Zaakë 2 - N’KANGULU WUMOONË

Keelaanu lulë tandësënë

¹ A baanë bë nguli, beeno lun'tulaangë ciminu ciinu mu bumpumu bu Fumwiitu Yeesu Kliistu, beeno lusye fwaanë ko kuzingilë mu kutandësënë fë ntwaalë bayiinu.

² Monaanu lyaliili, libakëlë limweekë li cisinë livwaatë neelë yi woolë i binkutu bi miinji, wakotë ku cizutunu ciinu. Libakëlë li ciyeembi liba yi n'vwaatu wukaambu nteendu wuyikotë yivaandi.

³ Beeno luleesi luciinzu ke muutu wuvwaatë binkutu bi miinji i beeno lukun'kaambë: « Mweeni yisungëmë kwaaku afa, fë ciikë ci bunaangë. » Kasi beeno lun'kaambë ciyeembi : « A njeeyi, ba wutelëmë, kaambofo kalë afa, fë n'toto, fë maalu maami. »

⁴ Ningë boobo likelili, beeno luke mu kuyitaandë benuveekë i beeno luke mu kuyifundisi mu simbalulu siinu simbi.

⁵ A baanë baami bë nguli, yuwaano : Nzaambi wusoolë biyeembi fë moongo butoto bwiinji bëbakë businë bu ciminu i bëtambulë Lwaangu lunë kukanyi ke banë bën'zolisi.

⁶ Kasi beeno, lun'fwiisyaangë sonyi biyeembi! Lucinzikaangë banë bëke yi businë i baawu bëluvangisi simpasi i kulunatë ke sinzoonzi, baawu kwee, bisinë beenë?

⁷ Baawu bën'safulë lizinë liboti bëluveeni.

⁸ Cyelikë libuuku li Nzaambi lin'tubë : « Zolë mwaanë yaaku nguli bo buke njeveekë. » Lwaawu lutumu lu Lwaangu lu Nzaambi. Mooti lyaawu lun'salilaangë, beeno lun'vaangë lyaambu liboti.

⁹ Kasi ningë lun'vangaangë butaandu, Lun'vaangë lisumu i n'kaakë wulufundisi cibilë beeno lusë kun'yuwulwaangë ko.

¹⁰ Ningë muutu wun'cinzikë n'kaakë wooso wu Nzaambi wun'sumukë mu n'kaakë wumweekë, naandi wun'seembu mu wakë wooso.

¹¹ Licyelikë, wunë wutubë : « Keelaanu kuvaalë », wutubë yivaandi : « Keelaanu kuvoondë. » Boobo, ningë njeeyi sye vaangë cinduumbë ko, kasi bëvoondë, njeeyi wum'maangë kuwulu Nzaambi.

¹² Mu lyaawu, beeno lube fwaanë kutubë i kusalilë dedë mweekë baatu bën'fundisi mu n'kaakë wun'vaanë lusyalulu.

¹³ Licyelikë, bunë Nzaambi kun'fundisi baatu, naandi kusë m'monë cyaali ko mu banë bën'kaambu kubakaangë bayaawu cyaali. Kasi wunë wum'bakaangë bayaandi cyaali, naandi wusyeeli yi boomë ko mu lufundusu.

Ciminu i mëvaangë

¹⁴ A baanë bë nguli, mbici bivyokilili mu muutu mu kutubë : « Miinu yike ciminu », ningë naandi wusë yileesi ko mu mëvaangë maandi? Ciminu ocyo podi kun'vuuci?

¹⁵ Mooti mwaniinu nguli wu libakëlë kaambofo wu n'cyeetu, wukeeli ko yi cyosuku ci kuvwaatë, kaambofo ci kulya mu kadë cilumbu.

¹⁶ Lyaawu n'ciinzë mbici mu beeno mu kubëkaambë : « Yendaanu mu n'sikë, lwe kalyaanu buboti, vwaataanu binkutu bi cyoosi i lyaanu mo luyukutu! » Ningë beeno lusye bëvaanë ko binë bifwenikini mu kuzingilë mu nyitwaawu?

¹⁷ Dedë mweekë ciminu cikaambusu mëvaangë, cyaawu cifwa.

¹⁸ Muutu kupodi kutubë : « Ke bëmesë bëke yi ciminu, bën'ka mëvaangë. » Oboobo miinu yikun'vutulilë : « Ndeesi buni ciminu cyaaku cim'podi kubeelë kukaambu mëvaangë! Kasi mu miinu yikuleesi ciminu cyaami mu mëvaangë maami. »

¹⁹ Njeeyi wata maanë ti ke Nzaambi mweeke? Liboti beenë. Biluunzi bibi bëlizabisi yivaandi i byaawu bin'tekëtaangë mu boomë.

²⁰ Njeeyi ciyimbu wukeeli! Wun'toombë kubakulë ti ciminu cikaambu mëvaangë cike kwaandi vwiili too?

²¹ Kwisilë buni Nzaambi mu kuteelë Abalaamë, nkaakiitu muutu wusulëmë? Mati cibilë ci mëvaangë maandi, naandi wukwindulë mwanaandi Isaakë fë civakululu.

²² Njeeyi wulë mu kumonë, ciminu cyaandi i mëvaangë maandi mëlësalilaangë fë cimweekë : ciminu cyaandi cim'monikë ci cyelikë mu mëvaangë maandi.

²³ Bwaawu, buvangëninë linë lin'tubë Libuuku : « Abalaamë wusë ba civuufu mu Nzaambi i Nzaambi wusë monë ti naandi wusulëmë mu cibilë ci ciminu cyaandi. » Nzaambi wusë kun'teelë ndikwaandi.

²⁴ Lwe monaanu, muutu wunë Nzaambi wutubë ti naandi wusulëmë mu cibilë ci mëvaangë maandi i yaaku ti mu ciminu kwaandi vwiili.

²⁵ Bo bumweekë mu n'cyeetu nduumbë bën'teelë Laabë. Naandi wusë zabukunu wusulëmë ke Nzaambi mu cibilë ci mëvaangë maandi. Cibilë naandi wuyakë bipayi bi Islayeelë i wusë bëbiikë mu kweendë mu nzilë yin'ka.

²⁶ Licyelikë, nyitu yikaambu n'vumuku luziingu yifwa, bo bumweekë ciminu cikaambu mëvaangë cifwa.