Zaakë 3 - N’KANGULU WUMOONË

Ndakë

¹ A baanë bë nguli, keelaanu lulë ba mpaapë mu kuloongë, cibilë luzabisi ti, beeso tun'loongaangë lufundusu lwiitu lun'vyokilë mëseembu i bëmesë.

² Besubooso tun'kubë mëbaku. Ningë muutu ve wupodi kukubë libaku mu n'tubulwaandi, naandi wusulëmë wum'podi kukeelë nyitwaandi yooso.

³ Beeso tun'tuulaangë cilalambu mu minu sikuvaalu bwiinji bëtuyuwulu i beeso kupodi kwaandi kunatë nyitwaawu yooso.

⁴ Kaambofo, monaanu mëkuumbi më masi: bosuku mëbeeli kutolë, simpeemo si ngudi si mësindikilaangë, bëkumënatinaangë mu cibindukulu cicyeeci i maawu mën'sungëmaangë bo cinatë likuumbi kun'zolë.

⁵ Bo bumweekë, ndakë cinamë cicyeeci mu nyitu muutu, kasi yaawu podi kunyemi mëvaangë mënenë. Lwe monaanu buni mbaasu yincyeeci kupodi kuviikë n'situ wunenë!

⁶ Mu lyaawu, ndakë yike buke mbaasu, buloongo bubi mu nyitu, yaawu yin'sumunaangë nyitwiitu yooso. Yaawu yin'viikë nyitwiitu yooso mu mbaasu yin'fuminë ku buluunji bu mbaasu.

⁷ Muutu lu moonyi ke mëkanë më kutwiilë cyosuku cibulu ci n'situ, sinuni, sinyokë i simbisi, naandi kubëtwiilë.

⁸ Kasi muutu ve wum'podi kusitikë ndakë: yaawu cinamë cibi i yaawu yikalilë lyabu-lyabu, yi waalë myangelë lufwa.

⁹ Mu yaawu tun'dumisyaangë Nzaambi Tatiitu, kasi yivaandi mu yaawu tun'sifilaangë baatu banë Nzaambi kufikulë mu cifwaani cyaandi.

¹⁰ Mëbuungu mu kudumisi Nzaambi, kaambofo mu lusifu mëm'basikaangë mu munu wo wumweekë. A baanë baami bë nguli, lisye fwaanë ko kubeelë boobo.

¹¹ Nto-masi ve yinë yim'baasyaangë masi mëboti i masi më nkali.

¹² A baanë yaami bë nguli, fëkeeli ko yivaandi n'ti n'ngengë wunë wum'podi kuvaanë biseseci, kaambofo n'ti viinyi kupodi ve kubutë mëngengë. Nto-masi më nkali kupodi ve kubaasi masi mëboti.

Bungelë bufuminë ku yilu

¹³ Ningë fë meeyiinu luke yi muutu wuke yi bungelë i mëlyeelë? Naandi we mëleesi mu ndyatulwaandi, mu mëvaangë yimunë bubonzulu i bungelë.

¹⁴ Kasi ningë n'timaaku wuwaalë likwaafi li nduli i ciluunzi ci bumpalë, leembwaanu kwaandi kuyituunvi ti luke yi bungelë, kupuutë cyelikë.

¹⁵ Bungelë bu mpilë oyo kusë bun'fuminaangë ko ku yilu. Bwaawu bu n'toto kwaandi, bu cimuutu, bu dyaabu yivaandi.

¹⁶ Kasi fanë fëke likwaafi i ciluunzi ci cimpalë, fëke yivaandi n'vuusu i yosuku mpilë libi.

¹⁷ Kasi bungelë bu yilu bulyoomë ntetë ketë ntetë, bu landëkënë, buke n'sikë, buvuundë, bwalëkisi. Buwaalë cyaali i mëvaangë mëboti. Bwaawu butaandu ve i mëfukë-nyeembo ve.

¹⁸ Banë bën'vaangaangë n'sikë fë katyaasi kwaawu, bën'kunaangë mu n'sikë, mati luziingu lusulëmë.