Za 8 - N’KANGULU WUMOONË

¹ Yeesu wuyendë ku moongo miti Oliivë.

² Cilumbu cilandëkënë, yimenë-ngwaali, naandi wusë vutukënë ku n'zo-Nzaambi, i baatu bakë booso bisë belëmë fëke naandi. Naandi wukalë fësi i wusë ba mu kubëloongë.

³ Miloonji n'kaakë i Sifalisyaanu bën'twalilë n'cyeetu bëbwiilë wulëvalaangë yimunë libakëlë. Baawu bën'tuulë fë meeyi baatu,

⁴ baawu bëkaambë Yeesu : « A N'loonji, beeso twasiimbë n'cyeetu awu fanë kulëvalilë.

⁵ Moyiizë wutuvaanë n'swa mu n'kaakë mu kuvoondë bëcyeetu be mpilë oyo mu mëmanyi, kasi njeeyi mbi wun'tubë? »

⁶ Baawu bëtubilë boobo mu kun'seengë i mu kum'bakë libooti li kun'fundisi. Kasi Yeesu wusondëmë i wusë sonikë mu luzalë fë n'toto.

⁷ Abu baawu bëlën'kacikaangë kutubë, Yeesu wukuvumbulë ntalu i wusë tubë : « Mooti fë meeyi yiinu fëkeeli muutu wubuunu vyaasi kuvaangë lisumu, naandi kwe deelë n'tetë kun'laakë limanyi. »

⁸ Naandi kubësondëmooso i wusë be sonikë fë n'toto.

⁹ Bunë bayuwu mamoomo, wumweekë-wumweekë ke volikaangë, ntetë bëkuluutu, Yeesu wusyaalë naveekë yimunë n'cyeetu wabë fë ntwaalaandi.

¹⁰ Yeesu wuvumbulë ntalu i wusë n'kufulë : « Baawu kuni bakwendë? Muutu ve wakutabe? »

¹¹ N'cyeetu wun'vutulë : « Muutu ve, a Fumu », keti Yeesu wun'kaambë : « Miinu yisë kutabë ko, yeendë kwaaku, yabili, vyaasi yin'ka kube sumukë ve. »

Yeesu cyeseesë ci buloongo

¹² Yeesu wusë be bëkaambë : « Miinu cyeseesë ci buloongo. Wosuku muutu wukun'daandë, naandi wum'bakë cyeseesë ci luziingu i kusë be lyatooso ko ku citoombi. »

¹³ Sifalisyaanu bisë n'kaambë : « Njeeyi wulë mu kuyitubilë cimbaanji. Cimbaanji cyaaku cikeeli ko cicyelikë. »

¹⁴ Yeesu wusë bëvutulilë : « Keti miinu yilë tubë cimbaanji mu miveekë, cimbaanji cyaami cicyelikë, cibilë miinu yibe zaabë kuni yifuminë i kuni yilë mu kweendë.

¹⁵ Beeno lun'fuundisyaangë mu cimuutu, kasi miinu yisë n'fundisi muutu kuve.

¹⁶ Miinu buni yin'fundisi, lufundusu lwaami lucyelikë, cibilë yikeeli miveekë kuve, kasi Taatë wo wukun'filë ke yaami.

¹⁷ Bësonikë mu n'kaakiinu ti ningë baatu bwaali bën'vaanë cimbaanji cyo cimweekë, cimbaanji cyaawu cicyelikë.

¹⁸ Miinu yilë mu kuvaanë cimbaanji mu miveekë, i Taatë wo wukun'filë ke mu kun'tubilë yivaandi cimbaanji. »

¹⁹ Kasi Sifalisyaanu bën'yufulë : « Kuni kuke Tataakwe? » Yeesu wusë vutulë : « Beeno lusye kun'zaabë ko, miinu i Tataami. Ningë lube kun'zaabë, lun'zaabë yivaandi Tataami. »

²⁰ Yeesu wutubë mëbuungu be moomo, fanë kululongilaangë mu n'zo-Nzaambi, fanë fabë bikonunu bi mboongo. Muutu ve wun'kaangë, cibilë ntaangwaandi yabë yibuunu kufwaanë.

