.

¹⁴ Mati Enookë, nkaakiitu wu saambwali mu n'suundë mweekë yimunë Adaamë, wunë wubikë ntamë mu baawu, wutubë : « Yuwaano, Fumu wulë mu kwiisë yimunë siyaanzi syaandi si saantu biveefi-biveefi,

¹⁵ bwiinji bëvaangë lufundusu mu baatu bakë booso. Naandi wun'sifë bisumuci byooso, mu mëbi mooso bëvaangë mu kumaangë kucinzikë Nzaambi i mu mëbuungu mooso mën'vangisi n'timë lusweenu i linë baatu aba bisë tubë mu naandi. »

¹⁶ Baatu aba bëkalilë mu linyoonji i bëlë mu kwaambë mu manë më bëyisilë. Baawu bën'laandaangë bideenzë byaawu. Baawu bën'vofaangë lukwaayi mu manë bën'tubaangë i bën'kondulaangë baatu mu miciinzaawu.

Tukumini i tutumu

¹⁷ Kasi mu beeno bayaami bë n'timë, tebukaanu moonyi mu maambu manë mimbunzi yi Fumu Yeesu Kliistu bëbëkaambë sintaangu sintamë.

¹⁸ Baawu bëlukaambë, cibeeni : « Mu sintaangu si siitu, fë m'ba baatu banë bëludyeengë i baawu bën'zingilë mu bideenzë byaawu bibi. »

¹⁹ Baawu bën'vangisi baatu kukabukë! Baawu bëwaalë simbalulu si baatu kwaandi vwiili, kasi syo si Ciluunzi ci Nzaambi kuve.

²⁰ Kasi beeno bayaami bë n'timë, tatëminaanu mu lufyaatu lu luziingu lwiinu mu ciminu ciinu cisaantu. Sambililaanu yimunë luleendo lu Ciluunzi ci Saantu.

²¹ Tatëminaanu mu luzolo lu Nzaambi i tee fanë Fumwiitu Yeesu Kliistu mu buboti bwaandi, wuluvaanë luziingu lu sakë yi sakë.

²² Bakaanu cyaali mu banë bëke yi n'kakinyi.

²³ Fëke bën'ka bo beeno lum'podi kuvuuci mu kubëkobulë ku mbaasu. Mu bëmesë yivaandi, leesyaanu cyaali ciinu mu baawu, cyaali cibundënë yi boomë. Keelaanu kubundënë yaawu, kaambofo, yimunë binkutu byaawu bidiifë mu bideenzë bi ci n'sunyi.

Ndumu yi siitu

²⁴ Ke wunë wum'podi kulukeelë mu simpekaadu syooso i kululeesi kukaambu libi i liyaanji linenë fë ntwaalë bumpumu bwaandi.

²⁵ Ke Nzaambi viingu, N'vuuciitu mu Yeesu Kliistu Fumwiitu, mwa mu ke bumpumu, bunenë, luleendo i lutumu mu sintaangu syooso, buyifanwabu, tee sakë yi sakë! Ameenë.