Zaakë 4 - N’KANGULU WUMOONË

Bundiku bu buloongo

¹ Kuni kun'fuminaangë bicindu i twambulu fë meeyiinu? Byaawu bin'fuminaangë mu bideenzë biinu, bin'nwanisyaangë binamë biinu.

² Beeno, luke yi tesu kasi i lusë m'bakë ko, lwabelëmë mu kuvoondë, yi cideenzë mu cin'viipë, kasi beeno kupodi ve kucibakë i mu boobo lweekë mu kwambilë i mu kufindënë mpakë. Beeno lusë n'tambulë ko linë lun'toombë, cibilë lusye zaabë ko buni bufwenikini kucilombilë ke Nzaambi.

³ Ningë lun'loombë, lusë m'bakë ko, cibilë simbalulu siinu simbi : beeno lun'toombaangë kudifisi makë mooso mu bideenzë biinu.

⁴ Baatu bëkaambu kusulëmë lukeeli! Lusye zaabë ko, kuba bundiku bu buloongo, mati kuba mbeeni yi Nzaambi? Wunë wun'zolë kuba bundiku buloongo, kwe ba mbeeni yi Nzaambi.

⁵ Keelaanu lulë balë ti mu buunë kwaandi too Lisonëmë : « Nzaambi wun'loombë yi bunkanvi booso Ciluunzi kutuulë mu beeso. »

⁶ Bwa boobo, muulë wunë Nzaambi wutuvaanë mwiinji bunenë, cibilë bëtubë yivaandi : « Nzaambi wusë n'zolë ko baatu bëke yi lukwaayi, kasi mu buboti bwaandi naandi wun'sasyaangë yi bibonzulu. »

⁷ Lwe baanë yi sisu mu Nzaambi, kasi ntundukenaanu dyaabu i naandi wun'tiinë cinaanu yi beeno.

⁸ Belëmaanu yi Nzaambi i naandi wum'belëmë yiinu. Cyesyaanu myookwiinu, beeno bisumuci. Lwe lyomisyaanu mitimiinu, baatu bëke mitimë yikabukë!

⁹ Lwe baanu mu cyuundë, mu mënyonyi i lilaanu. Lisefu liinu lye balukë mu miluunji i liyaanji liinu mu cyuundë.

¹⁰ Lwe besëmaanu fë nduunzi yi Fumu i naandi wuluzanjikë.

Wufundisi ko mwaanë nguli

¹¹ A baanë bë nguli, kebaanu kutubësënë libi benuveekë yi benuveekë. Wunë wun'tubë libi mu mwaanë naandi nguli kaambofo wukun'fundisi, wun'tubë lyaambu libi mu n'kaakë Nzaambi i kuwufundisi. Oboobo, weekë nzoonzi yi n'kaakë, mëyoolë njeeyi wulisalilë.

¹² Kosuku, mati Nzaambi vwiili to wun'vaanaangë n'kaakë. Wum'podi kufundisi. Naandi vwiili wumweekë wum'podi kuvuuci i kuvangisi kunyambëkënë, njeeyi nani wukeeli mu kufundisi wayaakwe?

We ba ko yi lunaangu

¹³ N'yuwulwaanu, buyifanwabu, beeno lun'tubë : « Bubwaayi aci kaambofo mbasi-menë, tun'kwendë ku livulë linaa, tun'vyoosi kwaawu n'vu, beeso tun'vaangë lungooso i tum'bakë simboongo. »

¹⁴ Licyelikë, beeno lusye zaabë ko buni luziingu lwiinu lum'beelë mbasi-menë! Beeno luke buke mwa m'buunji wun'selukë mu mwa ntaangu i wun'zimbilooso.

¹⁵ Talaanu, linë lufwenikini kutubë : « Ningë Fumu wulizolisi, beeso mba tun'ziingë i beeso tun'vaangë ali kaambofo lina. »

¹⁶ Kasi, licyelikë beeno luke lunaangu i lukwaayi. Losuku lunaangu lu mpilë oyo lubi.

¹⁷ Ningë ti wun'viipë wuzabisi buni bu kuvangilë liboti i wusë livaangë ko, naandi wun'vaangë lisumu.