« Beeno kupodi ve kweendë ko yin'kwendë. »

²¹ Yeesu wusë be bëkaambë : « Miinu yakun'kwendë, beeno lukun'toombë, kasi lun'fwa mu mësumu miinu. Beeno kupodi ve kweendë ko yin'kwendë. »

²² Abu bëyuwu mamoomë, Sizwiifë bëlëkufusënaangë : « Naandi syawuyivoondë, cibilë naandi watubë ti : “Beeno kupodi ve kweendë ko yin'kwendë”? »

²³ Yeesu wusë bëvutulilë : « Beeno baatu bëke fësi, kasi miinu yifuminë ku yilu. Beeno baatu bë buloongo be buubu, kasi miinu yisë muutu bu buloongo be buubu ko.

²⁴ Mu bwaawu, miinu yalukambilë ti beeno lun'fwiilë mu mësumu miinu. Mooti beeno lusye ta lyaanë ti “miinu wuuwu”. »

²⁵ Baawu bën'yufulë : « Njeeyi nani wukeelye? » Yeesu wusë bëvutulilë : « Miinu mati, muutu wo yilukaambë kutatikilë fanë ntonunu.

²⁶ Miinu yike mpaapë maambu mu kulukaambë i mu kulufundisi mu manë mu lutalë. Kasi yilë mu kutendulë mu buloongo manë yisinu ke wo wukun'filë i naandi wun'tubaangë cyelikë. »

²⁷ Sizwiifë bësye bakulë kuve ti Yeesu wulëtubilaangë mu Taatë.

²⁸ Yeesu wusë bëkaambooso : « Bunë lun'zanjikë Mwaanë Muutu faawu lun'zabilë ti “Miinu, mi woowo”. Beeno lun'zaabë ti miinu yisë n'vangaangë lin'viipë ko mu miveekë. Kasi yin'tubaangë manë Taatë wukun'sinë.

²⁹ Wo wukun'filë ke yaami, naandi wusë kum'biikaangë miveekë kuve, cibilë miinu yin'vaangaangë tokë manë naandi kun'tiisi. »

³⁰ Bunë Yeesu kwe tubi mamoomo, mpaapë baatu bëta maanë mu naandi.

Baatu bësyalulu i bëdoongo

³¹ Yeesu wusë kaambë Sizwiifë sinë sita maanë mu naandi: « Ningë beeno lube sulëmë mu mëbuungu maami, cyelikë beeno bilaanzi byaami.

³² Boobo, beeno lun'zaabë cyelikë i cyelikë cilukobulë. »

³³ Baawu bisë n'vutulilë : « Beeso sindaandu si Abalaamë, tubuunu vyaasi kuba bëdoongo. A njeeyi buni wum'podi kutubilë ti “tun'kobukë”? »

³⁴ Yeesu wusë bëvutulilë : « Licyelikë, licyelikë yilukaambë : wosuku muutu wun'sumukë, n'dongo lisumu kukeeli.

³⁵ N'dongo wukeeli wun'viipë fë likaandë ko, kasi mwaanë na wun'kalilë ci mëkulu fë likaandë lyaandi.

³⁶ Mooti Mwaanë be lukobulë, beeno cyelikë lun'kobukë.

³⁷ Miinu yizabisi ti beeno sindaandu si Abalaamë. Kasi beeno lun'toombë kum'poondë, cibilë lulë mu kumaangë mëbuungu maami.

³⁸ Miinu, yilë mu kulukaambë maambu mo yimonë ke Tataami, kasi beeno lulë mu kuvaangë manë tatiinu wulukaambë. »

³⁹ Baawu bisë n'vutulilë : « Tatiitu mati, Abalaamë. » Yeesu wusë bëtubooso : « Cyelikë, ningë beeno sindaandu si Abalaamë, nkanë lulë mu kuvaangë bunë naandi kulëvangilaangë.

⁴⁰ Miinu yilukaambë cyelikë cyo Nzaambi wukun'kaambë, kasi beeno lun'toombë kum'poondë. Abalaamë sye siilë boobo ko.

