Za 9 - N’KANGULU WUMOONË

Yeesu wubelusi mpofo

¹ Mu nzilë sikwendë, Yeesu wumonë muutu wubutukë mpofo.

² Bilaanzi byaandi bisë n'yufulë : « A Fumu, cibilë-mbici muutu awu wubutukë mpofo: cibilë ci lisumu lyaandi voo mu mësumu më tataandi i mamaandi? »

³ Yeesu wusë vutulë : « Yaaku ti mu cibilë ci mësumu maandi kaambofo mu mësumu më tataandi i mamaandi. Naandi wubutu mpofo bwiinji mëvaangë më Nzaambi mëmonikë mu naandi.

⁴ Abu bwiisi bucili bucya, beeso tufwenikini kusalë bisalu bi wunë wukun'filë. Bwiisi bwa kun'kwiilë, muutu ve wum'podi kube salë.

⁵ Abu yicili mu buloongo, miinu cyeseesë ci buloongo. »

⁶ Fo kwe maani kutubilë obo, Yeesu kutamë matë fë n'toto, kuvaangë ngabu mu matë maandi. Naandi wusilë ngabu mu meeso më mpofo,

⁷ i wusë n'kaambë : « Yeendë we sukuli ciinyi cyaaku ku cizibë ci Silowe. » – Lizinë be lyooli lin'tubë ti « Wufilu ». – Mpofo wuyendë mu kusukulë busu i bunë naandi kuvutukë, wusë moonë.

⁸ Sindiku syaandi i bakë booso banë bëlëm'monaangë kuloombë simboongo, bëtubë : « Muutu awu, naandi kwe wulëkalaangë fë n'toto mu kuloombë simboongwe? »

⁹ Bën'ka bëlëtubaangë : « Na woowo. » Bëmesë : « Moniko, naandi kuve, kasi naandi be fwanëkënë yaandi. » Naveekë wusë tubë : « Mi wuuwu. »

¹⁰ Baawu bisë n'yufulë : « Njeeyi buni wasiilë mu kumonë? »

¹¹ Naandi wusë vutulë : « Muutu bën'telaangë Yeesu wavaangë mwa ngabu, wakun'silë mu meeso i wakun'kaambë yasukulë meeso mu cizibë ci Silowe. Miinu yakwendë, yasukulë i meeso mazibukë! »

¹² Baawu bisë n'yufulë : « Muutu be woowo kuni kukeeli? » Naandi wusë vutulë : « Miinu yisye zaabë kuve. »

Sifalisyaanu bëyufulë mpofo yo bëbelusi

¹³ Bisë natë muutu wabë mpofo ke Sifalisyaanu.

¹⁴ Kosuku, Yeesu wuvaangë ngabu i wun'zibulë meeso cilumbu ci saba.

¹⁵ Mati mu bwaawu Sifalisyaanu yivaandi bisë kufulë muutu be woowo manë mëvyookë naandi mu kube monë buyifanwabu. Naandi wusë bëkaambë : « Naandi wakun'silë ngabu mu meeso i miinu yasukulë busu, buyifanwabu yamonë. »

¹⁶ Ndaambu Sifalisyaanu bëlëtubaangë : « Wunë wasiilë boobo kupodi ve kufuminë ke Nzaambi, cibilë naandi wusë n'cinzikë ko n'kaakë wu saba. » Kasi Sifalisyaanu sin'ka bëlëtubaangë : « Lya kubeelë buni n'sumuci mu kuvaangë bimakë bi mpilë oyo? » Baawu bisë kabukë baveekë yi baveekë.

¹⁷ Sifalisyaanu bisë kufulooso mpofo bëbelusi : « Njeeyi mbici wun'tubë mu muutu wunë wakuzibulë meeso. » Naandi wusë vutulë : « Mati m'bici. »

¹⁸ Mu kumonë, sifumu si Sizwiifë bësye zolaangë kuve kuta maanë ti muutu be woowo wubutu mpofo i buyifanwabu naandi wake m'monë. Mati bwaawu bëtelë tataandi i mamaandi.

¹⁹ Baawu bëyufulë tataandi i mamaandi : « Cibeeni na wuuwu mwaniinu? Cibeeni ti naandi wubutukë mpofo? Buni naandi kwasiilë mu kumonë buyifanwabu? »

²⁰ Tataandi i mamaandi bëvutulë : « Cibeeni beeso tube zaabë ti naandi mwaniitu i naandi wubutukë mpofo.

