Zaakë 1 - N’KANGULU WUMOONË

Sibweekë

¹ Zaakë, ciseelu ci Nzaambi i ci Yeesu Kliistu. Miinu yafilë sibweekë syaami ke nkoongë yooso yi likaandë li Nzaambi yinyambë bwendi buloongo n'viipë.

Ciminu i bungelë

² A baanë bë nguli, lwe monyaanu sinyeenzi ningë lube bwaanu mu syosuku simpekaadu.

³ Cibilë beeno luzabisi, ningë ciminu ciinu ciciindë mu yosuku mpekaadu, cyaawu ciluvaanë lutatumunu.

⁴ Kasi zungululaanu, bwiinji lutatumunu lwiinu lumonikë buboti, lukaambu lyaambu libi i cyosuku kulukaambu ve.

⁵ Ningë ti, muutu fë meeyiinu bëkaambu bungelë, naandi we buloombi ke Nzaambi, naandi wukun'vaanë bwaawu. Cibilë ti Nzaambi wun'vanaangë mu n'timë wumboti i mëseembu ve.

⁶ Kasi naandi wufwenikini kuloombë mu ciminu cikaambu mëketëkini. Cibilë wunë wun'ketëkënaangë fwiifu liyo li m'bu, linë mpeemu wun'nangunë i wun'vekumunë lweeku alu kaambofo lweeku lun'ka.

⁷ Muutu wu mpilë oyo, kupodi ve kuta lyaanë mu kubakë cyosuku ciimë ke Fumu,

⁸ cibilë naandi cifiindë-mpakë i simbalulu sivyakënë mu makë mooso kun'vaangë.

Buyeembi i businë

⁹ Biikë mwaanë nguli ciyeembi kusangilë mu linë Nzaambi wukun'zanjikë

¹⁰ i mwaanë nguli cisinë Nzaambi wukun'kululë. Licyelikë, cisinë wun'vyookë buke citeekë ci n'situ.

¹¹ Muunyi wun'sëlukë, libabëlë lyaandi lin'kumisi n'ti. Citeekë cyaandi cim'bwa i kunyeefu kwaandi kumanë. Bo bumweekë, cisinë wun'zimbilë fë meeyi bisalu byaandi.

Simpekaadu i tuseengu

¹² Nyeenzi ke muutu wun'ciindë mu mpekaadu, cibilë fë mbusë kuciindë mu mpekaadu. Naandi wum'bakë ntaatë nduunji, luziingu lu sakë yi sakë lunë Nzaambi kukanyi ke banë kuzolisi.

¹³ Ningë wun'viipë bëseengu, keelë kulë tubë : « Mati Nzaambi na wakun'seengë. » Cibilë Nzaambi kupodi ve kuseengë mu kuvaangë libi i naandi kupodi ve kuseengë muutu.

¹⁴ Licyelikë, wosuku muutu wum'bwangaangë mu luseengu ningë bideenzë byaandi bibi byan'vwaatë.

¹⁵ Mu boobo, cyosuku cideenzë cibi cim'butaangë lisumu i mooti lisumu lyeekë nengë-nengë, lyaawu lin'vanaangë lufwa.

¹⁶ Keelaanu lulë putësënaanu, a baanë yaamë bë nguli.

¹⁷ Lyosuku likabu liboti i ndobu yi m'boti bin'fuminaangë lu yilu. Byaawu bin'fuminaangë ke Nzaambi, N'vaanji bicyenisi bi yilu. Nzaambi wusë n'vilukë ko, ke naandi mëbalukulu më ntaangu mëkeeli ko.

¹⁸ Naveekë wuzolë kutuvaanë luziingu mu Libuungu lyaandi, like cyelikë, bwiinji beeso tuba mu n'taandë wun'tetë mu bivaangu byaandi byakë byooso.

Kuwu i kusalilë

¹⁹ A baanë baami bë nguli, tebukaanu moonyi mu amaama : wosuku wufwenikini kuzumbululë mu kuwu, kasi kulekë buboti, ntiinu ve mu kutubë i mu kudasukë.

²⁰ Cibilë muutu wuke likaanzi kusë n'vaangë lyaambu liboti ko fë nduunzi yi Nzaambi.

²¹ Mati mu lyaawu, bumaanu makë mooso mën'vangisi kusafukë i makë mooso më tuvangisi kuba bubaalu. Lwe taambulyaanu yi bubonzulu libuungu linë Nzaambi wakunë mu n'timiinu, cibilë lyaawu like yi lutumu mu kuluvuuci.

²² Keelaanu lulëvaangë mëfukë-nyeembo mu kuwu Libuungu li Nzaambi. Salilaanu lyaawu mu cyelikë.

²³ Cibilë wunë wun'kuwu Libuungu li Nzaambi i wun'kaambu kulisalilë, wuke dedë mweekë muutu wuyibiilë mu lumweeno i wum'monë buni ciinyi cyaandi cikelili.

²⁴ Bunë kuyibiilë, naandi kweendë i kusundilë kuzimbëkënë buni kukelili.

²⁵ Kasi wunë wum'biilë buboti n'kaakë wusulëmë, wunë wutuvaanë lusyalulu i wun'kangëmë mu cyelikë. Naandi kusë n'laandë tokë mu kuwu ko mu kuwuzimbëkënë, kasi wun'salilë waawu. Cyelikë, naandyoowo wum'ba mu nyeenzi mu makë mooso kun'salilë.

²⁶ Ningë muutu wum'balë ti naandi citamaanë ti cyelikë i wun'kaambu kuzisi ndakaandi, naandyoowo wu yi puutu naveekë : ntekwaandi kusambilë yikeeli kwaandi vwiili.

²⁷ Tala, libuundu lilyoomë i licyelikë linë Nzaambi Taatë kun'tisyaangë : kuzudi baanë bësyaanë i bëfwiili, mu simpasi syaawu, yiveko kukebë kusafukë mu makë mooso mëke mu buloongo.