Zaakë 5 - N’KANGULU WUMOONË

Lubikunu ke bisinë

¹ Buyifanwabu, n'yuwulwaanu, beeno bisinë! Lilaanu i cyenzëkënaanu mu cibilë ci mënyoni makë mooso mëm'bwiilë mu beeno!

² Businë bwiinu bwabungunë i n'vwatwiinu waliiwu ke selëlë.

³ Wooliinu i simboongo siinu syawaalë fuluusu i fuluusu yim'ba cimbaanji mu beeno. Yaawu yin'viikë n'sunyiinu dedë mweekë mbaasu. Beeno lwakucikë businë fë situkulu buloongo.

⁴ Beeno lwamaangë kufutë mbakë bisasi binë bin'salaangë mu sisolë siinu. Likeeli lyaambu liboti ko! Twaambu tu bisasi biinu twake tuukë tee mu matu më Nzaambi, Fumu buloongo booso.

⁵ Beeno lwazingilë fë moongo butoto mu sinyeenzi i binvweenvu. Beeno lwayidaanvë mu zeetë dedë mweekë bibulu bën'natu mu kuvoondu.

⁶ Beeno lwavaanë lutabu i lwavoondë banë bë mpeembi yi mpeesu, baawu bisë lutuzukënë ko.

Mpungë-moonyi i lusaambu

⁷ A baanë bë nguli, vungaanu moonyi tee ntaangu yo Fumu kun'kwisilë. Monaanu buni n'vasi wun'ciimbaangë moonyi mu kuviingë tee fanë n'toto kun'vaninë mbutë yo yakweelë: naandi wun'vingaangë sinvulë si ndoolo n'kasi i ndoolo n'nunyi sifwenikini ntetë kunokë.

⁸ Vungaanu moonyi benuviinu, ciindaanu bitu, cibilë lwiisulu lu Fumu lwabelëmë.

⁹ Keelaanu kuyinyonginaanu benuveekë yi benuveekë, baanë bë nguli, mu kumaangë Nzaambi kulufundisi. Nzoonzi wabelëmë, naandi weekë fë ntwaalë mëvitu!

¹⁰ A baanë baami bë nguli, tebukaanu moonyi mu mibici bëtubilë mu lizinë li Fumu: boongaanu lyaawu buke bifwaani bi mpungë-moonyi mu simpasi.

¹¹ Beeso tulë mu kutendulë, nyeenzi oyo ke banë bëtatëminë. Beeno luyuwu mpungë-moonyi yi Zoobë i luzabisi manë Fumu wun'vaanë fë siitu. Licyelikë, Fumu ke beenë cyaali i maambu mëboti.

¹² Yiveko, a baanë baami bë nguli, keelaanu kulefë-mpesë: keti ku yilu, kaambofo fë n'toto, keti mu mpilooso yin'ka. Kasi lwe tubyaanu « Ngete » fo bëfwenikini kutubë « Ngete » , « Moniko » fo bëfwenikini kutubë « Moniko », mu kumaangë beeno kubwa mu lufundusu lu Nzaambi.

¹³ Wun'viipë fë meeyiinu ke mu simpasye? Kwe sambili. Wun'viipë ke mu liyaanjye? Kwe yoli twiimbu.

¹⁴ Wumweekë mu beeno wum'beelë? Kwe teli bëkuluutu bë Cingangë, baawu bën'sambilë i kun'doci mwa mëbeti më mëfutë fë yilu n'tu mu lizinë li Fumu.

¹⁵ N'saambu wu mpilë oyo, wun'vangininë yimunë ciminu, wun'vuuci cibeedo: Fumu wukun'telikë i mësumu kuvangisi mën'kobukë.

¹⁶ Fungulaanu mësumu miinu benuveekë yi benuveekë i sambilaanu benuveekë yi benuveekë bwiinji lubelukë. N'saambu wu muutu wusulëmë wuke n'viingu wu mpaapë.

¹⁷ Eli wabë muutu wufwanëkënë yi beeso: naandi wusë sambilë mu kumaangë n'vulë kunokë i n'vulë yileembu kunokë mivu tatu i ndaambu.

¹⁸ Naandi wusë be sambilooso, li yilu lisë nokisi n'vulë, n'toto wusë vaanë mëkuundi.

¹⁹ A baanë bë nguli, ningë wumweekë mu beeno wakwakënë mu cyelikë i wun'ka wukun'vutulë,

²⁰ tebukaanu moonyi mu lyaliili: wunë wun'vutulë n'sumuci mu nzilë yinë naandi kwavitu, wukun'vuuci mu lufwa i naandi wun'tambulë lobukulu lu mpaapë mësumu.