²¹ Kasi beeso tusye zaabë ko buni lyakwisilë naandi mu kumonë buyifanwabu i beeso tusye zaabë yivaandi ko nani wan'zibulë meeso. N'yufulyaanu, naveekë ke yi mpuungë mu kulucikuninë! »

²² Baawu bëtubilë obo cibilë babë yi boomë mu bëkuluutu bë Sizwiifë. Licyelikë, bawaaba bëyuwusënë mu kukulë mu cizutununu wosuku muutu wun'siinji ti Yeesu na Kliistu.

²³ Mu lyalyooli lyaawu, tataandi i mamaandi bëtubilë: « Naandi weekë yi mpuungë, n'yufulyaanu! »

²⁴ Sifalisyaanu bëtelë mu vyaasi yimwaali muutu wabë mpofo i baawu bën'kaambë : « Tubë cyelikë fë nduunzi Nzaambi, kasi beeso tube zaabë ti muutu wakuvuuci n'sumuci. »

²⁵ Naandi wusë vutulë : « Miinu yisye zaabë kuve ningë naandi n'sumuci, kasi limweekë yizabisi, miinu yabë mpofo i buyifanwabu yake m'monë. »

²⁶ Baawu bisë n'yufulooso : « Naandi mbici kwa kusya? Buni kwasiilë mu kukuzibulë meeso? »

²⁷ Naandi wusë vutulë : « Miinu yalukaambë maawu, kasi beeno lusye kun'cikuninë kuve. Cibilë-mbici lun'toombë kube kuwu maawu? Benuviinu lun'toombë kuba bilaanzi byaandi? »

²⁸ Baawu bisë n'fiingë: « Njeeyi, nje cilaanzi cyaandi, beeso bilaanzi bi Moyiizë!

²⁹ Beeso tuzabisi ti Nzaambi wutubënë yi Moyiizë, kasi naandi tusye zaabë ko kuni kufuminë! »

³⁰ Muutu be woowo wuvutulë : « Lyaawu ali lyaambu litudë: Beeno lusye zaabë ko kuni kwafuminë! Akasi naandi wakun'zibulë meeso!

³¹ Tuzabisi ti Nzaambi kusë n'kuwulwaangë ko misumuci, kasi naandi wun'kuwulwaangë wosuku wun'cinzikaangë i wum'bakaangë sisu mu n'vwiilwaandi.

³² Tubuunu vyaasi kuwu ti muutu wubutukë mpofo ban'zibulë meeso.

³³ Ningë muutu be woowo sye fuminë ke Nzaambi ko, naandi kupodi ve kuvaangë bimaaku. »

³⁴ Baawu bisë n'vutulilë : « Njeeyi wuke mu kati ku lisumu kutoonë lubutulu lwaaku i njeeyi wun'toombë kutuvaanë ndoonji! » Baawu bën'kulë mu cizutununu.

Bumpofo bu cimpeefë

³⁵ Yeesu wayuwu ti Sifalisyaanu bëkulë muutu be woowo, naandi wusë kun'dyengënë i wun'yufulë : « Njeeyi wata lyaanë mu Mwaanë muutu? » —

³⁶ Naandi wuvutulë : « A Fumu, n'kaambi nani kukeeli bwiinji miinu yita maanë mu naandi. »

³⁷ Yeesu wusë n'kaambë : « Njeeyi wulë mu kum'monë, naandyaawu wulë mu kutubënë yaaku. »

³⁸ Mu lyalyooli, naandi wusë vutulë : « A Fumu, miinu yata lyaanë. » Wusë fukëmë fë ntwaalë Yeesu.

³⁹ Yeesu wusë tubë : « Miinu yiyisë mu buloongo bwiinji lufundusu luvangunu: bëfwa meeso bëmonë i bo bëlë mu kumonë, bëfwa meeso. »

⁴⁰ Mwa m'pooku Sifalisyaanu syabë faawu bëyuwu manë mëtubë Yeesu, baawu bëyufulë : « Beeso yiviitu simpofo tukeelye? »

⁴¹ Yeesu wuvutulë : « Beeno ningë lwabë simpofo, nkanë beeno lusye seembu kuve, kasi abu lulë mu kutubë ti : “Lum'monaangë”, beeno lun'kalilë mu mëseembu. »