⁴¹ Beeno lulë mu kuvaangë dedë mweekë tatiinu. » Kasi Sizwiifë bisë vutulilë : « Beeso tukeeli ko baanë bë ndaayi, kasi beeso Tatiitu wumweekë vwiili, Nzaambi. »

⁴² Yeesu wusë bëkaambë : « Licyelikë, mooti Nzaambi wabë Tatiinu, nkanë beeno lukun'zolë, cibilë miinu yifuminë kuke Nzaambi i miinu yike afa mu cibilë cyaandi. Miinu yisye kwisilë mu miveekë ko, kasi naandi na wukun'filë.

⁴³ Mu mbici lun'kaambu kuwulu manë yilë mu kulukaambë? Cibilë beeno lukeeli ko yi likanë li kuwulu mëbuungu maami.

⁴⁴ Beeno mati tatiinu dyaabu i lun'toombë kuvaangë manë tatiinu kuzolisi. Naandi wabë n'voondi baatu fanë ntonunu. Naandi wusye zingilë ko mu bucyelikë, cibilë mu naandi cyelikë voo. Naandi wukeeli yi cyelikë ko, mungë lupuutu i taatë lupuutu.

⁴⁵ Kasi miinu yin'tubaangë cyelikë bwaawu beeno lun'kaambu kun'teelë lyaanë.

⁴⁶ Nani mu beeno wum'podi kutubë ti miinu yasumukë? I mooti miinu yin'tubë cyelikë, buni beeno lun'kaambu kun'teelë lyaanë?

⁴⁷ Muutu Nzaambi wun'kuwaangë mëbuungu më Nzaambi. Kasi beeno lusë baanë bë Nzaambi ko, bwaawu lun'kaambu kun'yuwulwaangë. »

Yeesu i Abalaamë

⁴⁸ Sizwiifë bisë vutulilë Yeesu : « Beeso tusye tubë cyelikë kwe faanë tutubilë ti njeeyi musë Samali i njeeyi wuvwaatu ke ciluunzi cibi? »

⁴⁹ Yeesu wusë bëvutulilë : « Miinu yisye vwaatu ko ke ciluunzi cibi. Kasi yilë mu kutuunvi Tataami i beeno lulë mu kumaangë kun'tuunvi.

⁵⁰ Miinu yisë n'toombë bumpumu bwaami miveekë ko, ke wun'viipë wutoombë bwaawu mu miinu i wun'fundisi.

⁵¹ Licyelikë, licyelikë yilukaambë : muutu wo wun'cinzikë mëbuungu maami, naandi kusë n'fwa ko. »

⁵² Mu lyaawu, Sizwiifë bisë tubë ti : « Beeso twazaabë vandi cyelikë, ti njeeyi wuvwaatu ke ciluunzi cibi! Abalaamë wufwa, mibici yivaandi bëfwa. Njeeyi wulë mu kutubë ti : “Wunë wun'vitikë mëbuungu maami wusë n'fwa ko.”

⁵³ Tatiitu Abalaamë wufwa, wum'balë ti njeeyi mwiinji bunenë yi naandi? Mibici yivaandi bëfwa. Njeeyi mbici wun'toombë kuleesi? »

⁵⁴ Yeesu wusë vutulë : « Mooti miinu yin'toombë kuyituunvi, bumpumu bwaami bukeeli yi nkaali ko. Wunë wukun'tuunvi, mati Tataami. Beeno lun'tubë mu cibilë cyaandi : “Naandi na Nzaambiitu.”

⁵⁵ Beeno lusye n'zaabë ko, kasi yin'zabisi. Ningë miinu yibe tubë ti yisye n'zaabë ko, yim'ba cibutë-maambu buke beeno. Kasi miinu yin'zabisi i yin'cinzikaangë mëbuungu maandi.

⁵⁶ Abalaamë tatiinu wabë mu nyeenzi, cibilë wulëciingaangë lwisulu lwaami, wumonë lwaawu i wusë ba mu liyaanji. »

⁵⁷ Sizwiifë bisë n'kaambë : « Njeeyi wubuunu kudukusi mëkumë-taanu më n'vu i wulë mu kutubë ti wumonë Abalaamë! »

⁵⁸ Yeesu wusë bëvutulilë : « Licyelikë, licyelikë yilukaambë : ntetë Abalaamë kubutu, “miinu yabë”. »

⁵⁹ Mu lyaawu olyo, baawu bisë noongë mëmanyi mu kun'laakë, kasi Yeesu wuswaamë i naandi wusë basikë mu n'zo-Nzaambi.